Die historie van Christoffel Wagenaer

[3] ¶ Hoe dat Christoffel Wagenaer aen Doctor Faustus aenhoudt, om eenen Gheest te verkrijghen.

DOen nv Doctor Faustus synen loop wt hadde, ende synen Knecht Wagenaer tot eenen Erfgenaem van alle zijn Goedt gemaeckt hadde, so heeft Christoffel Wagenaer synen Heere ghedanckt, ende was in alles wel te vreden: maer begeerende dat hy doch hem wilde synen Gheest na synen Doodt oock toevoeghen? Waer op hem Faustus antwoorde dat alsulcx niet in zijnder macht en ware, want hem den geest niet langer en hadde belooft te dienen, als zijn

[p. 11]

leuen, maer dat hy soude te vreden zijn, hy soude hem wel eenen anderen Geest bestellen, door welckers Conste hy alles, ja meer als Faustus oyt gedaen hadde, soude connen wtrichten. Doch met sulcke Condition, dat hy hem oock moeste houden, wat hy hem beloofde. Christoffel Wagenaer en hadde noyt soeter ofte aengenamer woort gehoort, Hy vraechde terstont, off hy dien Geest oock haest te sien mocht comen? Ja sprack Faustus. In wat gedaente wilt ghy hem hebben? Wagenaer sprac: In eender Apen gestalt, oock in sulcker forme ende grootte, als die Apen gemeynlijc zijn. Corts daer na quam den Aep ter Deuren ingespringen, ende sprong' al op ende neder, ende maecte vele seltzame boetzen ende Keuchelspel¹, het welcke den jongen scholier seer wel behaechde. Als D. Faustus dit mercte, seyde hy tot hem: Ghy en sult desen geest niet tot uwen wille brengen, ten zy na mijnen doot, ende dan sal hy v dienen, gelijc my Mephostophi[4]les nv dient, maer ghy moet met hem in verbontenis treden, ende hem Averhaen noemen. Christoffel Wagenaer bedancte hem hoochlijck, ende ginck vrolijck wech.

1 Bokkesprongen