|
| |
| |
| |
Dit zyn de pointen ende articlen van den payse begrepen tusschen den coninc van den Romeynen over een zyde, ende den drie leden slands van Vlaendre met haeren adherenten, over ander zyde, den 10sten dach in meye int jaer 1488.
Eerst dat de drie leden slands van Vlaendren hebben belooft ende zullen ghehouden zyn te stellene den voorzeyden coninc up zyne voeten ende vryheyt ende liberteyt omme terstont te vertrecken daert hem ghelieft, dies zal hy laten in verzekerthede ende ostage binnen der stede van Brugghe, den marcgrave van Baden ende den hertoghe Chistoffels in Beyeren, ende binnen der stede van Ghendt met Phylips van Cleven heere van Wynendale.
Item den welcken marcgrave hertoghe ende mer Phylips ter bede ende begheerde van den coninc zullen zweeren upt heleghe hout des crucen, ende upt heleghe evangelie, ende ooc up haerleder heere ende trauwe, dat zy uut den vooseyden steden niet sceeden en zullen toot ander stont, dat alle de pointen ende articlen begrepen in dezen jeghenwoordeghen pays, wel ende duechdelic vulcommen zullen wesen.
Item ende in noch meerder verzekerthede den coninc heift begheert ende ghebeden den voorseyden mer Phylips, dat waert dat hy in eenich ghebrec ware te vulcommene de
| |
| |
voorseyde pointen of dat yement van hy zy in favuere van hem ofte andersins hem vervoorderde eenich belet daer in te doene, dat in dien ghevalle de zelve mer Philips zal ontlast zyn ende de coninc ontlast hem van allen heeden die hy hem ghedaen mach hebben, ende zal assisteren ende by staen den voorseyden van Vlaendre tjeghens den voorseyden coninc, met alle zynder macht ende cracht, ende daer of zal mer Philips eedt doen ende geven zyne brieven den voorseyden van Vlaendre zulcke als daer toe dienen ende behooren zullen.
Item, ende boven dien de coninc heeft gheconsenteert, gheordenneert ende belooft den ghedeputeerden van den staten van den lande van Brabant, Henegauwe, Zeelant ende Namen, ende van der staten van Valenchyne, Ruscle ende Duwagey ende andre tjeghenwoordelic vergadert binnen der stede van Ghendt, dat zy niet en scheeden van der zelven steden, nemaer daer bliven statewys al of zom toot den pays van Vranckryk de unye ende alianche tusschen den landen ende alle andre pointen deser materie aengaende, ghesclooten ende verzekert zullen wesen.
Item den coninc heeft belooft ende es ghehouden ter stont te doen cesseeren zyn volc van wapene van allen exploten van oorloghen, ende hetzelve volck mitsgaders alle zyne garnisoenen te doen sceeden ende vertrecken binnen 4 daghen naer dat hy in zyne vryhede ghestelt zal worden of wezen, ende binnen 4 daghen daer naer huut allen andren landen of eer eist moghelic, ende zal bezoorghen ende bescudden tselve volck in zyn vertrecken, noch honder weghene zullen barnen, pilieren, vanghen, rooven, rensoeneren noch eeneghe andre quaden doen in de zelve landen, ende ooc dat zy gheene ghevangenen met hemleden leeden zullen huut Vlaendre, nemaer zullen gehouden zyn die te stellene, ten
| |
| |
redelicken rensoene, zonder die te moghen vervoerene.
Item inschelicx de voorseyde van Vlaendre zyn ooc ghehouden terstont te doen cesserene haer volck van wapene ende garnisoenen van allen exploiten van oorloghen, ende de zelve te doen vertrecken huut alle den landen, ende zullen wachten dat van hemlieden den zelven lande gheen qua et noch achterdeel toecommen en zal ende ooc bezoorghen datter gheen ghevanghenen vervoert en worden, maer die te stellene ten redelicken rensoene.
Item ende ten hende dat de coninc te bet zal moghen doen sceeden ende vertrecken zyn volck van wapene ende garnisoenen, zo hebben de staten van alle den voorseyden landen hem gheconsenteert te betalene, binnen eender maendt eerst commende, de somme van 25 duizent ponden van 40 grooten tpond, met condicien waerdt dat zelven volc ende garnisoenen niet en vertrocken ende zyn huut alle den voorzeyden landen binnen den voorzeyden tyden, dat in dien ghevalle de voorzeyde 25 duuzent terstont behoort zullen zyn in betalinghe van den andre volcke van wapene, om by nachte, om dat anders niet ghescien en mach, tvoorseyde volck te wederstane ende veriaghene, volghende der alianche die daer of tusschen allen den voorseyden ghedaen es ende ghemaect.
Item bet voort de coninc consenteert ende es ghehouden terstont te stellene alle de sclooten, stercten ende plaetse van den lande ende graefschepen van Vlaendre, in den handen van myne heeren van de bloede, ten profyte van onzen harden gheduchtegen prince ende natuerlic heere den hertoghe Philips zinen zone, omme daer in ghestelt te zyne al zulcke casteleynen ende officiers alst behooren zal, naer den rechten ende privilegen van den lande ende by advyse ende consente van den voorseyden drie leden achtervolghen der voorseyde alianche.
| |
| |
Item den coninc by der nerstegher bede van mynen heere van den bloede, ende van den ghedeputeerden van den voorseyden staten, ende ooc ter ootmoediger begheerte van den poorters ende inghezetenen van der stede van Brugghe, heift gheaboleert, vergheven ende quyte gescholden ten eeuweghen daghen het vanghen ende de detencie van zynen edelen persoon, metgaders altguen datter ghebuert of ghesciet es vooren of naer, by wien, hoe ende in wat manieren, het zy dat vergheven geheel ende als niet ghebuert.
Item de coninc heift belooft den voorseyden van Vlaendre te ontlastene ende quyt of quyte te houdene jeghens onzen voorseyden natuerlicken prinche zinen zone, ende tjeghens alle de landen diet naermaels an gaen mach, zoude moghen vul al zulcken juweelen ende tapit tapytcherien als hy naer den pays van den jare 85 ghecreech huut hueren handen toebehooren onzen voorseyde prinche.
Item de voorseyde van Vlaendre, alzo wel int yncle als int particuliere, zullen blyven in al huerleder rechten, privilegen, vryheden, costumen ende usagen in zulcker wys, als zy gheweest hebben van houden tyden zonder te lettene of hooghemerc te hebbene, up tghuent dat ghedaen mach wesen in prejudicie van den zelven rechten ende privilegen, in wat manieren het zy, ende zullen alle brieven van obligacien ofte anderzins, die ghemaect zyn ter contrarie, weder ghegeven als ghecasseert ende te nieuten ghedaen.
Item de coninc heift belooft dat hy nemermeer en zal doen noch procureeren ghedaen te zyne directelic noch indirectelic, eeneghe zaken, die commen of keeren zouden moghen in prejudicie of scade ende achterdeele van den voorseyden lande ende graefscepe van Vlaendre, noch ooc den coopman, noch der coopmanscepe van den zelven, ende indien dat eeneghe zaken ghedaen es ter contrarien, by
| |
| |
hem ofte den zynen, hetzy by gheestelicke censure ofte andersins, die zal hy terstont wederroepen ende te nieute doen, ende hy zal gheven zine brieven van verzekerthede alle den cooplieden ende andre diese heesschen zullen, omme vredelic te moghen gane ende rondscrieven in huerleder coopmanschepe, ende andersins in Duudsche landen, ende al omme eldre, zonder ter cause van zaken voorleden ghetravelgiert of ghemolesteert te zyne in lyve, noch in goede, noch andersins, in wat manieren het zy.
Item ende omme de verzekerthede van al dat voorzeyd es, de coninc zal zweeren up de heleghe evangelie, upt heleghe hout des cruce, upt canon van der messe, ende upt heleghe Sacrament ende upt lichame van Sinte Donaes, dat hy, zonder inbreken, onderhouden zal ende vulcommen dit tracteit van payse, van pointe te pointe, zonder nemermeer te doen of te procureerne ghedaen te zyne yet ter contrarie, ende zal hem stellen ende submitteren tallen kerckelicken censuren, niet teghestaende de privilegen die hy als coninc van den Romeynen of anderssins hebben mach ter contrarien.
Item ende boven dien zo zal hy daer of gheven zyne opene letteren ende brieven bezeghelt met zynen zeghele de welcke gheconfirmeert zyn zullen by onzen heleghen vader den Paus, by den Keyzere, zynen vadre, by den zeven cuervuersters, by den voorseyden heeren van den bloede, ende by den staet, van alle den voorseyden landen, ende contentemente van die van Vlaendre, ende ooc by den busscop van Uutrecht, ende van Ludchen, ende den hertoghe van Cleven ende Ghulekin, de welcke beloven zullen ende hemleden verbinden niet te ghevene, eenich passage duer huerleder landt of revieren eeneghe volcke van wapene, dat zoude willen commen oorloghen up Vlaendre.
Item de coninc consenteert, belooft, ende zal hem verbin- | |
| |
den dat waerdt, het welcke God werde, dat in eenegher manieren hy yet dede of ghedochte te doene tjeghen dit tracteit of eenich point van dien, dat in dat cas, zonder andre of meerdre declaracie daer of te doene, mynen voorseyden heeren van den bloede, de heeren van der oordene van den ghulden vliese, de heeren van den staten ende inghezetenen van den voorseyden lande zullen ipso facto nu als dan, ende dan als nu, ontsleghen zyn van huerleder eede ende ooc ontlast van allen beden, subvensien, pensioenen ende andre lasten hem gheconsenteert of te consenteerne ende van allen achterstellen van dien, ende jnsgelicx die van Vlaendre, van den voorseyden pensioenen, ende voorseyde andre landen sciedende van zynder subjectie ende onderdanichede zullen ghehouden zyn te assisteerne ende te secoureerne de voorzeyde van Vlaendre, ende van dan voort zullen gheregiert zyn ende gheghouverneert onder de name van onzen natuerlicken prince, by den advyse van den voorzeyden van den bloede ende van den rade, in elc landt, alzo die van Vlaendren nu gheregiert worden.
Item ende dit jeghenwoordeghe tracteyt van payse zal gheconfirmeert worden by den coninc van Vranckericke, ende als naest ende baerblyckenste hoor van onzen voorseyden natuerlicken prince, ende ter cause van der coninghinne zynder ghezelnede, dochter van den voorzeyden coninc.
Item desghelicx ter bede als boven, de coninc heift vergheven al tghuent dat by den drie leden slands van Vlaendre ende elcker van hemlieden int generale ende particuliere mesdaen of mesbruuct mach zyn, tjegens zynen edelen persoon voorseyd, het zy adhererende den volcke van Brugghe, houdende den coninc ghevanghen in huerleder name, hem doende viantscip ende oorloghe, up hem zelven ofte gadere
| |
| |
blamerende ofte injurierende hem ofte den zynen, by fayten, by woorden of andersins, in wat manieren het zy, zonder ter cause van dat voorseyd es of eeneghe andre zaken voorleden, hemlieden nemermeer yet te heesschene int generale noch int particuliere in live of in goede, buuten of binnen den lande of andersins in eenegher manieren.
Item de voorseyde van Vlaendre ter contemplacie van den voorzeyden coninc, ende van myne heeren van den bloede, ende ter begheerte van den ghedeputeerden van den voorseyden staten hebben vriendelic ende liberalic vergheven ende quyte ghescolden alle luchteren, injurien ende violencien die hemleden ghedaen hebben gheweist uut causen van divicien, by wien, hoe, ende up wat manieren het zy, zonder eeneghe excepcie ofte resynacie, alzo wel int consenteren van Duudschen zettynghen, zonder eendraegtich consent van den leden of andersins, dat ooc vergheven als niet ghesciet ende consenteeren dat elc passivelic up den zynen in den staet dat hem vynden zal, zonder ter cause van den zelven hemlieden nemmermeer yet te heeschene ofte verwytene.
Item waerdt dat yement handelynghe ghehadt hebbende van eeneghe pennynghen, het zy van den coninc ofte van onzen harden gheduchten heere ende prince den hertoghe Phylips of van eeneghen steden, of casselrien of landen hem ghemeshuuseert hadde in zyne administracie, ende dat men bevonde dat hy se gheappliqueert hadde te zynen singulieren profyte, eeneghe van den voorzeyde pennynghen gehouden zyn zal daer ofte audwardine ende te rechte te stane, daer ende alzoot behooren zal.
Item ende om zelve redenen de coninc moverende, ende zonderlynghe omme te scuwene alle questien ende processen die ter cause van appellacie gheinterjecteert by die van
| |
| |
Vlaendre ghescepen waren te rysen, zo heift den coninc, ter contemplacie ende bede als boven, gherenonciert ende ofghegaen van zynder voochdien in Vlaendre, ende heift gheslaect den zelven van Vlaendre van allen heeden, die zy hem in die qualitheyt ofte andersins ghedaen moghen hebben, ende consenteert dat tzelve landt ende graefscip in alle zyne leden voordan zal zyn gheregiert ende gheghouverneert, onder den name van onzen voorzeyden harden, gheduchteghen prince ende natuerlic heere, alzo wel in souvereintheyt als anderssins, van mynen heeren van den bloede, ende van zulcken raden als de zelve myne heere daer stellen ende ordonneren zullen, by den advise ende consente van den voorseyden drie leden ende staten van Vlaendre, achtervolghende der eendrachticheyt.
Item mids welcke renonciacie, de voorseyde van Vlaendren hebben gheconsenteert jaerlicx te betalene de coninc, om zyn onderhout, de somme van(uitversleten), gheduerende de onbejaerthede van onzen voorseyden natuerlicken prinche, de welke hy heffen zal by den ontfanghere van Vlaendre, ten tween payementen tsjaers, te wetene, de eene helfsceede telken Kersmesse, ende dandre te Sint Jansmesse, daer of het eerste payement vallen zal te Kersavend eerst commende, zonder dat de zelve coninc yet meer zal moghen begheeren of heffen int zelve landt, up tzelve graefscip van Vlaendre, ende mids dezen, zullen alle achterstellen die men schuldich wesen mach, ter cause van der subvencie of gheboden voorleden ofte anderssins, quyte zyn.
Item den coninc accepteert den pays, die den coninc van Vranckryke ghepresenteert heift by zine besclootene ende opene brieven, den voorseyden lande van Vlaendre ende allen andren, die metter zelve drie leden zullen willen volghen ende verclaersen an den pays van den jare van 82
| |
| |
ende es te vreden dat alle dandre landen hemlieden verclaersen an den zelven pays, ende hy zal confirmeren, ratificeren ende onderhouden zonder breken, al tghuent dat by zyn ambassaduers up dat hy daer eeneghe zenden wille, of by den ambassaduers van den zelven staten zal ghemaect ende ghescloten zyn by den coninc van Vranckricke ofte zyne ghedeputeerde.
Item insghelicx de coninc es te vreden in de unye, alianche ende goede eendrachtichede, die de staten van den lande onderlynghe ghemaect ende ghesclooten hebben, omme de welvaerd van de pollicye, ende den ghemeenen profyte van den zelven lande, ende heift belooft te auctoriseerne, confirmeerne ende ratifieerne de zelve unye ende alianche ende ceure van onzen voorseyden natuerlicken prince, ende ooc als voocht ende gouvernement hebbende van den andren landen, ende ooc die te houdene ende te doen houden van pointe te pointe, zonder nemmermeer daer jeghens te commene, noch te laten commene in eenegher manieren.
Item de coninc heift belooft te stellene den persoon van onzen natuerlicken prinche in den handen van mynen heeren van den bloede van der moederlicker zyde, om voordan heerlic gheregiert te zyne, ende thonderhouden up den staet die men hem maken zal, ende zal worden vervoert van lande te lande, by tyden ende oordenen al zoot tanderen tyden gheconsenteert ende gheadviseert heift geweist, ofte alzo men om tbeste adviseren zal makende den zelven staet, ende ten onderhoudene van den welcken, de staten van alle den landen contribueren zullen by raten ende by porcien.
Item ende waerdt zo dat dit tracteyt ghemoliert of in ghebroken warde by wien het ware, de zelve zal ghecorrigiert ende ghepuniert warden, in exemple van allen andren, zo waer dat zy wonden of ghecrieghen warden, als infractuers van payze.
| |
| |
Item waerdt ooc, dat naermals by eeneghe van den contractanten dat tracteit in breken warde in eeneghe van zynen pointen ende articlen, dat nochtans tzelve tracteit van payse vanc zal hebben ende macht, ende men zal daer of de reparacie moeten volghen by justicye, zonder te procederen by weghe van fayte.
Item waerdt ooc dat eenich van den voorseyden of andre, by delaye, of negligencie, of andre ghebreken, zyne zeghelen niet en hynghen ant zelve tracteyt, dat nochtans daer omme tzelve tracteyt niet zyn en zal van minder affectie.
Deze voorzeyde pointen ende articlen waren ende zyn vulcommen by den voorseyden roomschen coninc by zynen eede te Brugghe, up de maert, present alle den staten van den landen, den 16sten dach in Meye, int jaer ons heeren, duust vier hondert 88.
|
|
Auteursrechtvrij