|
| |
[1484]
[1484-1-7]
Item eerst up den 7den in Laumaend, anno 84, zo was in den Burch een schavood ghemaect, ende daer was up onthooft, by justicye, eenen geheeten Jacop, ende hy was van Dixmuude. God hebbe zyn ziele.
| |
[1484-1-22]
Item up den 22sten dach in Laumaend, anno 84, doe was ghehouden ende ghedregen processyen generael tOnzer Liever Vrauwen, met grooter heere ende weerdichede.
| |
[1484-2-7]
Item up den 7den dach in Spurkele, zo verdranc haer
| |
| |
zelven dhoude Jan van Booneems wyf, by nachte, in den barnepit, in de plaetse van hueren huuse, anno 84.
| |
[1484-2-8]
Item up den 8sten dach in Spurkele, anno 84, doe waren ghebouden ende ghedregen processyen generael tSinte Donaes.
| |
[1484-2-21]
Item up den 21sten dach in Spurkele, anno 84, doe was up Sint Jansbrugge water ghebarrend, by justicye, ende hy dien tvoorseyde water toebehoorde, was up den 27sten dach in de voorseyde maend, by justicye verwonnen 50 jaer, up zyn ooft, huuten lande van Vlaenderen.
| |
[1484-2-27]
Item up den 27sten dach in Spurkele, anno 84, doe was in den Burch ghemaect een schavood, ende daer waren up ontooft twee mannen, den eenen hiet Willem Mathys, ende was een schilder, ende dander hiet meester Pieter Bane, ende was van Dudzeele: hy was ghequartierd, ende de quartieren waren gehangen van den voorseyden meester Pieter buuten de Speypoorte, de Coolkerksche poorte ende Sinte Ledenaerd poorte, ende de oofden van hun beeden voorseyd, waren ghesteken ten Damme up de poorten, deen ter Bruchscher poorte, ende tander ooft ter Coolkercsche poorte. God hebbe der zielen! Amen.
| |
[1484-3-1]
Item up den 1sten dach in Maerte, anno 84, doe waren ghehouden ende ghedregen processyen generael tOnzer Liever Vrouwe, ende daer was mede ghedregen de weerdegen fierter van Sinte Bazelis, die rustend es tSinte Donaes.
| |
[1484-3-5]
Item up den 5den dach in Meerte, anno 84, doe waren in den Burch ontooft vier mannen, by justicye, deen was Jan Breydel, ende mer Nyclaus Davelu, ofmeester van den hertoghe van Oostrycke Maximilyaen, ende Colaerd de patinemakere, die woonachtich was in de lange wynckel, ende Jacop de Donckere: de voorseyde Jan Breydel ende mer Davelu, beneden by de westduere, waren die
| |
| |
ontooft, ende dander twee voorseyd in den Burch up een schavood. God wil der zielen ontfermen.
| |
[1484-3-10]
Item up den 10den dach in Maerte, anno 84, doe was gehangen ende over ghedaen by justicyen, eenen ballync, gheheeten Jan van der Luere, Jans zuene.
| |
[1484-3-20]
Item up den 20sten dach in Maerte, anno 84, doe was ooc in den Burch een schavood ghemaect, ende daer warender twee ontooft, den eenen hiet Jan Stuer ende plochte te coolmeten, ende hy was gheworden een roodcaproen, ende dander hadde gheweeist hardsier van den hertoghe Maximilyaen. God ontferme de zielen.
| |
[1484-3-21]
Item up den 21sten dach in Maerte, anno 84, doe waren ghehouden ende ghedregen processyen generael toot Sinte Salvator. God lof ende danc.
| |
[1484-3-29]
Item up den 29sten dach in Maerte, anno 84, doe zo was justicye ghedaen van eender vrauwe, als ballync zynde, die was ghedolven bachten de Magdaleene muer, by den heere ende de wet van der stede. God hebbe de ziele. Amen.
| |
[1484-3-31]
Item up den laetsten dach in Maerte, anno 84, doe was dood ghesteken Jooris, in den buc, in de Munte, in de Vlamynestrate, ende het dede een zanger van Sinte Donaes, ende dien was een Vrieze. God hebbe de ziele. Amen.
| |
[1484-4-3]
Item up den 3den dach in April, anno 84, doe zo was te Brugghe hover ghedaen, by justicye van de wet van den Vryen, van eender vrauwe, die huer kind hadde van levenden live ter dood ghebrocht; zoe was van Lichtervelde, ende ooc den moord gheschiede daer.
| |
[1484-4-10]
Item up den 10den dach in April, anno 84, doe waren dry mannen, in den Burch, ontooft, by justicye; den eenen hiet Michiel de Witte, dander hiet Pieter van Mechelen, ende de derde die hiet Joos, ende was ontooft by de wed van Zyseele, ende alle dryen van straetroven. God ontferme der zielen. Amen.
| |
| |
| |
[1484-4-16]
Item up den 16den dach in April, anno 84, doe was eene vrauwe dood ghevischt honder de Waterhalle, met eenen preeicstoel an hueren harem; ende zoe woende in den houden Gendwech by tPatynckyn. God hebbe de ziele, ende alle zielen, daer Gods beede vooren begeerd. Amen.
| |
[1484-4-23]
Item up den 23sten dach in April, anno 84, doe starf eenen man zeer haestelic bachten Sinte Donaes, by de looden busse, zittende up eenen banc, ende hy hadde ghezitten drincken, in havengonen, ende hi was een boucscrivere, ende hy woende in Sint Jacobstrate, in den Wulf, up eene camere. God hebbe zyne ziele. Amen.
| |
[1484-4-26]
Item up den 26sten dach in April, anno 84, doe was dood ghesteken Lauwereyns de Grote, de zeune van Jan de Grote, de handschoewerkere, ende de voorseyden Lauwereyns was gheworden een rood caproen, ende het was hem ghedaen, in de Balcstrate, bachten Jerusalem, in Sente Quintin, ende het dede hem eenen geheeten Lieven, ende es een schipghezelle, ende een helsenare.
| |
[1484-4-30]
Item up den laetsten dach in April, anno 84, doe quam onzen erfachtigen harde gheduchten heere ende prinche, den jonghe hertoghe Philips, van zynder goede stede van Gend, te Brugghe te Cruuspoorten in, met zeere schonen state, honder te peerde ende te voet, met 2200 mannen.
Item hy hadde voor hem rydende zes zelveren trompetten, ende zes zelveren claroenen, ende zes heerrauden ende voor hem voerende een gouden zweerd, ende hem volchde meneghen fresschen hedelen man.
Item daer naer hem volgende vuf hanghende vergoudin waghenen, becleed met goudin lakenen, ende elcken waghene vul edele vrauwen, ende seven witte aggenyen, ende alle met ghetugen van goudin laken, ende up elcke een edel joncvrauwe.
| |
| |
| |
[1484-5-2]
Item voord up den 2den dach van Meye, anno 84, doe was onzen jongen hertoghe ter Carmers.
| |
[1484-5-6]
Item voord up den 6den dach, ten broeders van den Predicaren, ende altoos met zynen voorseyden state. Item voord up den achtsten dach toot Onzer Liever Vrauwekerke princhelic, huuterlic, chierlic ende metten voorseyden vulmaecten state.
| |
[1484-5-9]
Item voord up den 9sten dach, doe quam hy te Sinte Donaes ten tien hueren.
Item voord up den zelven dach, zo quam hy snavends ten schepenenhuuse ter maeltyd, om hem ende alle de hedele mede te fyestyerne.
| |
[1484-5-10]
Item voord up den 10sten dach, doe dede myn heere joncker Jan van Vlaender zyn eerste messe tOnzer Liever Vrouwe, ende was doe daer ontfanghen als proost.
Item voord up den zelven dach, zo was onzen jongen heere ende prinche ooc daer princhelic ende chierlic, ende al met zynen voorseyden state, alzo hy up dien tyd in de stede van Brugghe quam. God lof.
| |
[1484-5-12]
Item voord, onzen erfachtegen prinche den jongen hertoghe Phylips reed ende vertrac van zynder goede stede van Brugghe toot zynder goeder stede van Gend, op den 12sten dach van Meye, anno 84, hy hadde doe hier ghezyn twaelf dagen. God lof ende danc.
| |
[1484-5-19]
Item op den 19den dach, in Meye, anno 84, doe quam in de stede van Brugghe, van der stede van Gend, mynheere Antheunis de Bastaerd, met 300 peerden ende met fresschen hedelen man; hy was doe hier zes dagen.
| |
[1484-5-24]
Item op den 24sten dach in Meye, anno 84, doe waren ghehouden ende ghedregen processyen generael ten broeders van den Predicaren, ende voord up den zelven dach, zo vertrac mynheere Antheunis de Bastaerd van der goeder
| |
| |
stede van Brugghe, met 300 peerden, toter goeder stede van Gend, ende alzo men zeyde, van daer te Bruesele.
| |
[1484-5-25]
Item up den 25sten dach in Meye, anno 84, doe was eenen man dood ghesteken, up Stuvenberch, by Hemelryke, het was een schoemakers cnape; die daer dood blief hiet Jacop, ende was van Langemerc, ende diet dede was ooc een schoemakers cnape, ende die hiet Willem.
| |
[1484-6-1]
Item up den eersten dach in Wedemaend, anno 84, doe was groot messchief van brande in de brauwerye gheheeten in de Schelpe, staende byder houde Muelenbrugge, ende daer verbarrende in een kind, tkind wezende van den huuse, een knechtkin zynde. God hebbe zyn ziele. Amen.
| |
[1484-6-2]
Item up den tweeden dach in Wedemaend, anno 84, doe was een kind hoverghereden dat dood bleef liggende up de strate, in de Smeeidstrate, van eender karre gheladen met zande.
| |
[1484-6-7]
Item up den 7den dach in Wedemaend, anno 84, doe waren ghehouden ende ghedregen processyen generael buuten der Ezelpoorte ten Observanten. God lof ende danc. Item, voord de cause dat de voorseyde processye quamen ten voorseyden cloostre, dat was om dat de voorseyde hoordene doe hilden generael capytel, ende zyleden van den voorseyden cloostere quamen heerlic ende devotelic toot Sinte Donaes processyewys, ende ze quamen daer den dienst doen, ende daer wasser by ghetale, dry hondert; dit was, anno 84, den vuyfsten dach in Wedemaend.
| |
[1484-6-19]
Item up den 19den dach in Wedemaend, anno 84, doe was in den Burch, een schavood ghemaect, ende daer op was eenen hoverghedaen by justicyen, eenen die hiet Pieter van Henegauwe, van kerc rove, ende van straet roove. God hebbe zyne ziele.
Item up den selven dach, anno 84, doe waren vier
| |
| |
bouven ghegeesselt, zittende up eenen waghene, geeselende van der Burch tooter Smedepoorte, de twee waren ghebannen tien jaren, elc up zyn ooft, ende dander tween elc zes jaren, up zyn vust.
| |
[1484-6-20]
Item up den 20sten dach in Wedemaend, anno 84, doe was ghestelt int Schepenenhuus, een motalen hand, wyzende met den eenen vyngere up 't ghescrifte voor hem staende, ende het moeste daer doen stellen eenen gheheeten Jan Smeekaerd, wezende een vry barbier van Brugghe, in voorme van zeker meshuuzen die hy gedaen hadde contrarye de rechten ende de previlegien van der stede van Brugghe, alzo tghescrifte mensyoen maecte, daer als doe ten tyde, de voorseyde hand up wyzende was, ende de voorseyde hand, ende tghescrifte stond ter plaetsen voorseyd negen weeken dry dagen min.
| |
[1484-6-21]
Item up den 21sten dach in Wedemaend, anno 84, doe waren ghehouden ende ghedregen processyen generael toot Sinte Donaes, ende daer was mede ghedregen tweerde, helich, glorieus, ghebenedyde sacramend dat rustend es tSinte Donaes, ende den weerdegen fierter ende glorieus lichame van Sinte Donaes, ende den dienst Gods was ghedaen tSinte Donaes.
| |
[1484-6-22]
Item up den 22sten dach in Wedemaend, anno 84, doe was eenen man zyn hand of ghehauwen by justicyen, up den houc van der Breydelstrate, ter plaetse ghecostumeerd.
| |
[1484-6-28]
Item up den 28sten dach in Wedemaend, anno 84, doe was eenen man dood ghesteken, an de Kuenyncxbrugge, ende hy was eenen haerbeyder van Sint Jansbrugge; de dooden hiet Jacop de Queestre. God hebbe zyn ziele, ende alle zielen. Amen.
| |
[1484-7-2]
Item up den 2den dach in Hoymaend, anno 84, doe was up Sint Jansbrugge ghemaect een schavood, ende daer
| |
| |
waren up ghestelt vuf mannen, ende alle haerbeyders van Skuenyncxbrugghe, ende waren daer ghestelt by justicyen, ter cause van valsche packynge van valschen fruute, twelcke fruut, up Sint Jansbrugge, ghewesen was, by schepenen, te viere ende te verbarnene, twelc vonnesse daer vulcommen was. Item dewelke vuf mannen, van den zelven voorseyden schavoote gaende, moesten gaen in huer lynwaed, baervoed, ende metten bloten oofde, ende elk met eene wassen keerse in zyn hand, tooten helegen bloede, die voorseyde keersen daer presenteerende ende daer latende.
| |
[1484-7-9]
Item up den 9den dach in Hoymaend, anno 84, doe quam mynen heere Anthuenis den Bastaerd, ende mynen heere Van Beveren quamen van der goeder stede van Gend, in de goeder stede van Brugghe met 300 peerden. God lof.
| |
[1484-7-11]
Item up den 11sten dach in Hoymaend, anno 84. Doe waren ghehouden ende ghedregen processyen generael ten broeders van den Freminueren. God lof ende danc.
| |
[1484-7-12]
Item up den 12sten dach in Hoymaend, anno 84, doe was een man dood ghesteken, in de Langhe Wynckel; het was eenen tegeldeckers cnape die hiet Toorin, ende het dede hem twee van myns heere van Bever ghezellen.
| |
[1484-7-18]
Item up den 18den dach in Hoymaend, anno 84, doe waren ghehouden ende ghedregen processyen generael ten broeders van den Predicaren, ende up den zelven dach zo verdranc eenen man bachten den Wyngaerde, hy quam ter Smedepoorte in gereden te peerde, ende alzo verdranc hy daer. God hebbe zyn ziele. Amen.
| |
[1484-7-25]
Item up den 25sten dach in Hoymaend, anno 84, doe waren ghehouden ende ghedregen processyen generael tOnzer Vrauwe.
| |
[1484-8-2]
Item up den 2den dach in Oust, anno 84, doe waren te Brugghe dry lieden dood ghesteken; den eenen lach an Sint
| |
| |
Jansbrugge, ende dandre upt kerchof van Ste Salvator, en dat was eenen tegeldecker, ende hiet Adriaen, ende den derden was eenen messemakere.
| |
[1484-8-3]
Item up den 3den dach in Oust, anno 84, doe zo was in den Burch een schavood ghemaect ende daer was up onthooft by justicyen, Gillis van der Vlaen, ende hy was eenen yvoren cammakere, ter cause van mans dood. God hebbe zyne ziele. Amen.
| |
[1484-8-7]
Item up den 7den dach in Oust, anno 84, doe viel dood eenen tegeldeckers cnape, van Sint Jacops kerke, ende hy hiet Pieter.
| |
[1484-8-8]
Item up den 8sten dach in Oust, anno 84, doe waren ghehouden ende ghedregen processyen generael toot Sinte Donaes, ende daer was mede ghedregen de weerdege fierter van Sinte Bazelis, die rustend es tSinte Donaes.
| |
[1484-8-21]
Item up den 21sten dach in oust, anno 84, doe verdranc eene zuster van Betanyen in de Carmersstrate, by rampe ende by messchieve, in de fonteyne, int voorseyde clooster, alf ter strate, ende half int clooster. God hebbe huer ziele.
| |
[1484-8-25]
Item up den 25sten dach in Oust, anno 84, doe was by justicye ghesteld up eene carre, Martine twyf van eenen gheheeten Pieter Prysbier, ende de voorseyde Martine ghesteken met gloyenden yseren up huer bloten lyf, up de merct, voor de Halle, ende van daer up de beurze, ende van daer up Sint Jansbrugge, ende up de plaetse Maubeerd, ende alzo ooc weder in den Burch, ende daer ghesteld upt een schavood, ende daer ghebonden an eene stake, ende daer een stic ghesneden van huerer tonghe, ende dies ghedaen zynde, zoe daer ghebannen zynde zes jaeren, up den pit, huuten lande van Vlaenderen, ende dit al ter cause, om datse met tuusschers ghezeten hadde up een dobbel spil, ende daer ghesproken blasphemye, God almachtich ghe- | |
| |
benedyd, ende zyn lieve moeder ende maecht Maria, zegghende: ic zal cause winnen in spyte van Gode, ende van zynder moeder. Ic bidde Gode ende Maria, dat zyt huer willen vergeven, en alle die daer in mesdoen. Amen.
| |
[1484-8-27]
Item up den 27sten dach in Oust, anno 84, doe waren twee schone jonge knechten ghehangen, ende hover ghedaen by justicyen, als dieven, ende den eenen hiet Geleyn, ende hadde ghezyn eenen corael tSinte Donaes bin den koore.
| |
[1484-8-31]
Item up den laetsten dach in Oust, anno 84, doe waren verbarrend twee zwarte lakenen, up Sint Jansbrugge, ende dat by justicyen, ende die waren ghereed in Braband te Dueffele.
| |
[1484-9-1]
Item up den eersten dach in September, anno 84, doe waren ghehouden ende ghedregen processyen generael ten broeders van den Predicaren, ende daer was mede ghedregen de weerdeghe fierter van Sinte Bazelis, die rustend es tSinte Donaes, ende daer ghinc in de voorseyde processye, in voorme van amende, eenen man, met eene barnende toordse, ende ooc eene vrauwe met eene barnende keerse, die vrauwe hiet Lyzebette, ende die woende in den Oostmeerschs.
| |
[1484-9-9]
Item up den 9sten dach in September, anno 84, doe quam mynen heere van Ravesteyn, van der goeder stede van Gend, in de goede stede van Brugghe, ter Cruuspoorten in met 50 peerden, eerlic ende princhelic, en hy vertrac weder tsanderdaechs, ter Cruuspoorten huut, al metten zelven state.
| |
[1484-9-12]
Item up den 12sten dach in September, anno 84, doe waren ghehouden ende ghedregen processyen generael ten clooster van den Freminueren, ende daer was mede ghedregen de weerdege fierter van Sinte Heluterius die rustend es tSinte Donaes.
| |
[1484-9-25]
Item up den 25sten dach in September, anno 84, doe quam mynen heere van Ravesteyn ter Cruuspoorten in, met
| |
| |
myn vrauwe van Oorlyens zyn zuster, met 150 peerden ende 12 witte aggenyen, ende alle ghetuughen van rood gouden laken, ende up elc een kameriere, ende twee hanghende vergouden waghenen, becleed met rood gouden laken, ende voord noch drie hanghende waghenen, bedect met zwarten ledere.
| |
[1484-10-1]
Item up den 1sten dach in October, anno 84, doe zo was eene vrauwe ghesteld up een schavood in den Burch voor thuus van den Vryen, ende zoe hiet Karstine, ende was de dochtere van eenen Willem van Bursele, huut Zeeland, ende was daer ghesteld ter cause om datse hadde gheclaechd van crachten ende van foordsen, over eenen gheheeten Pieter Heyndricx, twelc der contrarye bevonden was, by der goede waerhede.
| |
[1484-10-4]
Item up den 4den dach in October, anno 84, doe zo vertrac mynen heere van Ravesteyn, van der goede stede van Brugghe, tooter goede stede van Gend, eerlic ende met schonen state, met 100 peerden.
| |
[1484-10-14]
Item up den 14den dach in October, anno 84, zo waren ghehouden ende ghedregen processyen generael toot Sinte Donaes, ende daer was mede ghedregen de weerdege fierter ende glorieus lichame van Sinte Donaes, met vier zelveren trompetten, ende twee claroenen. God lof ende danc.
| |
[1484-10-17]
Item up den 17den dach in October, anno 84, zo was eenen man dood ghesteken voor tPaeukin, up den houc van den Maechdendalle, het dede een tegeldeckers cnape, ende den dooden die daer bleef die hiet Anthuenis Barvoed. God hebbe zyne ziele. Amen.
| |
[1484-12-8]
Item up den 8sten dach in December, anno 84, zoe waren ghehouden ende ghedregen processyen generael toot Onzer Vrauwen, ende daer was mede ghedregen de weerdege fierter van Sinte Bazelis, die rustend es tSinte Donaes, ende
| |
| |
den weerdegen fierter van Sinte Loy, die rustend es te Sinte Salvator, ende daer ghync mede, in de voorseyde processye, eenen man in zyn lynwaed en metten bloten oofde, met eender barnende toordse in zyn handen, ende daer anhangende de wapene van de stede, ende voord de voorseyde toordse rondomme behangen met fygen, ende dit al, in voorme van amende.
| |
[1484-12-11]
Item up den 11sten dach in December, anno 84, doe was groten nood van brande, bachten de Carmers, ten huuse van eene geheeten Margriete Rommelconte, ende tvoorseyde huus, behoorde toe Jan van den Keere.
| |
[1484-12-12]
Item up den 12sten dach in December, anno 84, zo verdranc een schoon joncman tusschen der Strobrugghe ende sKuenyncxbrugghe, ende hy hiet Joorkin de Gay, ende was ghevischt, up den 13den dach. God hebbe zyne ziele. Amen.
| |
[1484-12-17]
Item up den 17den dach in December, anno 84, doe was eenen man ghesteld up een schavood, by justicyen voor thuus van den Vryen, ende met een gloyende helsene duer zyn tonghe ghesteken, ende dat ter cause om dat hy Jhesus Christus ghebenedyd gheloochend hadde.
| |
[1484-12-18]
Item up den 18den dach in December, anno 84, doe was een joncknecht ghehangen by justicyen van der wet van der stede van Brugghe, ende hy hiet Michiel van den Dale, filius Michiel.
| |
[1484-12-12]
Item up den 12den dach in December, anno 84, doe verdranc eenen geheeten Jan van den Steene, ende viel in de reye, by der Strobrugghe, ende was schade belettre van Willem Moreel, ende lach 18 daghen verdroncken int watere, want hy was ghevischt up den 29sten dach in December, anno 84, ende begraven tSinte Cruus. God hebbe zyne ziele ende alle zielen daer Gods beede vooren begeerd. Amen.
| |
| |
Item tjaer van 84 es huut. God zy ghelooft ende ghebenedyt ende by zynder gracye, genaden ende grondelooze ontfermachtichede; zo begund tjaer van 85.
|
|
Auteursrechtvrij