Het Christalyne spieghelken
(1630)–Anoniem Christalyne spieghelken, Het–
Auteursrechtvrij
[pagina 28]
| |
Op de wijse: Alsoo ’t beghint.
BEpeynst u edel mensche,
Bepeynst u leven wel,
‘tEn is niet t’uwen wensche,
Al waerdy noch soo snel
Dat ghy hier langh sout blijven,
Sonder pijn oft ghequel,
Al haddy duysent lijden:
De doodt en is gheen spel,
O doodt, o doodt,
Ghy en spaert kleyn noch groot:
o doodt, ay my,
Hoe bitter zijt ghy,
Hoe bitter zijt ghy.
Ghy Jonghers en Jonck-vrouwen
Die daer draeght zijd’ ende goudt,
De doodt sal u doen flouwen,
Al zijdy noch soo stout:
Laet danssen ende springhen,
Laet al u overdaet:
En wilt doch niet volbringhen
‘sVleeschs, duyvels, wereldts raet.
o doodt, etc.
Al haddy Keysers rijcke,
| |
[pagina 29]
| |
Daer mede Samsons kracht,
Al haddy desghelijcke
Al Cresus schat en pracht,
‘tEn can u al niet baten,
Al waerdy oock rebel,
Ghy moetet al verlaten,
Onder des doodts bevel.
o doodt, etc.
Waer zijn de maechden schoone
Met haer gheluwe hayr,
Die hier spanden de croone,
om haer schoon aenschijn claer?
Al vande wormen gheten
Zijn sy, ‘tis soo voorwaer:
Haer schoonheydt is versleten,
Verwacht sulckx allegaer.
o doodt, etc.
Waer zijn de Potentaten
Des wereldts groot van macht,
Die wijse Magistraten
Hier voortijdts hooch gheacht:
Niemandt en is ghebleven,
‘tZy edel oft vileyn,
Die niet en heeft beseven
Den strael des doodts voorwaer.
o doot, etc.
Waert dat ghy wel bekenden,
| |
[pagina 30]
| |
Wat ons ghebeuren sal,
Als ons die doodt sal schenden,
En brenghen inden val,
Dat herte soude breken,
Met groote bitterheydt,
Gheen tonghe can uytspreken,
Dus peyst op d’eeuwicheydt.
o doodt, etc.
Ick bidd’ u alghemeene,
Wilt vaten dit verstandt,
Maeckt u van sonden reene,
Denckt op den uyttersten pandt,
Die Godt u heeft ghegheven,
Eer ghy die note kraeckt,
Die elcken mensch doet beven,
o doodt, etc.
|
|