Die historie van Christoffel Wagenaer

¶ Wat Christoffel wagenaer met synen Gheest Averhaen voor een Afscheydt ghehouden heeft.

ONtrent om dese tijt so waren nv al dry Jaren gepasseert van Christoffel Wagenaers tijt, also dat hy maer noch twee jaren voorhanden hadde, die hy begeerde met Lust ende ghenuechte des Werelts ouer te brengen. Hierom ginc hy nv dagelijcx by het geselschap ende schoone Vrouwen: Oock quamen sy dickwils genoech van selfs by hem, ende dat daerom, dat hy so kostvry² ende milt [125] was, want hy haddet Gelt met menichte, twelcke hy met zijn wonderlijcke ende seltzame Consten genoech conste crijgen. Ende somtijts so brocht hem synen Gheest Averhaen oock een schoone Vrouwe, daer hy dan lustich ende vrolijck mede

2 Royaal

[p. 125]

was. Aldus brocht hy den Tijt ouer, maer doch werde hy oock eens denckende op de Helle, dat hy die besien woude, so badt hy synen Gheest, dat hy hem daer eens soude brengen, ende dan wederom t'huys, maer den Geest en woude niet, ende hy sloech hem dat geheel af, ende seyde tot hem, dat hy daer na te truerich soude wesen. Ende hy seyde hem oock, dat hy noch maer twee Jaren voor de handt en hadde, dan soude hijt genoech sien ende selfs besoecken. Doen quam Wagenaer een bangicheyt aen, ende hy worde seer cleynmoedich, ende suchte in hem selfs. Den geest vraechde hem: Waerom zijt ghy so truerich? Christoffel Wagenaer antwoorde: Om dat ic nv eerst bedencke, wat ick gedaen hebbe, ende dat ick my so schandelijck van v heb laten bedriegen, ende dat ick hebbe om so cleynen tijt van vijf Jaren mijn zalicheyt ouergegeuen. Den Geest antwoorde hem: Ic bidde v: En bedroeft v doch daerom niet, ic sal v noch wel so menige vreuchde maken, ende ick sal v so dickwils lustich ende vrolijck doen zijn, dat ghy dit altemael vergeten zult, daerom so laet nv uwe sorghe varen, want het mach nv niet anders wesen, want ghy het seluer ghesocht hebt. Het heet also: Factum infectum fieri nequit. Hierom so laet alle v Truericheyt varen, so sult ghy alles wat my, ofte yemant van onsen Gheesten mogelijck is, van ons vercrijgen. Ick salt maken, dat ghy alles wat een ander onmogelijck is, sult connen te weghe brengen, ende [126] wat aen de swarte Constenaers verborgen is, dat sal v geopenbaert worden. In summa, ghy sultse al te bouen gaen, die voor v gheweest hebben. Alle genuechte ende Cortswijle sal ick v helpen doen, oock en sult ghy v Leuen gheen gebreck hebben, maer al wat ghy begeert, sult ghy in Ouervloet hebben, so langhe als ghy leeft, ende siet om, dat ghy v Const vorder brengt, Want voor elcke Ziele die

[p. 126]

ghy cont toebrenghen, sult ghy noch een Jaer leuen. Ende daer na als ghy dit vlijtich bedient hebt, so sal ick maken dat ghy daer en bouen sult een goet Locum hebben in de Helle, also dat ghy onder v gebiet sult hebben vele Toouenaers ende Toouerinnen, de welcke alle tot uwen dienste sullen moeten bereydt staen.

Daer op begonste hem den Geest een Cortswijle te maken van alderley Jachten ende wilde Dieren. Daer by vergaderde hy vele schoone Joncvrouwen al waer Christoffel Wagenaer eene wtnam, ende zijne genuechte met haer hanteerde. Ende des anderen daechs nam hy weder een ander, ende so al voorts, tot dat zijn truericheyt een weynich vergeten was.