De C.L. psalmen des conincklijcken propheten Davids
(1625)–Anoniem De C.L. psalmen des conincklijcken propheten Davids–
Auteursrechtvrij
[Folio Cxj.r]
| |
Op de Voys: O HEERE GOdt dijn God'lijck Woort.1. VVIe int Beschut des Hoochsten is,
Hem onder GOdt is gheven:
Die seydt: Ghy HEer mijn Toevlucht bist,
Mijn Godt, mijn Hoop end' Leven.
Van Stricken vry des Duyvels ghy,
End' van die Pest seer schadich,
Sult helpen, end' Verlossen my
O HEEre GOdt ghenadich.
2. Met syne Vleughels deckt hy u,
Op hem sult ghy Vertrouwen,
Gheweldichlijck beschut syn Trouw,
Dat dy by Nacht gheen Grouwen,
Noch droeff Gelaeg' verschricken mach
Want hy syn Woort doet lichten,
Geen pijl, oock (die vliecht door den dach)
Dy schade sal aenrichten.
3. Gheen Peste dy beschaden can
Die in het duyster sluypet,
Geen Sieckt noch kranckheyt rueren aen
Die s'middaechs omme cruypet,
Al storver duysent aen dyn Zijd',
Thien duysent noch daer Neffen,
Aen uwe Rechterhant subijt,
So salt doch dy niet treffen.
4. Ghy sult dijn Lust end' vrolickheyt
| |
[Folio Cxj.v]
| |
Met uwen Ooghen schouwen,
Aen der Godloosen herten leydt,
Wanneer haer wert vergouwen.
Dijn Toeversicht dat is de HEER,
Die Hoochst' (daer ghy op bouwet)
Die is dijn Toevlucht ymmermeer,
Om dat ghy hem betrouwet.
5. Gheen quaet sal weder varen dy,
Gheen Plaech dijns Huys sal rueren
Want synen Enghelen heeft hy
Bevolen dy te Vueren,
En te behoeden, dat sy Trouw
Dy op haer handen draghen,
Dat gheen Steen dyn Voet quetsen sou,
Al nae syn welbehaghen.
6. Op Leeuwen, Adren sult ghy gaen,
En treden op de Draecken,
Op Jonghe Leeuwen sult ghy staen,
Haer Felheyt t'schanden maecken,
Want gheen Dier dy beschaden kan,
Dewijl ghy aen hem houwet,
Gheen sieckte sal hem comen aen
Die vast op Godt betrouwet.
7. Midts hy my eert van herten gront
End' hoopt op myne goede,
(Seyt Godt) Daerom ik t'alder stont
Hem help end' wel Behoede.
Ick wil altijdt syn Hulper zijn,
Dies dat hy mynen Naem,
| |
[Folio Cxij.r]
| |
(Daer in hy hem sal Troosten fijn)
Recht kendt so dat Betame.
8. Als synen Godt Aenroept hy my,
Dies wil ick hem Verhooren,
In aller Noot stae ick hem by,
Mijn Hulp sal hy Orbooren,
Tot Eeren ick hem brenghen wil,
En Rijckelijck beloonen,
Met een gherust lang' Leven stil,
Mijn Heyl wil ick hem Thoonen.
|
|