|
| |
[1485]
[1485-1-25]
Item eerst up den 25sten dach in Laumaend, anno 85, doe waren ghehouden ende ghedregen processyen generael ten broeders van den Predicaren, ende daer was mede ghedregen den weerdegen fierter, ende glorieus lichame van Sente Donaes.
| |
[1485-2-5]
Item up den 5den dach in Spurkele, anno 85, doe was ghevonden eenen verdroncken priester, by der Pypers capelle, an de Wulfacrdbrugge, ende hy hiet heere Lauwereys ende plochte te stane toot Sinte Salvator. God hebbe zyn ziele. Amen.
| |
[1485-2-26]
Item up den 26sten dach in Spurkele, anno 85, doe waren vier mannen ghestelt, up een schavood, waer of de twee waren ghegeeselt met roeden, ter cause van dieften, ende up den zelven tyd, dander twee ghegeeselt honder den steen ghebonden an den pylaer, ter plecke ghecostumeerd.
| |
[1485-3-5]
Item up den 5den dach in Maerte, anno 85, doe was eenen man huut ghevoerd ter Cruuspoorten, ende hover ghedaen by justicye, metten brande des viers, ter plecken ghecostumeerd, van zaken die beter ghezwegen zyn dan ghenoemdt; ende het dede de wet van den Vryen.
| |
[1485-3-12]
Item up den 12sten dach in Maerte, anno 85, doe was ghevonden ende ghevischt eenen verdroncken man, by Sint Jansbrugge, ende hy hiet Jooris, ende was den broeder van eenen gheheeten Dixu ende plochte te zine duerwaerder ter poorters loogye. God hebbe zyne ziele. Amen.
| |
[1485-3-28]
Item up den 28sten dach in Maerte, anno 85, doe waren ghehouden ende ghedregen processyen generael toot Sinte Donaes, ende daer was mede ghedregen den weerdegen fierter, ende glorieus lichame van Sinte Donaes.
| |
[1485-4-1]
Item up den 1sten dach in April, anno 85, doe hoverleed
| |
| |
van dezer weerelt, de vrauwe in Bouweloo, zeere aestelec ende onverzyens, op de merct, by de Fonteyne, zoe viel daer aestelic neder, ende starf terstond. God hebbe haer ziele, ende God wilder ons of beschermen, ende alle menschen; ende zoe hiet Pieternelle. Amen.
| |
[1485-4-11]
Item up den 11sten dach in April, anno 85, doe gheschiede groot grief van brande, in de Vulderstrate, ende daer verbarrenden 36 huusen, honder cleen ende groot ende den voorseyden brand, quam huut den huuse van eenen gheheeten Matheeus Derdeboudt. God wilder ons allen voord of beschermen. Amen.
Item up den zelven dach, anno 85, doe verdranc een brauwers cnape, by der Gendpoorte, hy woende in de brauwerye int Bleekerstraetken, gheheeten int Houpelkin, ende hy hiet Winnoc. God hebbe zyn ziele, ende alle zielen, daer Gods beede vooren begeerd. Amen.
| |
[1485-4-28]
Item up den 28sten dach in April, anno 85, doe was groot messchief van brande, int Sint Jacopsstrate, bachten den koore, by der Fonteyne, bachten Sint Jacopskerke.
Up den zelven dach, anno 85, doe viel eene vrauwe dood, op tOostproosche, in een huus geheeten in de Zunne, by sinte Erasmus capelle, ende zoe viel huer zelven dood van eenen steeger, van boven neder, op een goedye. God ontferme haer ziele ende alle zielen. Amen.
| |
[1485-5-15]
Item up den 15den dach in Meye, anno 85, doe waren ghehouden ende ghedregen processyen generael ten broeders van den Predicaren, ende daer was mede ghedregen den weerdegen fierter ende glorieus lichame van Sinte Donaes ende den weerdegen fierter van Sinte Bonifacius, ende den weerdegen fierter van Sinte Loy.
| |
[1485-5-20]
Item up 20sten dach van Meye, anno 85, doe waren ghehouden ende ghedregen processyen generael toot Sinte Donaes,
| |
| |
ende daer was mede ghedregen den weerdegen fierter van Sinte Donaes, ende den weerdegen fierter van Sinte Bazelis, enden weerdegen fierter van Sinte Maximus, die rustend es toot Sinte Donaes, ende daer was mede ghedregen, den weerdegen fierter van Sinte Bonifacius ende den weerdegen fierter van Sinte Loy, ende deeze weerdeghe processye was ghedregen, duer de Oochstrate, voorby den broeders van den Predicaren, voorby den Braemberch, over de grote Heechoudbrugghe, duer de Vullestrate, rondomme de Merct, over de plaetse Maubeerd, ende alzo tSinte Donaes in.
| |
[1485-5-22]
Item up den 22sten dach in Meye, anno 85, doe was groot messchief van brande, tusschen de Kuenyncxbrugge ende Sint Jansbrugge, ten huuse van Giervays van der Schave, ende tvoorseyde huus barrende of tooten gronde, van vooren up de reye toot up de Doosterlynge plaetse, ende up den zelven dach, naer der noene, zo viel daer eenen doot, onder de verbarrende mueragyen van den voorseyden huuse, ende het starf binden darden dage daer naer, van den zelven brande, by grooter verbarrendhede ende quetsuere van den zelven brande, eenen gheheeten Lauwereyns van Hille. God hebbe zyne ziele. Amen.
| |
[1485-6-18]
Item up den 18den dach in Wedemaend, anno 85, doe gheschiede een groot messchief, ende een deerlic quets, bachten den Hoorne, op tHoochstic, daer ghebuerde dat een dochterken van 6 jaren stak doot een jonc kind van twee jaren, een knechtken zynde. God hebbe zyn ziele. Amen.
| |
[1485-6-20]
Item up den 20sten dach in Wedemaend, anno 85, doe waren ghehouden ende ghedregen processyen generael tOnzer Liever Vrauwe, ende daer was mede ghedregen tghebenedyde, warachtich, glorieus ende helich sacrament, dat rustend es tSinte Donaes.
|
|
Auteursrechtvrij