|
| |
[1487]
[1487-1-7]
Item up den 7den dach in Laumaend, anno 87, doe quamen in mynheere Van Bevere ende myn heere den grave van Nassauwe beede te samen ter Gendpoorte in, wel met 100 peerden, ende quamen van der goede stede van Gend, binder goeder stede van Brugghe.
| |
[1487-1-12]
Item up den 12sten dach in Laumaend, anno 87, doe verdranc eenen schipman van Gend, ende was gheboren van Moerbeke, ende hy hiet Cornelis de Vettere; hy verdranc te Brugghe, honder de Waterhalle. God hebbe zyn ziele. Amen.
| |
[1487-1-14]
Item up den 14den dach in Laumaend, anno 87, doe quam meester Adriaen de Mil, broeder van den hoordenen van de Predicaren, meester in der Goddelichede, ende honderzoucker van den kersten ghelove, die quam ten daghe voorseyt binder stede van Brugghe, van den helegen grave, ende hy hadde wech gheweeist 39 weken ende twee daghen.
| |
[1487-1-16]
Item up den 16den dach in Laumaend, anno 87, doe viel eenen man dood up thys by der Minnebrugge, gheseyt up tMinnewater, zo dat hy daer starf.
| |
| |
| |
[1487-1-19]
Item up den 19den dach in Laumaend, anno 87, doe trac huut Brugghe omtrend 300 volcx van wapene om te treckene te Therewane, om die te helpene, om te secoursene ende te vytaeljerne.
| |
[1487-1-22]
Item up den 22sten dach in Laumaend, anno 87, doe waren ghehouden ende ghedregen processyen generael ten broeders van den Predicaren.
Item up den 22sten dach in Laumaend, anno 87, doe was eenen dood ghesteken in een wyntaverne, geheeten in Tillegeem, ende hy hiet Ruebrecht, ende hy was daer den cnape van den huus, ende het deden de clocluuders van Onzer Vrauwen, den eenen hiet Olyvier, ende den andren die hiet......
| |
[1487-1-23]
Item up den 23sten dach in Laumaend, anno 87, doe was ghevonden eenen die hemzelven verhangen hadde te Brugghe, in den corten Rollenwech, bachten der Peperstrate, ende hiet Ancelmus Kervoed, ende was eenen hofman; zyn vader hiet Anthuenis Kervoed.
| |
[1487-1-24]
Item up den 24sten dach in Laumaend, anno 87, doe was groten nood van brande te Brugghe, ten hoye, by den huuze gheheeten in den Buc.
Item up den 24sten dach in Laumaend, anno 87, up de 9 hueren, in den havend, doe was daer in den langen wynckel, eenen Spaengyard dood ghesteken ende het dede eenen cleeder scriver, ende hy hiet....
| |
[1487-1-28]
Item up den 28sten dach in Laumaend, anno 87, doe waren gehouden ende ghedregen processye ten broeders van den Augustinen.
| |
[1487-2-2]
Item up den 2den dach in Spurkele, anno 87 doe was groot messchief van brande, in een cleen straetkin geheeten ten Gootkene, staende beneden der Snackersbrugghe, maer God lof ende danc het vergync metter minster schade.
| |
| |
| |
[1487-2-4]
Item up den 4den dach in Spurkele, anno 87, doe waren ghehouden ende ghedregen processyen generael ten clooster ten Karmers geheeten, tOnzer Vrauwe broeders. God lof ende danc.
Item up den 4den dach in Spurkele, anno 87, doe was eenen man ghequetst ende ghegrieft van zinen live, ende hy hiet Francoys de Witte, ende was den hofman van de Fremynueren, ende het dedem eenen die hiet Joos, ende die plochte ooc, ten hoove voorseyd, hofman te zine, alzo dat den voorseyden Francoys quam van levenden live ter dood.
| |
[1487-2-5]
Item up den 5den dach in Spurkele, anno 87, doe was alle de stellyngen ende alle belemmerdhede of ghedaen van den Beeilfrooyd, staende up de Halle an de groote merct; up den welken Beeilfroyd was ghestelt de voorme, of de ghelyckenessse van den helegen hingel Sinte Michiel, ende dit was schone vergoud ende up ghestelt, up den eersten dach in Hoymaend, anno 86. Voord int zelve jaer voorseyd, zo was up ghesteld ende angheslegen, twee latoenen platen, scone ende costelic vergoud, up den 22 in November, voord zo zynder ghemaect an den voorseyden Beeilfrooyd 4 veinsterkins torrekins zynde, ende die hovertrocken met loode, ende an elc torrekin, eene latoene plate vergoud, ende an elke yzern spille, 3 latoene appelen vergoud, ende voord up elke spille een bannierkin vergoud, ende daer in ghemaect de wapenen van den lande ende steden van onzen harden gheduchten heere ende prinche. Voord neder dalende, in den rechten middel van den voorseyden Beeilfrooyd, zo staender ghemaect 8 veinstern, hoopen gaende ende ooc sluutende, ende elke veinster hebbende ghelyc als dander 4 voorseyd. Voord ten an den zelven Beeilfroyd beneden, by der voye, zo staen ghemaectooc 4 veinstern hoopen gaende ende ooc sluutende, ende elke veinster hebbende ghelyc als alle dander voorseyd. Voord
| |
| |
tusschen elke veinstre voorseyd beneden, zo staet ghemaect eenen schild van wapenen, tes te wetene, in de zyde van den Burch, zo staet ghemaect de wapenen van den keyser, twelc es den zwarten harend in een gouden veld, ende die harend hebbende op zyn borst de wapenen van Oostryke. Item voord, an de zyde, hover de grote merct, daer staet de schild van Bourgognen ghedeelt alzo daertoe behoord. Voord an dander zyde, hover de Steenstrate, daer staet de wapene van Brugghe, twelc es den blaeuwen leeu, liggende up den rooster ghelyc als dat behoord. Voord an de zyde van der houde Burch, tusschen de vierde veinster, zo staet ghemaect de wapenen van Vlaendren, twelc es den zwarten leeu, int gouden veld.
| |
[1487-2-7]
Item up den 7den dach in Spurkele, anno 87, doe quam hy in zyn goede stede van Brugghe, onzen harden geduchten heere ende prinche Maximilyaen, vader, voochd, ende monboor van onzen erfachtegen prinche, den jongen hertoghe Phylips, ende hy quam van zynder goede stede van Sinte Homaers, ende hy quam in, ter Smedepoorte, met honder vooren ende naer, met 400 peerden, ende hy zat, up een middelbaer peerd graeu van hare, ende hy hadde an eenen zwarten fluweelen keerle, ghevoedert met marters, ende eenen zwarten caproen, up zyn ooft, ende die hovertrocken, hover zyn schouderen, ende beneden den boord van den caproene voorseyd, rondomme beleyt met rooden fluweelen lakene, ende hy hadde up zyn hooft eenen velten hoed, doncker blaeu, ende het was doe ten daghe voorseyd, 25 weken, dat hy vertrac huuter stede van Brugghe. Voord up den 7sten in Spurkele, zo vertrac huuter stede van Brugghe, ter Cruuspoorten huut, in goede maniere ende hoordenancye hondert kalveneriniers.
Item up den 7den dach in Spurkele, anno 87, doe reed
| |
| |
den hertoghe Maximilyaen ter Gendpoorten huut, ende reed vliegen ende jagen betrend den cloostere van Sint Truwen ende betrend Rybaudenburch.
| |
[1487-2-8]
Item up den 8den dach in Spurkele, anno 87, doe reed Maximilyaen onzen hertoghe ter Ezelpoorten huut, ende reed vliegen ende jagen, ende ooc hy dede monster van wapenynghe van zynen volcke van wapene.
| |
[1487-2-10]
Item up den 10den dach in Spurkele, anno 87, doe reed ons prinche ende hertoghe Maximilyaen, hy reed spelen, vliegen ende jagen ter Cruuspoorten huut met 500 mannen, tes te wetene, 200 te voed ende 300 te peerde, ende den grave van Polleem was daer mede, ende hy hadde an tgouden vlyes, ende den hertoghe voorseyd dede buuten monster, ende hy quam bin den zelven havende alzo weder ter poorten in.
| |
[1487-2-11]
Item up den 11sten dach in Spurkele, anno 87, doe reed onzen harden gheduchten heere ende prinche Maximilyaen, ten Observanten, buuten der Ezelpoorten, met zeere schonen, chierlicken ende princhelicken state, ende met den grave van Polleem, ende metten bailju van Brugghe, ende met den meester Pieter Lanchals, als schoutheeten van Brugghe, ende met menegen andren fresschen edelen heere, ende met 300 mannen te peerde, ende met 68 voedgangers, ende den hertoghe voorseyd hadde up zyn ooft een roode fyne schaerlaken bonnette, ende daer up eenen finen witten velten hoed, ende hy hadde an eenen keerle, lanc tooten voeten, van gouden laken.
| |
[1487-2-12]
Item up den 12sten dach in Spurkele, anno 87, doe vertrac ons harden gheduchten heere ende prinche ter Gentpoorte huut, toot Houdeleem, vliegen ende jagen, zeere heerlic ende met princhelicken state, ende voord van daer reed hy te Maldegeem, ooc daer vliegen ende jagen, ende
| |
| |
daer was hy twee dagen ende twee nachten, ende up den 14den dach van der voorzeyde maend, doe quam hy in ter Ezelpoorte, ende up den zelven havende, in de voorseyde maend, snavends ten zeven hueren, doe quam hy heeten met zinen hedelen, met meester Pieter Lanchals, rudder ende schoutheeten van Brugghe, als doe ten tyden.
| |
[1487-2-15]
Item up den 15den dach in Spurkele, anno 87, doe quam ons harde gheduchten heere ende prinche ten hetene in der schepenen huus van Brugghe, met zinen heeren ende princhen, ende vele van den notabelen poorters van der stede met hem, ende elc poorter met zinen wive, daer was gehouden eene costelicke maeltyt ende rykelic, ende tvoorseyde schepenen huus, beneden an 't hupperste hende, daer de schepenen zitten, dat was behangen met tappytserye die schone ende huterlic, ende daer was ghedanst ende ghehoveerd, alzo daer toe behoord.
Item voord noch up den 15den dach in Spurkele, anno 87, snavens ten 8 hueren, doe hadde een scheppers cnape zitten dryncken in de Tassche, staende in de Wullestrate tiegen hover de Bueshalle; dat voorzeyde huus comt bachten up de Reye; die man voorseyt gync van bachten huut, ende hy viel van boven neder in de Reye, versmoorde ende verdranc daer int watre, ende hy worde weder ghevist up den 17den dach, in de maend voorseyd. God hebbe zyn ziele, Amen, ende alle zielen. Amen.
| |
[1487-2-25]
Item up den 25sten dach in Spurkele, anno 87, doe was eenen man dood ghesteken int sHeerhameraelstrate, bachten den Augustinen, ende was een messemakers cnape, ende hiet Thomaes, ende het dede een Duudsche.
| |
[1487-3-3]
Item up den 3den dach in Meerte, anno 87, doe was by justicyen eenen man zyn hoore al zuver of ghesneden, in den Burch, ende was een crepel gaende met twee cricken,
| |
| |
ende hy was een cousscheppers cnape; ende up dien zelven dach ende huere, zo was daer ooc eenen ghegeeselt, ende den crepel was ghebannen tien jaer, van dieften, ende het dede de wet van Brugghe.
| |
[1487-3-5]
Item up den 5den dach in Meerte, anno 87, doe quam ter Gendpoorten in, myn vrauwe de duwarierege, ons houde princesse, de weduwe van hertoghe Kaerle, ter zaleger ghedachte; zo quam in met zeere schonen, heerlicken ende rykelicken state, toot int hof van den prinche, ende alle de joncfrauwen van der stede van Brugghe, tes te wetene, de upperste ende de nottabelste van der stede voorseyd, alst recht ende redelic es, waren ghenood ten banckette, dat ons harde gheduchten heere ende prinche daer toe bereed hadde, om huer te feesteyerne ende wellecomme te heetene.
| |
[1487-3-7]
Item up den 7sten dach in Meerte, anno 87, doe was in den Burch justicye ghedaen, up een schavood, by den heere ende by de wet van der stede, van eenen quaeddoender ende die hiet Joos, ende hem was execucye ghedaen van den live ende gherecht metten zweerde. God hebbe zyn ziele, ende alle zielen. Amen.
Item up den 7den dach in Meerte, anno 87, doe vochten de Heynuwiers tiegen de Duudschen te Brugghe, up de Merct, by Sinte Kartoffels kerke, ende de Henuwier slouch eenen Duudsche zyn hand of van zinen haerme; de hand zuver of.
| |
[1487-3-8]
Item up den 8sten dach in Meerte, anno 87, doe was onthooft by justicyen in den Burch een Duudsche, ende execucye ghedaen ende gherecht, metten zweerde, by den heere ende by der wet van der stede van Brugghe.
Item up den 8sten dach in Meerte, anno 87, doe waren 4 ghezellen tuusschers ende dobbelaers van der Vischmerct, zy waren ghesteld ende ghesloten te haerleder cleenichede
| |
| |
ende schoffierichede, metten voeten in den bloc, up den houc van den Waterhalle, thenden der Breydelstrate, daer men al zulke bouven pleeicht te stellene.
| |
[1487-3-14]
Item up den 14den dach in Maerte, anno 87, doe was in den Burch, by der wet van de stede van Brugghe, eenen man ontooft, ende execucye van den live metten zweerde, ghebrocht van levenden live ter dood, ende het was een Ingelsman. God hebbe zyn ziele. Amen.
| |
[1487-3-16]
Item up den 16den dach in Maerte, anno 87, doe reed ons harde gheduchten heere ende prinche Maximilyaen, vader, voocht, monboor van onzen erfachtegen ingheboren heere ende prinche, den jonghen hertoghe Phylips, Maximilyaen voorseyd reed huut zynder goede stede van Brugghe, tooter goeder stede van den Sluus met schonen eerlicken ende princhelicken state, alzo hem betaemd ende toebehoord.
| |
[1487-3-22]
Item up den 22den dach in Maerte, anno 87, doe was ghedaen in Onzer Vrauwe kerke het jaergetyde van Marie van Bourgognen zeere costelic ende chierlic alst recht ende redelic es, ende daer was onze houde princesse myn vrauwe de duwarierege met zeere schoone costelic ende rykelicken state, ende met meneghen edelen heere, ende rudder.
| |
[1487-3-29]
Item up den 29sten dach in Maerte, anno 87, doe quam ons hertoghe Maximilyaen van der stede van Sluus weder bin zynder goeder stede van Brugghe, al metten zelven state voorseyd.
| |
[1487-3-24]
Item up den 24sten dach in Maerte, anno 87, zo was eenen man ghequetst, ghesteken ende ghegrieft van zynen live, zo dat hy daer terstond of starf, ende hy hiet Boudin, ende het dede eenen gheheeten Lauwereins, ende zy woenden beede by der Vrydachmerct.
| |
[1487-3-26]
Item up den 26sten dach in Maerte, anno 87, doe quam ons harde gheduchten heere ende prinche, in den Burch, up
| |
| |
der schepenen huus, met al zynen eerlicken ende costelicken state, ende ooc met alle den prelaten, ende met zynen edelen heeren.
| |
[1487-3-27]
Item up den 27sten dach in Maerte, anno 87, doe was ghevonden een dood kind in de Veste van der stede van Brugghe ende het vond eenen visscher in zyn net, die visschede varsche visch ter Veste voorzeyd, tusschen der Smedepoorte ende der Bouverypoorten, bin der Minnewatre.
| |
[1487-3-29]
Item up den 29sten dach in Maerte, anno 87, doe was hover ghedaen by justicyen, de zelve vrauwename die tvoorzeyde kind geworpen hadde ende verdroncken in de Veste van der stede van Brugghe, ende zoe was zelve de natuerlicke moeder van den voorseyde kinde, ende zoe wierpt in de voorseyde Veste ende liet daer versmooren bachten Karstendomme, ende het was eenen knechtkin; ende zoe hiet Margriete, ende zoe was van Geele, huut Braband, ende zoe woende buuten der Bouveryepoorte, up den heerwech, alzo men gaet te Sinte Michiel waerd in een huus dat heet in Bueterbeke, ende zoe ghelach ende worde moeder van dien voorseyden kinde, aelst Gode gheliefde, up den 23sten dach in Maerte voorseyd, ende zoe versmoorde ende verdranc tselve haer natuerlic kind, ten daghe voorseyd, bin den zelven havende; ter cause van dien zo was de zelve vrauwe, ten daghe voorseyd, ghewezen by der wet van der stede van Brugghe, te barne an een stake, in een vier ende alzo te brynghene van levenden live ter dood. God hebbe huer ziele. Amen.
Item up den 29sten dach in Maerte, anno 87, doe was groot messchief van brande bin der stede van Brugghe, in Groenynge, by eene stove geheeten in den Pelegerim, ende daer verbarrende of een huus.
Item up den 29sten dach in Maerte, anno 87, doe was
| |
| |
eene schone jonge maecht dood gheslegen van de heken van eene muelne, staende ten Vlamync damme, ende de muelne behoord toe een backer van Brugghe, ende hiet Pieter Juustemond.
| |
[1487-3-30]
Item up den 30sten dach in Maerte, anno 87, doe reed ons harde gheduchten heere ende prinche Maximilyaen ten clooster van den Observanten, buuten der Ezelpoorte, hy quam daer met schonen, costelicken, chierlicken ende princhelicken state.
| |
[1487-3-31]
Item up den laetsten dach in Maerte, anno 87, doe reed ons harde gheduchten heere, huut zynder goeder stede van Brugghe, ter Cruuspoorten huut, eerlic ende met princhelicken state, ende den upper jager met hem, ende reeden alzo tot Maldegeem, opt tvelt vliegen ende jagen, ende up den eersten dach van April, zo quam hy weder ter Cruuspoorten in, bin zynder goeder stede van Brugghe, snavends ten 7 hueren.
| |
[1487-4-1]
Item up den 1sten dach in April, anno 87, doe quamen die van Sinte Cruus, de gheheele college van der kerke, ter Cruuspoorten in, met eene zeere schoone processye, ende quamen ten broeders van den Predicaren, ende haelden daer een stic van den lieven, weerden, helegen, ghebenedyden houte van den cruce ons behouder Christi Jhesus, twelcke dat gheprouft ende warachtich bevonden es, dat zo es, by notabele doctueren ende meesters van der goede stede van Brugghe, meester Gillis de Baermakere, meester in theologye, suffregaen van den busschop van Doornicke ende busschop van Sarepten; meester Adriaen de Mil, van der Predicaren oordenen, als meester in de Goddelichede ende honderzoucker van den kerstene ghelove; den notabelen, eerweerdegen meester Jooris de Ketelare, van den Augustinen ende met vele andre meesters ende doctuers, zo
| |
| |
was dat helege, glorieus, ghebenedyde houd ghedregen met groter heeren ende weerdicheden, van den broeders van den Predicaren, binnen Brugghe, toot in de kerke van Sinte Cruus, daer dat rustend es ende blyven sal.
| |
[1487-4-4]
Item up den 4den dach in April, anno 87, doe was een dood kind ghevonden, gedolven in dheerde, buuten der Bouverye poorte, in een beeilet, ter rechter hand van den eerwech, also men gaet te Sinte Michiels waerd, by eender waterynghe geheeten Bueterbeke.
| |
[1487-4-5]
Item up den 5den dach in April, anno 87, doe was eenen schonen joncman ghedood, ende execucye ghedaen van den live, ende ghedaen sterven metten zweerde; ende deze justicye was ghedaen buuten Zevecote, tAssebrouc; ende het dede myn heere van Merwe, als souvereyn van Vlaendren; ende up den zelven dach, waren ghestelt by der wet van der stede van Brugghe, twee bouven, metten voeten in den stoc, an de Waterhalle, ten houcke van der Breyelstrate, ende up dien zelven dach, do zo wast bandach ende daer en waren ghebannen maer seven personen, 6 mannen ende eene vrauwe.
| |
[1487-4-7]
Item up 7den dach in April, anno 87, doe waren dry mannen ontooft, in den Burch, up een schavood, by der wet van der stede van Brugghe, ende dat om zeker pointen van meshuuzen; den eenen was van by Haed huut Heynegauwen, ende dandre was van Sinte Adriaen van Geerolfsberge, ende de derde was van der goede stede van Gend, ende die hiet Pieter; ende die was ghequartierd ter plaetse voorseyd, daer hy onthooft was; waer of de twee waren begraven in Sinte Jans huus, binnen Brugghe, ende Pieter voorseyd was ghestelt zyn ooft up een glavyeschacht up de Smedepoorte, ende zynen eenen harem ghehangen an een cricke, an een yzeren ketene, buuten der Bouveryepoorte, ende zynen anderen
| |
| |
harem, buuten Sinte Katelinepoorte, ende zyn een been, buuten der Gendpoorte, ende dandre been, buuten der Speypoorte, ende tlichame of den buuc toe behoorende de vier quartieren voorseyd, was ghedaen in eenen zac, ende met coorden zeere sterc ghebonden, ende alzo gehangen an de galge, of ant gerechte van der stede, hoe men wil.
| |
[1487-4-10]
Item up den 10den dach in April, anno 87, doe was te Brugghe ghestelt up een schavood, eenen gheheeten Symoen Servaes, die men hiet den blenden Moenin, ende hy was ooc blend, zo dat hy niet en sach; hy was daer ghestelt ter plaetse voorseyd ende hy was met eenen gloyenden helsene duer zyn tonghe ghesteken ter cause, om dat hy Symoen voorseyd, hadde ghesproken up onzen harden gheduchten heere ende prinche, ende up ons houde princesse myn vrauwe de duwarierege; zo haddy Symoen voorseyd ghesproken quade injurege woorden, ende hy was zes jaer ghebannen up zyn ooft.
| |
[1487-4-13]
Item up den 13den dach in April, anno 87, doe was groot messchief van brande ten huuse gheheeten in Casselberch, staende ten hende van de Oochstrate binnen Brugghe, tiegen hover een huys gheheeten in de Zunne; tvoorseyde huus wylen toebehorende de kindren van der Banc, ende het was int jaer, ende ten daghe voorseyd den goeden Vrydach, jaerghetyde ende ghedinckenesse van den passye van onzen behouder Christi Jhesus.
| |
[1487-4-17]
Item up den 17den dach in April, anno 87, doe waren twee mooren tSinte Donaes in Brugghe, ende die ontvangen tkerstendom, ende thelege kersten ghelove, hover de vonte, tes te wetene, deenen was een manooft, ende dander was eene vrauwename, ende waren de petrens den grave van Nassauwe, mynheere van Beveren ende mynheere Phylips, monsr, ende de metrins myn vrauwe van der Vere, de
| |
| |
wedewe van mynheere van Sint Jooris, ende de wedewe van Maertin Lem.
Item up den 17den dach in April, anno 87, doe vertrac ons harde gheduchten heere ende prinche Maximilyaen, huut zyn goede stede van Brugghe, ter Gendpoorten huut, ende reed vliegen ende jagen, met zeere schone ende princhelicken state, ende reed alzo ter goeder stede van Hardenburch, ende van daer tooter goeder stede van den Sluus, om van daer te treckene tooter goeder stede van Middelburch in Zeeland, ende hy hadde ten daghe voorseyd van zyn vertrecken, ghelegen in de goede stede van Brugghe, 10 weken.
| |
[1487-4-20]
Item up den 20sten dach in April, anno 87, doe was groot messchief van brande in de stede van Brugghe, in een plecke gehieten int Nyeuland, naest den Hingel; maer Gode lof ende danc, het verghynck metten minsten quets.
| |
[1487-4-23]
Item up den 23sten dach in April, anno 87, doe waren ghehouden ende ghedregen processyen generael tOnzer Liever Vrauwe Kerke, binnen Brugghe, ende het dede den dienst eenen priester van der oordenen van den Predicaren, ende hy es biechtvader van onzen harden gheduchten heere ende prinche Maximilyaen, ende hy es busschop van Salubry; het licht in Eydenesse, by der stede van Jerusalem.
| |
[1487-4-27]
Item up den 27sten dach in April, anno 87, doe waren ghestelt 4 rybauden in den bloc, met haren voeten gheslooten, an den houc van de waterhalle, up den houc van der Breydelstraet, in Brugghe.
| |
[1487-5-8]
Item up den 8sten dach in Meye, anno 87, doe was te Brugghe, in den Burch justicye ghedaen by der wet van der stede van Brugghe, van twee mannen, den eenen hiet Adriaen Ballync, ende was van der stede van Brugghe, ende dander die was van der stede van Gend, ende die hiet Jan; de twee mannen waren execucye ghedaen van
| |
| |
den live ende gherecht metten zweerde, ghelyc quaeddoenders diend ende toebehoord. God hebbe de zielen. Amen.
| |
[1487-5-7]
Item up den 7den dach in Meye, anno 87, zo was eenen man ghegrieft van zynen live, zo dat hy daer of starf, ende quam van levenden live ter doot, ende hy hiet Cornelis Hagoudt; ende het geschiede bachten den Augustinen clooster, in Sheerhamerhaelstrate, en dat dede een houd cleeder lapper, die zat in een huizeken, ende lapte houde cleedren, up den houc van der voorseyde strate.
Item voord noch up den zelven dach, den 7den dach van Meye, anno 87, doe zo was eenen man dood ghesteken in de Steenstrate, in een huus dat men heet in den Paeu, by twest vleeschshuus, ende het was een Duudsche, ende het was ooc een Duudsche died dede. God hebbe den zielen van al. Amen.
| |
[1487-5-9]
Item up den 9den dach in Meye, anno 87, doe quam ons harde gheduchten heere ende prinche, ende kuenync van den roomschen ryke, hy quam bin zynder goeder stede van Brugghe, ten dage voorseyd, van der goeder stede van Gend, ende hy quam in ter sinte Cateline poorte, met zeere schone ende rykelicken state princhelic, eerlic, als wel hem betaemd, en hy hadde doe huuter stede van Brugghe ghezyn 25 daghen.
| |
[1487-5-12]
Item up den 12den dach in Meye, anno 87, doe was in den Burch een schavood ghemaect voor thuus van den Vryen, met eenen stake, ende daer an was an ghebonden een manooft naect, ende die was daer an ghegeeselt van dieften, ende hy was dry jaer ghebannen up zyn een hoore.
| |
[1487-5-16]
Item up den 16den dach in Meye, anno 87, doe reed ons harde gheduchten heere ende prinche huuter stede van Brugghe, ter Cruuspoorten huut, met zeere schone, costelic ende princhelicken state, ende reed alzo tooter zynder goeder stede van der Sluus, wel met 200 peerden.
| |
| |
| |
[1487-5-19]
Item up den 19den dach in Meye, anno 87, doe was te Brugghe, in den Burch, justicye ghedaen up een schavood, by der wet van der stede voorzeyd, van eenen gheheeten Clays, ende hy was van der stede van Valenchiene; hy was ontooft ter plecke voorseyd, ende up een wiel gherecht, als voor eenen rover, ende was alzo ghestelt buuten der Smedepoorte, tusschen den Magdaleene kerke ende de capelle van Sinte Erwoud; ende up dat voorseyde wiel, was ghemaect staende eene galge; voord ten daghe voorseyd, zoe zo was ter plecke voorseyd ooc justicye ghedaen van eenen gheheeten Cornelis, ende men hiet hem, al int ghemeene, Cornelis de Plaesterare, ende hy was van binder stede van Brugghe gheboren; hem was een stic van zynder hoore ghesneden, ende tien jaer ghebannen van dieften, ende dat ooc ghedaen by der wet van der stede van Brugghe; item voord, zo was noch by der wet van der stede van Brugghe hover ghedaen by justicyen, eenen gheheeten Lammekin, ende was eenen joncknecht, ende hy was eens muelenaers zuene, van der stede van Brugghe, ende was ghehangen ende verworcht ant gherechte van der stede, ghelyc eenen dief. God hebbe zyn ziele ende alle zielen. Amen.
| |
[1487-5-20]
Item up den 20sten dach in Meye, anno 87, doe gheschiede groote moyte buuten ten 3 kuenynghen, buuten der Cruuspoorte, ende het waren Duudschen; ende deen Duudsche griefde den andren, zo dat hy daer starf van der quetsuere, ende quam van levende lyve ter dood.
Item up den 20sten dach in Meye, anno 87, doe gheschiede grote moyte, twiste ende ghevecht by den Augustinen, ter houcke van tSheerhamerael strate, van de galeyers ende van eenen Gillis Tousayn, die men hiet in de Wandelynge, de quade Gille; zyn vader heet Tousayn ende es eenen graeuwerkere, zo dat den voorzeyden Gillis van den voor- | |
| |
zeyden ghevechte, quam van levende lyve ter dood, ende lach daer dood up de reye, tusschen de Augustine kerke, ende den voorseyden hove, voor een nagelmakers duere.
| |
[1487-5-23]
Item up den 23sten dach in Meye, anno 87, doe was grooten noot, zoorgen ende vreezen van brande, up toost proosche, tiegen hover tof van de veere, achterwaerd streckende ten cliefhoucke waerd, ende dat zoude ghecommen hebben van reeustrote barnene, huut eenen sterfhuuse; maer God zy ghebenedyt, het verghync metten minste schade.
| |
[1487-5-26]
Item up den 26sten dach in Meye, anno 87, doe quam onzen harden geduchten heere ende prinche Maximilyaen by zynder goeder stede van Brugghe, snavends ten 9 hueren, ende hy quam huut den goeden lande van Braband, Holland ende Zeeland, ende hy hadde doe van Brugghe ghezyn 10 dagen; ende hy quam in, met schonen eerlicken ende princhelicken state, als hem wel betaemd ende toebehoord.
| |
[1487-5-27]
Item up den 27sten dach in Meye, anno 87, doe was te Brugghe gheschoten den papegay van den houden voedboghe; hy was geschoten by der Cruuspoorte, up de veste van de stede, an deerste muelne, by der voorseyde poorte; ende daer schoot ooc mede ons harde gheduchten heere ende prinche Maximilyaen. De 2de schote die hy schoot den papegay tooft of; ende het worde doe kuenync, ende hy schoot den gay of eenen gheheeten Anthuenis Pyljaerd, ende es een droochscheerer, ende hy woend in de Cupstrate, ende onzen prinche voorseyd hadde doe han eenen zwarten keerel van laken van damast, binnen ghevoedert met rooden zyden laken creymezy, ende hy hadde han zyn gouden vlyes, ende eene roode scharlaken bonette up zyn hooft, ende was daer alzo met schoonder oordenancye, state ende eerlichede, ende met goeder manieren, ende met menegen fresschen hedelen man, ende men voerde voor onzen harden, gheduch- | |
| |
ten heere ende prinche voorseyd een blood zweerd zeere costelic vergoud.
| |
[1487-5-30]
Item up den 30sten dach in Meye, anno 87, doe was monster ghedaen, buuten der Cruuspoorte, van 500 mannen te voed, ende die deden monster voor den grave van Nassauwe, den grave van Polleem ende den jongen hertoghe van Gelder ende voor menich hander fresch edele heeren.
| |
[1847-6-3]
Item up den 3den dach in Wedemaend, anno 87, doe was te Brugghe een groot ghevecht van twee ghebroeders, ende waren beede van Gend; ende van den Duudschen, waer of dat den eenen broeder starf in Sint Jans huus, bin den zelven havende: den eenen broeder hiet Wouter ende den andren hiet Jan.
| |
[1487-6-4]
Item up den 4den dach in Wedemaend, anno 87, doe quetste ende griefde van zinen live, ende brochte van levende lyve ter dood, den bottelgyer van onzen harden geduchten heere ende prinche, hy brochter dood den bottelgyer van den hertoghe van Gelder, ende dit voorseyde ghevecht gheschiede voor thof van onzen prinche.
| |
[1487-6-7]
Item up den 7den dach in Wedemaend, anno 87, doe reed ons harde gheduchten heere ende prinche Maximilyaen, huuter stede van Brugghe, ter Cruuspoorten huut, met schonen princhelicken state, ende reed te Maldegeem, vlyegen ende jagen, ende hy quam weder in de voorzeyde stede, bin den zelven havende.
| |
[1487-6-9]
Item up den 9den dach in Wedemaend, anno 87, doe was dood gesteken eenen Duutsche, ende het dede een Duudsche, ende het gheviel te Brugghe, tusschen den houc van der Vlamyncstrate ende Sinte Pieters kerke, up de Wisselbrugge.
| |
[1487-6-17]
Item up den 17den dach in Wedemaend, anno 87, doe vertrac den grave van Nassauwe, den jongen hertoghe van
| |
| |
Gelder ende noch 2 of 3 hander heeren, die vertrocken al te zamen huut in oorlogsche wise, ter Smede poorten huut, ende alle te voed, pyken, ende calveneren, ende ardchiers, toot 600 hondert, 10 min, dus zo warender int voorseyde ghetal 60 mannen te peerde, ghewapend, ende voord alle dander te voed, ende daer waren ghedaen tien ingienen, huuter stede huuse staende te Minnewatre, 6 serpentinen, ende 4 andre, de welke 4 men voerde, ten dage voorseyd, metten voorseyde wapenynge ende daer volchden mede achter, 10 waghenen met vytaelje, 6 waghenen met coorne, ende 4 waghenen met broode; up elcken waghen twee groote pac manden ghevult met broode.
| |
[1487-6-17]
Item up den 17den dach in Wedemaend, anno 87, doe vertrac ons harde gheduchten heer ende prinche Maximilyaen huut zynder goeder stede van Brugghe, ende reed alzo toot de stede van den Damme, ende van daer ter Sluus, buuten homme, ende van daer te Middelburch, in Zeeland, ende hy hadde doe ghezyn in de stede van Brugghe 19 weken, twee dagen min.
Item up den 17den dach in Wedemaend, anno 87, doe was een Duudsche dood ghesteken in de Steenstrate, voor slypen, ende het dede een Duudsche.
Item voord zo was up den zelven dach voorseyd ooc eenen dood ghesteken buuten der Cruuspoorte, in de dreve van den Sartruesen, ende. het dede ooc deen Duudsche den andren.
Item up den 17den dach in Wedemaend, anno 87, doe verdranc eenen man ter Steenbrugge, ende hy was eenen zeemenleder tauwere. God hebbe zyn ziele, amen, ende alle zielen. Amen.
| |
[1487-6-18]
Item voord up den 18den dach in Wedemaend, anno 87, doe waren te Brugghe, honder de Waterhalle, twee schepen
| |
| |
met wapenen, tes te wetene, teen schip vul pyken, ende tander vul lyfwapenen, ende ooftwapene; ende die twee schepen voorseyd waren ghelost, ende de pyken ende de wapene ghedaen te waghene, ende ghevoerd westwaerd ter Smede poorten huut, volghende theer.
Item voord, up den 18den dach in Wedemaend, anno 87, doe waren buuten de Cruuspoorte, tusschen der kerke van Sinte Cruus, ende der poorte voorseyd, daer lagen 12 hondert mannen ghewapend ende ghereed, ghelyc als zulc volc toe behoord, die waren ghedaen gaen van daer ter Speypoorte in, met goede oordenancien, ende alzo ter Sinte Ledenard poorte huut, ende alzo voord lancx der Veste ter Ezelpoorte, ende alzo voord westwaerd up volghende tvoorseyde heer.
| |
[1487-6-20]
Item voord up den 20sten dach in Wedemaend, anno 87, doe was dood ghesteken eenen die men hiet Reubin, ende hy was eenen muzepyper, ende hy en hadde maer eene ooghe, ende tgheschiede ten 3 brauwers.
| |
[1487-6-25]
Item up den 25sten dach in Wedemaend, anno 87, doe waren ghehouden ende ghedregen processyen generael te Sinte Salvator.
Item up den 25sten dach in Wedemaend, anno 87, doe was eenen man dood gheslegen met eenen stocke, te Coolkerke, bin den dorpe, ende hy was van der prochie ghebooren, ende het dede eenen Brabandre, eenen lynewevers cnape.
| |
[1487-7-3]
Item up den 3den dach in Hoymaend, anno 87, doe was eenen man execucye ghedaen van zynen live, ende gherecht metten zweerde up een schavood, by den heere ende de wet van der stede van Brugghe, ende was buuten gherecht up een wiel, buuten up tgalgestic.
| |
[1487-7-25]
Item up den 25sten dach in Hoymaend, anno 87, doe
| |
| |
was ghehouden ende ghedregen processyen generael in Sint Jacops kerke, bin der stede van Brugghe.
| |
[1487-7-28]
Item up den 28sten dach in Hoymaend, anno 87, doe zo was eenen man dood ghesteken by der Vridachmerct, tusschen Sinte Loyshuus, ende der Noordzandbrugghe.
| |
Dit ghescrifte es menchyoen makende van den pointen ende artikelen, daer omme dat mynheer Loys van Ludchenburch ghezeyt grave van Saint Pool, ende constable van Vrankeryke ghexcuteerd was van zynen live, ende ontooft te Parys, den 19den dach in Decembre, int jaer Ons Heere 1475.
Naer ghezien dan, dat by den hove van den kuenync van Vrankerycke, staende tiegen mynheere Loy van Ludchenburch, ghezeyt den grave van Saint Pool, ende constable van Vranckeryke, up alle zyn lasten ende informacye tiegen hem, by den biecht vaders, ende meer andre grote, hooghe, edele, mueghende ende notable persoonen, zo heeift hem den voorseyden Loys, heere van Ludchenburch ghebiecht, by minne ende by vriendschepen, zonder eenich dreeghement of crachten, heeift ghekent ende ghebiecht tgund dat hier naer volghend es.
Tes te wetene, om thonderhoudene den staet van zynder officye, aldus om die te gheduerne, eewich ende tallen dagen, zo maecte hy alyance, den voorzeyden Loys van Ludchenburch, hy maecte alyance met den hertoghe van Bourgogne, zeggende dat hy zoude onderhouden van zynder zyde de oorloghe, ende zoude volc van wapenen in de wapene doen, ende alse bereed zouden zyn om in te slane, hy zoude dat voorzeyde volc achterwaerd tarden.
Voord zo heeift hy ghebiecht ende ghekend den voorzeyden heer Loys van Ludchenburch den grave van Saint Pool, dat alzo zaen als hy den voorzeyden heer Loys weten zoude
| |
| |
dat den kuenynclicken pays zoude gheschien tusschen mynheere de Guiennes, ende als den voorseyden heere de Guiennes zoude trauwen de dochter van den conync van Spaengien, ende by dien middel, zo zoude hy maken grote alyanche ende profyt den voorseyden kuenyncryke, den zelven heere Loys van Ludchenburch, hoe dat hy screef an mynheere de Guiennes, dat hy hem wel verwaren zoude te passeerne tvoorseyde traytier ende appointement van den voorseyden huwelicke, want alzo varync als hy zoude zyn in Spaengien, den kuenync ende zynen raed zouden zenden ende bezien de pozychie van mynheere van Guiennes, ende nemmermeer meer hy ne zoude niet zenden ghelyc dat men ghedaen hadde den grave van Noormendye; ende zinen zeghel moeste bliven an den hertoghe van Bourgognien ghelyc den andren, ende hy zoude hem doen hebben den zegel van den hertoghe van Bourgognen, ende hy zoude zenden te Rome om ondsleghen te zine van zinen heede, die hy ghedaen hadde den conync van Spaengien, ende dat aldus ghedaen zynde, hy zoude hem zenden den busschop van Montheban.
Voord zo heeift den voorseyden heer Loys van Ludchenburch gheseyt den grave van Sainpool, conestabel van Vrankeryke, heeift ghekent ende gheleden, dat hy ghezonden heeift by hem, dat hy zoude zenden zinen zegel, om te zenden in Savoyen, de welke die gheseyt hadde dat hy zoude missen, dat se zouden trecken by den hertoghe van Borbon, ende dat hy hem zoude hoverscryven de welcke wie dat zouden gaen tot Molyns, ende zouden zenden de letteren toot den hertoghe van Borbon, de welke heere van Borbon, zal zenden by hemleden den bailju van Beeujolys, dat hy hem zoude zegghen dat den hertoghe van Borbon hem niet en zoude gheven zinen zegel, ende dat hy best
| |
| |
zoude zenden aen den haermen Sinte Job, die conchenteerde daer up, ende die zeide an mynheere Loys van Ludchenburch die hem geen duecht doen en zoude in thende, en dat hy zoude hover brynghen by hem de ghevaernesse by mynheer Loys van Ludchenburch, ende zoude hem zegghen de andwoorde van den hertoghe van Borbon, ende zoude hem vraghen de lossynghe van zynen zegel, de welke die hy hem gaf om te draghene in Savoye, ende concluderen metten andren.
Voords zo heeift den voorzeyden heere Loys van Ludchenburch ghezeyt den grave van Sainpool, als dat den conync hem bad, ende an hem begeerde, als dat hy zoude scriven an den kuenync van Ingheland, an de kueneginne ende an mynheere Pourlerset De Stalles, ende andre angaende den pays die den cuenync ghemaect hadde, dat den grave van Wervic, de welke verandwoorde den kuenync ende zeide hy zoud geerne doen, maer als Olyvier Roelx, quame by mynen heere Loys van Ludchenburch, hadde last te gane in Ingheland, hem zegghende, dat hy zoude scriven aldus als dat hy hem beloofd hadde by den conync den voorseyden heere Loys van Ludchenburch hem zeyde, dat hy hem niet scriven en zaude, anders dan an den constable van Vrankeryke, om dat hy was te zynder macht, ende screef hem der contrarye van tguend dat den kuenync verstaen hadde.
Voords zo heeift den voorseyden heere Loys, heere van Ludchenburch gheseyt den grave van Sainpool ende constabel van Vrankeryke, als dat de kuenync was te Haenst by hem, ende hy sprac den conync als voor verzekerthede van den conync, hy dede daer maken eene barriere tusschen den kuenync ende hem, ende telker werf dat den kuenync zoude passeeren de voorseyde baryere, ende nam hem in
| |
| |
zinen harem, an hem begeerende dat hy zoude houden zyn paart, ende hy beloofde hem daer, als dat hy hem niet faelgieren en zoude ende zoude dat doen om zinen wille, ende tiegen alle andre, ende ten minsten binnen twee dagen daer naer, den hertoghe van Bourgogne zoude zenden by hem, hem vraghende of hy wilde houden tguend dat hy hem belooft hadde, nemmemeer en zoudy hebben hem begheven van zinen dienste, ende zoude hebben van hem alle jare 10 duyzend leeuwen, alzo langhe als de hoorloghe ghedueren zoude.
Voord zo heeift hy ghekent in zyn biechte, mynheere Loys van Ludchenburch, ghezeyt den grave van Saint Pool, dat hy zoude scriven an den hertoghe van Bourgogne, dat hy hem niet twifelen en zoude in hem, ende dat hy zoude vinden de maniere ende tfaçon den kuenync te vanghene biden halze, ende hem te doen stervene of te doen overlydene van zinen leve in eeneghe plecken, ende dan daer naer zoude men gaen halen de kueneginne ende myn heere den dolphin, ende dat mense beede yeuwerd ooc zenden zoude, in eeneghe plecke, in secrete plaetsen.
Voord, zo heeft den voorzeyden heere Loys van Ludchenburch ghekent, als dat hy ghescreven hadde an den hertoghe van Calabre, als dat hy hem wel wachten zoude, te commen by den kuenync, wand hy hadder mede gheweest ten rade, wand den raed was daer op ghesloten, waert so dat hy quame by den kuenync, hy zoude gheleyt zyn in de vanghenesse, ende ooc hy zoude al zyn goed verliezen en dat hy zoude gaen te Guyzen, ende dat hy hem zoude doen gheleen van den volcke van wapene.
Voord zo heeift hy ghekent de voorzeyden mynheer van Ludchenburch, hoe dat hy ondboot den kuenyne van Ingheland, dat hy comen zoude en hy zoude hebben de stede van Amecins, Pyrone ende Abevile om tvolck van wapene, ende
| |
| |
dat tkuenynckryke zoude ghedeelt zyn, ende dat hy niet ander eesschen en zoude voor zyn deel dan tgraefscip van Champaignien et de Brye, ende den hertoghe van Bertangne zoude hebben tgraefschip van Ponteyu, ende dat hy ander niet eesschen en zoude.
Voord, zo heeft hy ghekend, de voorseyden Loys van Ludchenburch, ende grave van Sainpool, ende constable van Vrankerycke, dat meer andre voyagen ende reysen waren ghedaen by meester Ydyer, coopman zynde, angaende de zaken die boven ghezeyt zyn, ende dit al anghezien, by grote muerewe ende rype deliberacie, zo heeift hem thof van den kuenync ontlast ende ontslegen van alle zyn officyen, ende ooc van connestabelscepe, ende belasten hem crimineux ende creminele zaken, ende hebben den voorseyden heere Loys ghecondampneerd te stervene ende execucye hover hem te doene van zinen live, ende zyn ooft of te slane, met eenen zweerde, op een schavoodt, ter plaetse van Greve, ende alle zyn goedynghen gheleyt ten tafle van den kuenync, ende om de heerlichede van zinen ooge ende edlen state van zynen huwelicke, zo heeft al thedel hof van den conync gheoordeneerd by gracien, zyn lichame te begraevene in de supiltuere van den heleger kerke.
Gheprenonchyerd ten parlemente den 19den dach in Decembre, int jaer ons heeren 1475, by mynheere Pieter Doriole, zeghelare van Vrankeryke. Amen.
| |
[1487-7-31]
Item up den laetsten dach in Hoymaend, anno 87, doe verdranc een jonc ghezelle ten Vlamyncdamme; hy zoude een peerd te water ryden, ende dat hy verdranc, twas de cause om dat hy reed metten peerde buuten der baeilge van den hawatte, daer men de peerden pleeicht te waterne, ende hy wilde alzo metten peerde zwemmen dweers hover de veste van der stede.
| |
| |
| |
[1487-8-25]
Item up den 25sten dach in Oust, anno 87, doe verdranc een schoon jonc ghezelle, in de veste van der stede thenden de Karmerstrate by den Waterhuuse, hy hiet Cornelius ende hy was een cleder scriver.
| |
[1487-8-16]
Item up den 16den dach in Oustmaend, anno 87, doe was een vleeschauwers cnape dood ghesteken int west Vleeschuus, ende hy hiet Gillis vander Gote, ende diet dede hiet Jan Warrin ende tes ooc een vleeschauwers cnape.
| |
[1487-8-23]
Item up den 23sten dach in Oust maend, anno 87, doe verdranc een schoon jonc man, in de Reye, by den Augustinen kerke, thenden den Gistelhove ende hy hiet Pieter Mentin, ende hy woende aldernaest de caeshuuse, metten crudenier, teegen hover de kerke van Sinte Kartoffels. God hebbe zyn ziele, Amen, ende alle zielen daer God bede vooren begeerd. Amen.
| |
[1487-8-24]
Item up den 24sten dach in Oustmaend, anno 87, doe waren ghehouden ende ghedregen processyen generael tOnzer Liever Vrauwen kerke binnen Brugghe.
| |
[1487-9-1]
Item up den 1sten dach van September, anno 87, doe was eenen man te Brugghe, in den Burch ontooft, op een schavoodt ende hy hiet Maertin Van Steelandt: hy hiet de schoone Maertin, in de Wandelynghe. God hebbe zyn ziele. Amen.
Item voord up den 1sten dach in September, anno 87, doe waren twee mannen ghesteld in den Burch, up al tzelve schavood, den eenen was naect ontcleed, ende ghebonden an eene stake, ende ghegeeselt met roeden, ende ghebannen up zyn ooft, tien jaer van dieften, ende hiet Coppin Trappaerd ende hy was een linewevers cnape. Item voord up den zelven dach voorseyd, zoo stond ooc up tselve schavood eenen man ghebonden an eene stake ende hy hiet Mattys Geeraerd, ende was ooc een linewevers cnape, ende was van Assene,
| |
| |
ende was ghebannen 50 jaer up zyn ooft, ende zyn tytel stond voor hem ghescreven in groten lettren; hy stond alzo ghebonden, ende was 50 jaer ghebannen om zaken die beter ghezwegen zyn dan ghescreven ende ghelezen.
| |
[1487-9-7]
Item up den 7den dach in September, anno 87, doe was in de stede van Brugghe, ende by der wet van Brugghe, in den Burch, up een schavood, eenen man ontooft, ende hy hiet Coppin Steegre, den zuene van Jacop Steegre. Den heere consenteerde hem zyn kercof by gracien, ende was begraven tSinte Cruus, buuten Brugghe. God hebbe zyn ziele ende alle zielen daer God beede vooren begeerd. Amen.
| |
[1487-9-15]
Item up den 15den dach in September, anno 87, doe geschiede een groot messchief van een knapelic kind, en dat was ghesteken van den peerde daert up sat, ende was dood ghesmeten ende ghetorden, ende dood hover ghereden van den voordsten wiele van den wagen daer de peerden inghespannen waren, ende de voorseyde waghen ende peerden, ende den knecht waren van Houtawe, ende die den knecht van den peerde stac, waer of dat den voorseyden knecht quam van levenden live ter dood, dat dede eene vrauwe, ende die heet de wedewe Cauds, ende vercochte fruut ende vele andre manieren van zaken, honder thende van den Waterhalle, up den houc van de Vlamyncstrate, daer gheschiede tfayt ende de doot.
| |
[1487-9-25]
Item up den 25sten dach in September, anno 87, doe gheschiede eenen doodslach, tusschen den dry Brauwers ende den Zwartenhuuse, ende diet dede hiet Wouter, ende die daer doot bleef, hiet Thomaes Digue, ende was eenen hofman.
| |
[1487-9-27]
Item up den 27sten dach in September, anno 87, doe was groot messchief van brande, tusschen tclooster van Sinte Hobrecht ende der Cruuspoorte, toot eenen berbier, ende
| |
| |
het verghync metter minste schade. God zy gedanct ende ghebenedyt. Amen.
| |
[1487-10-21]
Item up den 21sten dach in October, anno 87, doe waren ghehouden ende ghedregen processyen generael ten broeders ende ten clooster van den Augustinen, ende daer ghyngen twee jonghe ghezellen, in voorme van hamende, elc metten blooten oofde, ende met eene barnende toordse in zyn hand ten voorseyden cloostre, ende die toordsen daer latende, ende elke toordse van 2 ponden.
Item up den 21sten dach in Octobre, anno 87, doe waren gebrocht de engienen van der stede van Brugghe toot allen poorten van der voorseyde stede, serpentinen, bussen, aghebussen ende andre.
| |
[1487-10-27]
Item up den 27sten dach in October, anno 87, doe quam eenen man in tclooster van den Carmers ende ghync bachten duer den houden Hommegank van der houder kerke: daer staet eenen ghemaetsten bornepit, ende hy spranc daer in, om hem zelven te verdrynckene, ende tlyf te nemene. God almachtich ghebenedyt, die wilder ons of beschermen. Amen. Maer ten viel alzo met hem niet, wand hy was levende ghevischt, ende huut geholpen, ende dat dede de zoete ghebenedyde gracie van Gode almachtich ghebenedyt. Amen.
| |
[1487-6-17]
Item up den 17den in Wedemaend, anno 87, doe trac hier huut de stede van Brugghe, in voorme van wapenynghe mynheere Ingelbrecht, grave van Nassauwe met 600 velex 10 min, te voed ende 60 mannen te peerde ende met alle de edele, die hier honder ghescreven ende ghenoomt staen, beide dood gheslegen ende ghevangen, ende trocken hier huuter goede stede van Brugghe, om te ghecrygene ende in te nemene de stede van Betune, alzo in dezen bouc gheteekend ende ghescreven staet, voorwaerd keerende naest dezen ghescrifte.
| |
| |
| |
Ende dat zynze die daer dood gheslegen ende ghevanghen waren.
Dood gheslegen: Eerst mynheere van Sarre, ende was huut Bourgogne.
Dit zynze de edele diere ghevanghen waren:
Heer Kaerle, zone van Adolf, hertoghe van Cleven.
Heer Ingelbrecht, grave van Nassauwe, heere van Breda in Braband, heere van den toyzoene.
Heere Phylips van Haeyne, heere van Bossuut, van den oordene ende van den toyzoene, huut Enegauwe.
Geeraerd van Bossuut een van den zuenen van den heere van Bossuut.
Heer Anthuenis de Fonteyns, huut Pycaerdyen.
Ector de Miliadecht, huut Bertaengen bailliu van Werveken.
Heere van Monfaucon, huut Bourgognen.
Heere Jacob Heller, ghenaemt in de zelve camer capiteyn van den archyers van den Roomschen kuenync.
Heer Heyndric de Zwane van Bruesele.
Phylips de Pondrewaerd, stedehouder van den gouvernuer van der stede van Rysele.
Heere de Foreest.
Glaude de Spontalien, van Bourgogne.
Dit zyn de walsche heeren.
| |
Dit achtervolghende zyn de edele van Vlaenderen die daer ghevanghen waren.
De heere van der Gracht, ghenaemt heere Antheunis van Houtem, heere van Vletrin.
De heere van der Zoeterstede, ghenaemt joncheer Jan,
| |
| |
heere van Dadyzeele, de zuene van meer Jan van Dadyzeele.
Heer Kaerle van Moerkerke, heere van Moerkerke, item zyn broeder joncheer Phylips van Moerkerke.
Joncheer Jan van der Mote.
Joncheer Willem van Hoortsy.
Joncheer Robrecht van Belle, heere van Eeke, ende van Eduwaerds Cappelle.
Boudin Dongwies, poorter van Brugghe, schilt cnape.
Meester Jan van Hoverschelde, bailliu van Ypre, dito.
Jacop de Heere, burchmeester van den Vryen. dito.
Jan van Comene f. Bertranis, schilt cnape.
Joncheer Jan Van Praet, zuene van den heere Van Praet. Amen.
| |
Deze naervolgende heeren zyn de welke hem sauveerden in de batailge van Betune.
Heere Phylips van Cleven, capiteyn van Duway.
Heere Boudin van Lannoy, gouverneur van Rysele, ende heere van den Toyzoene.
De heer van Lens.
dHeer Jan van Isegeem.
Joos van der Woestine, schilt cnape.
Maertin de Hemmers.
| |
[1487-11-4]
Item up den 4den dach in November, anno 87, doe quam eene vrauwe-zitten om Gode, voor de kerke van den Freminueren, alzo zy plochte te doene, snuchtens ten 8 hueren, ende zoe ne was daer maer ghezeten, zo starf terstond zonder tale, teekin of kennesse te ghevene; zoe hiet Kateline, ende zoe woende up tHoochstic, by de Bolle. God hebbe haer ziele. Amen, ende God wilder ons allen of beschermen. Amen.
| |
[1487-11-6]
Item up den 6den dach in November, anno 87, doe was te
| |
| |
Brugghe, in den Burch, up een schavood, eenen man zyn hand of gehauwen, ende het was zyn luchter hand, ende het dede de heere ende de wet van der stede van Brugghe, ende hy hiet Pieter ende was een Schotte.
| |
[1487-11-11]
Item up den 11sten dach in November, anno 87, doe wast zeere by te gheschiene groot quets ende grief van brande ten huuse gheheeten int Gouden Vlyes, staende tusschen der Dweerstrate ende der Noordzandbrugge, maer Gode lof ende danc, het verghync metter minster schade.
| |
[1487-11-25]
Item up den 25sten dach in November, anno 87, doe waren te Brugghe ghehouden ende ghedreghen processye generael, ende der was mede ghedregen den weerdegen, glorieuzen lichame ende fierter van Sinte Bazelis, die rustend es tSinte Donaes, ende de voorseyde processye waren ghedregen hover de merct, hover de Wisselbrugge, hover de plaetse Maubert, ende alzo ter Oostpoorte in, van den Burch toot Sinte Donaes. God lof ende danc.
| |
[1487-12-1]
Item up den 1sten dach in December, anno 87, doe waren gheprouft de engienen van der stede van Brugghe, de welke engienen voorseyd, waren ghebrocht ter poorten, ten mueren ende ter veste van der voorseyde stede.
| |
[1487-12-4]
Item up den 4den dach in December, anno 87, doe waren ghehouden ende ghedregen te Brugghe, processyen generael, ende toot Onzer Liever Vrauwe Kerke te Brugghe, ende daer was mede ghedregen den weerdegen fierter van Sinte Loy, die rustend es te Sinte Salvator kerke in Brugghe. Voord daer was mede ghedregen den weerdegen fierter van Sinte Maximus, die rustend es in de kerke van Sinte Donaes, binder stede van Brugghe.
| |
[1487-12-7]
Item up den 7sten dach in December, anno 87, doe was te Brugghe hover ghedaen by de justicye, de heere ende de wet van der stede, eenen geheeten Loys, ende was huuten
| |
| |
lande van Savoye, ende hy was execucye ghedaen van zinen live, by den baste, ende hy was ant gerechte van der stede, gehangen ende verworcht, ende alzo ghebrocht van levenden live ter dood.
| |
[1487-12-13]
Item up den 13den dach in December, anno 87, doe was groot messchief van brande, buuten der Bouverye poorte, by der kerke van Sinte Michiel, daer verbarrende een huys staende up de heerlichede van Tillegeem.
| |
[1487-12-16]
Item up den 16den dach in December, anno 87, doe quam ons harde gheduchten heere ende prinche den hertoghe van Oostenryke, Maximilyaen, kuenync van den roomschen ryke, natuerlic vader, voocht ende monboor van onzen herfachtegen prinche den jongen hertoghe Phylips, den grave van Vlaendren. Hy quam van zynder goeder stede van Ypre, ende hy quam ten dage voorseyd bin zynder goeder stede van Brugghe, ende hy quam zoetelicken, eerlicken met goeder manieren, ende in princhelicken state, betrent met tusschen den dry ende 400 peerden, ende hy quam van by Sinte Bave om naer de Smedepoorte, ende hy reed alzo lancx der vesten van der stede van Brugghe, toot der Ezelpoorte, ende daer quam in alzo, metten state voorseyd zittende up eenen schoonen hynxt, graeu van hare, ende hy hadde an eenen graeuwen keerle, laken van Damast, ende daer up hangende tgouden vlies, ende hy hadde an eenen roode ghehackelde caproen, ende up zyn ooft eenen graeuwen hoed, ende eenen voor hem rydende, die voor hem voerde tgoudin zweerd, ende daer vooren rydende 12 heerauden, elc met eenen wapenroc, ende daer vooren zes trompetten ende zes claroenen, ende noch daer vooren 4 bombaren, ende alle spelende ende trompende alzo daertoe behoord, ende met dat hy ter voorzeyde poorte in quam, zo waren gheschoten de engienen van der stede, die daer laghen, an
| |
| |
beede zyden van der voorzeyde poorte, ende voor hem, zo reeden de heere ende de wet van der voorseyde stede, zeere manierlic ende met schonen state, ghelyc als daer toe dient; voord zo waren daer gheoordeneerd 30 barnende toordsen, ende die ghyngen an elke zyde van der strate 15, ende daer reed den voorseyden hertoghe in den middel, alzoot voorseyd es, ende quam alzo eerlic ende princhelicken in, ter poorte voorseyd, duer de Ezelstrate, hover de Ezelbrugge, duer Sint Jacopsstrate, inslaende neffens den caseweeich huuze, voor by de bornecamere, ende alzo van vooren toot in zyn hof; dit geschiede al met heeren ende met blyschepen. God almachtich zy lof ende danc, ende hy hadde doe als up dien tyt, huuter goeder stede van Brugghe ghezyn 26 weken heffene.
| |
[1487-12-21]
Item up den 21sten dach in December, anno 87, doe reed spelen, vliegen, jagen, onzen harden gheduchten heere ende prinche Maximilyaen, ter Gendpoorten huut, om naer der kerke van Sinte Cruus, ende tclooster van der Sartruezen, ende daer vync hy 2 reygers, ende van daer quam hy ter Cruuspoorten in, met schonen eerlicken ende wel ghemanierlicken state, ende met 100 ende 50 peerden.
Item up den 21sten dach in December, anno 87, snavends ten zes hueren, doe gheviel een groot ghevecht, by der Noordzandbrugge, daer bleef een dood liggende up strate, ende die daer bleef dood het was eenen naghelmakers zuene, ende hy hiet Gregorius, ende zyn vader heet Jan Linier, ende hy woende in de Heechoudstrate, ende het dede dezen doodslach, eenen die men heet Kaerle de Clerc; zyn vader heet Cornelius de Clerc, hy woende tiegen hover het Princhen hof, tiegen hover dhoude Munte.
| |
[1487-12-23]
Item up den 23sten dach in December, anno 87, doe reed ons harde gheduchten heere ende prinche Maximilyaen
| |
| |
huuter stede van Brugghe ter Cruuspoorten huut, ende hy reed vliegen, spelen ende jagen, bachten der kerke van Sinte Cruus, ende den clooster van den Sartruezen, ende hy quam weder in ter Speyepoorte, binder zelven dagen voorseyd. Ende up den 24sten dach, in de zelve maend voorseyd doe quam hy met zeere schonen princhelicken state, den dienst hooren ter kerke van Sinte Salvator.
| |
[1487-12-24]
Item up den 24sten in December, anno 87, doe was binder stede van Brugghe, in den Burch, up een schavoodt, justicye ghedaen metten zweerde, ende alzo ghebrocht van levenden live ter doot, by den heere ende de wet van der voorseyden stede, eenen gheheeten Francoys Roels, eenen vry temmerman van der voorseyde stede, ende den heere gaf hem zyn kerkhof, by gracien.
Item tjaer van 87 dat es huut, ende by der gracie van Gode almachtich ghebenedyt, zo zal ic begunnen tjaer van 88, ende dat vulhenden by zynder ghebenedyde gracie, ende altoos tjaer huut ende ingaende metten nyeuwen jare.
|
|
Auteursrechtvrij