|
| |
| |
| |
[Dit es tractaet van payse ten love Gods]
Dit es tractaet van payse ten love Gods ende der maghet Maria, en ter heeren ende contemplacien van zeere hooghe excellent, ende zeere moghende prinche de kerstenen coninc van Vranckericke, tusschen zeere hooghe, excellent ende moghende prinche de coninc van de Romeynen, alzo wel in zinen name, als in de namen van minen heere de ertschertoghe Phylips van Oostenricke, grave van Vlaenderen, zinen zone, honder zine jaren, ter eender zide, ende de landen van Vlaenderen ter ander zyde.
Ende eerst de voorseyde heere coninc van de Romeynen zal ghereintegreert wesen, geheel ende al, in de monbournye ende voochdye van mynen voorseyden heere de eertschertoghe minen heere Phylips, zinen zone, grave van Vlaenderen, ende in dye namen zal hebben tvulle ende geheele gouvernement van de voorseyde landen en graefschip van Vlaenderen, in zulken state, auctoriteyt ende honderdanicheit als hy die hadde voor tbeginsel van de laetsten differenten
| |
| |
tusschen die van Ghend, Brugghe ende Ypre, ende huren adherenten.
Item de guene, die zichtent den begunsele van de voorseyde differenten hebben ghezyn in wetten in de voorseyde stede Gend, Brugghe ende Ypre, zullen supplyeren in alder reverencyen ende oodmoedichede, den voorseyden heere ende Coninc van den Romeynen in zinen persoon, of in den persoon van de ghonen die daer toe ghestelt zal wesen van zinen weghe, dat de geliefte van den voorseyden heere coninc zi hemlieden tondfanghen in zin gracie ende hemlieden te verghevene alle de mesdaet, die zi hebben moghen ghedaen ende ghecommitteerdt jeghens hem, ende minen vorseyden heere de eerstschertoghe zinen zone, ende zullen zegghen dats in dien zyt te doene hadden, dat zyt nemmermeer doen en zouden, welcke requeste zi doen zullen in elc van den voorseyden steden, of voor de poorten van den zelven steden, alzoot best ghelieven sal de voorseyden heere coninc van den Romeynen, ende by elc van den voorseyden wetten, ende de gonne die daer commen sullen, dat die zullen ghecleed wesen met zwarten omgegord, metten blooten oofde, ende up haer knyen.
Item op tguend dat d'ambassaduers van den voorseyde heere coninc van den Romeynen gheheescht hebben thuus van Cranenburch, ghezeten up de merct van Brugghe, gedemolieerd te zine, ter cause dat de zelve heere coninc daer gehouden was, ende dat in de stede van dien gheconstruerd zi eene capelle, met zeker fondacien, tes gheaviseerd dat dit point ende artykel zal versteld worden, toot dat hem de twee conyngen zin zullen, daer of dat mencie ghemaect es int tractaet van Francvoord, de welcke heeren zullen avizeeren tghuend dat daer of behoord ghedaen te zine, omme twelvaren ende tverzekerthede van dezen payse, ende inschelicx
| |
| |
zullen avizeeren up zekere andere fondacien, die de voorseyde ambassaduers gheheescht hebben ghedaen te zine in de voorseyde steden van Gend en Brugghe, omme de remedye van de zielen van den ghonen die gheexecuteert hebben geweest gheduerende de voorseyde differenten.
Item om te doen rumene tvolc van oorlogen van den zelven heere coninc van den Romeynen huuten lande van Vlaenderen, ende wederkeeren in zine goede gracien, ende ooc huut consideracien van den grooten verliese, schade ende interesten, die den voorseyden heere coninc ende minen voorseyden heere den eertschertoghe zinen zone hebben ghehat, indien dat zy niet ghebruuct en hebben van den voorseyden lande gheduerende de voorseyde differenten, van den welcken lande dien tyt hanghende zi geen prophyt ontfangen en hebben, die van den zelven lande van Vlaenderen zullen betalen den voorseyden heere coninc van den Romeynen de somme van 300,000 goudin cronen, te 5 schs 10 deniers elc stic, comt ter somen van 520 duyzent ℔ gr. of de weerde die betaelt zullen wesen in gelde, loop hebbende int voorseyde land, van naer de reduccie die huer doen zal van der munte bi den voorseyden coninc heere van den Romeynen, ende de staten van den zelven, ter welker reduccien de voorzeyden van Vlaenderen als nu consenteren daer of hem payement doen zal in dry jaren, ende in dry terminen, elc jaer te wetene, te Kersmesse, Paesschen ende Sint Jansmesse, welc es voor elc jaer therde van de voorseyde somme, behouden dat omme tseer te doen vertreckene tvolc van oorlogen huuten voorseyden lande van Vlaenderen, de payementen van den tweeen eerste terminen zullen hem doen te Karshavende eerst comende, van welcker somen van 525 duyzent ℔ gr., minen voorseyden heere de eertschertoghe hebben sal zeswaerf 20 duyzent ℔ gr., ende mine vrauwe de hertoginne Margriet de
| |
| |
Duvagiere 21 duyzent ℔ gr., om de schade dien hebben ghedaen gheweist, aengaende de voorseyde differenten, dewelke vrauwe boven dien zal betaelt wezen zulke reste als men huer schuldich noch mach wesen, by dien voorseyden van Vlaenderen, ter cause van composicien by hemleden ghedaen anno 85, ende aengaende Guy De Baenst, Jacop Dhonche, Jacop Hammaert ende andre beschaedige buuten exploite van orloghen, omme de welcke de voorseyde ambassaduers van den voorseyden coninc van den Romeynen hebben clachten ghedaen, zy zullen ooc hebben up de voorseyde principale somme, de somme van 40 duyzent ℔ gr., die zullen ghedestribueerd worden ende honder hemlieden ghedeelt, by oordonnancien ende ter goeder gheliefte van de voorseyden heer coninc van den Romeynen.
Item ende dat de demeynen van den voorseyden lande ende graefschip van Vlaenderen zal weder ghestelt ende gheoordeneert weesen, also het was binnen den levene van wylen hertoge Phylips ende hertoghe Kaerle, heeren van den voorseyden lande, behoudens de partyen vercocht ende verzet by hemlieden, ende by wylen de vrauwe hertoginne Marie, gravenede van Vlaenderen, haerleden dochter.
Item dat de voorseyde van Vlaenderen vulcommen zullen tghuend dat begrepen staet in een zeker artikle van den tractaet van Francfoort, mencyon makende van ghevangenen dien gheleed waren te Gend, ende al naer thinhouden van den zelven artykle ende alst of hier in gheinsereerd waren, ende zal bliven mheer Wulfaert van Pollem quite ende onghehouden van der trauwe ende beloofte, die hy ghegeven mach hebben den voorseyden van Vlaenderen oft andre voor hemlieden.
Item dat up tpayement van de voorseyde 525 duyzent ℔ gr. zal ghedaen worden de voorseyde stede van Ypre, aen- | |
| |
gaende haerleder porcye, zulker moderacye als men ghewone es, als eeneghe prinche, gheinposeert ende ghestelt zynde huuten voorzeyden lande van Vlaenderen, ende tghuend dat hemlieden alzo ghemodereert werden, ende ofghesleghen zal hem recouvemereeren up de andre steden ende conmartieeren dien contunable werden, in welcke somme van 525 duyzent ℔ gr. ne zullen eenichsins contribueren dien van der stede van Audenaerde, Aelst, Dendremonde, Hulst, Nyeupoort, Vuerne, Dicxmuude, Duunkerke, Berghe, Burborch, Grevenynghe, Vuerne-Ambocht, Berch-Ambocht, Loo ende Lombaerdsyde, ende indien dat in dien steden dien contribueeren zullen in de voorseyde somme, zittinghe ghemaect zy by oofde, dien van de voorseyde steden, die hem betrocken zullen hebben in de oobedyencye van den voorseyden heere coninc van de Romeynen, gheduerende de voorseyde differenten ne zullen daer in eenichsins niet ghezet worden.
Item dat omme twelvaren ende verzekerthede van dezen payse, es ghedaen vulle, generale ende gheheele abolicie ende perdoen alle de ghone die hem honderwonden hebben van den voorseyden differenten, sichtent den jare van 82, ende als angande eeneghe die gherezerveert waren, by den payse van Vlaenderen, anno 85, zy zullen ende zyn begrepen in dezen presenten pays, om de heere ende reverencie van dat den coninc belooft heeft daer of instancie te doene, ende dat den coninc van den Romeynen, zynen schoonvader, hem wel zoude willen ghelieven in meerdere zaken.
Item, dat alle bannyngen van wat partyen ghedaen hebben gheweist spruutende van den differenten particuliere of gouvernuers van den voorseyden lande, sichtent den payse anno 85, zullen ende zyn ghedaen te nieten ende alle rancunen, injurien ende quaedwillichede vergeven, ghereserveerd
| |
| |
de gonne daer of proces es, welcke processen zullen weder ghezonden worden daert behooren sal, naer tractaet van payse van den voorseyde jare 82 ende tartikle daer of hier naer gheroerd zal worden.
Item, dat elc van deendre partye, ende van der andre, zal wederkeeren tot alle zyne goedinghen, waer die gheleghen zyn int keyserrycke of int conincrycke, ende int land van minen voorseyden heere, eertschertoghe, naer de artyklen ende provisie van den voorseyden payse, anno 82, ende van den voorseyden tractate van Francfoort.
Item, dat al tghuent dat heeift gheweeist ghegeven of quite ghescholden van de vruchten ende incommen van herven of achterstellen van renten, alzo wel up den lichame van der steden, als up den particulieren toebehoorende den gonnen, die doe waren in partye contrarye, zal bliven ghegeven ende quite ghescholden, ende men zal daer of niet moghen vervolch ghedaen worden: ende of de persoonen, goedinghe of commerschepe van den poorters of inwonende van den steden, van der partyen van den voorseyden twee kuenynghen, of van de voorseyde lande van Vlaenderen, die schuldich waren, de voorseyde renten waren als nu of int toecommende tyden ghearesteert of becommert over de voorseyde achterstellen, ghegeven of quite gescholden, tvoorseyde belet zal ter stond geweerd wesen.
Item, dat den voorseyden heere coninc van den Romeynen, als vader ende memboor van den voorseyden minnen heere den ertschertoghe zynen zoon, zal gheven zulke ordre ende policie, int voorseyde land van Vlaenderen, de coopmanschepen daer loop zal hebben zekerlic ende paysivelic, ende dat die van Vlaenderen, die hem vinden zullen in de landen ghebuers zynde, ne zullen niet becommert wesen, in live noch in goede, by lieden van oorloghen, noch andersins,
| |
| |
omme diensten of zaken toeghecommen in voorleden tyden.
Item, omme tvuldoen de somme van den pennynghen die men zal moeten ferneeren ter causen van dezen presenten tractate, de voorzeyde heere coninc van de Romeynen, als vader ende voocht van minen voorseyden heere, den eertschertoghe, zal consenteeren dat de voorseyde steden van Gend, Brugghe ende Ypre, ende andre contribuable ter somme boven verklaerst, moghen vercopen renten up hemlieden, ende daertoe als nu de voorseyde heere coninc de zelve auctorizeert, ende ooc hy auctorizeert de vercopynghe van de renten, die vercocht hebben gheweeist ende verleden by den zelven steden, gheduerende de voorseyden differenten, alzo varre, als tghemeente daer in gheconsenteerd zal hebben, inder manieren ghecostumeerd.
Item, intschelicx al dat ghedaen es ghezyn, ghedeurende de voorseyde differenten, huuter name van minen voorseyden heere, den eertschertoghe, int selve land van Vlaenderen, by minen heere Phylips van Cleven, als zynen stedehouder de camer van rade, de ghecommitteerde ter financien, demeynen, ayden, audiencie van rekenyngen, ontvangers generael ende perticuliers tresoriers van oorloghen van den consistorium, meesters ende offichyers van den munte, zal bliven ghedaen, ende ne zal daer of niet gheretricteert worden, behoudens in alzo varre als men zoude moghen verzet hebben, of ghealigiert eenich dync van de zelve demeyne of andre rechten toebehoorende minen voorseyden heere den eertschertoghe.
Item, ende up tghuent dat mynen voorseyden heere Phylips van Cleven heeift ghedaen verzoucken omme ontfanghen te zine, te vertoghene in alder heeren en reverencie, zine justificacie, ende ooc dat hy onderhouden zy in de staten, officien ende pensioenen, die hy altoos gehad heeift van den
| |
| |
zelven heere, coninc van den Romeynen, ende eerdshertoghe van den welcken hy hem continuelic gehouden heeift ende houtzeere oodmoedich maech dienare ende honderzate, es ghezeyt gheweeist dat de voorseyden mynen heere Phylips begrepen es in tractaet van Francfoort, ende dat den kerstelycken coninc zal spreken van dezen requeste, metten coninc van de Romeynen zinen schoonvader, als hy hem zien zal.
Item, dat staple van Brugghe ende de nacien zullen commen, om de welvaerd ende coopmanschepe, ghehouden ende onderhouden wezen, alzo zy van allen heeren in houden tyde ghezyn hebben, in de voorseyde stede van Brugghe.
Item, dat de processen die weesen zullen in den grooten raet van de voorseyde heere coninc van de Romeynen ende eerdschertoghe zinen zone, omme zaken van den persoone of van de goedynghen zynde in resoorte van den hove van den parlemente, te Parys zullen gherenvoyert wezen, naer thinhouden van de voorseyden artykele van den payse van 82, ende by faute van renvoye, die partyen die dat aengaen zullen, te moghen voorzien by justicie daer dat behooren zal.
Item, dat van de sentencien, gegeven by dyfauten of contumacien, van der eender partye of van der andere, gheduerende de voorseyde differenten, zal ghedaen zyn in ghelykerwys alst in ghelycker zaken gheoordeneerd ende gheavizeert es, by den voorseyden payse, anno 82.
Item, op dat de ghevanghenen van oorloghen van der eender pertye ende van der andre, die betwist hebben haerleden resten, zullen ghedelivereerd worden, ende die noch niet betwist en hebben zullen ghesteld worden ten gracieuzen rendsoene ende mids dien ghestelt ter delivrancie.
Item, als aenghaende de privilegen daer of de ghedeputeerde van Vlaenderen gheantwoord hebben, dat zy geene macht en hadden te bezoenzierne in deze materye, maer in
| |
| |
contrarye hebben last expres te versouckene de confirmacie van al hueren privilegen, ende volghende den tractaet van den payse, anno 82, het es gheapointeert gheweeist dat de voorseyde van Vlaenderen zullen honderhouden worden in de privilegen ende huzagen, daer of dat zy ghebruuct hebben bin den levene van wylen hertoghe Phylips ende hertoghe Kaerle, ende van te vooren by wylen van heeren voorzaten graven van Vlaenderen: ende alzo varre aelst aengaet de nyeuwen previlegen die zy vercreghen hebben sichtent de dood van wylent hertoghe Kaerle, ten eersten ziene ende vergaderynghe van den tween kuuninghen, zy zullen zenden haerleder ghecomitteerde hebbende macht, instructie ende last suffisant om te labuerne up de modderacie van den voorseyden privilegen, die nyeuw zyn, en daer men vinden zal dat eeneghe modderacie behoord ghedaen te zyne. Ende by dezen presenten tractaet van payse es te nieten ghedaen tlaetste tractaet van apointemente ghemaekt in de stede van Brugghe, anno 88, ende zullen daer of de brieven weder gheven worden, als ghecasseert, ende van geender weerde.
Item, den coninc van de Romeynen ende intschelicx mynen heere den eertschertoghe zinen zone, van hem gheauctoriseert suffisantelic, zullen gheven huer letteren patenten der kerstelicken coninc, ooc die van Gend, Brugghe en Ypre, by den welken zy belooven zullen, ende zweeren up haer eere ende in woorden van trauwen als prinche, tonderhoudene, alzo wel int generale als in perticuliere, de pointen, tractaet ende den voorseyden pays anno 82, in al haer pointen ende artykelen daer in begrepen, conserveerende tfayt van Vlaenderen zonder nemmermeer te gane, noch ghedoghen ghegane te zine ter contrarye, in wat manieren dat zy, ende zullen de zelve heeren doen gheven ghelycke beloften ende bezeghelthede, by den hertoghe van Zassen, van Cleven ende van
| |
| |
Guleken, ende by den prelaten ende nottablen die de voorseyde van Vlaenderen over haerleder verzekerthede zullen begeeren, ende waerdt dat ghecommen warde tieghen dit voorseyde tractaet, dat God voorhoede, dat den kerstelicken coninc, als souvereyn heere van den lande van Vlaenderen, zal daer in voorzien, ende zal moghen gheven hulpe, hulpe en bystand om te doen repareerne dat ghedaen zal weesen tieghen tegen tvoorzeyde tractaet, ende ooc of eeneghe declaracien of interpetracien waren te doene hier naermals, tzal hem moghen doen over de welvaert ende onderhouden van desen payze, wele tractaet van payse boven gheschreven heeift ten dyveerschen stonden ghezien gheweeist, ghevizenteert ende ghexameneert wel ende dylegentelic in alle zyne pointen ende artiklen, alzo wel by den ambassaduers als andre.
| |
Extrayt van dezen payse, anno 82, van zeker artykelen dienende omme warachtich bescheed te wetene van thinhouden van zeker artiklen boven ghescreeven, die hem meest reformeeren totten voorzeyden payse, anno 82.
Item, zullen bekennen de voorzeyde hertogen, en staten, den coninc ende resoort int graefschip van Vlaenderen, alzo dat gheweeist is in voorleden tyden, ende belooven dat den voorzeyden hertoghe Phylips, commende ter houde, hy zal doen de trauwe manschip ende diligencie diere toebehooren, ende daer of zullen gheven brieven mynen voorseyden heere den hertoghe van Oostenrycke ende den drie leden van Vlaenderen.
Item, den coninc van zynen chertaine sciencie, macht ende auctoriteyt heeift gheconfirmeert ende confirmeert alle privilegen, houde ende nyeuwe, gheacordeert ende gheconfirmeert by der zelve wilen vrauwe voor huer huwelic ende by mynen
| |
| |
voorseyden heere den hertoghe, den hertoghe ende huer, aengaende huer huwelic, alzo wel den dry leden van Vlaenderen int generale als int perticuliere, den stede ende tghemeente van vorzeyde land van Vlaenderen, stede ende casselrye van Rysele, Duway ende St. Omaers, midsgaders alle de rechten, uzagen ende costumen van den zelven steden ende ghemeenten van Vlaenderen, steden ende casselryen van Sint Omaers, Rysele, Duway ende Oortsyes.
Item, de apellacien van den wetten van Vlaenderen an guene zyde van de lelye, die by middel of zonder middel die verheven worde int hof van de parlemente te Parys, zullen verhandert ende verkeert worden in reformacien, ende zal hem executieren tghewysde, in alzo varre alst reparabel es ter diffautive up de cause, naer de ordenancie die om welvaren ende coers van den coopmanschepe int voorzeyde land van Vlaenderen, in tyden voorleden ghemaect hebben gheweeist.
Item, by dezen payse es ghedaen abolycien generale rappeel van allen bannen, ende defauten ende continuacien der subiecten van de eender partye ende van de andre, ende van alle zaken criminele of delicten, die men hem zoude moghen anleggen, te wetene, dat den coninc by de vuldermacht ende kueninclicke auctoriteyt ghegeven heeift, ende ooc gheeift abolicie generale alle de dienaren ende honderzaten, also wel van den lande van Bourgonie als van harwaerds over, ende van helders die ghehouden hebben de partye van wylen hartoghe Kaerle, myne vrau Marie zyne dochter, van mynen heere den hertoghe ende van mynen heere zyne kindren, van alle manieren van zaken ghedaen ende gheperpetreert sichtent beghansele van der orloghen van den voorseyden hertoghe Kaerle, tsy in te hebbene ghehouden de voorseyde partye zelve ghedient te hebbene, ende gheweeist te heb- | |
| |
bene in ambassaden voor hemlieden in Ingheland, by den hertoghe van Bertaengen of elders, of hemlieden ghewapent te hebbene ende ghediend in de oorloghe tieghen den coninc, gheraden, gheholpen ende gefavoriseert by fayten, by woorden of by gescriften, de pertye oft querele van den voorseyden hertoghe ende hertoginnen, gheweeist hebben teghen hemlieden eeden, of belooften, of in eeneghe andre manieren, hoe datzy of wesen mach, gheoffenciert ende ghedelinqueert jeghen den coninc, ende verstelt hemlieden, ende schelt quyte ende vergeeift den coninc alle offencien, parame corporele ende civile, midsgaders alle peinie ende amenden ghewyst in tyden voorleden, imposeerende hier up silencie perpetuele zyner prouve, zonder dat van nooden zy eenich van den voorseyden subiecten ende dienaers hier of te vercrighene andre abolicie ende perdoen int particuliere, ende niet min die hier of brieven begheeren zullen, zullenze hebben zonder cost.
Item, ende ghelike abolicien presenteert te doene, ende doet myne voorseyden heere, den hertoghe, om te vergevene die ghehouden hebben de partye van den coninc.
Item, dat de subiecten ende de dienaers van eender partye ende van de andre, alzo wel prelaten, capelanen, edele, lichame van steden, gemeenten ende de particuliere van wat state of condicie dat zy zyn, zullen wederkeeren by hueren dignitete, beneficien, leenen, landen, eerlicheden ende andre herven, pennynghen van herven, ervelicke renten ende lyf renten, die de princhen schuldich syn, als de ghuene dien men schuldich es mynen heere van Haves up de domeynen van Hamiens, ende ooc by lichamen van steden ende particuliere, omme daer of te posseseerne ende te ghebrukene, van den daghe van payse, in zulken staet als zy die vinden zullen, dats te verstane die keeren zullen wil- | |
| |
len theuren goede, by dezen payse zullen gehouden weezen in zulken possesse en ghebruczamichede van hueren dignitete, beneficien ende in de goedynghen, als zy waren voor dbelet daer up ghecommen by den oorloghen, zonder dat men hemlieden zal moghen obicieren interrupcie van possessyen of prescripsye om den tyt dat oorloghen gheduerd heeift, van datse beghonste by tyden van den voorzeyden hertoghe Kaerle, en dit niet tyeghenstaende eene giften of disposicien, te tyde of te eeweghe daghe, ghedaen in den contraryen, by den coninc in zyne party of by mynen heere hertoghe of hertoginne int huere, noch eenich declaracie van consistancie, also wel van de eendre partye als van de andre, omme de welvaerd van dezen payse zullen ghedaen zyn te niete, ende verclaerst moghen, niet tieghenstaende ooc eeneghe vercoopynghe van den zelven erven of lossynghe van den voorseyden renten ghedaen, geduerende de oorloghe, by den gonnen of andere gonne, die de giften ghehad hebben van den voorzeyden erven of renten.
Item, of ooc eeneghe erven of renten hebben vercocht gheweeist by decrete, omme schulden gheypotiqueert, daer of dat de schuldenaers weesen mochten in partye contrarie, de voorzeyde schuldeneers of huerleden erve zullen moghen wederkeeren terstont, naer de voorseyde pays, an huerleder erve alzo vercocht, mids vuldoen binnen den jare vander sculd, datze vercocht zoude weezen alleenlic, ende indien zy niet vuldaen en hadden bin den voorseyden tyde, decreyt zal bliven in zyn cracht en zal wederkeeren met vullen rechte de copere in zyn possesse, maer indyen de proprietaris wilde wederlegghen ende sustineren tieghen de scult, hy zal daer toe ontfanghen weesen mids nantisatie de pennynghen als of hy daer presend gheweeist hadde, ten ware dat by den voorseyden adiudicacie van decrete eeneghe renten hadden gheas- | |
| |
zyneert ghezyn, de zelve renten zullen ten daghe van dezen payse, weder ghestelt weezen in haer loop als van te vooren.
Item, of de sculden om tpayement van den welcken men gheprocedeert hadde ter vercopynghe van erven van den gonnen die waren in pertye contrarye, waren pour personel, maer gheypotiqueert daer of dat de gifte ghedaen ware by recompensie in de partye daer de sculdenare woonachtich ware, ende de zelve sculdenare zal wederkeeren tsynder erve also vercocht, zonder te restitueeren de princepale pennynghen noch andre zaken, den copre van de voorseyde erve, of van hem cauze hebbende.
Item, in al andre manieren geestelic ende proplave daer ghegeven zyn eeneghe fenten of contumacien thiegens de ghuene weesende in pertye contrarye, zy zullen hem muegen purgieren binnen den jare tieghens wyen dat die vercreghen worden.
Item, de honderzaten van de eendre pertye ende van de andre, zullen wederkeeren toot hueren goede honroerende, tewetene, also wel de gonne dar of zy ghebruuct voor de divize beghunnen, by tyden van wylen hertoghe Kaerle, als de gonne die hemlieden sichtent verstorven zyn, ende ghebuert; al waert zo dat de doode daer of commen zoude de voorzeyde goedynghe ware ghebuert of dat de zelve goedynghen gheleghen waren in partyen contrarye daer hem zyn maech gehouden hadde zonder dat men zoude moghen obicieren den erfghename, dat zynen voorzate viand ghestorven ware van den prinche honder wien hy ghestelt hadde zyn goedynghe, of in dienste van orloghe, tieghens hem of den zelven erfgename, dat hy inhabel ware te succedeerne, by dat zy zouden onderhouden hebben pertye contrarye van de plecke, daer de voorzeyde goedinghe voorscreven waren.
Item, als van de vruchten ende upheffene van de erven en
| |
| |
renten al dat upghegeven es geweeist of ghegeven, sichtent dbeghunsele van der divizen van den voorzeyden hertoghe Kaerle, toten dage van den payse, by mandementen van princhen, hueren stedehouderen of ghecommitteerden, zal blyven gheheven ende ghegeven, ende ne zal daer of nemmermeer vervolch ghedaen worden tieghen den commissarizen, die hem daer of honderwonden hebben, noch de gonne diese ontfanghen hebben of die daer of gheprofeteert hebben, noch tiegen den gonnen diese betaelt ende vuldaen hebben.
Item, als van de achterstellen van de renten ende pachten daer of dat de terminen verschenen zyn, of van ghevallen pachte, die noch niet ghegeven en zyn, ten hende dat gheweert zy alle manieren van processen, zy zullen bliven den ghonen dien daer of gifte hebben van den prinche.
Item, intschelicx alle sculden de persoonen zyn ghegeven by den prinche of by hueren stedehoudere, alwaert zo datter niet of ghegeven en waere, zullen bliven ten prophyte van den ghonen die daer of de gifte ghehat zullen hebben, ende als van andre zaken, dat nobiliaire es, wat gifte dat daer of ghedaen es gheweeist, zyn die maer ghegeven of dat daer of proces sy, tgheund dat men daer of vinden zal naer den pays ghepubliert, zal toebehooren den ghonen die voorseyde goedynghe toe behoorden voor dhoorloghe, ende zullenze moghen nemen ende upheffen al omme waer zy die vinden zullen, zonder dat men hemlieden zal moghen hier in eenich belet doen om wat occasoen of zake dat zy.
Item, dat honder de generalichheyt van dezen tractate, mynen voorzeyden heere den hertoghe van Oosterike ende zyne voorseyde kindren zullen zyn ende bliven quite, ende ontslegen van allen sculden die zy schuldich moghen wezen, den ghonnen die ghehouden hebben de pertye contrarye, ende ne zullen de voorseyde schuldenaers, omme wat zaken
| |
| |
de voorseyde schulden procederen, nemmermeer daer of moghen vervolch doen, tieghen mynen voorseyden heere den hertoghe, mynheeren zyne kindren, behoudens altoos de renten ende pencioen die zy betalen zullen van dezen daghe voorwaerts.
Item, dat omme de wederkeerne te zinen, niement ne zullen ghehouden worden eenich eed te doene den prinche of heeren, honder wien de voorzeyde goedynghen worden zullen huutghesteken, de leenhouders ende vassalen, die ghehouden worden te doene den eed van fideliteyt omme huer leenen, welcken eed hem nochtans doen zal moghen by procureur hebbende speciale macht ende bevel,
| |
Andere artykelen ghetraytiert huuten payse van Francfoort, ooc dienende om tverstant van zeker artikelen begrepen in de pays van Tours.
Ende in alzo varre alst angaet de ghevanghenen dienaers van den zelven heere coninc van de Romeynen, die ghevanghen waren te Brugghe die alsnu te Gent zyn, of helders, den coninc zal zo vele doen, datze zullen ghedelevereerd worden gheheel ende al quyte van allen composycien ende costen, ende indien eeneghe alsnu ghecompozeerd hadden of fynancien betaelt, zy zullen daerof gherembourseert worden.
Item, bovendien den voorseyden heer coninc van de Romeynen zal weder nemen in zyne goedwillichheyt mynheer Phylips van Cleven, ende zal hem te ghedaghene te ghebruuckene van de lande ende goedynghen die hem moghen ancleven ende toebehoren, alzo wel van zientweghe, als ter cause van mir vrauwe zinen wive.
| |
| |
Item, elc zal commen up zyn goedynghen onroerende in zulken state, als hy die vinden zal, ende als van den roerende goedynghen, ende ooc intschelicx van materye beneficiaten, met al datter voord ancleven mach zal ghedaen zyn, als in den pays van 82 begrepen staet.
einde.
|
|
Auteursrechtvrij