De C.L. psalmen des conincklijcken propheten Davids


Den XXIII. Psalm.
Met een ander Compositie ende Voys, als hier nae volget. WAt can ons comen aen voor Noot, Als ons de HEERe weydet, En spijset ons met Hemels Broot, End' op die Weyde leydet, Daer toe verquicket onse Moet, Vercoelt ons metten Water soet, Sijns weerden Heyl'gen Geestes. 2. Om zijns Naems willen hy altoos, Ons voert op rechter Straten, Laet ons in gheender Tijdt troostloos In Schaed' oft oock in baten,
[Folio xxv.r]
Daerom wy altijt moedich syn, Oock in des Doots ghestalt en Pijn, Want ghy zijt met ons HEERE. 3. Dijn Stock en Staff (ghy Herder goet) Ons troosten en oock straffen, Dat Cruys des vleesches Lust wech doet, Dat ons gheen schaep mach schaffen, Den Geeste door t' Sondich gespuys, Dat in dit sterfflijck Lichaem is, En doet hem altijdt rueren. 4. Een Disch hebt ghy voor ons bereyt, Die wy altijdt aenschouwen, Dijns Heyl'ghen Woordes goede Weydt Die wy int Herte knouwen, Als ons des Vyants List aen grijpt, Dees Disch dan ons die Ziel verquickt, Met dijnens Gheestes gaven. 5. Dijn Goetheyt en Barmherticheyt My volghen all' mijn Daghen, Van nu aen tot in Eewicheyt, Want ghy gaet sorghe draghen, Dat wy hier door t' Geloove syn End' daer oock in den Zale dijn, Borghers end' Huysghenooten. 6. Des help ons HEEre Jesu Christ, Wilt onse Herte bouwen, Dat ons niet schaed' des Sathans List, End' dat ons niet berouwe,
[Folio xxv.v]
Dat wy der Werelt aff ghegaen, Nu moeten inden Kampe staen, Helpt ons (HEER) overwinnen.