De C.L. psalmen des conincklijcken propheten Davids

Psalm L. Deus deorum loc.

Op de Voys: Als hier nae volghet.

DE HEEr hem machtich hooren laet
En roept de Werelt heele,
So wijt die Sonn' int Oosten gaet,
Romdtom ten Westen deele.

[fol.  Lviij.r]

 

 

Wt Zyon coemt sijn schoone Glants

 

Ons' Godt en wil niet swijghen,

 

Verteerend' Vier dat is sijn Schants,

 

Met Onweer gaet hy Krijgen.

 

 

 

2. Hemel end' Aerd' Ghetuygen sijn,

 

Dat hy sijn volck wil Richten,

 

Van sonden en des Doodes Pijn

 

All' onval wil hy slichten,

 

Vergadert my mijn Vroom ghemeen,

 

Die mijn Verbondt meer achten

 

Dan alle Offerhand' met een,

 

Voor eyghen Werck haer wachten.

 

 

 

3. De HEmel, sijn Gherechticheyt,

 

Verconden end' hem Eeren,

 

Hoort mijn Volc mijn Waerachticheyt,

 

Israel laet dy Leeren,

 

Om dijn Offer ist niet te doen,

 

Voor my syn alle Daghen

 

Dijn Offer en dijn Reuckwerck schoon

[fol.  Lviij.v]

 

Maer niet sy my behaghen.

 

 

 

4. Ick neem geen Vee wt dijnen Stal,

 

Want all' Ghediert' op Aerde,

 

Daer toe t'Ghevogelt over al

 

Is mijn met all' syn Waerde.

 

Geen Beeste bloet, noch Vleesch so goet

 

Is in des Werelts Ronde,

 

Bequaem te Coelen mijnen Moet,

 

Als my App'tijdt bestonde.

 

 

 

5. Den Hoochsten dijn Geloffte goet,

 

Betael, End' my Aenroepe,

 

So sult ghy mijne hulpe vroet

 

Gaen prysen nae dijn Hope

 

Maer totten Boosen seydt de HEER,

 

Wat voert ghy huychels wijse?

 

In dijnen Mont mijn goede Leer?

 

Tot Spot, end' niet ten Prijse.

 

 

 

6. Siet ghy een Dieff, ghy loopt met hem

 

Gaet mee nae vreemde Wijven,

 

Vol Boosheyt is dijns Mondes' stem,

 

Dijn Tongh' gaet Valscheyt drijven,

 

Dijns Moeders Soon aendoet ghy hoon

 

Als ick dijn Boet' verwachte,

 

So meynt ghy Dwaes, het is al schoon

 

Als offt ickt niet en achte.

 

 

 

7. Maer ick sal straffen dy wel hart,

 

End' openbaer beschamen,

 

Aenmerckt doch sulcx al sonder schert,

 

Ghy Spotters al te samen,

[fol.  Lix.r]

 

Op dat doch gheen Eewich Verdriet

 

V moet ten laetsten Vaten,

 

Want als ick Ruck int Ongheluck,

 

Dan mach gheen Hulpe baten.

 

 

 

8. Wie Dancken can die Offert Recht,

 

Dat neem ick aen ten Prijse,

 

Daerom so leert dit Offer Recht,

 

Het is de beste Wijse,

 

Daer is bereyt die Salicheyt,

 

Dees' Wech mach niet Faelgeeren,

 

Des HEEren Woort is goet bescheyt,

 

Daer in laet ons Studeeren.