Het boeck van al 't gene datter geschiedt is binnen Brugghe

[1477]

‘Item dit naervolgende, en behoord hier niet te stane,

[p. 74]

maer het behoord te stane, ende ghesteldt te zyne, in dezen zelven bouc in tweestebladt achtervolgende den maend van Oust, up den 5^den dach van September, maer ic, als scriver van dezen bouc, en hadde dit naervolgende gescrifte niet, want het was my eerst gegeven up den 9^den dach van December, anno 85, dus neemet voor t' goede, dat hier aldaer staet.’

[1477-9-5]

Item achtervolgende dit voorseyde point zo eist gheschied, anno 77, den 5^den dach in September, Maerten Lem, doe wesende burchmeester van der stede van Brugge, doe dede maken een schavood, in den Burch van der voorseyde stede, up twelke schavood up den voorseyden dach, anno 77, was gherechd, metten zweerde, eenen man dienare wezende van sprinchenhoove, die eenen andren dienare van den voorseyden hoove, dood stac.

Item voord up den zelven voorseyden dach, anno 77, doe worde ooc eenen gherecht, up tvoorseyde schavood, metten zweerde, eenen man van Cortrycke, die te Brugghe ghecooren was om busschieter te zyne.

[1477-9-10]

Item up den 10^den dach in September, anno 77, waren up tzelve voorseyde schavood gherecht, metten zweerde, twee moylicke ghezellen, waer of dat den eenen hiet Pieter Braemaerd, die men hiet in de wandelynghe Woupgay, ende dander hiet Anthuenis de Quame.

[1477-9-27]

Item up den 27^sten dach in September, anno 77, doe was ooc gherecht metten zweerde, by justicyen, eenen gheheeten Adriaen de Backen, de welke was ontooft beneden up de calsye, ende dat ter cause om den groten stoorem van winde dat niemand en dorste staen op tvoorseyde schavood.

[1477-10-15]

Item up den 15^den dach in October, anno 77, was ooc ooverghedaen metten zweerde, ende ghequartierd by der rooden roede, snavends ten 5 hueren, ten voorseyden scha-

[p. 75]

voote, ende zyn ooft ghesteld buuten de Bouverye poorte.

[1477-2-21]

Item up den 21^sten dach in Spurkele, anno 77, doe was ooc ontooft, op tselve schavoot, eenen gheheeten Gildeken van den Pitte, dienare van den proossche.

[1478-6-20]

Item tvoorseyde schavood was of ghedaen, als ter gheboorte van onzen jongen hertoghe Phylips, ende dat was den 20^sten dach van Wedemaend, anno 78, aldaer het stond ter plaetse voorseyd 9 maenden ende twintich dagen.

Item, nu ga ic voord int guend daer of dat desen boec mensyoen maect, by de gracien van Gode.