Historie van de borchgravinne van Vergi

Hoe die hertoghinne haer sieck maecte bi gramscappen ende ginc te bedde ligghen om dat die ridder weder ten hove quam.

Alst nu middach was ende die spijsen bereyt waren, so ghinck die hertoghe eten met sijnder vrouwen ende volc, daer ooc die ridder quam, de seer feestelijc ontfangen wert vanden hertoghe; dies de hertoginne so seer vergramt wert, dat si opstont vander tafelen ende ghinc in haer camer te bedde liggen ende maecte haer sieck. Als nu die tafelen op ghedaen waren ende die hertoge niet wetende wat sijnder vrouwen miscomen was datse so haestelijck vander tafelen opstont, so seyde des hertogen camerlinc dat sijn vrouwe sieck was. Doe ghinck die hertoghe in die camer daer sijn vrouwe

[fol. f1v]

lach op haer bedde ende vraechde haer wat haer miscomen was. Doe antwoorde die vrouwe my mach wel wee sijn, want mi dunct dat ghi mi haet ende dat ghi mi luttel eeren doet, want ghy doet den ghenen veel eeren, jae meer eeren dan ghi pleghet ende ghi houdt hem voor uwen vrient dye u ende mi so veel scanden ende oneeren bewesen heeft, daer hy mede verdient heeft om hem ter doot te brengen; ende ic ben u huysvrouwe ende die oneere ende schande die hi mi te voren leyde was so wel uwe oneere als de mijne, mer ten mach niet gewroken sijn, want ghi hebten liever dan ghi te voren dedet, om dat ghijer mi mede te toorniger soudt maken. Die hertoge antwoorde ende seide. Gheminde vrouwe. Laet dese fantasie va[r]en, want ic weet wel tgene dat ghi mi geseyt hebt dattet al luegenen sijn, want ic heb hem so ondertast vander saken dat hi mi alle sijn secreet ende heymelicheit te kennen heeft gegeven, also dat ic wel weet dat hi noyt en peysede die vals\hede

[fol. f2r]

over u te doen daer ghi hem mede belieghet. Daer om waert beter dat ghi sulcke dinghen sweecht dan met lueghenen yemant sijn eere te benemen; ende met dien ghinck die hertoghe van daer inder salen ende was ghenuechte hanterende. Maer die hertoginne bleef doe seer verbolghen ende gram, ende si dachte in haer selven dat die hertoge haer man gheen vrientschap en soude van haer vercrijgen hi en soude haer openbaren de dinghen de hy wiste vanden ridder, om dat si niet ghelooft en was.