Het boeck van al 't gene datter geschiedt is binnen Brugghe

(1859)–Anoniem Het boeck van al 't gene datter geschiedt is binnen Brugghe– rechtenstatus


[1489] [1489-1-4] Item up den 4^den dach in Laumaend anno 89, doe reed huuter stede van Brugghe, mynheer Aernoud Pychaved als
[pagina 257]
schoudheeten van Brugghe zynde up dien tyd, hy reed huuter Burch dweers hover de groote Merct, duer de strate van Sint Amand, ter Smedepoorten huut, om naer der stede van Houdenburch, om te treckene tiegen de vianden van der stede van Brugghe, ende hy reed ten goedoene van der goeder stede van Brugghe ende ter welvaerd van den lande van Vlaendren, om de quaedwillighe des lands van Vlaendren te dwynghene van harer quaedwillichede, ende hy was in ghezelschepe metten peerde ende te voed, 500 mannen, ghestoet, ghewapend alzo ter oorloghe dient, ende trocken alzo met engyenen, met thenten, met haecsen, spaden, hauweelen ende al dat daer toe diend. Item up den 4^den dach in Laumaend, anno 89, doe zo verdranc eenen man tusschen der Kuenyncxbrugge ende Sint Jansbrugge, tsnavends tusschen den 7 ende den 8 hueren, ende het was een patinemakers cnape, ende hy woende in de Roodstrate. God hebbe zyn ziele ende alle zielen daer God bede vooren begeerd. Amen. Ende hy hiet Jooris Reygier.
[1489-1-6] Item up den 6^den dach in Laumaend, anno 89, doe zo was te Brugghe ghevischt eenen verdroncken man by tsKuenyncx brugge, ende was eenen scipman van den Damme, ende hy verdranc up Sinte Stevins dach, dat was dsdaechs naer den helegen Kersdach, ende hy hiet Michiel van den Diepmare.
[1489-1-15] Item up den 15^den dach in Laumaend, anno 89, doe was binder stede van Brugghe, in den Burch een schavood ghemaect, ende daer was execucye up ghedaen van den live eenen gheheeten Willem Escausses ende metten zweerde ghebrocht van levenden live ter dood. God hebbe zyn ziele. Amen. Item up den 15^den dach in Laumaend, anno 89, doe zo
[pagina 258]
dede monster mynheere Van Vletre, binder stede van Brugghe, int clooster van den Eechoute, van 100 ende 50 mannen, om daer mede te treckene westwaerd tooter stede van Houdenburch, tiegen de vianden ende de quaedwillende van der stede van Brugghe. Item up den 15^sten dach in Laumaend, anno 89, doe quamen bin der stede van Brugghe, ter Sinte Katelinepoorte in, edele eerweerdege persoonen als hambassade van den edelen eerweerdeghen kuenync van Ingeland, ende quamen met 40 peerden, ende de nottable wed van der stede van Brugghe, ende menich ander nottabel poorter der voorseyde stede, die was daer ooc mede te peerde, nottabelicken ende chierlicken, om de heere van der stede van Brugghe, te helpene te verwaerne, ende alzo waren zy ghebrocht ter herberge, ten huuse van Jan Kaneel, staende tiegen hover de Coushalle.
[1489-1-17] Item up den 17^sten dach in Laumaend, anno 89, doe vertrac tsnuchtens ten 7 hueren, mynheere Van Vletre, huuter stede van Brugghe, ter Smede poorten huut, met 100 mannen ghewapend ter wapene, ende ten harnassche alzo ter oorloghe toebehoord, ende reed alzo naer de stede van Houdenburch. Item up den 17^den dach in Laumaend, anno 89, doe zo was binder stede van Brugghe, eene vrauwe ghestelt up een schavood, in den Burch, zittende up een stoelkin ghebonden de handen, up haren ric, met eender coorde, ende dat ter cause van haer meshuuzen, ende zoe hiet Geertruud, ende ze was ghebannen huuten lande van Vlaendren zonder tyd, up den pit.
[1489-1-24] Item up den 24^sten dach in Laumaend, anno 89, doe zo was binder stede van Brugghe, in den Burch, eenen joncknecht naect gebonden an den pylaer, by den Steenstegre,
[pagina 259]
ende hy was daer ghegeeselt met roeden, ende dat by justicien van der wed van den lande van den vrye.
[1489-1-26] Item up den 26^sten dach in Laumaend, anno 89, doe quam mynheere van den Gruuthuuse huut zynen hove, staende binder stede van Brugghe, by der kerke van Onzer Vrauwe, hy quam ghereden up een zward peerdekin, met zeere schonen, princhelicken state, als capiteyn van der stede van Brugghe, ende hy reed buuten der Smede poorte tusschen den clooster van der Magdeleene, ende de kerke van Sinte Bave, ende daer was monster ghedaen van den volcke van buuten, van den lande van den vryen, ende daer passeerde monster wel 1500 mannen, ten goedoene den lande van Vlaendren ende ter welvaerd van der stede van Brugghe, by der gracien van Gode almachtich, ghebenedyt; ende daer was ooc, mynheere Van Vletre, ende ooc daer was den heere ende de wed van der stede van Brugghe.
[1489-1-28] Item up den 28^sten dach in Laumaend, anno 89, doe zo was ghebrocht huuter stede van Gend bin der stede van Brugghe, een groot yzeren engyen, ende het was ghebrocht te schepe, toot honder de crane van der stede van Brugghe, ende daer zo wast up gewonden, ende te waghene ghedaen, ende daer was ooc een metalen serpentine ende noch een mindre.
[1489-1-30] Item up den 30^sten dach in Laumaend, anno 89, doe waren ter stede huut ghevoert twee manoofden, up eenen waghen, ter Smede poorten huut, van der stede van Brugghe, by der Roode Roede, ende waren gherecht by den 3 leden van den lande van Vlaendren, in de stede van Houdenburch ghehanghen ende verworcht.
[1489-1-31] Item up den laetsten dach in Laumaend, anno 89, doe quamen de vianden van der stede van Brugghe, huuter stede van Duunkerke, Nyeupoorte ende huuten Dicxmuude,
[pagina 260]
ende quamen toot voor der Smedepoorte van der stede van Brugghe, met ghewapender hand, ende vynghen ende quetsten ende vermoorden den schamelen landsman, ten quetse ende ten schimpe van der stede van Brugghe.
[1489-2-1] Item up den 1^sten dach in Spurkelle, anno 89, doe zo was tvoorzeyde engyen van der stede van Gend ghestelt te Brugghe up de groote merkt, voor de halle van der voorzeyde stede, in den mond van der Steenstrate, ende was tvoorzeyde engyen dat up ghewonden was, ter Cranebrugge, den 28^sten dach in Laumaend, anno 89, dat voorzeyde engyen, ende een voorzeyde engyen van Brugghe, twelc hiet Sint Jooris, waren ghevoerd huuter stede van Brugghe, om naer der stede van Houdenburch, ende int voorzeyde engyen van der stede van Gend, waren ghespannen 24 peerden, ende int voorzeyde engyen van der stede van Brugghe, Sint Jooris gheheeten, waren ghespannen 20 peerden.
[1489-2-2] Item up den 2^den dach in Spurkele, anno 89, doe zo waren te waghene huut ghevoerd ende up dien zelven waghen ghebonden met coorden, 4 mannen, ende ghevoerd huuter loove van den Schoudheeten, ende van daer, ter Smedepoorten huut, als om justicye daer hover te doene.
[1489-2-4] Item up den 4^den dach in Spurkelle, anno 89, doe zo waren weder ingebrocht, de 2 groote engyenen, bin der stede van Brugghe, de zelve engyene die huuter stede van Brugghe ghevoerd waren, den eersten dach van Sporkele westwaerder, ende tengyen dat Sint Jooris heet, dat was ghevoerd int sprinchenhof, ende tgroote engyen van Gend, dat was ghevoerd ter crane.
[1489-2-6] Item up den 6^den dach in Spurkelle, anno 89, doe zo was binder stede van Brugghe, ghehouden ende ghedregen processyen generael, ten clooster van den Freminueren, ende in die tjeghewoordege processye zo was ghedregen,
[pagina 261]
den weerdegen fyerter, ende glorieux lichame van Sente Bazelis, die rustend es in de kerke van Sinte Donaes, binnen Brugghe; daer was ooc mede ghedregen, den weerdegen fyerter ende glorieux lichame, die rustend es in de kerke van Ons Lieve Vrauwe, binnen Brugghe; voord zo was daer mede ghedregen den weerdegen fyerter ende glorieux lichame, van Sinte Loy, die rustend es in de kerke van Sinte Salvator, binnen Brugghe, ende by elcken fyerter, waren ghedregen, twee barnende toordsen, elc van zynder kerke weghe, ende by den fyerter van Sinte Bazelis, zo waren ghedregen 4 barnende toordsen van der stede weghe, ende an elke toordse eenen schild metter wapene, van der stede van Brugghe, ende het dede tofficye den eerweerdegen Suffregaen van den busschop van Doornicke, busscop van Sarepten, gheheeten dheer Gillis de Baremaker.
[1489-2-9] Item up den 9^den dach in Spurkele, anno 89, doe zo was binder stede van Brugghe, up de groote merct, up een schavood, twee mannen execucye ghedaen metten zweerde, van haren live, ende alzo ghebrocht van levenden live ter doot, ter cause, van harer grooter meshuuse, ende mynheere van Lichtervelde als bailju van Brugghe, die dede de justicye als heere, den eenen die hiet Cornelis Heyndricx, die men hiet de schoelje, in de wandelynghe, ende hy was gheboren van Andworpe, ende dander die hiet Jan van der Oochstal, den turfdrager, ende was gheboorne van Sinte Beernaerd, buuten Andworpen, ende den heere voorseyd, die consenteerde hem beede, elc zyn kerchof. God hebbe alle zielen. Amen.
[1489-2-10] Item up den 10^den dach in Spurkele, anno 89, doe zo was buuten der stede van Brugghe, tusschen der kerke van Sinte Cruus ende der spyckers muelne, naer der noene, ten 4 hueren, eenen man ghequetst ende ghegrieft van zynen
[pagina 262]
live, zo dat hy terstond daer of quam van levenden live ter doot, ende hy hiet Adriaen de Pape. God hebbe zyn ziele; ende die den doodslach dede, die hiet Pieter Heyns. God wild hem vergheven. Amen.
[1489-2-15] Item up den 15^den dach in Spurkele, anno 89, doe zo was bin der stede van Brugghe, bevel ende ghebod huut ghegeven, achter de strate, met eenen trompette, hoe datse alle die in de gagie ende saudeye waren, datse zouden hem alle up stellen te peerde ende te voed, elc honder sinen capiteyn ende oofdman, ende zouden trecken om naer der stede van Houdenburch, ende up den zelven nacht volgende van den zelven dach, als den 16^den dach bedaechde van der maend voorzeyt, zo waren ghevoerd huuter stede van Brugghe, zeere veele engyenen groot ende cleene, om naer der stede van Houdenburch, ende waren ghevoerd ter Bouveryepoorten huut.
[1489-2-17] Item up den 17^sten dach in Spurkele, anno 89, als den 18^den dach bedaechde, by nachte ten 11 ende den 12 hueren, doe zo voeren huuter stede van Brugghe 16 wagene, ter Smede poorten huut met gheschotte, met engyenen, poeder ende steenen, ende voord dat daer toe diend, ende ooc eene ghemaecte brugge, lanc ende breed zynde 100 ende 46 voeten, om hover water mede te gane, ende men voerde dit al, om naer de stede van Houdenburch, ende van daer te Dixmuude.
[1489-2-18] Item up den 18^den dach in Spurkele, anno 89, tsnavens ten 5 hueren, doe was binder stede van Brugghe, up de Groote Mert, van eenen man ende was eenen Pycaerd huuten lande van Pycaerdyen, van hem zo was execucie ghedaen metten zweerde, ende alzo ghebrocht van levenden live ter dood, ende de heere gaf hem zyn kerchof by gracien, ende hy was begraven in Sint Jans huus.

[pagina 263]
[1489-2-20] Item up den 20^sten dach in Spurkele, anno 89, doe zo waren te Brugghe ghehouden ende ghedregen processyen generael, ende deze weerdeghe processyen waren ghedregen huuter Burch, duer de Oochstrate, hover dhoude Muelenbrugge, voorby tclooster van den Predicaren, streckende voorby den Braemberch, hover de groote Eechoudbrugghe, duer de Wulle strate, toot up de Groote Merct, daer zo gynghen de voorzeyde processyen rondomme de merct, ende quamen alle met haren crucen, weder toot voor de Halle, daer dat stond gheoordeneerd eene schoone stacie, een trezoor ghedect ende becleed met goedin lakenen, ende up elc hende eenen zelveren kandelare, met eender barnende keerse, ende daer tusschen zo was ghestelt ende ghedaen rusten, den weerdegen fierter ende glorieux lichame van Sinte Donaes, de welke mede omme gedregen was, in de voorseyde processye, ter heere van Gode ende den gloryeuzen zandt, zo vielen alle de ghemeene colege van den priesters hover haerleder cnyen, den heere ende de wet, ende voord alle den mannen ende vrouwen die up de voorzeyde groote merct waren, Gode biddende om gracie, ende daer zo was ghezongen, ter heeren van den almuegenden God ende den gloryeuzen zand, hantiffonen, collecten, oracien, al zulk als daer toe diend, dat ghedaen zynde, zo ghyngen de voorzeyde processyen weder hover de voorseyde merct, hover de Wisselbrugghe, voorby de kerke van Sinte Pieter, hover de plaets Maubeerd, toot voor Blanckenberge ende alzo in den Burch, toot in de kerke van Sinte Donaes, ende daer was den dienst ghedaen; voord in deze voorzeyde devote processye, zo ghync in voorme van hamende, met eender barnende toordse in zyn handen, eenen gheheeten Antheunis Tayaerd, een zwarte leder tauwer, ende hy bleef ooc knyelende voor den hoogen houtaer, alzo langhe als den dienst van de messe
[pagina 264]
gheduerde, ende hy moeste doe daer zyn toordse laten der kerke. Item voord up den zelven dach, voorseyd 20^sten in Spurkele, anno 89, doe zo quam tsnuchten, ten 7 hueren, mynheere van den Gruuthuuse, in den Burch, up den schepenen huus, ende men vergaderde oofdmannen van der stede van Brugghe, ende alle de dekenen ende elken met zynen eede, beede de burchmeesters, schepenen ende raden van der stede van Brugghe, ende daer dede mynheere van den Gruuthuuze zinen eed op thelege ewangelye in eenen mesbouc, ende up thelich Cruce, goed ende ghetrauwe te zine de jongen hertoge Phylips grave van Vlaendren, onzen harden, gheduchten heere ende prinche, voord dat ghedaen zynde, zo dede alzo achtervolgende den zelven heed, elken zinen heed, alle de voorseide oofdmannen van der stede van Brugghe, ende daer naer achtervolgende elcken deken met zinen eed, deden aldaer al den zelven ghelyken eed, den zelven hertoghe Phylips, ende zinen lande van Vlaendren, ende zynder goede stede van Brugghe, goed ende ghetrauwe te zine, ende de goede lieden van der wed van der stede van Brugghe, die zaten daer up de camer van schepenen huuze zeere eerlic, chierlic ende nottabelic ende met ghemanierlicken state, ende den heere van den Gruuthuuse, meer Jan van Nyeuwenhove, als burchmeester van schepenen, ende Antheunis Loschaerd, als burchmeester van den Coerse, al inder ghelyker manieren.
[1489-2-23] Item up den 23^sten dach in Spurkele, anno 89, doe zo was tghemeente van der stede van Brugghe, dat es den ghemeenen buuc van der stede voorseid, alzo wel den poorters van der voorseide stede, als de ambochten, om te zweerne, ende al den zelven ghelyken heet te doene, ende te houdene, ende thonderhoudene alle den zelven heet, die
[pagina 265]
belooft ende ghezwooren was, up den 20^sten dach, up der schepenen huus, voor alle de nottabele voorzeyd, van oofdmannen en van de dekenen, ende van haren heed, ende honder de poorterye ende elc led van den ambochten, zo quamen 2 schepenen ende eenen clerc, ende alzo dede elc zinen heed, in kennesse van schepenen. Item noch voord, up den 23^sten dach in Spurkele, anno 89, zo was binder stede van Brugghe eene trompet ghesteken ende het waren gheoordeneerd 48 roode caproenen, ende die waren ghedachvaerd te comene, ten hove van mynheere van den Gruuthuuse, omme voor hem monster te passeerne, alzo zy deden, ende dat omme te wakene, toot allen poorten van der stede, 2 by daghe ende 2 by nachte. Item up den 23^sten dach, tsnachs by nachte, als den 24^sten dach bedaechde, doe zo warender eenege dyversche quaetwillende der heleger kerke, der kerke van Sinte Salvator binnen Brugghe, ende die zyn by nachte gheclomen in de voorzeyde kerke, ende hebben daer ghestolen den pelder van Sinte Pieter ende van Sinte Pauwels, den welken pelder was nyeu zward fluweel ongheborduerd ende onbewrocht, ende binnen ghevoedert met blaeu toole.
[1489-2-24] Item up den 24^sten dach in Spurkele, anno 89, doe zo was binder stede van Brugghe, een schavoot ghemaect, in den Burch, ende dat ter cause om 2 mannen die daer up ghestelt waren, den eenen hiet Jacop van den Bussche, gheheeten in de wandelynghe Cootkin, ende die was ghesteken daer duer zyn tonghe met eenen gloyenden yzere, ter cause van zeker quade onnomelicke heede, die hy ghesproken ende ghezwooren hadde, ende den andren die hiet Loy Hemmins, die was daer ooc ghestelt by hem, maer niet anders ghedaen.
[1489-2-28] Item up den 28^sten dach in Spurkele, anno 89, doe zo
[pagina 266]
was te Brugghe een schavoot ghemaect in den Burch, ende daer up zo was execucie ghedaen, metten zweerde, ende alzo ghebrocht van levenden live ter doot, eene gheheeten Heyndric de Vos, of Vos Reynaerd, of Lossche Heyne, in de wandelynghe, de Scheppers cnape, ende hy voorseyd was ghevoerd buuten der Smedepoorte, ende daer gherecht up een wiel, als van doodslaghe ende eenen straetroover. God hebbe zyn ziel. Amen. Item noch up den 28^sten dach in Spurkele, anno 89, doe zo was binder stede van Brugghe, ter hallen huut een ghebod ghepuplyerd ende te kennen ghegeven, hoe dat by den buscop van Doornicke ende den Suffregaen busschop van Sarepten, ende voord alle de ghemeene colege van den kerkelicken personen, dat elc, ende alle menschen zouden mueghen zuvel heten, dien vastene gheduerende, tes te verstane, melc, bueter ende caes, zonder de laetste weke, de cause van de groter dierte.
[1489-3-3] Item up den 3^den dach in Meerte, anno 89, voor den noene, ten 8 hueren, doe vertrac mynheere van den Gruuthuuze huuter stede van Brugghe, ter Gendpoorten huut, om naer der stede van Gend, met zeere schoone, princhelicken state. God laet ons allen duecht gheschien.
[1489-3-6] Item up den 6^den dach in Maerte, anno 89, doe gheschiede een groot ghevecht, binder stede van Brugghe, ten huuse gheheeten in Ypre, staende by de Cranebrugge, int welke ghevecht worde ghequetst ende ghegrieft, van zynen live zo dat hy daer quam van levenden live ter dood, eenen gheheeten Thomaes de Messemaker, ende het dede hem, een gheheeten Jennyn van Hee, van Gend.
[1489-3-14] Item up den 14^den dach in Meerte, anno 89, doe zo was binder stede van Brugghe, in de Ezelstrate, an de noordzyde van der strate, grooten nood van brande, om daer groot
[pagina 267]
messchief of te ghebuerne, maer by der gracien van Gode almachtich, ghebenedyd, tvergync zoetelic. Amen. Item up den 14^den dach in Meerte, anno 89, doe zo was binder stede van Brugghe ghewesen by der wet van der stede voorzeyd, eenen man de tunne te draghene, ende het was eenen schotte, ende die tunne drouch hy te zynder confuzie ende cleenichede, hover de groote merct 10 of 12 straten ter goedyncken van den heere ende der wet. Item noch up den 14^den dach in Meerte, anno 89, doe zo was ooc eene vrauwe den steen ghedaen draghen, ende dat ooc, by der wed ender justicie van der wed van der stede van Brugghe, ooc thuerer blamacie ende cleenichede.
[1489-3-16] Item up den 16^den dach in Maerte, anno 89, doe zo was binder stede van Brugghe, een schavood ghemaect in den Burch, ende daer so was up gestelt eenen gheheeten Antheunis Schevekin, van Kouckelare, een scheppers cnape; hy Antheunis die was daer up ghestelt, ende zyn handen ghebonden up zinen ric, an eenen stake, twee hueren, ende daer thenden zo was hy ghesteken duer zyn tonghe met eender helsene, ende daer thenden ghebannen 6 jaer, up zyn ooft, huuten lande van Vlaendren, ende dat by der wed van der stede van Brugghe.
[1489-3-21] Item up den 21^sten dach in Meerte, anno 89, doe zo was binder stede van Brugghe, een jonc knecht van 18 jaeren houd, naect ontcleed ende in den Burch ghebonden an een van den pylaren, staende by den steeger van der vanghenesse, met zyn handen up zyn ric, ende thaer van zinen oofde of gheschooren, ende een stic of ghesneden van zynder luchter hoore, ende daer ghegeeselt met roeden zeere ende vele, ende was van daer ondbonden, ende alzo al naect ghegeeselt huuter burch, duer de Oochstrate, over d'houde Muelenbrugge, lancx de langhe strate, ter Cruuspoorten
[pagina 268]
huut, ende was doe daer ghebannen 10 jaer, up de galge, als van dieften, ende dit al by der wet van der stede van Brugghe.
[1489-3-28] Item up den 28^sten dach in Maerte, anno 89, doe zo quamen tsnuchten ten 6 hueren, de vianden voor de Smedepoorte van der stede van Brugghe, ende quamen huuter stede van Dixmude, viand zynde van der stede van Brugghe, ende quamen daer ende vynghen den schamelen landsman, ende de peerden lieden, ende peerden vele, ende groote menichte, ende ooc zy quamen toot binnen den drayboome van der poorte, met ghespannen booghen, ende schooten ter stedewaerd in. Item noch up den 28^sten dach, anno 89, in Maerte, doe zo was te Brugghe in den Burch ghemaect een schavood ende daer was up ghedaen execucie metten zweerde, ende alzo ghebrocht van levende live ter doot, eenen gheheeten Loy Hemmins, ende den heere die gaf hem zin kerchof, by gracien, ende desen voorseyden Loy was ooc ghestelt te Brugghe, in den Burch, up een schavoot, ter cause van zynder meshuuze, die hy ghedaen hadde, ende dat was up den 24^sten dach in Spurkele, daer te vooren, anno voorseid. Item noch up den 28^sten dach in Meerte, anno 89, doe zo was ooc te Brugghe, in den Burch, up tzelve schavoot, daer den voorzeyden Loy up ontooft was, ten dage voorzeyd, ghegeeselt een bouve, een buerzesnyder ende 6 jaer ghebannen up de galge huuten lande van Vlaendren.
[1489-3-31] Item up den laetsten dach in Maerte, anno 89, doe vertrac mynheere den Schoutheeten van Brugghe, huuter stede van Brugghe, tsnavens ten 7 hueren, met 500 mannen tooter stede van Houdenburch ende tsanderdaechs so volchden 40 werclieden, temmerlieden, cuupers ende wielwerkers, ende voord al dat ter oorloge dient.

[pagina 269]
[1489-4-7] Item up den 7^den dach in April, anno 89, doe zo was binder stede van Brugghe, ghehouden ende ghedregen processye generael, ende in de voorseyde processye zo was mede omme ghedregen den weerdegen fierter ende glorieux lichame van Sinte Donaes, ende was alzo ghedregen huuter Burch, duer de Breyelstrate, up de Groote Merct, voor de Halle, ende daer was een stage ghestelt, becleed met goudenen lakenen, ende met ghewyeden dwalen, ende daer zo was up ghestelt te rustene den voorzeyden fierter van Sinte Donaes, ende daer zo was hy ghehavebeeid met ghebogenen knyen, met blooten oofden van menich hondert menschen die daer waren, voord daer waren ooc ghezongen loven anthyffenen, zulc als daertoe dienden, ende de stede van Brugghe, die hadde daer ooc mede gaende 6 barnende toordsen, ende an elke toordse hangende ende vastghemaect eenen schild, metter wapene van der stede van Brugghe: tlof daer alzo gedaen zynde, tglorieuze lichame voorzeyd up nemende, de voorzeyde processye gaende van voor de voorzeyde Halle toot Sinte Kartoffels kerke, tooten houcke van der Vlamync strate, voorby de kerke van Sint Pieter, hover de plaetse Maubeerd ende alzo tSinte Donaes weder in, ende up den zelven dach voor der noene, ten 9 hueren, voor thuut gaen van der voorseyde processye zo was de veinster van der Halle becleed met tappitserye, buuten ende binnen, ende daer zo quam mynheere den schoudheeten van der stede van Brugghe, ende mynheere den bailju van den brugschen vryen, ende den ambassade van den coninc van Ingheland, ende zinen eerhaud, ende daer zo was gheopenbaerd, ghepuplyerd ende te kennen ghegeven, pays, minne, vriendschepe tusschen den lande van Ingeland an deen zyde, ende den inwoonende van dien, ende den lande van Vlaendren, ende den inwoonende van dien hover dander zyde, dat alle maniere
[pagina 270]
van coopmanschepe zoude hebben haren vryen loop den termyn van 4 jaren, of emmer gheduerende tooter bejaerdhede van onzen jongen hertoge Phylips, erfachtich heere ende grave van Vlaendren, ende de bezegelthede van dien ende van beede den landen, ende de bezegelthede van meer Phylips van Cleven, ghezeyt mynheere van Marke, die waren daer ghetoocht ter voorseyde veinster huut: dit alzo ghedaen zynde, de heeren huuter voorzeyde veinster gaende, daer waren bereed 6 barnende toordsen ende an elke toordse hanghende der stede van Brugghe wapene; ende in dander veinster der boven, daer stonden der stede speeillieden ende speeilden daer ter heeren van Gode ende van Maria: Ave regina celorum: dat ghedaen zynde, mynheere den schoutheeten, ende mynheere den bailju voorzeyd, ende den ambassade voorzeyd, ghyngen al te zamen, eerlicken ende met ghemanierlicken state van daer toot Sinte Donaes in de kerke, ende daer was ghezongen ende ghespeeilt metter orgele, ten love van den almueghenden God, Te Deum laudamus, te Dominum confitemur, ende den voorzeyden ambassade, die hadden an eenen keerel, rood schaerlaken ghevoederd met marters, ende eenen rooden caproen ligghende up zyn schoudre, ooc rood schaerlaken, ende die ghevoedert met finen witten lasten, als eenen busschop als hy was.
[1489-4-9] Item up den 9^sten dach in April, anno 89, doe zo vertrac den edelen, eerweerdegen ambassade van Ingheland huuter stede van Brugghe, ter Smedepoorten huut, om naer de stede van Calays, ende hy hadde ghezyn binder stede van Brugghe 12 weken, ende hy reed alzo wech, met zeere schoonen state, ende mynheere van Lichtervelde, weesende bailju van den Brugschen Vryen, dede hem gheleede tooter stede van Houdenburch.
[1489-4-11] Item up den 11^sten dach in April, anno 89, doe zo reed
[pagina 271]
mynheere den Schoutheeten huuter stede van Brugghe, geheeten mons^r Aernoud Pychavet, hy reed tooter stede van Houdenburch ende der stede van Oostende, voord achtervolghende van dien, zo was binder stede van Brugghe een trompet ghesteken, alle die sauderye zouden willen winnen, datse hem zouden commen doen bescriven, ten clooster van den Eechoute, staende binder stede van Brugghe, ende voord achtervolghende van dien, zo was up den 13^den dach in de stede van Brugghe, tsnuchten ten 6 hueren, dat alle die hem hadden doen bescriven, datse zouden commen by der Smedepoorte, te Sinte Loys huus, men zouden daer haerleder geld gheven, om te volgene mynheere den Schoudheeten, ter plaetse voorzeyd.
[1489-4-13] Item up den 13^den dach in April, anno 89, doe ghyngen huuter stede van Brugghe, 200 ghezellen van oorloogen, ter Smedepoorten huut, om naer der stede van Houdenburch.
[1489-4-15] Item up den 15^den dach in April, anno 89, doe zo was te Brugghe, up de groote merkt, up een schavoot, execucie ghedaen metten zweerde, ende alzo ghebrocht van levenden live ter dood, eenen ghehieten Willem, ende hy was van Zomergem by Gend; ende hy hadde van der stede van Brugghe saudery ontfangen, ende was boven dyen hoverghegaen honder de vianden die der stede van Brugghe contrarye waren, ende hy woorde ooc contrarye vander stede van Brugghe. God hebbe zyn ziele. Item voord noch up den 15^den dach in April, anno 89, zo drougen twee vrauwennamen binder stede van Brugghe den steen, ende eene vrauwe die drouch de tunne, ende die voorzeyde tunne was beneden up de voeten behangen int ronde met coebellen.
[1489-4-23] Item up den 23^sten dach in April, anno 89, zo was huuter stede van Brugghe ghevoerd eene brugge, de welke brugge
[pagina 272]
ghemaect was binder stede van Brugghe, in een hof gheheeten int wallekin, staende by der Cruuspoorte; de voorzeyde brugge daer ghemaect was, ende meer ander ghereeschepe der oorlogen anclevende ende menich ander schoon engyen der mede, het was ghevoerd huuter stede voorzeyd, ten dage voorseyd, ter Smedepoorten huut, tooter stede van Houdenburch, om te wederstane de vianden van der stede van Brugghe, de welke waren int jaer ende ten dage voorseyd, binder stede van Dixmuude ende van der Nyeupoort ende ooc mons^r Aernoud Pychavet trac ooc mede, als capitein ende man van wapene, om dbhehoud ende welvaerd den lande van Vlaendren ende der stede van Brugghe, ende hy voorseyd was, ten dage voorseyd, Schoudheeten van der stede van Brugghe.
[1489-4-25] Item up den 25^sten dach in April, anno 89, doe zo was binder stede van Brugghe, ter Bouverye poorte, gheprouft een groot zwaer engyen, ende daer waren mede gheschoten dry schoten, ende hem was daer den name ghegeven David.
[1489-4-28] Item up den 28^sten dach in April, anno 89, doe was eenen zager dood ghesteken in de Steenstrate, ende hy hiet Karstiaen, ende hy was begraven tOnzer Liever Vrauwen, in de stede van Brugghe, ende het dede hem eenen cuuper.
[1489-4-30] Item up den laetsten dach in April, anno 89, doe zo was binder stede van Brugghe, up de Groote Merct, up een schavoot eenen ghexecuteerd van zynen live, metten zweerde, ende hy hiet Jacop Bollaerd, ende hy was gheboren van Moerkerke, ende hy was hangeman ende houdslager van Biervlied, ende dien zelven Jacop voorseyd was in de stede van Brugghe ghebrocht up eenen wagen, ghebonden met coorden, den 28^sten dach van April, anno 89. Item up den laetsten dach in April, anno 89, doe zo was in de stede van Brugghe, eenen man voor tprinchenhof,
[pagina 273]
zyn hand of gehauwen, by ghevechte ende het dede een jonc knecht. Item achtervolgende van den laetsten dach van April, doe ontooft was Jacob Bollaerd voorzeyd, zo was doe noch eenen ghebrocht ten voorzeyden schavoote om ooc execucie te doene van zinen live, maer die hadde gracie; gracie wil ons allen God verleenen. Amen.
[1489-5-2] Item up den 2^den dach in Meye, anno 89, doe zo quamen binder stede van Brugghe van der stede van Cortricke, mynheere van den Gruuthuuse, ende mynheere van Vletre, quamen beede te zamen in te Sinte Cateline poorte omtrend met 100 peerden, ende mynheere van den Gruuthuuse die hadde als doe ghezyn huuter stede van Brugghe 8 weken ende 4 dagen.
[1489-5-3] Item up den 3^den dach in Meye, anno 89, doe zo ne stonden binder stede van Brugghe niet meer dan 3 poorten hoopen, deene was de Speye poorte, de Gendpoorte ende de Smede poorte, ende dat ter cause van den quadwillenden van der stede van Brugghe, vianden zynde van der stede van Brugghe, ende de stede van Brugghe hadde ghecleed al nyeu keerels ten dage voorzeyd, den 3^den dach van Meye, de 48 roode caproenen, de welke ghecooren waren den 23^sten dach in Spurkele, anno voorseyd, ende an elken keerel, an de luchter mauwe, 2 linten, rood ende wit.
[1489-5-7] Item up den 7^den dach in Meye, anno 89, doe zo was binder stede van Brugghe groote vreeze, zorge ende ancxt van brande in de Wapenmakersstrate, by een huus gheheeten in de Stegereep, an de zyde van den burchgrave, maer God lof het vergync metter minster schade ende quets.
[1489-5-9] Item up den 9^sten in Meye, anno 89, doe was tghemeente van der stede van Brugghe vergadert elc int sine, naer d'houde costume, om zeker zaken, pointen ende artikelen die myn-
[pagina 274]
heere van den Gruuthuuse begeerde an de stede van Brugghe, ende hy gync zelve, in zinen persoon, van lede te lede.
[1489-5-11] Item up den 11^sten dach in Meye, anno 89, doe zo waren eeneghe quaedwillende van der stede van Brugghe, zy quamen van der stede van Dixmuude, ende quamen toot voor de Smedepoorte van der stede van Brugghe, ende sloughen de lieden dood, ende vyngen de lieden, ende vynghen veeil peerden ende coyen, ende vynghen ooc 2 achouters van der stede van Brugghe. Item up den 11^sten dach in Meye, anno 89, doe zo was gheslegen trompet binder stede van Brugghe, dat alle mannen te peerde hem zouden commen doen bescriven int hof van mynheere van den Gruuthuuse.
[1489-5-18] Item up den 18^den dach in Meye, anno 89, doe zo was binder stede van Brugghe, met den gheboode van der stede, vry consent ghegeven te vercoopene binder stede voorseyd, vleeschs, vischs ende brood, twelc dat gheduerde toot den 14^den dach in Meye, twelc es 34 weken, ende den 14^den dach in Meye voorzeyd, doe zo wast weder of ende te nieten gheroupen, ooc metten ghebode van der stede voorseid, twelc daer veele lieden om waren zeere mespayt.
[1489-5-13] Item up den 13^den dach in Meye, anno 89, doe zo was binder stede van Brugghe ghebooden metten trompette, dat alle man te peerd hem zoude commen doen bescriven ten hoove van mynheere van den Gruuthuuse.
[1489-5-14] Item up den 14^den dach in Meye, anno 89, doe zo was te Brugghe een ghebod ghedaen metter klocke, ende metten heere ende metten wed, dat alle die saud wilden winnen, datse te voed zouden commen ten hoove van mynheer van den Gruuthuuse, zy zouden hebben 8 grooten alle daghe, ende betaelt een maend te vooren.
[1489-5-16] Item up den 16^den dach in Meye, anno 89, doe zo was
[pagina 275]
binder stede van Brugghe, in den Burch, voor thuus van den vryen eenen bloc ghestelt in d'heerde ende daer zo was eenen man van buuten zinen eenen vyngher of ghecordt, tes te wetene, den vyngher naest den cleenen vyngher van zynder luchter hand.
[1489-5-19] Item up den 19^den dach in Meye, anno 89, doe quam mynheere van den Gruuthuuse ter kerke van Sinte Kartoffels toot den goeden Sint Jooris, ende hy quam al wit in de wapene, van der oofde tooten voeten, ende hy dede daer doen eene misse voor Sint Jooris.
[1489-5-20] Item up den 20^sten dach in Meye, anno 89, doe zo was mynheere van den Gruuthuuse, ten clooster van den Eechoute staende binder stede van Brugghe, als capiteyn generael van der stede van Brugghe, daer ontfync hy monster van 1000 mannen van oorlogen, om te treckene int Westland, op die vianden waren van der stede van Brugghe.
[1489-5-21] Item up den 21^sten Meye, anno 89, doe zo was mynheere van Lichtervelde, als bailju zynde van der stede van Brugghe ende van den brugschen vryen, hy was ten dage voorzeid buuten der Smede poorte van der stede van Brugghe ter Magdaleene, daer so ontfync hy monster van 1200 mannen. Item up den 21^sten Meye, anno 89, doe quamen 4 mannen van der stede van Dixmuude, vianden zynde van der stede van Brugghe, zy quamen tusschen der kerke van Sinte Bave, ende den clooster van den Magdaleene, om vernemen ende ooc om bespyen, ende hemlieden quamen 4 mannen te ghemoete, van huuter stede van Brugghe, buuten der Smede poorte, ende waren te peerde an beede de zyden, honder al zy daer vochten, zo datter 2 dood bleeven, van den vianden van der stede van Brugghe, den eenen bleef daer dood up de stede, ende dander was ingebrocht al ghequetst ende die starf bin den havende, waer of
[pagina 276]
dat den eenen was een busschayere, ende dander 4 die dat deden, den eenen was eenen achhouder van Oosthende, ende hiet Annekin de Waghenare; nu dander twee van der partye zynde van der stede van Brugghe, die reeden om naer haerleder volc, dat lach betrend den clooster van Sinte Andries, nu zilieden alle int gemeene treckende om naer de stede van Dixmuude, zy worden bevochten betrend Aertryke, van die van Ostende, Houdenburch ende Winendale sauweniers zynde van der stede van Brugghe, ende daer bleefer honder dooden ende ghevangen een hondert ende 50, partye zynde van der stede van Brugghe, ende den standaert van de partyen van der stede van Brugghe, was in de stede van Brugghe ghebrocht up den 22^sten dach in Meye, den welken standaert was ghelu ende blaeu.
[1489-5-23] Item up den 23^sten dach in Meye, anno 89, doe zo was inghebrocht als ghevangen man Aernoud Breydel, als ballync van der stede van Brugghe, ende fugutif viand zynde van der stede van Brugghe, ende hy was ghevangen up den 21^sten dach in Meye tAertryke in een ghevecht, ende hy was inghebrocht in de stede van Brugghe ten dage voorseyd, ende was gheleed up de plaetse Maubeerd, ende van daer was hy gheleed in de Loove, daer men de quaeddoeners pleeicht te exameneerne, ende van daer in de vanghenesse van der stede van Brugghe, ende al de poorten van der stede van Brugghe die waren ghedaen sluuten dien dach, zo datter niement huut en mochte zonder passepoort, ende binder stede voorzeyd, was een trompet gheslegen, dat alle de Spaniers zouden commen ten clooster van den Eechoute, binnen Brugghe, naer der noene, ten 4 hueren, ende daer so deden zy monster, ende voord naer der noene, zo was noch trompet gheslegen, dat alle die wilden voeren vytaelje, datse hem zouden ghereed maken.

[pagina 277]
[1489-5-24] Item up den 24^sten dach in Meye, anno 89, doe zo was een trompet gheslegen binder stede van Brugghe, dat alle mannen die hadden peerden ende waghenen, datse die zouden bryngen te voorschine, up de verbuerte van peerden ende waghen. Item up den 24^sten dach in Meye, anno 89, doe was binder stede van Brugghe geoordeneerd ende vergaderd eene grote wapenynghe, met goeden rypen rade, ende met schoonder oordenancye, om te treckene upt Westland, ende tiegen de quaedwillende van der stede van Brugghe, metter welke wapenynge men voerde huuter stede van Brugghe 12 metalen serpentinen, 24 haghebussen, 6 cortauwen, eenen waghen vul kerksparen, 3 waghenen vul schouplancken, buspoeder, steenen, hartyljerye, targyen, warcmannen, tes te wetene, timmerlieden, cuupers, schipwerkers, wielwerckers ende voord alle ghereedschepe dat ter oorloghe diend ende toebehoordt. Item daer ghyngen ooc huuter stede van Brugghe, ten dage voorzeyd, 500 mannen gheheeten Spadeniers, elc man, met eender pyke ende met eender spade.
[1489-5-25] Item up den 25^sten dach in Meye, anno 89, doe zo was binder stede van Brugghe, up de groote merct, voor de halle, up schavood, execucye ghedaen, metten zweerde, ende alzo ghebrocht van levenden live ter dood, eenen gheheeten Arnoud Breydel, ghebooren van binnen der stede van Brugghe.
[1489-5-26] Item up den 26^sten dach in Meye, anno 89, doe zo was binder stede van Brugghe, eenen jonc knecht ghegeeselt met roeden ende dat by justicyen, hy was al naect ghegeeselt van in den Burch toot buuten der Cruuspoorte. Item up den 26^sten dach in Meye, anno 89, doe zo was binder stede van Brugghe, een trompet gheslegen achter
[pagina 278]
de straten, dat alle de ghone, die waren van der gage ende saudeye ontfangen hadden, datse commen zouden int heer, up de galge.
[1489-5-30] Item up den 30^sten dach in Meye, anno 89, doe zo quamen de vianden van der stede van Brugghe, huuter stede van Dicxmuude, ende quamen ten daghe voorzeyd, te peerde ende te voed, voor de Smede poorte van der stede van Brugghe, ende vyngen mannen ende peerden, ende de vytaelgye waghenen die op weghe waren, om te treckene ten heerewaerd, van der stede van Brugghe, twelc dat de stede van Brugghe, huut hadde liggende, ende daer was een van den voorseyde vianden zyn kele of ghereden met eender pycke, zo dat hy daer dood bleef upt veld.
[1489-6-2] Item up den 2^den dach in Wedemaend, anno 89, doe zo quamen de vianden van der stede, voor de Smede poorte ende voor der poorte van der Bouverye van der stede van Brugghe, ende quamen huuter stede van Dicxmuude, met 3 hopenen standaerden eene witte, eene groene ende eene roode, ende vyngen de lieden mannen ende peerden toot voor de voorseyde poorten ende vyngen twee wakers van der stede van Brugghe, die waecten ten dage voorzeyd, ter Smede poorte, ende die waren gaen drincken buuten der Smede poorte toot Sinte Bave.
[1489-6-3] Item up den 3^den dach in Wedemaend, anno 89, doe zo quamen de vianden van der stede van Brugghe, voor de Smede poorte, ende zy quamen huuter stede van Dicxmuude, maer zy en vyngen doe nyemende, maer zy waren huut om te vanghene de waghenen metter vytaelgye.
[1489-6-4] Item up den 4^den dach in Wedemaend, anno 89, doe zo was in de stede van Brugghe, eene trompet ghesleghen, van eenen eerhaud of missagyer van der crone van Vrankerycke, voor tSprinchenhof ende daer was ondboden ten parlemente
[pagina 279]
van Parys, den roomschen kuenync, van den kuenync van Vrankerycke weghe.
[1489-6-5] Item up den 5^den dach in Wedemaend, anno 89, doe zo waren ghehouden ende ghedregen processyen generael tOnzer Liever Vrauwe kerke, binnen Brugghe.
[1489-6-6] Item up den 6^den dach in Wedemaend anno 89, doe zo was binder stede van Brugghe, ter Vridachmerct, de butync vercocht van coyen die theer van Brugghe ghecreeghen ende gheconkesteerd hadden in tWestland, in Vueren ambocht, ende up den zelven dach, zoo was te Brugghe, by den gheboode van der stede, ter hallen huut, de munte of ghestelt.
[1489-6-9] Item up den 9^sten dach in Wedemaend, anno 89, doe zo was huuter stede van Brugghe, ghevoerd eene brugge, die ghemaect was om volc van wapene te rydene ende te gane daer hoover, om te leggene in twater van der veste van Dicxmuude, om de stede voorseyd hinder der mede te doene.
[1489-6-11] Item up den 11^sten dach in Wedemaend, anno 89, doe zoo waren binder stede van Brugghe, ghecooren ende gheoordeneerd 80 mannen, om die te zendene int heer van Brugghe, te weten, dat lach in een perc, up zyn sterken te Beersbrugge, voor de stede van Dicxmuude, tes te wetene, de 80 mannen voorseyd waren 20 timmerlieden, 20 maetsenaers, 20 cuupers, ende 20 smeden, die zouden daer gheghaen hebben, omt voorseyde heer te hebben gheholpen te versterkene.
[1489-6-13] Item voord op den 13^den dach in Wedemaend, anno 89 achtervolghende te sprekene dien van den tvoorzeyden heer van Brugge, dat lach ten daghe voorseyd, te Beersbrugge voor der stede van Dicxmuude, dat worde op den 13^den dach in Wedemaend voorseyt up gheslegen van zinen vianden ende zeere geschoffyerd, veele dood ghesleghen, ghequetst
[pagina 280]
ende ghevanghen. God wild ontfermen ende God wil der zielen ontfermen van die daer dood bleeven, ende voord alle zielen daer God bede vooren begeerd. Amen.
[1489-6-14] Item up den 14^den dach in Wedemaend, anno 89, doe zo waren ghezonden, van huuter stede van Brugghe, vychtich ardchyerds tes te verstane, een 25 van den houden voedboghe, ende een 25 van den handboghe.
[1489-6-15] Item up den 15^den dach in Wedemaend, anno 89, doe zoo was, binder stede van Brugghe, een trompet ghesleghen, dat alle die saut zouden willen winnen, datse hem zouden commen doen bescriven. Item up den 15^den dach in Wedemaend, anno 89, tsnavends ten 8 hueren, doe zo waren om naer Ostende ghezonden huuter stede van Brugghe, hondert ende vichtich saudeniers.
[1489-6-16] Item up den 16^den dach in Wedemaend, anno 89, doe zo waren te Brugghe, metter clocke, verbooden alle ambochten ende neeringen, ende verboden werken ende doen werken, ende het was gheboden metten trompette, alle die saud wilden winnen te ligghene binder stede van Brugghe, datse hem zouden commen doen bescriven. Item up den 16^den dach in Wedemaend, anno 89, naer der noene, ten 4 hueren, doe quam te Brugghe de tydynghe by eenen bode van der stede van Ypre, alsdat de ermeye van Vrankerycke was ghepasseerd der stede van Ypre, ende het was ghecommen te Cappelle te Poele, als op den 17^den dach te zine te Thoroud, buuten welken men ghebood, metten trompette, in den Burch voor der stede huus, dat alle man diet geliefde zoude voeren vytaelge te Toroud, ende dat alle menschen up den 17 dach zouden werken ende doen werken. Item up den 16^den dach in Wedemaend, anno 89, doe zo waren ghezonden 3 tunnen buspoeder der tOostendewaerd
[pagina 281]
metten roode caproenen van der stede van Brugghe, maer zy keerden wederomme, ter cause omdat de vianden van der stede van Brugghe de stede van Ostende inghenomen hadden. Item up den dach voorzeyd, den 16^den dag voorseyd van Wedemaend, anno 89, doe zo wast gheoordeneerd ende ghesloten hoe dat alle de vrauwen ende de kindren moesten ruumen de stede van Brugghe, toebehoorende den fugytiven van der stede van Brugghe van alle dewelke die ghevloon waren ende geloochend hadden der stede van Brugghe, zy moesten alle ruumen.
[1489-6-17] Item up den 17^den dach in Wedemaend, anno 89, zo was te Brugghe een ghebod ghedaen ter hallen huut, metter klocke, hoe dat men zoude voeren vytalye in tVransche heer, twelc liggende was te Tooroud, twelc geschiede; want daer was ghevoerd, ten dage voorzeyd, vaten met wine, cruud ende specherye, ende vier waghenen met broode, ende 4 waghene met biere, twee waghenen met smedecoolen, 2 waghenen met yzere, om de peerden mede te beslane. Item up den 17^den dach in Wedemaend, anno 89, doe zo quam eenen eerhaud an hebbende eenen wapenroc, ende hy quam van mynheere van Merwe, geheeten Daneel Van Moerkerke, zo quam hy ghereden up eenen zwarten moor, ende hy quam huuter stede van Ostende, toot voor dEzelpoorte van der stede van Brugghe, vraghende of haer de stede van Brugghe zoude willen up gheven, behouden lyf ende goed of niet, ende hy was inghebrocht met verbonden ooghen ende alzo ghebrocht gheleet toot in den Burch, inder schepenen huus. Item up den 17^sten dach in Wedemaend, anno 89, doe zo was huuter stede van Brugghe ghezonden een 100 mannen ghezeyd Saudeniers, toot in de stede van den Dam.
[pagina 282]
Item up den 17^den dach in Wedemaend, anno 89, doe zo quamen 300 mannen, gezeyd Saudeniers van Gend, ende zy quamen in ter Gendpoorte, ende ghyngen in ter herberghe, an de Vridachmerct, in de Valcke ende int Schaec.
[1489-6-20] Item up den 20^sten dach in Wedemaend, anno 89, doe zo was te Brugghe, up de Groote Merct, een galghe ghemaect ende gherecht.
[1489-6-21] Item up den 21^sten in Wedemaend, anno 89, doe zo waren binder stede van Brugghe, ghehouden ende ghedreghen processyen generael, ende die waren ghedreghen duer d'Breydel straetken, voorby de Halle, rondomme de groote Merct, alzo gaende voorby de kerke van Sinte Pieter, hover de plaetse Maubeerd, alzo omme slaende duer de Oochstrate, hover dhoude Muelenbrugge, ten broeders van den Predicaren; den dienst daer ghedaen zynde, zy ghyngen van daer voorby den Braemberch, hover de groote Echoudbrugge, duer de Wullestrate, ende alzo weder in de Breyelstraete, toot in den Burch, ende daer was ghemaect eene stage zeer rykelic behanghen met gouden lakene, ende met ghewyeden dwalen, waerop dat ghesteld was rustende het heleghe, zoete, weerde, warachtich, ghebenedyde Sacrament, twelc rustende es in de kerke van Sinte Donaes, binnen Brugghe, twelc helich, ghebenedyde Sacrament voorseyd mede omme ghedreghen was, in deze voorseyde devote processye, ende de stede van Brugghe hadde daermede gaende 4 barnende toortsen ende an elke toordse was hanghende der stede van Brugghe wapene. Item up den 21^sten dach in Wedemaend, anno 89, doe zo was huuter stede van Brugghe ghevoerd twee waghenen vul taergyen ende eenen waghen met thenten, ende die waren ghevoerd om naer der stede van Nyeupoort, in tVransche heer, het welke was ghecommen in tWestland, ten secourse
[pagina 283]
ende ter bate, ende ter helpsamichede van der stede van Brugghe, met meneghen edelen heere, ende met grooter menichte van volke.
[1489-6-27] Item up den 27^sten in Wedemaend, anno 89, doe zo was binder stede van Brugghe, in den Burch, up de bloote carsye, eene karre zands ghesturt, ende daer waren twee mannen up gheexecuteerd, metten zweerde, ende alzo ghebrocht van levenden live ter dood; den eenen hiet François Rycx, ende hy was een makelare van der stede van Brugghe, ende hy was een schotter in de gilde van de houden voedbooghe, ende dander was van de stede van Gend, ende hy was van doodslaghe. Item up den 27^sten dach in Wedemaend, anno 89, doe zo quamen binder stede van Brugghe, Francoyzen, mannen van oorloghen, tes te wetene, 300 te peerde ende 500 te voed branckenyers.
[1489-6-28] Item up den 28^sten dach in Wedemaend, anno 89, doe zo quamen in de stede van Brugghe noch 1000 Francoysen, honder te peerde ende te voed.
[1489-6-29] Item up den 29^sten dach in Wedemaend, anno 89, zo waren ghebrocht in de stede van Brugghe, duer de stede van den Dam, te watre, ter Speyepoorten in, twee metalen bussen van der stede van Gend, groot ende schone, ende waren ghebrocht te schepe toot honder de Crane. Item up den 29^sten dach in Wedemaend, anno 89, doe zo quamen binder stede van Brugghe, ter Gendpoorten in, 26 waghenen met engyenen, met buspoeder ende met steenen; de 20 waghenen met poeder ende met bussteenen, ende de 6 waghenen met engyenen, waren elc wyt bin den boorde 10 duumen, ende elc engyenen tes te wetene, de twee engyen van dien hadde 18 peerden, ende dander 4 engyenen, elc 7 dumen wyd, ende elc van dien waghen 14 peerden, ende daer
[pagina 284]
quamen mede te voed 3 waerven 40 mannen, pyken ende handbooghen, ende 3 waerven 24 stalen voedbooghen, ende de voorzeide 6 waghenen, metten voorzeyden engyenen, die reeden hover de groote merct, duer de strate van Sinte Amand, toot up de Vridachmerct, om naer de Smede poorte. Item up den 29^sten dach in Wedemaend, anno 89, doe deden 200 mannen van oorlogen in de stede van Brugghe, monster in tclooster van den Eechoute, ende het waren ghezellen van Gend ende van Brussele.
[1489-6-30] Item up den 30^sten dach van Wedemaend, anno 89, doe waren binder stede van Brugghe, ter Crane up ghewonden de voorzeyde engyenen, die binder stede van Brugghe ghebrocht waren van Gend, up den 29^sten dach van Wedemaend. Item up den 30^sten dach van Wedemaend, anno 89, doe ginc eene vrauwe, binder stede van Brugghe, by justicye van der wet van Brugghe; zo was zoe ghedoen draghen de steenen aen hueren hals hangende, ende eenen looden hamer op haer schoudere, ende gync alzo rond omme de grote merct, ende voord ooc meer andere straten, ter gheliefde van schepenen, ende dat om zeker mishuuzen van huer, ende het was een melkeghe, die melc vercochte by der strate, ende zoe woende in de Boeverye strate.
[1489-7-1] Item up den eersten dach van Hoymaend, anno 89, doe zo ghyngen huuter stede van Brugghe, 2000 volc van wapenen, honder te peerde ende te voed, tes te wetene, 600 mannen te peerde, ende die reeden ende die ghyngen ter Smede poorten huut, om naer den stede van Houdenburg ende Oostende, ende daer voeren mede twee serpentinnen van metalen, die waren ghestelt up de Vridachmerct.
[1489-7-2] Item up den 2^den dach in Hoymaend, anno 89, doe zo voer huuter stede van Brugghe, ter Smede poorten huut, om naer de stede van Houdenburch ende Ostende, 6 wa-
[pagina 285]
ghenen, tes te wetene, 2 gheladen met broode, 2 gheladen met pyken, tes te wetene, up elken waghen 5 douzinen ende den derden waghen twee, vul gheladen met wapene, tes te wetene creeiften en halve creeiften. Item up den tweeden dach in Hoymaend, anno 89, doe zo quam in de stede van Brugghe, ter Gendpoorten in, mynheere Phylips mons^r, den zuene van mynheere van Ravesteen, ende hy reed terstond in thof van mynheere van den Gruuthuuse, toot mynheere van den Gruuthuuse, als capitein van der stede van Brugghe, ende daer dede hy zin noenmaeltyd, ende hy reed terstond van daer om naer Oostende tot mynheer Phylips van Crevecuer, ghezeyt mons^r de Coordes.
[1489-7-3] Item up den 3^den dach in Hoymaend, anno 89, doe zo waren ghevoerd, huuter stede van Brugghe, 3 waghenen vul gheladen met sparren ende met schouplancken, ende waren ghevoerd ter Smede poorten huut, om naer Oostende, ende om naer Dixmude.
[1489-6-29] Item up den 29^sten dach in Wedemaend, anno 89, doe zo was binder stede van Brugghe, by de Cruuspoorte, thenden der Peperstrate, eenen ghequetst ende ghegrieft van zinen live, zo dat hy quam van levenden live ter dood, het was eenen Francoys, ende hy was begraven in Sint Jans huus, staende bin Brugghe, ende het dede eenen Francoys.
[1489-7-3] Item up den 3^den dach in Hoymaend, anno 89, doe zo was eenen man ooc ghequetst ende ghegrieft van zynen live, zo dat hy quam van levenden live ter dood, ende het was een vry timmerman van Brugghe, ende het gheschiede buuten der Smedepoorte van der stede van Brugghe, tusschen den clooster van der Magdaleene, ende der kerke van Sinte Bave, buuten Brugghe, ende den dooden die hiet Jooris de Dobbelare, ende die den dood slach dede, dat was eenen messemaker, ende hy hiet Diederic ende by woende by Sint Jans
[pagina 286]
plaetse, by een pasteye backer, ende den dooden was begraven up den 4^den dach in Hoymaend, met ghewapender hand, ghelyc als dat betaemt ghedaen te zine, int kercof van Sinte Salvator, binnen Brugghe. God hebbe zyne ziele.
[1489-7-4] Item up den 4^den dach in Hoymaend, anno 89, doe zo waren ghevoerd huuter stede van Brugghe, 3 waghenen gheladen met bussteenen, tes te wetene, den eenen waghen hadde in 4 peerden, ende dander 2 waghenen hadden elc maer 3 peerden, ende waren ghevoerd ter Smede poorten huut, om naer de stede van Houdenburch ende de stede van Oostende.
[1489-7-5] Item up den 5^den dach in Hoymaend, anno 89, doe zo was binder stede van Brugghe een trompet gheslegen, dat alle de guene, de Francoyzen ende Vlamyngen, die saudeye ontvanghen hadden, dat zy alle zouden gaen, alzo wel te peerde als te voed, huuter stede van Brugghe, om naer der stede van Houdenburch ende Oostende, elc honder zynen capiteyn, up de galghe. Item up den 5^den dach in Hoymaend, anno 89, doe zo quam Phylips mons^r in de stede van Brugghe, van der stede van Oostende.
[1489-7-6] Item up den 6^den dach in Hoymaend, anno 89, doe zo was binder stede van Brugghe, int clooster van den broeders van den Predicaren, ghezeyt den Jacopinen, daer was doe daer den weerdeghen fierter, ende daer in den gloryeuzen heleghen lichame van Sinte Godelieve van Gistele, ende het dede den dienst van haer den suffregaen van Doornicke, ghezeyt den busschop van Sarepten. Den dienst ghedaen zynde, men drouch den weerdegen fierter ende glorieux lichame van Sinte Godelieve omme met de processye van den voorseyden couvente ende clooster van der oordene van den Predicaren, den eerweerdegen busschop voorseyd, drouch het weerdich,
[pagina 287]
helich, ghebenedyde ooft van Sinte Godelieve, ende de priesters van den voorseyden clooster van den Predicaren, droughen de weerdichste ende de helichste relyken van haerlieder kerke voorseyd, ende deze voorseyde weerdeghe processyen ghyngen huuten voorseyde clooster ter voorpoorte, omme slaende ter rechterhand ter Gancstrate, inslaende toot voor een huus geheeten int Kakebeen, omme slaende ter rechterhand toote plaetse ten Hoye, toot voor een huus geheeten in den Buc, der omme slaende ter rechterhand duer de Witte Ledertauwer strate, ende alzo omme slaende ter rechterhand, ende alzo weder ter voorpoorten in, met groter eere, weerdichede ende reverenchye, ende metten stede speeillieden, eerbaerlic ende notabelic, zo als dat betaemt. Item op den 6^den dach in Hoymaend, anno 89, doe zo was ghevoerd hutter stede van Brugghe, 20 metalen engyenen, de 6 wyd zynde int ronde 12 dumen ende 12 waghenen gheladen met thenten ende met pauwiljoenen, tes te wetene, de 12 waghenen stonden int tSprinchenhof ende de 20 engyenen die stonden up de Beestenmerct, by der Vridachmerct, ende een trompet was ghesleghen ten dage voorzeid, dat alle de guene, die daertoe ghecooren ende ghearresteerd waren, dat hem elc zoude bereed maken terstond te treckene om naer de stede van Houdenburg ende Oostende. Item up den 6^den dach in Hoymaend, anno 89, doe zo quam mynheere Phylips mons^r van Oostende by nachte, ter middernacht, ten 1 hueren, als den 7^sten dach bedaechde, doe quam hy in de stede van Brugghe, met zeere schoonen state, ter Ezelpoorten in, ende up den 7^sten dach voorzeyd, naer der noene, ten 4 hueren, doe zo reed hy huuter stede van Brugghe ter Gendpoorten huut, om naer de goede stede van Gend ende de goede stede van Bruessele.
[1489-7-8] Item up den 8^sten dach in de Hoymaend, anno 89, doe zo
[pagina 288]
was binder stede van Brugghe een trompet ghesleghen achter de straten, dat zo wye die waren van der oorloghe, ende saudeye ontvangen hadden of niet, datse terstond zouden vertrecken, huuter stede van Brugghe, ende bin den zelven havende zouden zyn ter stede van Oostende, up de galghe.
[1489-7-9] Item up den 9^sten dach in Hoymaend, anno 89, doe zo was binder stede van Brugghe, ghebooden, metten trompette, achter de straten, dat alle waghenaers zouden hem voughen te commene, te voerne engyenen artylgerye, up ghecorengyerd te zine van den heere den Capiteyn, ende noch voord dat alle de ghone, die consten spelen metter calvenere en metten stalen booghe, datse hem zouden commen doen bescriven, my zoude hem terstond betalen voor eene maend, ende datse zouden volghen terstond, zonder letten. Item up den 9^sten dach in Hoymaend, anno 89, doe zo waren ghevoerd huuter stede van Brugghe, 34 waghenen met hartyljerye, te verstane houten bruggen, schermen, targyen, 3 waghenen gheladen vul waghewielen, 6 waghenen met 12 schepen, elc waghen twee, ende ooc 2 ponten, ende voord al ander ghereedschepe, al zulc als daer toe diendt.
[1489-7-10] Item up den 10^den dach in Hoymaend, anno 89, doe zo waren ghevoerd huuter stede van Brugghe, ter Ezelpoorten huut, om naer de stede van Oostende, 40 waghenen met hartylgerye, tes te wetene, met schermen, scraghen, bruggen, schepen ende voord al dat der oologhen diend.
[1489-7-11] Item up den 11^sten dach in Hoymaend, anno 89, doe zo waren noch ghevoerd huuter stede van Brugghe, 25 waghenen ter Ezelpoorte huut om naer de stede van Oostende, met bruggen, targen, schermen, poonten, ende 6 waghenen gheladen vul met leederen, ende voord met meer andre ghereedschepen die ter oorloghen dienen.
[1489-7-13] Item up den 13^den dach in Hoymaend, anno 89, doe zo
[pagina 289]
was binder stede van Brugghe, ghecooren ende ghemaect eenen nyeuwen schoudheeten, ende dat was Willem Moreel, ende het worde of ghestelt mis^r Aernoud Pychavet, ter cause om dat de roede niet bedienen en mochte ende dat om zeker beletten ende bejeghenthede die hem toe quamen, ende den voorseyden mis^r Aernoud Pychavet hadde de roede bediend ende den schoudheeten van Brugghe ghezyn, 47 weken, eenen dach min. Item up den 13^den dach in Hoymaend, anno 89, doe zo was binder stede van Brugghe, up de groote merct, voor de kerke van Sinte Kartoffels, een bouve dood ghesteken, ende het was een Duudsche, wand hy lach daer en dobbelde op de vischbancken. Item up den 13^den dach in Hoymaend, anno 89, doe zo was binder stede van Brugghe, een trompet gesleghen, achter de straten, dat zo wye wilde voeren vytaelgye, dat terstond zouden trecken naer de stede van Houdenburch, ende weten waer dat tVransche heer neder zoude slaen.
[1489-7-14] Item up den 14^den dach in Hoymaend, anno 89, doe zo vertrac mynheer van den Gruuthuuse huuter stede van Brugghe, met zeere sconen princhelicken state, ter smedepoorten huut, ende reed alzo om naer Kouckelare, daer tVransche heer lach, ende mynheere van Koordes, gheseyt mynheere Phylips van Creveceur, maerschalc van Bourgogne, joncheere Jan van Piere, den zuene van mynheere van den Gruuthuuse voorseyd, mynheere van Peenen, mynheere van Vendomen, ende voord menich ander ede heere, ende laghen daer met 30 duyzent volcx van wapene, om te treckene op de vianden van den 3 leden dslands van Vlaendren, ende Willem Moreel, als schoudheeten van Brugghe, ende mynheere Jan van Nyeuwenhoove als burchmeester van Brugghe, die deden mynheere van
[pagina 290]
den Gruuthuuse gheleede, ende het trocken met hem 3 dekenen van der stede van Brugghe, tes te wetene, den deken van den vullewevere, den deken van den smeden ende den deken van de kousscheppers die trocken mede toot Kouckelare.
[1489-7-17] Item up den 17^den dach in Hoymaend, anno 89, doe zo waren die van Dicxmuude voor de stede van Brugghe, ende vynghen veele schamel mannen die zy buuten vonden, ende het worde een ghevangen van hemlieden, ende hy was te peerde, ende hy was te Brugghe ingebrocht.
[1489-7-18] Item up den 18^den dach in Hoymaent, anno 89, doe zo was binder stede van Brugghe, een trompet ghesleghen, dat so wye dat zoude willen winnen saudeye, datse hem zouden commen doen bescriven int huus van den vryen. Item up den 18^den dach in Hoymaend, anno 89, doe zo waren ghezonden 80 schotters van der stede van Brugghe tooter stede van Damme, tes te wetene, 40 schotters van den handbooghe, ende 40 schotters van den houden voedbooghe, ende 20 van den jongen voedbooghe, dats een 100. Item up den 18^den dach in Hoymaend, anno 89, doe zo was binder stede van Brugghe by der Cruuspoorte, up de Veste, een kind ghegeten van eenen zwine, zo dat daer of starf bin die nacht, als den 19^den dach bedaechde, ende het was een meyskin. Item up den 18^den dach in Hoymaend, anno 89, doe hadden gheleghen in de stede van Brugghe ter Crane, 2 groote engyenen van der stede van Gend, elc engyen 11 duimen wyd zynde bin den boorde, ende die voorzeyde engyenen hadden daer gheleghen 20 dagen, ende zy waren weder te Gentwaerd ghevoerd ende te schepe ghedaen, ten dage voorzeyd.
[1489-7-19] Item up den 19^den dach in Hoymaend, anno 89, doe
[pagina 291]
zo was tsnuchtens tyleken ghevonden binder stede van Brugghe, een man dood ligghende by der Cruuspoorte, tiegenhover een cappelle, gheheeten de Colomme, ende hy lach daer doot ghestorven zyn zelfs doot, ende hy was van der steden van Houdenburch. God hebbe zyn ziele. Amen. Item up den 19^den dach in Hoymaend, anno 89, doe was ooc tsnuchten tyleken, ghevonden eenen man dood ghesteken in den langhen rollewech, binder stede van Brugghe, thenden der Balcstrate, ende hy was van der stede van Nyeupoort, ende diet dede, men hiet hem in de wandelynghe den schotschen pyer. God hebbe ooc zyn ziele ende alle zielen. Amen. Item up den 19^den dach in Hoymaend, anno 89, doe zo was binder stede van Brugghe, een man ghevonden ligghende dood ghesteken, in de Moerstraete, ende het was een wale, ende het was een wale diet ooc dede. Item up den 19^den dach in Hoymaend, anno 89, doe zo quamen weder thuus in de stede van Brugghe, Willem Moreel, als schoutheeten van der stede van Brugghe ende den upper burchmeester van der stede van Brugghe, gheheeten mynheere Jan van Nyeuwenhoove, de jonghe, ende quamen van der stede van Ypre. Item voord up den 19^den dach in Hoymaend, anno 89, doe zo quamen binder stede van Brugghe, ter Gendpoorten in, mynheere van den Gruuthuuse, als captein van der stede van Brugghe, den grave van Vendomme, mynheere van Peenen, ende eenen schotschen capitein, ende met 2 hopenen standaerden, elc rood, wit ende blaeu, met trompetten ende claroenen, ende met 1200 peerden, ende 500 voedgangers, ende den bastaerd van Borbon seere costelic ende met ryckelicken state, ende hy zat te peerde, ten vullen harnasche, ende eene groote plu-
[pagina 292]
magye op sinen hellem staende, ende zyn peerd vooren ende achter ghewapend met ghezoden ledere: voord het achtervolgende, de schoone voorseyde wapenynghe 1000 voedgangers tes te wetene, 600 stalinbooghen, 200 handboghen ende 200 pyken.
[1489-7-20] Item up den 20^sten dach in Hoymaend, anno 89, doe zo was een ghebod ghedaen, binder stede van Brugghe, ten halle huut, metter clocke, dat elc ende elken zoude mueghen vercopen vytaelgye, om redelicken loon, tes te wetenen, al zo wel up de Vridachmerct als up de groote Merct. Item up den 20^sten dach in Hoymaend, anno 89, doe zo was binder stede van Brugghe, monster ghedaen int clooster van den Eechoute van 800 mannen Francoyzen ende andre, ende 200 schotten.
[1489-7-21] Item up den 21^sten dach in Hoymaend, anno 89, doe zo waren ter stede van Brugghe, ter Cruuspoorten in, in ghebrocht 6 bouven up eenen waghen, ende waren ghevanghen te Maldegheem, in den busch, ende werdeden daer bevochten van die van der prochye voorseid, ende zy waren ghecommen huut Hulst, ende daer bleefer 4 dood. ende 6 in de vangenesse van Brugghe ghebrocht ghevanghen, Item up den 21^sten dach in Hoymaend, anno 89, doe zo waren te Brugghe, up de groote merct, ghehanghen an een galghe, 8 mannen, naer der noene, ten 4 hueren, ende daer stond een schavoot ghemaect, ende dat hadde daer ghestaen een jaer ende seven weken, ende dat viel ter neder vande den laste van den volcke.
[1489-7-22] Item up den 22^sten dach in Hoymaend, anno 89, doe zo waren de voorseyde 8 persoonen of ghedaen van der galghe, te Brugghe, op de groote merct, voor den noene, ten 8 hueren.
[pagina 293]
Item up den 22^sten dach in Hoymaend, anno 89, doe zo quamen mynheere van den Gruuthuuse, den graeve van Vendomme ende mynheere van Peenen, zy quamen ghereden met zeere schoonen, ende ryckelicken ende princhelicken state, binder stede van Brugghe, tsnavends, ten 7 hueren, huuten hoove van den Gruuthuuse toot buuten der Cruuspoorte, spaseeren huut ghenouchten, ende quamen weder ter Cruuspoorten in, ende reden deur de Peperstrate, ende alzo voord toot elc int syne.
[1489-7-23] Item up den 23^sten dach in Hoymaend, anno 89, doe zo dede, binder stede van Brugghe, monstre een Hyngelschs capitein, int hof ten clooster van den Predicaren, van 200 ghezellen. Item up den 23^sten dach in Hoymaend, anno 89, doe zo gaf de stede van Brugghe een schoone costelic ende eerliche havendmaeltyd, up der schepenen huus, staende in den Burch, mynheere van den Gruuthuuse ende mynheere van Peenen, als ooc mynheere den grave van Vendomme.
[1489-7-24] Item op den 24^sten dach in Hoymaend, anno 89, doe zo trac een Hyngelsch capiteyn huuter stede van Brugghe, ter Gendpoorten, in voorme van wapenynghe, om naer de stede van Cortricke, hy was te peerde ghewapend, ende hy hadde eenen standaerd zwart ende wit, ende hy hadde 200 voedgangers, 25 min.
[1489-7-25] Item up den 25^sten dach in Hoymaend, anno 89, doe zo was buuten der Cruuspoorte van der stede van Brugghe, by der kerke van Sinte Cruus, by den huuse van Pieter Stoppel, in eene gracht, der zo was ghevonden tsnuchtens metten dage, eenen man dood ligghende ghestorven, binder nacht zyn zelfs dood Item up den 25^sten dach in Hoymaend, anno 89, doe
[pagina 294]
waren in ghebrocht, in der stede van Brugghe, 7 ghevanghenen, vianden zynde van der steden van Brugghe, ende quamen huuter stede van Dicxmuude, ende waren ghevanghen te Hansamen, te Brugghe ter Smede poorten in, ende zy waren inghebrocht van den Francoyzen, die als doe ten tyde in de stede van Brugghe waren ghelogyerd.
[1489-7-26] Item up den 26^sten dach in Hoymaend, anno 89, doe zo was een Francoys, binder der stede van Brugghe, ghehanghen ende verworcht an eene galghe, te Brugghe, up de groote merct. Item boven den Francoys voorzeyd, die up den 27^sten ghehanghen was, daer was boven zynen hoofde ghesteld een groen meyken, ende boven upt dweers hout van der voorseyde galghe, was gheleyt een hand vul gars. Ende hy was of ghedaen, up den 27^sten dach, voor der noene ten 8 hueren, ende begraven ten clooster van den freren.
[1489-7-27] Item up den 27^sten dach in Hoymaend, anno 89, doe zo waren noch te Brugghe, up de groote merct, twee mannen ghehanghen ende verworcht an de galghe, waer of dat den eenen hiet Jacob De Vurstre, ende hy was van Gend. Item up den zelven dach, zo waren de twee of ghedaen, naer der noene, ten dry hueren, die ghehanghen waren up den 27^sten dach, voor der noene, ende waren beede gheleyt up een corde waghen ende alzo ghevoerd int Sint Jans huus. Item up den 27^sten, tsnavends ten 8 hueren, doe trocken hutter stede van Brugghe, 1000 francoyzen te peerde, om naer der stede van der Nyeupoort.
[1489-7-28] Item up den 28^sten dach in Hoymaend, anno 89, doe zo waren te Brugghe, 3 manhoofden ghesteld met den voeten in den bloc, thenden der waterhalle, staende op de groote
[pagina 295]
merct op den houc van den Breyelstraetkene, ende zaten daer 10 hueren. Item noch op den 28^sten dach in Hoymaend, anno 89, doe zo was te Brugghe, achter de strate, gheboden, metten trompette, te voerne vytaelgye, ter Heye, staende op eene mile van Dicxmuude.
[1489-7-30] Item up den 30^sten dach in Hoymaend, anno 89, doe zo waren te Brugghe ghehouden ende ghedregen processyen generael ten broeders van den Predicaren, ende deze weerdeghe voorzeide processye was ghedregen huuter Burch, duer de Breyelstraete, rondomme de groote merct, hover de Wisselbrugghe, voorby de kerke van Sinte Pieter, hover de plaetse Maubert, duer de Oochstrate, hover dhoude Meulenbrugge, ende alzo in ten broeders van den Predicaren, ende in deze voorseide weerdeghe processye, zo was mede ghedregen den weerdegen fierter ende glorieux lichame van sinte Godelieve van Gistele, die doe ten tyden rustende was ten voorseyden clooster van den predicaren; ende omtrent den voorseyden fierter ende glorieux lichame van Sinte Godelieve, zo waren ghedregen 4 barnende toordsen, van der stede van Brugghe, elc van een garsoen, ende an elke toordse hanghende ende vast ghemaect een schild metter stede wapene, ende voor den voorseyden fierter gyngen de 4 speeillieden al spelende, ende metter vooseyden processyen zo ghyngen princhelic ende met eenen princhelicken state, mynheere van den Gruuthuuse ende mynheer van Peenen.
[1489-8-1] Item up den 1^sten dach in Oust, anno 89, doe zo waren ghebrocht binder stede van Brugghe, 11 mannen ghevanghen huuter stede van Dicxmuude, ende waren gheboren ende ooc inwonende van Dicxmuude, ende zy waren ghebrocht in de herberghe, in de Clocke, staende by tusschen
[pagina 296]
tSprinchenhof ende een plaetse gheheeten ter Dweerstrate.
[1489-8-2] Item up den 2^den dach in Oust, anno 89, doe zo reeden, huuter stede van Brugghe, 1200 Francoyzen, 700 te peerde ende 500 te voedt; tpeerde volc hadden 2 standaerden, den eenen was rood blaeu ende wit, ende tvoedvolc hadde eenen standaerd ende die was zward ende wit, ende in tzwarte veld stond een wit cruce, ende trocken alzo ter Cruuspoorte huut, ende men seyde datse alzo reeden ende ghynghen toot Gend, ende van daer voor Hulst.
[1489-8-3] Item up den 3^den dach in Oust, anno 89, als den 4^den dach bedaechde, by nachte, naer der middernacht, doe zo zwam een man buuten duer de veste van der stede van Brugghe, van buuten in, ende het gheschiede tusschen der Ezelpoorte ende de poorte van Sinte Ledenaerd, ende hy worde ghevanghen ende gheleed in de vanghenesse van der stede van Brugghe.
[1489-8-2] Item up den 2^den dach in Ougst, anno 89, doe zo reeden huuter stede van Brugghe, naer der noene, ter Cruuspoorten huut, 1200 Francoyzen zo alst voorseyd es, te peerde ende te voed, ende die zelve quamen weder in, up den 7^sten dach voorseyd, naer der noene, ende zy quamen huuten lande van Eynegauwe, ende die zelve trocken weder huut ende ooc noch meer andre, up den 8^sten dach van Oust, in de maend voorseyd, voor der noene, te peerde ende te voed, ende zy reeden huuter Smede poorte, ter Bouverye poorte ende ter Ezelpoorte, ende daer reede ooc huut mynheere van Peenen, ende trocken tooter stede van Houdenburch, tiegen de vianden ende den quaedwillende van der stede van Brugghe, ende zy quamen in bin den zelven dage voorseyd, tsnavens ten 6 hueren, ende brochten in ghevanghen 2 mannen, den eenen hiet Mathys, ende hy plochte te woenen tSevecote, buuten der Gendpoorte, ende zy brochten in wel
[pagina 297]
1000 pylen, die naer hemlieden gheschoten waren, ende men zeyde als datse versloughen 34 quaedwillende van der stede van Brugghe.
[1489-8-8] Item up den 8^sten dach in Oust, anno 89, doe zo was in de stede van Brugghe, by Onzer Vrauwe kerke, naer der noene, ten 4 hueren, grooten noot van brande ten huuse van een berbier, die hiet Jan Snellegeer, maer God lof ende danc, het verghync metter minste schade.
[1489-8-10] Item up den 10^sten dach in Oust, anno 89, doe zo was, binder stede van Brugghe, ghehouden ende ghedregen processye generael toot in de kerke van Onzer Liever Vrauwe, staende binnen Brugghe, ende in deze weerdege processye was mede omme ghedregen het ghebenedyde, warachtich, glorieux, ontfermachtich ende almachtich helich sacrament Gods, twelke dat rustend es in de kerke van Sinte Donaes, binnen Brugghe, ende deze voorseyde processye was ghedreghen huuter Burch, duer de Breyelstrate, voorby de Halle, hover de groote Merct, duer de Steenstrate, voorby twest vleeschuus, duer Sinte Maryestrate, ende alzo in Onzer Liever Vrauwe kerke binnen Brugghe; ende de stede van Brugghe hadde gaende by den weerden, heleghen, ghebenedyden sacramente 4 garsoenen van der stede van Brugghe, ende elc een barnende toordse in zyn hand, ende an elke toordse hanghende eenen schild, metter wapene van der stede van Brugghe.
[1489-8-11] Item up den 11^sten dach in Oust, anno 89, doe zo waren ghezonden huuter stede van Brugghe tooter stede van den Dam, een 50 mannen ghestoct, ghewapend, alzo daer toe diend, om de bewaernesse ende versterkynghe van der stede van den Dam, ende ooc ter verstercthede van der stede van Brugghe.
[1489-8-12] Item up den 12^sten dach in Oust, anno 89, doe zo quam
[pagina 298]
mynheere van Breederode, ter Gendpoorte, in de stede van Brugghe, met zeere schoonen, rykelicken state, ende hy quam huut Holland, hy ghync te voed huuter stede van Brugghe ter Speyepoorte huut, met 500 mannen te Hollandwaerd, up den 6^den dach in November, ende hy was wech, heer hy weder quam te Brugghe, alzo ghezeyt es 40 weken en eenen dach.
[1489-8-17] Item up den 17^den dach in Oust, anno 89, doe zo vertrac mynheer den grave van Vendomme, huuter stede van Brugghe, ter Cruuspoorten huut, ende hy reed tooter stede van den Dam, met zeere schoonen, rykelicken ende princhelicken state, ende hy quam weder in, bin den zelven dage, tsnavends, ter Cruuspoorten in.
[1489-8-18] Item up den 18^den dach in Oust, anno 89, doe zo was binder stede van Brugghe een trompet ghesleghen, achter de strate, dat zo wie tland van Vlaendren ende de stede van Brugghe beminde ende lief hadde, dat die hem zouden up stellen te peerde ende te voed, ghewapent ende ghestoct, ende dat zy zouden commen ter Vridachmerct, alle de ruuters die de wapenen pleghen te anthyerne, ende voord alle goedwelleghe, om te treckene tiegen de vianden ende de quaedwillende van der stede van Brugghe. Item noch up den 18^den dach in Oust, anno 89, doe zo trocken de Francoyzen huuter stede van Brugghe, ter Ezelpoorte, ter Smede poorte ende ter Bouveryepoorte, om te treckene op de vianden ende de quaedwillende van der stede van Brugghe, ende de Francoyzen waren sterc 2 duizent ende een half, ende mynheere van Vendomme, den edelen grave, die trac den 18^den dach in Oust, anno 89, huuter stede van Brugghe, tooter stede van den Sluus, met zeere schoonen, eerlicken, rykelicken ende princhelicken state.

[pagina 299]
Dit naervolgende point geschiede up den 17^den dach in Oust anno 89, maer den scriver ne wist niet. Item up den 17^den dach in Oust, anno 89, doe zo gheschiede een doodslach tusschen der stede van Brugghe, ende der stede van den Damme, in de vaert die tusschen beeden licht, in een schip dat voer ten Damme waerd, ende hy die daer dood bleef, die hiet Jan Vander Haghe, Loonis Vander Haghe zuene, vry schipman, binder stede van Brugghe, ende diet dede, dat was een droochscheere, ende die plochte te werkene te Brugghe, an de groote merct, up den houc van der strate van Sinte Amand, ten huuse geheeten in Bouchoute, ende dien droogscheerer die hiet Cornelis.
[1489-8-19] Item up den 19^den dach in Oust, anno 89, doe zo was een ghebod ghedaen, binder stede van Brugghe, ter hallen ghecostumeerd, dat alle de landslieden, vrylaten, proostlaten ende kannoniclaten zouden commen den 20^sten dach van de maend voorseyd, ten clooster van den Eechoute, alle manhoofden boven den 15 jaren ende beneden den 60 jaren, ende ooc daer was gheboden, in tzelve ghebod, dat alle reeuwers ende reeuweghen zouden dragen boven up haer upperste cleed, een rood schaepken, een vierendeel lanc zynde.
[1489-8-20] Item up den 20^sten dach in Oust, anno 89, doe zo vertrac mynheere van den Gruuthuuse, huuter stede van Brugghe, om naer de stede van Ypre, in voorme van ambassade van den 3 leden tslands van Vlaendren, om te treckene in Vrankeryke, ende hy trac met mynheere ende grave van Vendomme, ende met meneghen edelen man ende veele nottable persoonen van der stede van Brugghe, poorters onder al, met 500 mannen te peerde ende te voet.
[pagina 300]
Item up den 20^sten dach in Oust, anno 89, doe zo was mynheer joncker van Breederode, ten clooster van den Eechoute, binder stede van Brugghe, ende daer zo passeerde hy monster van 600 mannen te voed. Item up den 20^sten dach in Oust, anno 89, doe zo quam mynheere van Peenen van der stede van Ypre, in de stede van Brugghe, ter Smedepoorten, met 300 peerden ghewapent ten harnassche, ende vele van den peerden alle behanghen ende becleet met ghezoden ledre zeere schoone ende rykelic van schilderyen.
[1489-8-21] Item up den zelven nacht, als den 21^sten dach bedaechde, doe zo reeden huuter stede van Brugghe, ter Smedepoorten huut, 200 peerden ghewapent ter harnassche, om naer de stede van Dicxmuude, om de vianden ende de quaedwillende van der stede van Brugghe te betrapene.
[1489-8-22] Item up den 22^sten dach in Oust, anno 89, doe was een groot ghevecht, binder stede van Brugghe, van den Francoyzen die honderlynghe in de rechte strate, alzo men gaet van den broeders van den Predicaren tooter Braemberch, ende daer bleef een Francoys dood, ende dit gheviel, naer der noene, ten 4 hueren. Item voord, noch up den 22^sten dach, anno 89, doe zo was noch een groot ghevecht, buuten der stede van Brugghe, in eene plaetse, buuten der Gendpoorte, geheeten te Daverlo, ten 7 hueren naer der noene, ende daer zoo bleef ligghende dood, een gheheeten Matthys, ende was den broeder van eenen gheheeten Cornelye ende es een melkeghe, ende haer man es een cousschepper, ende woend up den houc van de Witte Ledertauwerstrate, ende dezen dooden die hiet Mathys ende hy plochte te vercopene levende water, lyfcoucke, kermeswerc ende ander ware; ende het dede hem eenen gheheeten Jan Van der Schelde, een vry muelenare, binder stede van
[pagina 301]
Brugghe, ende het dede noch eenen gheheeten Victor De Ketelare ende Cornelis De Ketelare, beede muelenaers binder stede van Brugghe.
[1489-8-24] Item up den 24^sten dach in Oust, anno 89, doe zo waren binder stede van Brugghe ghehouden ende ghedreghen processye generael tooter kerke van Sinte Salvator, binnen Brugghe, ende in deze voorseyde processye was ghedreghen den weerdegen fierter ende glorieus lichame van Sinte Bonifacius, die rustend es in Onzer Liever Vrauwe kerke, binnen Brugghe, ende daer was ooc mede ghedregen den weerdeghen fierter ende glorieux lichame van Sinte Bazelis, die rustend es in de kerke van Sinte Donaes, binnen Brugghe; ende de kerke van Sinte Salvator die hadde ooc of ghedaen, ende in haren koor ghestelt, den weerdeghen fierter ende glorieux lichame van Sinte Loy, die rustend es in de kerke van Sinte Salvator, binnen Brugghe. Item up den 24^sten dach in Oust, anno 89, tsnuchtens ten 4 hueren, doe reeden huuter stede van Brugghe, ter Smede poorten huut, mynheere den grave van Vendomme ende mynheere van Peenen, met 500 mannen te peerde ende te voed, tiegen de vianden ende de quaedwillende der stede van Brugghe.
[1489-8-25] Item up den 25^sten dach in Oust, anno 89, doe zo reeden mynheere den graeve van Vendomme ende mynheere van Peenen, zy reden huuter stede van Brugghe ter Cruuspoorten huut met 300 peerden, ende met zeere schoonen, costelic ende princhelicken state, ende alle ghewapend ende ten harnassche, peerden met goudin zadelen ende goudin ghetugen, ende ooc peerden behanghen met ghezoden ledere, ende dat zeere costelic ende rykelic van schilderyen, ende zy quamen alle weder in, bin den zelven havende, ten 4 hueren, ende met trompetten ende claroeuen, ende met hopenen bannyeren.
[pagina 302]
Item up den 25^sten dach in Oust, anno 89, doe zo was binder stede van Brugghe, up de groote Merct, een gevecht van den Francoyzen ende daer een zo ghequetst ende ghegrieft van zinen lyve, zo dat hy quam van levenden lyve ter doot, ende was begraven up den 26^sten dach, in de kerke van Sint Gillis, binnen Brugghe.
[1489-8-28] Item up den 28^sten dach in Oust, anno 89, doe zo reed mynheer den grave van Vendomme huuter stede van Brugghe, ter Gendpoorten huut, om naer de goede stede van Gend, met 300 mannen te peerde, ende alle ghewapend, alzo daer toe diend.
[1489-8-30] Item up den 30^sten dach in Oust, anno 89, doe zo was, binder stede van Brugghe, ghehouden ende ghedregen processyen generael, ende deze voorseyde processye was ghedregen huuter Burch, duer de Breyelstrate, rondomme de groote Merct, hover de Wisselbrugghe, hover de plaetse Maubeerd, ende alzo weder in den Burch, ende met deze voorseide processye, zo was mede omme ghedreghen de weerdeghen fierter ende glorieux lichame van Sinte Donaes, de welke rustend es in de kerke van Sinte Donaes binnen Brugghe, ende alzo commende in den Burch, zo was daer ghesteld ende bereed eene stage, costelic ende chierlic ghedect met gewiede dwalen, ende met goudin laken, met goudin candelaren, ende wassen keersen, ende 4 barnende toordsen van der stede weghe voorseyd, ende an elke toordse hanghende eenen schild metter stede wapene van Brugghe; den gloryeuzen lichame voorzeid alzo heere ende weerdichede ghedaen zynde, men ghync weder in de kerke van Sinte Donaes, ende daer was met grooter weerdichede thoffycie ghedaen. Item up den 30^sten dach in Oust, anno 89, tsnavends
[pagina 303]
ten 8 hueren, doe zo quam mynheer den grave van Vendomme ghereden van der goeder stede van Gend, binder stede van Brugghe, met schoonen, eerlicken, costelicken ende princhelicken state.
[1489-8-31] Item up den laetsten dach in Oust, anno 89, doe zo waren de vianden ende quaedwillende van der stede van Brugghe, die quamen huuter stede van Dixmuude tot an tclooster van Sinte Andries, ende vynghen daer 2 priesters, deen was een muenic van den clooster van Sinte Andries, ende dander was een cappelaen van der prochye kerke, ende een ryke landsman, ende zy vynghen een schamelman van binder stede van Brugghe, ende was een coorendrager, ende 2 ghezellen van Sinte Andries die vynghen een man te peerde, ende brochten binder stede van Brugghe.
[1489-9-1] Item up den 1^sten dach in September, anno 89, doe zo quam mynheere Phylips mons^r, ghezeyt Phylips van Ravensteyn, hy quam van der goeder stede van Gend, binder goede stede van Brugghe ter Gendpoorten in, met zeere schoonen, costelicken, rykelicken ende princhelicken state, ende met goeder manieren, ende mynvrauwe zyn wettelicke ghezelnede, met mynheere den grave van Vendomme, deen ooc metten andren, met 300 peerden, ende hy hadde ghezyn huuter stede van Brugghe, 8 weken.
[1489-9-3] Item up den 3^den dach in September, anno 89, doe zo was tsnuchtens, ten 8 hueren, ghevonden een man dood buuten der Cruuspoorten, by een huus geheeten de 3 Kuenynghen buuten der pale van der stede van Brugghe, recht tiegen hover de pale, an dander zyde van den heereweeh, ende hy hadde an eenen graeuwen keerel ende 2 witte cousen ende 2 houde schoen, ende hy was van Eeckeloo.
[1489-9-5] Item up den 5^den dach in September, anno 89, doe zo
[pagina 304]
waren tsnuchtens ten 7 hueren, ende ooc naer der noene, ten 6 hueren, de vianden ende quaedwillende der stede van Brugghe, die quamen huuter stede van Nyeupoort ende Dicxmuude, toot voor de stede van Brugghe, ghewapenderhand, ende vynghen daer de schamel landslieden ende voerdenze in haer bewelt. Item noch up den 5^den dach in September, anno 89, doe zo waren ghebrocht 9 mannen, als ghevanghen mannen, up 2 waghenen, ende waren ghevangen buuten der stede van der Sluus, teender plaetse geheeten te Hanneweytens, ende het brochtse in als ghevanghen mannen, den bailju van Oosdburch buuten der Sluus voorseyd, ende waren gheleverd in de vanghenesse van der stede van Brugghe.
[1489-9-6] Item up den 6^den dach in September, anno 89, doe zo vertrac mynheere den grave van Vendomme, huuter stede van Brugghe, ter Smede poorten huut, om te treckene te Vrankeryckewaerd, te peerde ende te voed, met 800 mannen, ende hy hadde gheweeist te Brugghe, 7 weken.
[1489-9-8] Item up den 8^den dach in September, anno 89, doe zo was eenen man in Sinte Donaes kerke binnen Brugghe, tsnavends ten 7 hueren, ter tyd van Salve, ende die man voorseid starf daer in de kerke, ende was daer doot ghevonden in de kerke, an de noordzyde van de kerke voorzeyd, ende men zeide dat hy was van Oostende. Item up den 8^sten dach in September, anno 89, doe zo quam mynheere van Peenen ghereden in de stede van Brugghe, tsnavends ten 7 hueren, ter Coolkercsche poorten in, ende hy quam ghereden van der stede van der Sluus, met schoonen, eerlicken ende princhelicken state, met 40 peerden ende 25 voedgangers. Item up den 8^sten dach in September, anno 89, doe zo
[pagina 305]
reeden 300 Francoyzen huuter stede van Brugghe, tsnachs naer der middernacht ten 2 hueren, als den 9^den dach bedaechde, ende zy reeden ter Smede poorten huut, te peerde, ghewapent, ende up den 9^sten dach, voor de noene ten 8 hueren, quamen zy weder in de stede van Brugghe, ende brochten in ghevanghen 14 mannen, 8 te peerde ende 6 te voed, als vianden ende quaedwillende der stede van Brugghe.
[1489-9-10] Item up den 10^den dach in September, anno 89, doe zo was binder stede van Brugghe, up de groote merct een schavoot ghemaect, up twelke schavoot, zo was terstond een man zyn regter hand of ghehauwen, ende terstond up de voorseyde merct ghehangen ende verworcht, an de galghe, staende up de voorseyde merct, ende die of ghehauwen hand ghenageld an den stoc, up den houc vander Breyelstrate, ghezeyd an den zelven bloc, daer men de bouven in stelt, metten voeten vooren, an de Waterhalle, ende die was hutter lande van Zasse, ende up den zelven dach ende huere, zo was ooc an de zelve galge, noch een ghehanghen ende verworcht up de voorseyde merct, ende die man was huuter lande van Zwaven.
[1489-9-6] Item up den 6^den dach in September, anno 89, doe gheschiede een ghevecht buuten der Smede poorte van der stede van Brugghe, buuten geheeten ten Witten huuze, den weerd van den huuze die hiet Antheunis Manins, ende die stac dood eenen gheheeten Jan Scoutyts, ende was een cleeder lapper, beneden de Vlamyncbrugghe.
[1489-9-10] Item up den 10^den dach in September, anno 89, zo was binder stede van Brugghe, up de groote merct, eenen man ghehanghen an eene galge, ende hy of ghedaen zynde, was open ghesneden, ende men vond in zyn lyf twee gouden ryngen, ende een half Ingelsche nobel, ende doe was hy begraven in Sint Jans huus.

[pagina 306]
[1489-9-12] Item de Francoyzen trocken hutter stede van Brugghe, by nachte als den 12^sten dach bedaechde in September, anno 89, zy trocken ter Smede poorte huut, te peerde ende al ghewapend, ende op den 12^sten dach zo quamen zy weder in, en brochten in ghevangen vele mannen, peerden, beesten, en al van Kokelaere, dat hadden zy berooft.
[1489-9-15] Item up den 15^den dach in September, anno 89, doe zo was trompet van den Francoyzen gheslegen, binder stede van Brugghe, voor den noene, ten 7 hueren, om de Francoyzen te doen lichtene ende huut te trecken tiegen de vianden ende quaedwillende der stede van Brugghe, alzo zy deden, zy trocken huut ter Smede poorte huut, 500 te peerde ende te voed, toot eene prochye gheheeten Snellegeem, daer vonden zy de vianden ende de quaedwillende der stede van Brugghe, zo verre dat syse bevochtenende tcasteel weder wonnen, ende sloughender 30 dood, ende zy brochten 30 ghevanghenen binder stede van Brugghe.
[1489-9-16] Item up den 16^den dach in September, anno 89, doe zo was binder stede van Brugghe, up de groote merct, up een schavoot execucye ghedaen metten zweerde, ende ghebrocht van levenden lyve ter dood, eenen Matheeus Vleys, ende te Brugghe, eenen vry smit, ende hy was een bussemakere, ende hy hadde ghezyn der stede meester van den engyenen te schieten ende ook te makene, hy alzo ontooft zynde, zo was hy of ghedaen van den voorseyden schavoote, ende was ghehanghen an de galge, metten voeten opwaerd, ende die voorseyde galge stond ooc up de voorseyde merct, ende thooft van den voorseyden Matheeus was ooc ghestelt up een glavye schacht, boven up de voorseyde galge, ende up den zelven dach voorzeyd, tsnavends ten 6 uren, zo was Matheeus voorzeyd of ghedaen van de voorseyde galge, ende ooc zyn ooft, ende was begraven eerlic ende rykelic in tkerchof van Sinte
[pagina 307]
Salvator binnen Brugghe. God hebbe zyn ziele ende alle zielen, daer God bede vooren begeerd. Amen.
[1489-9-19] Item up den 19^den dach in September, anno 89, voor der noene, zo quam in de stede van Brugghe eenen gheheeten Hannekin de Waghenare, ende die brochte ghevanghen, in de stede van Brugghe, 9 ghevanghenen ende 2 waghenpeerden, ende hy brochtse in de Clocke, staende by der Dweerstrate.
[1489-9-20] Item up den 20^sten dach in September, anno 89, doe zo was te Brugghe, ghehouden ende ghedreghen processye generael ten clooster van den Freminueren, binnen Brugghe, ende daer was mede ghedreghen, den weerdigen fyerter ende glorieus lichame van Sinte Baselis, die rustend es in de kerke van Sinte Donaes binnen Brugghe.
[1489-9-24] Item up den 24^sten dach in September, anno 89, doe zo quam van der stede van der Sluus, mynheere Phylips mons^r, ghezeyt Phylips van Ravensteyn, hy quam te watere, des te wetene, in de roybaerdse, ghezeyt in de fuuste van der Sluus, die was aen beede zyden gheladen, ende beleyt met engyenen, binnen behanghen met costelic tappytserye ende met goudin lakene, daer hy in zat, alst recht ende redelic es; hy quam binder stede van Brugghe, met trompetten ende claroenen, met hopenen banyeren, ende hy quam up ter Cranebrugge, ende hy gync in, ten huuze van meester Jan de Groos, wylend was staende op de reye, an de voed van der Ezelbrugge, binder stede van Brugghe.
[1489-9-25] Item up den 25^sten dach in September, anno 89, doe zo was binder stede van Brugghe, gheslegen trompet van den Francoyzen, om huut te treckene tiegen de vianden ende den quaedwillenden van der stede van Brugghe, zo zy deden, maer zy quamen weder in, binden zelven daghe vorseyd, want zy en deden niet, de quaedwillenden worden dies gheware, zy liepen wech, ende zy kwamen weder tsnachs, als
[pagina 308]
den 26^sten dach bedaechde toot in de prochye van Sinte Michiel, ende quamen daer vangen, rooven ende moorden, ende up den 26^sten dach in September, anno 89, doe zo waren ghezonden, huuter stede van Brugghe, 50 schotters van der stede van Brugghe, tes te wetene, 20 van den houden voedbooghe, ende 20 van den handboghe, ende 10 van de jonghe voedboghe, ende dat om de bewaernesse van der stede van den Damme ende van der stede van Brugghe.
[1489-9-24] Item up den 24^sten dach in September, anno 89, doe zo was eenen man dood ghesteken, binder stede van Brugghe ter Ezelpoorte, tusschen de poorte ende de huuterste brugge, alzo men gaet ten clooster van den observanten. God hebbe zyn ziele ende alle zielen. Amen.
[1489-10-1] Item up den 1^sten dach in October, anno 89, doe vertrac huuter stede van Brugghe, ter Smedepoorten huut, mynheere van Peenen met 600 mannen te peerde ghewapend ten harnassche, tooter stede van Ypre, ende van daerin Vrankerycke, hy ende alle dat volc, hadde ghezyn in de stede van Brugghe 10 weeken ende 4 daghen in payze ende in goeder manieren.
[1489-10-2] Item up den 2^den dach in October, anno 89, doe zo was in der stede van Brugghe, achter de straten, gheboden, metten trompette, dat alle de ghuene, die hem beclagende waren van schulden van mynheere van Peenen of van zinen state, datse hem zouden commen doen bescriven by der stede, my zouden betalen. Voord so wast gheboden metten zelven bode ende trompet, dat zo wye zouden willen winnen saudeye, datse hem zouden commen doen bescriven ter plaetse ghecostumeerd my zouden betalen van een maend te vooren. Item up den 2^den dach in October, anno 89, als den 3^den dach bedaechde, naer der middernacht, ten 3 hueren, doe trocken de Francoyzen huuter stede van Brugghe, ter
[pagina 309]
Smedepoorten huut, om naer Dicxmuude tiegen de vianden ende de quaedwillende der stede van Brugghe ende van hemlieden, ende zy quamen weder in, up den 3^den dach voorseyd, naer der noene, ten 2 huere hongheschaed ende hongheschend. God lof.
[1489-10-3] Item up den 3^den dach in October, anno 89, doe zo gheschiede ende tghebuerde dat een gheheeten Willem Willays, een zouddrager, ter grooter Eechoudbrugghe, dat hy in de Eechoudstrate byder looden fonteyne, bin der stede van Brugghe, hoe dat den voorseyden Willem slouch met eenen ghemaecten stocke een man, ende hiet Karstiaen, zo dat ende dien Karstiaen voorseyd, woonde te Brugghe, in de Belzebuucstrate, in Sint Jooris, ende tapte daer byer, ende hy hilt corte penewaerde; den voorzeyden Willem slouch den voorzeyden Karstiaen, met eenen ghemaecten stocke zo dat den voorzeyden Karstiaen quam van levenden live ter dood, binnen 4 hueren daer naer. God hebbe zyne ziele ende alle zielen, daer Gods bede vooren begeerd. Amen. Ende den voorseyden Karstiaen was ghebooren van tusschen den Damme ende der Sluus, in een stede geheeten Muenkereede, ende zyn vader hiet Michiel Doens, ende aldus hiet den voorzeyden Karstiaen, Karstiaen Doens.
[1489-10-6] Item up den 6^den dach in October, anno 89, doe zo was bin der stede van Brugghe, up de grote Merct gebrocht geleed een quaeddoender die men zoude onthooft hebben metten zweerde, zyn handen en ooghen waren verbonden om dexecucye te doene, maer men const noch men mocht niet ghedaen, wand hy en wilde hem niet stille houden, noch by bede, noch by drieghemente, doe zo was hy ghedaen commen van den schavoote, ende was daer ghehangen ende verworcht an de galge daer staende up de voor-
[pagina 310]
seyde groote Merct by den schavoote voorseyd, daer an dood ende verworcht zynde zo was hy ghehangen, met den voeten opwaerd als een verrader, ende daer naer zyn ooft of gheslegen, ende dezen voorseyden dooden hiet Jan de Ponsuud, die men hiet le grand Jhan, ende was gheboren van Sinte Quintin in Vermondoys, ende zyn ooft was ghestelt up eene glavye boven up de voorseyde galge, ende boven zyn lichame daer hanghende, ende up den 7^den dach zo was tvoorzeyde lichame ende tooft ghevoerd ende begraven in Sint Jans huus.
[1489-10-2] Dit geschiede up den 2^den dach in October, maer den scriver en wist niet voor up den 8^sten dach in October. Item up den 2^den dach in Octobre, anno 89, doe zo was den cnape in de bornecamer ghegrieft van zynen live, zo dat hy daer of quam van levenden live ter dood, ende het gheviel by nachte up de strate, als den 3^den dach bedaechde in de maend voorseyd, ende het gheviel tusschen de Bornecamere ende tSprinchenhof thende vander dSheerboone strate.
[1489-9-7] Item up den 7^sten dach in September, anno 89, doe zo verdranc een jonc knecht buuten der Koolkercpoorte, in de veste van der stede van Brugghe; hy wachtede daer zwinen, schapen ende gheeten.
[1489-10-10] Item up den 10^den dach in October, anno 89, doe zo was groot messchief, zorge, vreeze, anxt van brande binder stede van Brugghe bi de Vridachmerct, an de noordzyde tiegen hover de fonteyne, in een houchuus gheheeten int Houfyser, maer God lof ende danc, het verghync ter minster schade ende quets.
[1489-10-12] Item up den 12^sten dach in October, anno 89, doe zo was te Brugghe, execucye ghedaen metten zweerde ende alzo ghebrocht van levenden live ter dood, eenen gheheeten Jan, ende hy was van by Moerbeke, van Moerspeye, ende
[pagina 311]
deze jucticye was ghedaen metten heere ende wed van der stede van Brugghe, ende deze justicye was ghedaen buuten der Cruuspoorte, ende was daer gherecht up een wiel, als voor eenen straetroover, ende zyn ooft was daer ghedolven honder den stake van den wiele, ende hy en hadde maer een ooghe, ende dat was zyn luchter ooghe. God hebbe zyn ziele, ende alle zielen. Amen. Item up den 12^sten dach in October anno 89, doe zo quamen in de stede van Brugghe, 600 Francoysen te peerde, ghewapend met hoopenen standaerden ende banyeren, met trompetten ende claroenen, naer der noene, ten 4 hueren, ter Smedepoorten in. Item noch up den 12^sten dach in October, anno 89, doe zo quetste ende griefde van sinen live, eenen gheheeten Victoor, ende was te Brugghe, eenen riemmaker, ende brochte alzo ter dood, den man van den huuze, woonende int Ketelken, by twest vleeschuus, aldernaest een huus staende gheheeten in Vlaendren, ende den voorseyden Victoor stac hem dood, in zyn huus.
[1489-10-10] Item up den 10^den dach in October anno 89, doe zo was binder stede van Brugghe, huut ghegeven by den ghebode van der stede, metten heere ende metter wed, ter Hallen huut, ter plaetsen ghecostumeerd, dat alle de brauwerscnapen van der stede voorseyd, zouden doen maken eene groene journeye, ende elc zyn teeken daer up staende bachten ende vooren, van den brauwerye daer hy wuenachtich ware.
[1489-10-19] Item up den 19^den dach in October, anno 89, tsnavens ten 8 hueren, doe zo quam mynheere Phylips mons^r van der stede van der Sluus in de stede van Brugghe, toot in zyn hof by Sint Jacops kerke, ende hy hadde ghezyn van Brugghe 19 daghen, ende hy reede up den 20^sten dach in October, anno 89, huuter stede van Brugghe, ter Gendpoorten huut,
[pagina 312]
met zeere schoonen, costelicken ende princhelicken state, met 100 ende 50 peerden tooter goeder stede van Gend. Item up den 19^den dach in October, anno 89, doe zo was ghevonden eenen man dood ligghende bin der stede van Brugghe, up de veste te Vlamyne damme.
[1489-10-20] Item up den 20^sten dach in October, anno 89, doe zo waren, voor de noene, 3 hueren, alle de poorten van der stede van Brugghe ghesloten, ende dat ter cause, om dat men slouch binder stede trompet van der Francoyzen, om dat zy huut wilden ende sloegen huut te peerde ghewapent ter Smede poorten huut, 400 ende zy reeden om naer der stede van Houdenburch, om te wederstane de vianden ende quaedwillende van der stede van Brugghe, maer zy en deden niet.
[1489-10-10] Den scriver ne wiste dit niet, dat dit geschiede voor up den 24^sten dach in October, anno 89, want dit naervolghende geschiede up den 10^den dach in October voorseyd. Dat es dat een man stond ghestelt an den pylaer vander Waterhalle ghesloten in den yzeren halsband, om zeker meshuuzen die hy ghedaen hadde.
[1489-10-24] Item up den 24^sten dach in October, anno 89, doe zo reeden de Francoyzen huuter stede van Brugghe ter Ezelpoorten huut, 200 peerden ende 60, al ghewapend ende met gheschote, ende reeden tooter stede van Blanckenberghe, ende zy quamen weder in, bin den zelven havende. Item noch up den 24^sten dach in October, anno 89, doe zo was binder stede van Brugghe ghestelt by justicyen, den heere ende de wed van der stede van Brugghe, eene vrauwe an de Waterhalle by der grote Merct, zoe was daer ghestelt ende ghesloten met eenen yzeren halsband an hueren hals, ende stond daer van tusschen den 9 ende 10 hueren voor der noene, toot den 4 hueren naer der noene.

[pagina 313]
[1489-10-25] Item up den 25^sten dach in October, anno 89, voor den daghe ten 3 hueren naer der middernacht, doe zo was binder stede van Brugghe, groot messchief van brande tusschen Sint Jansbrugge ende der Kuenyncxbrugghe, by een huus geheeten in den Roozenhoed, daer verbarrend hof een huus, twelc toebehoorde tclooster van den Dune, ende daer woende in eenen Oosterlync, ende hiet Jan Cordsac.
[1489-10-27] Item up den 27^sten dach in October, anno 89, doe zo was in de stede van Brugghe, tsnavens ten 6 hueren, eenen man ghebrocht gheleed huuter vanghenesse van der stede up de groote merct, om te hangene ende te verworgene an de galge die als doe ten tyden stond up de voorseyde merct, ende by den groten roup van den kindren ende ooc van den lieden datse zo zeere riepen om gracie, zo hadde gracie, wand hy was de leedre alf op, ende hy hadde tstrop an den hals, ende hy hiet Vincend, ende hy was van Eeckeloo. Item up den 27^sten dach in October, anno 89, doe zo ghyngen huuter stede van Brugghe, tsnavens ten 5 hueren, ter Speyepoorten huut, 28 voedbooghen schotters, tooter stede van den Damme ter bewaernesse van den dyen.
[1489-10-30] Item up den 30^sten dach in October, anno 89, doe zo reeden de Francoyzen ter Smedepoorten huut, om te treckene up de vianden van der stede van Brugghe, voor den noene, ten 7 hueren, ende mynheere Van Lichtervelde reed ooc mede; zy waren honder al 400 mannen te peerde, ende zy trocken om naer tcasteel van Cokelare, zy quamen weder in bin den zelven daghe voorseyd, in de stede van Brugghe, want zy ne deden niet.
[1489-10-31] Item up den laetsten dach in October, anno 89, doe zo was binder stede van Brugghe ghemaect eene stalage upt tkerchof van Sinte Salvator, ende daer was up ghestelt eene vrauwename ter harer groter confuzye, cleenichede ende
[pagina 314]
schoffierichede, om zeker causen, pointen die an huer bevonden waren, ende dat byder goeden wize mannen van discrecyen van der geestelicker wed, ende de voorzeyde vrauwe was van Jabbeke, zoe zittende up de voorzeyde stage, zoe hadde up haer ooft staende, eenen myter van pampiere, ende daer stond in ghemaect in figuere den duvel, ende zoe zatter den daghe voorseyd, voor de noene 2 hueren, ende naer den noene 2 hueren. Item up den laetsten dach van October, anno 89, doe zo waren de vianden ende de quaedwillende van der stede van Brugghe, voor de Smedepoorte van der stede van Brugghe, met ghespannen stalen boghen toot aen den drayboom, ende schoten een quareel int waechuusekin van den roodcaproenen, waer of den eenen was Loy de Zager.
[1489-11-1] Item up den 1^sten dach in November, anno 89, doe zo waren de vianden ende de quaedwillende van der stede van Brugghe, zy quamen van Dixmude ende quamen toot voor de stede van Brugghe te peerde toot tusschen den clooster van Sinte Andries ende de Magdaleenen clooster, ende vyngen daer de mannen die daer den bal sloughen, ende namen hemlieden haerlieder cleedren.
[1489-11-3] Item up den 3^den dach in Novembre, anno 89, doe zo ghyngen 25 mannen roode caproenen, huuter stede van Brugghe, als dienaers van de stede, ende ghyngen toot Male, om eeneghe dyversche quaedwillende der stede van Brugghe om die te vangene ende in te brynghene.
[1489-10-3] Item voord noch up den 3^den dach in October, anno 89, doe zo trocken de Francoyzen huuter stede van Brugghe 400 te peerde ghewapenderhand ter Smede poorten huut, ende zy quamen in tsnavens ten 6 hueren, ende zy brochten met hemlieden ghevangen 2 voedgangers ghebooren van der stede van Dixmude.

[pagina 315]
[1489-11-7] Item up den 7^den dach in November, anno 89, doe zo waren de vianden ende de quaedwillende van der stede van Brugghe, voor de stede van Brugghe, voor de Smede poorte, maer zy en mesdeden niet, noch zy ne vyngen niemende, wand de francoyzen die binder stede van Brugghe waren, die reeden up hemlieden. Item voord noch up den 7^sten dach in November, anno 89, tsnavens ten 6 hueren, doe zo was bin der stede van Brugghe te kennen ghegeven van den goede lieden van de wed, hoe datse ontfangen hadden zeker tydynghen, by brieven, commende huut Vranckerycke, van payze ende van blyschepen, twelc men gaf te kennen alle de clocke luuders van den prochye kerken, de 4 oordenen ende alle cloosters ende cappellen, hoe dat elc zoude luuden ende beyaerden van blyschepen, om de goede ende blyde tydinghe die zy ontfangen hadde, ende om tvolc van der stede te verweckene toot blyschepen ende ooc te devocyen, om den almachtegen God ghebenedyt te loovene ende te danckene van dyen.
[1489-11-9] Item up den 9^sten dach in November, anno 89, doe zo waren te Brugghe gehouden ende ghedreghen processyen generael, van huuter Burch, duer tBreydel straetkin, rondomme de groote Merct, hover de Wisselbrugge, voorby Sinte Pieters kerke, hover de plaetse Maubeerd, streckende duer de Oochstrate, hover d'houde Muelenbrugghe ten broeders van den Predicaren, ende in deze voorseyde processye, zo was mede homme ghedregen de weerdeghe fierter ende glorieux lichame van Sinte Donaes, die rustend es in de kerke van Sinte Donaes binnen Brugghe, ende de stede van Brugghe hadde daer mede gaende 4 barnende toordsen, an elke toordse hanghende eenen schilt metter stede wapene, voord daer zoude mede ghegaen hebben eenen man in zyn lynwaed, een vulder, ende hiet Wouter, bloods beens, ber-
[pagina 316]
voed, metten bloten oofde ende een barnende toordse in zyn handen, maer den heere ende de wed vergaven hem zyn mesdaed, omme Gods wille, ende deden hem gracie, ende hy ghync thuuszewaerd. Item, ende in de stede van Brugghe, up de groote Merct, up den houc van der strate van Sint Amand, zo staet een huus dat heet in Craneburch, dat huus was behangen van boven ant upperste toot beneden met schoonen werke van tappyserye, ten dage voerseyt, anno 89.
[1489-11-5] Den scriver ne wiste dat niet dat gheschied was, wand het geviel up den 5^den dach in November, anno 89, als den 6^den dach bedaechde, dat es dat een man dood ghesteken was, ende hy bleef up de stede dood in de Pieter Scriverstrate, ende hy hiet Cornelius Bane, ende het dede de ghezellen van mynheere van Breederode.
[1489-11-13] Item up den 13^sten dach in November, anno 89, doe zo was binder stede van Brugghe tusschen der Carmersbrugge ende de Strobrugge up de Reye, een ghevecht waer of datter een dood bleef up de stede, ende het was een wapenmaker, ende hy woende by dkerke van Sinte Pieter, ende die den doodslach dede dat was eenen man van Coolkerke.
[1489-11-14] Item up den 14^den dach in November, anno 89, doe zo was bin der stede van Brugghe een man ghestelt an de Waterhalle an de groote Merct, an den pylaer van der halle voorseyd, met een yzeren rync an den hals, om zeker meshuuzen van hem, ende dat by der wed van der stede van Brugghe, ende int hofdoen, zo was hy ghebannen 6 jaer huuten lande van Vlaendren, up zyn ooft.
[1489-11-21] Item up den 21^sten dach in November, anno 89, doe zo was binder stede van Brugghe eenen man gehangen an de galghe, de welke galge stond ten daghe voorseyd, te Brugghe up de grote Merct, ende hy hiet Mattheeus, ende hy was van Ypre, ende het dede de iusticye, den bailju van den Brugsche
[pagina 317]
Vryen, ghezeyt mynheere van Lichtervelde, ende het was ghedaen naer der maniere van der oorloghe.
[1489-11-27] Item up den 27^sten dach in November, anno 89, doe zo was binder stede van Brugghe ghestelt an de Watterhalle by der groote Merct, ende hy was daer ghestelt met eenen yzeren halsband ghesloten an zynen hals, ende het was een muelenaers cnape, ende hy was daer ghestelt, ter cause, dat hy ghezworen hadde quade heeden ende te zynder confuzye ende cleenichede, zo was eenen brief ghestelt boven zinen oofde, ende de heeden daer in ghescreven, ende hy hiet Cornelis Cools. Item up den 27^sten dach in November, anno 89, doe zo quamen in de stede van Brugghe, de ambassaden vander stede van Brugghe, de welke quamen huut Vrankeryke, ende hadden ween ghezyn 14 weken, ende quamen in, naer der noene, tusschen den 3 ende den 4 hueren, met zeer schoonen state, heerlicken, ende met manierlicken state, metten peerden, van binnen ende van buuten incommende, zo warender 400 ende 60 peerden, ende daer waren mede ghecommen 5 fransche heeren, ende de voorseyde incomste was ter Sinte Kateline poorte, ende alle de voorzeyde processye van den incommenden volcke, dat dede gheleede mynheere van den Gruuthuuse toot in zyn hof, ende van daer, zo reeden de goede lieden van der wed, ende al dat daer aencleeift, ende deden ooc gheleede mynheere den habt van Sinte Bave van Gend, ooc toot in zyn hof staende by den Nazarette binnen Brugghe, ende de stede van Brugghe hadde daer 12 toordsen, elke van 2 ponden, ende an elke toordse was hanghende ende vast ghemaect eenen schild metter stede wapene, ende met dezen voorseyden eerweerdege ambassaden zo quam ooc mede mynheere den habt van Sint Denys huut Vrankeryke. Item voord, achtervolgende den 27^sten dach
[pagina 318]
in November, anno 89, zo vertrocken de Francoyzen huuter stede van Brugghe den 28^sten dach, anno voorseyd, die binder stede van Brugghe ghelegen hadden 22 weken in garnizoene toot 1800, ende hadden ooc gheleeift heerlic ende payzivelic, by daghe ende by nachte.
[1489-12-1] Item up den eersten nacht in December, als den 2^den dach bedaechde, anno 89, doe zo was een man ghelogyerd binder stede van Brugghe, by der Vridachmerct, in een huus gheheeten in de Valcke, ende hy die daer thuus lach, hy was van Hancsamen, dien man voorseyd vermoorde ende stac hem zelven de keele of binder nacht voorseyd. God hebbe zyn ziele, of datter God beede vooren begeerd, ende ooc alle ander zielen, daer God beede vooren begeerd, amen, hy hiet an Mortroel.
[1489-12-2] Item up den 2^den dach in December, anno 89, doe zo stond te Brugghe up de groote Merct ghemaect eene galge ende een schavoot, de welke twee hadden daer ghestaen 12 weken ende 4 daghen, ende an de voorzeyde galge waren gehangen ende verworcht, ende alzo ghebrocht van levenden live ter dood, 16 mannen, waer of dat de 2 waren gehangen metten voeten opwaerd, ende upt voorseyde schavoot wasser ontooft metten zweerde 11 manne persoonen.
[1489-12-6] Item up den 6^den dach in December, anno 89, doe zo waren gehouden ende ghedregen processyen generael, ende die waren ghedregen huuter Burch, duer de Breydel strate, rondomme de groote Merct, voorby de kerke van Sinte Pieter, hover de plaetse Maubeerd, ende alzo in den Burch, ende in de voorzeyde processye was ghedregen den weerdegen fierter ende glorieux lichame van Sinte Donaes, ende alzo commende up de groote Merct, daer was gheoordeneerd eene stage up de groote Merct, behangen met goedin lakenen ende met ghewyede houtaer dwalen ende verchierd met
[pagina 319]
zelveren vergouden candelaren ende met zelveren wyerooc vaten, ende daer was den weerdeghen fierter ende glorieux lichame up ghedaen rusten, ende ter Halle voorseyd, ter plaetse ghecostumeerd de gheboden te doene, daer quam mynheere den habd van Sinte Denys in Vrankeryke, mynheere van den Gruuthuuse ende meer ander heeren ter veinster, ende die voorseyde veinster was buuten ende binnen behangen met schoone tappytserye, ende daer zo was huut ghelezen de warachtegen-ghedueregen pays tusschen den hertoge Maximilyaen, natuerlieken vader ende kuenync van den Romeynen ende natuerlic vader van onzen natuerlicken heere ende prinche hertoghe Phylips ende den lande van Vlaendren, ende daer boven noch was ghespannen een schoon cleed van tappytserye, voor Onze Lieve Vrauwe ende voor huer stonden ende barrenden 3 wassen toordsen. Voord noch daer boven ooghe an de halle, stonden de stede speeillieden, ooc voor hemlieden hanghende een schoon cleed van tappytserye, ende den pays huut ghelezen zynde, zo ghyngen de voorseyde processyen den ganc voorseyd. Item voord, zo was in den Burch ghemaect een stalage om spelen ende habatementen daer up te spelene, de welke stage voorseyd was lanc 16 voelen ende 18 voeten wyt, voord ant schepenen huus ende lancx den huuze voorseyd, zo was ghemaect een roc van sparren, ende daer was in ghestelt 12 barnende toordsen, ende de voorseyde stage was becleed met schoonen lakenen van tappytseryen, ende de wapenen van der stede van Brugghe daer in ghestelt. Item voord up de Groote Merct was een groot schoon vyer ghemaect, ende het was int ronde wyd 60 voeten, ende daer naer zyn hoochde. Item voord, den steeger van Sint Jooris steeger, was behanghen ende becleed met een goedin laken.
[pagina 320]
Item voord, tsnavends ten 7 hueren, zo was in den langhen wynckel ghezeyt in de Spaenjaerdstrate, daer waren ghemaect 2 vyeren, het een 4 voeten wyt int ronde ende tander 5 voeten wyt in de breede, ende dat stond voor den ronsenael. Item voord, up Sint Jansbrugge, zo stond een vyer ghemaect, het was wyt in de ronde 24 voeten. Item up de beurse stond een vyer ghemaect wyt zynde int ronde 24 voeten, ende van daer in de Vlamyncstrate, voor een huus gheheeten in den Baers, stonden 2 vyeren ghemaect. Item voord, up de groote Merct voor des viscopershuus stonden 2 vyeren ghemaect, ende voorseyde huus behangen met tappytserye, ende in de middel met een rood laken, ende daer an ghemaect hangende 7 schilden ghemaect van schilderyen, ter heere van den conync van Vrankeryke, conync van den Romeynen, ter heeren den hertoge Phylips, ter heeren den hertoge Maximilyaen ende onzer dochter kueneginne van Vranckeryke ende gravenede van Vlaendren ende den zwarten leeu, ter heere van den lande van Vlaendren, ende een schild metter wapene van den ambochte, ter heeren van der ambochte voorseyd, ende tvoorseyde ambocht hadde 24 barnende vierpannen, alder voorseyde nacht hover. Item voord tambocht van den vleeschshauwers hadden up den Braemberch, voor haerlieder huus, daer haddenze vooren ghemaect een stage, vooren becleed met schoone tappytserye ende alzo ooc, van bachten opgaende, end hadden daer up staende twee trompetters ende 2 claroenen, ende beede met zelveren trompetten ende zelveren claroenen, de 4 sticken toebehoorende d'ambochte voorseyd, ende die daer up staen spelende alle de nacht, ende hadden vooren up de stage voorseyd, ghemaect staende 6 barnende toordsen,
[pagina 321]
ende hadden voord ghemaect 6 vieren staende zyde an zyde, kercsparren ooghe, ende een vyer rond, dat was 7, ende dat vyer was wyt int ronde 24 voeten. An elc zelveren trompet ende claroen voorseyd was hangende eene baniere, groot ende wyd, naer de betaemte van der trompette ende claroene: ende ant voorseyde cleed van tappyts, dat bachten ghespannen was, daer was an ghehangen ende vast ghemaect, 7 schilden van wapenen, inhoudende ende achtervolgende de schilden van den ambochte van der vischscopers. Item ooc voor de kerke van Sinte Wouburge was ooc ghemaect een groot vyer kercsparren ooghe, ende 10 voeten wyd, ende den tor van de voorseyde kerke, was boven an de voye behangen met rooden lakene. Deze voorseyde 10 artykelen gheschieden ende waren al getoocht bin der stede van Brugghe, den 6^den dach in December, anno 89 voorseyd, ter cause van den payse, die doe ter hallen huut ghelezen was, die gemaect ende gesloten was tusschen den kuenync van den Romeynen ende den lande van Vlaendren.
[1489-12-8] Item up den 8^sten nacht, als den 9^sten dach bedaechde in December, anno 89, doe zo was eenen man vermoord, ende dood ghesteken in de Ezelstrate.
[1489-12-11] Item up den 11^sten dach in December, anno 89, doe zo was binder stede van Brugghe, grooten noot, zworghe ende vreeze van brande, in den tor van der kerke van Sint Gillis, binnen Brugghe, maer den almueghenden God zy ghedanct ende ghebenedyt, het vergync metten minsten quets.
[1489-12-14] Item up den 14^sten dach in December, anno 89, tsnavens ten 8 hueren, doe zo quam Phylips mons^r huuter stede van der Sluus in de stede van Brugghe, met zeere schoonen, costelicken state, ende den bastaerd van Braband met hem.
[1489-12-15] Item up en den 15^den dach der maend voorseyd, ten 10 hue-
[pagina 322]
ren, doe reedenze beede voorseyd, huuter stede van Brugghe, ende mis. Jooris Pychavet daer mede, zy reeden alle drye te peerde, met schoonen, costelicken state, om naer de goede stede van Gend.
[1489-12-16] Item up den 16^den dach in December, anno 89, doe zo deden binder stede van Brugghe, 100 ende 50 ghezellen monster, ten clooster van den Eechoute, om te vanghene ende in te halene de quaedoenders van buuten der stede.
[1489-12-17] Item up den 17^den dach in December, anno 89, doe zo was binder stede van Brugghe, in den Burch, ghemaect een schavoot ende daer waren up gheexecuteert van den live, metten zweerde, ende alzo ghebrocht van levenden live ter dood, ende zy waren beede van de stede van Doornicke, den eenen hiet Robinet, ende was een smit, ende dander hiet Arnoulet, ende was een droochscheerder, ende deze voorseyde justicye was ghedaen, by den heere ende by der wet der stede van Brugghe. Item up den 17^den dach in December, anno 89, doe zo was binder stede van Brugghe, by der grote Eechoudbrugge, ghevischt eene verdroncken vrauwe, de welke vrauwe was wonachtich bachten Onze Vrauwe kerke in Brugghe, in een huus gheheeten in den Havegeer, ende de voorseyde vrauwe plochte te beziene de horine van den zieke lieden.
[1489-12-18] Item up den 18^den dach in December, anno 89, doe zo was binder stede van Brugghe, in de Roodstrate, grooten noot, zworghe, ancxt ende vreeze van brande, by een huus, staende in de zelve strate voorzeyd, gheheeten in den Engel, maer den almuegenden God hebbe lof ende danc, het vergync metter minste schade.
[1489-12-23] Item up den 23^sten dach in December, anno 89, doe zo deden de rood caproenen van Brugghe, ende ooc meer ander mannen, zy deden monster binnen Brugghe, int hof van
[pagina 323]
den Gruuthuuse voor mynheere van den Gruuthuuze als capiteyn van der stede van Brugghe, de voorseyde roode caproenen, die wordeden daer ontslaect van haren heede, ende deden daer heed als sauwenyers van der stede van Brugghe tot 100 ende 60 mannen.
[1489-12-26] Item up den 26^sten dach in December, anno 89, doe zo gyngen huuter stede van Brugghe, 25 sauwenyers, tooter stede van den Damme.
[1489-12-30] Item up den 30^sten dach in December, anno 89, doe zo was Willem Moreel verlaten van den schoudheetenschip, ende hy hadde schoudheeten ghezyn 23 weken, een dach min, ende het worde doe den schoudheeten van Brugghe meester Antheunis De Witte. Item tjaer van 89 dat es huut, den almuegenden God hebbe lof ende danc, ende ic sal byder gracien van Gode almachtich, ghebenedyt begunnen ende vulhenden tjaer van 90, ende den ghebenedyden Christi Jhesus ghelieft. Amen.

Vorige Volgende

[1489]

[1489-1-4]

[1489-1-6]

[1489-1-15]

[1489-1-17]

[1489-1-24]

[1489-1-26]

[1489-1-28]

[1489-1-30]

[1489-1-31]

[1489-2-1]

[1489-2-2]

[1489-2-4]

[1489-2-6]

[1489-2-9]

[1489-2-10]

[1489-2-15]

[1489-2-17]

[1489-2-18]

[1489-2-20]

[1489-2-23]

[1489-2-24]

[1489-2-28]

[1489-3-3]

[1489-3-6]

[1489-3-14]

[1489-3-16]

[1489-3-21]

[1489-3-28]

[1489-3-31]

[1489-4-7]

[1489-4-9]

[1489-4-11]

[1489-4-13]

[1489-4-15]

[1489-4-23]

[1489-4-25]

[1489-4-28]

[1489-4-30]

[1489-5-2]

[1489-5-3]

[1489-5-7]

[1489-5-9]

[1489-5-11]

[1489-5-18]

[1489-5-13]

[1489-5-14]

[1489-5-16]

[1489-5-19]

[1489-5-20]

[1489-5-21]

[1489-5-23]

[1489-5-24]

[1489-5-25]

[1489-5-26]

[1489-5-30]

[1489-6-2]

[1489-6-3]

[1489-6-4]

[1489-6-5]

[1489-6-6]

[1489-6-9]

[1489-6-11]

[1489-6-13]

[1489-6-14]

[1489-6-15]

[1489-6-16]

[1489-6-17]

[1489-6-20]

[1489-6-21]

[1489-6-27]

[1489-6-28]

[1489-6-29]

[1489-6-30]

[1489-7-1]

[1489-7-2]

[1489-7-3]

[1489-6-29]

[1489-7-3]

[1489-7-4]

Dit naervolgende point geschiede up den 17^den dach in Oust anno 89, maer den scriver ne wist niet.