Het Christalyne spieghelken

Van den H. Iosephvs Brvydegom der Heyligher Maghet Marie.

Op de wijse: Alsoo ’t beghint.

IOsephe Voester goedt,
Van die ons allen voedt,
En spijst nu met sijn vleesch en bloedt:
Die voor Godt Mensche sorghe draeght,
Bewaert Godts Moeder ende Maeght.

Hoe heeft u Godt gheloont,

Hoe hoogh zijdy ghecroont,
V Eere wordt al om ghetoont:

[p. 85]

 

Men singht, men preeckt alom u lof

 

In ‘swereldts pleyn, in ‘sHemels hof.

 

Leer’ van de jonghe jeught,

 

Der Maeghden suyver vreught;

 

Ghehoud’ een spieghel tot de deught:

 

Ghemeynen Vader, Voester, Heer,

 

’t Is recht datmen hem tot u keer.

 

Godt Vader u versint,

 

Gheeft u last van sijn Kint,

 

Den Soon en Moeder u bemint:

 

Wilt ons besorghen, ons bewaert,

 

V dienaers, end’ u vrienden spaert.

 

Ghy toond’ u groot verstant,

 

Ioseph’ en boodt u handt

 

Aen ’t uytgheteyrde Egypsche Landt:

 

Dees slaet sijn ooghen over al,

 

Voorsiende gantsch het aerdtsche dal.

 

Egypten inden noodt

 

Socht Ioseph om sijn broodt,

 

Dees helpt sijn dienaers tot der doodt:

 

Die hem tot sijnen dienste begheeft,

 

Naer dit kleyn leven eeuwigh leeft.

EYNDE.