De C.L. psalmen des conincklijcken propheten Davids
(1625)–Anoniem De C.L. psalmen des conincklijcken propheten Davids–
AuteursrechtvrijOp de Voys: O Heere Godt beg'nade my: Als hier na volcht. O HEEre GOdt beg'nade my,
Nae dijn Goetheydt ontfermt doch dy,
Wt doet mijn Overtreden,
Nae dijn Barmhertichede,
End' wascht my wel O Heere Godt
Van alle mijne Missedaet,
End' maeckt my Reyn van Sonde,
| |
[Folio Lix.v]
| |
 Die ick in my bevinde.
End' mijne Sond' is steedts voor my,
Ick hebb' alleen ghesondicht dy,
Voor dy hebb' ick qualijck ghedaen,
In dijnen Woord' sult ghy bestaen,
Als men dijn Reden Richtet.
2. Want sondich (siet) ben ick van aert
Als my myn Moeder heeft ghebaert,
In sonden my ontfanghen,
Veel sond' heb ick beganghen.
Maer ghy hebt lief (Heer) die waerheet
End' leeret my oock dat ick weet,
Dijn Raet al teghen t'sorghen,
| |
[Folio Lx.r]
| |
Die Heym'lijck was verborghen.
Besprengt my (HEEr) met Ysop soo,
Dat ick werd' reyn end' maeckt my vroo
Sneeu wit, laet Vreuchd' ooc hooren my
Dat die Ghebeente worden bly,
Die ghy so hebt gheslagen.
3. Siet niet op mijn Sond'lijcken staet,
Doet wt all' mijne Missedaet,
HEER wilt doch in my schapen
Een Reyn Hert, wil ick Hopen.
Een rechten Geest vernieu't in my,
Verwerp my oock niet heel van dy,
Neemt my niet dijnen Gheeste,
Maer syn Ghenaed' my leeste.
End' laet my comen altijt meer,
Den Troost dijns Heyls, (O Godt mijn Heer,)
Die Vrije Geest behoude my,
De Godloos' wil ick Leeren vry,
Haer Weghen tot dy keeren.
4. Van Bloetschulden doch my bevrijt
Want ghy mijn Godt end' Heylant zijt,
Dat mijn Tongh' stadich kalle,
Dijn G'rechticheyt over alle.
HEER doet my op die Lippen mijn
Mijn Mont dijn Loff verconde fijn,
Tot Offer hebt ghy gheen Luste,
Ick gheve u dat oock suste,
Brandtoffer end' Ander al tsaem,
Behaghen niet meer dan een Waen,
| |
[Folio Lx.v]
| |
Sijn voor dijn Ooghen als een Haet,
Maer d'Offer Gods is (die ons baet)
Een Gheest al heel ghebroken.
3. Een broken end' gheslaghen Hert
Sult ghy niet werpen Achter wert,
End' sult het niet verachten,
Dat can ick wel betrachten.
O HEEre, Godt doet wel Zyon,
Nae dijnen goeden Wille schoon,
JErusalem die Mueren
Laet wederom Opvueren,
Dan sult ghy hebben Lust en Vreud',
Tot Offer der Gherechticheydt,
Tot Brand'offer nae dijnen Moet,
So sal men dan die Calver goet
Recht op dijn Outaer legghen.
|
|