|
| |
[1482]
[1482-1-6]
Item up den 6den dach in Laumaend, anno 82, doe was te Brugghe ghemaect eene steicbane, ende t'henden an Sinte Karstoffelskerke, daer waren ghemaeckt twee stalagen, waer of dat deene in viel, up den zelven dach, ende daer was honder ghequetst eenen dien men hiet Jan de Weerd, eenen frutenyer, ende was ghequetst tot up de dood.
| |
[1482-1-8]
Item up den 8sten dach in Laumaend, anno 82, doe quam ons harde gheduchten heere ende prinche in de voorseyde steicbane, al ghewapend, ende zijn peerd al overdect met roode zyde laken, tooter heerden al duertrocken met gouden draden, ende hy stac daer vroylic ende blyde, ende daer waren twee heeren van den hoordene, met hem in de bane, die ic niet en kende, ende alle zyne andere hedel heeren laghen ter veinster in Cranenburch, met ons princesse, zeere chierelic ende statelic ghelic als dat betaemt.
| |
[1482-1-9]
Item up den 9sten dach in Laumaend, anno 82, doe vertrac ons harde geduchten heeren ende prinche Maximilyaen, uyt zijnder goeder stede van Brugghe, ter Cruuspoorten huut tot Hardenburch, ende ooc ons princesse, zyne ghezelnede, met hem, met zeere schonen state met twaelf witte aggenyen, ende elken een ghetughe van rood gouden fluweelen lakene, ende up elc eene dienende vrauwe, ende met twee vergoude hanghende waghenen, ooc beede vul dienstvrouwen. God lof en danc.
| |
[1482-1-13]
Item up den 13sten dach in Laumaend, anno 82, doe stac ons harde geduchten heere ende prinche Maximilyaen, met zynen heeren, ende met zynen hedelen, ende zijn peerd was becleed met fluweel blau rood ende wit, ende alle die doe
| |
| |
daer, te zynen dienste waren, toot 360, hadden alle an journeyen, naer der steickbane manieren, al van den zelven lakene, ende hy hadde staende, boven op zynen helm dry vederen zeere fijn van stoffen, ooc blaeu, rood ende wit; voord onze gheduchte princesse die lach al met hueren edelen state up den houc van Sint Amandstrate, ten huuse geheeten in Cranenburch, ende daer was ghespannen honder de veinstere van den voorseyden huuse, een blaeu gouden fluweelen lakenen, ende int viercante beleyd met rooden fluweele. God lof ende danc van al.
| |
[1482-1-17]
Item up den 17den dach in Laumaend, anno 82, doe stac ons harde gheduchten heere ende prinche Maximilyaen, in de steicbane voorseyd, ende zijn peerd was overcleed met rooden fluweele, ende hy hadde een roode plume, staende up zynen helleme, ende ons princesse lach ten huuse voorseyd met haeren voorseyden state, ende voor huer ghespannen tvoorseyde goude laken.
| |
[1482-2-6]
Item up den 6den dach in Spurkele, anno 82, doe waren ghehouden ende ghedregen processyen generael ten broeders van de Predicaren.
| |
[1482-3-8]
Item up den 8den dach in Meerte, anno 82, doe waren ghehouden ende ghedregen processyen generael tot Sinte Salvator.
| |
[1482-3-25]
Item up den 25sten dach in Meerte, anno 82, doe waren ghehouden ende ghedregen processyen generael tOnzer Liever Vrauwe, ende dat ter cause, dat ons princesse niet wel te passe en was, maer zonderlynghe zeere ziec, ende in de voorseyde processye was ghedregen de weerdeghe fierter van sinte Bazelis, die rustend es tSinte Donaes, ende den jonghen hertoghe van Gelderen ende myn vrauwe zyne zuster, ghyngen der mede bervoed, ende daer ghync eenen die ic niet en kende bervoed, in zyn lynwaed ende metten
| |
| |
bloten oofde, met een barnende toordse in zyn hand, in voorme van amende.
| |
[1482-3-27]
Item up den 27sten dach in Maerte, anno 82, doe waren ghehouden ende ghedregen processyen generael ten Sartruezen, buuten Brugghe, ende daer was mede ghedregen de weerdege fierter ende glorieuse lichame van Sinte Donaes ende tsoete, weerdich, helich, ghebenedyde bloed, ende daer waren mede ghedregen 28 barnende toordsen, ende deze heleghe processyen waren ghedregen ter cause van dry pointen: ten eersten, om den pays, tander om de ghezondicheyd van ons princesse, terde omme grote gracien die ons God verleend hadde van den coorne. Voords ons voorseyde starf ende verschied van dezer wereld, up den zelven dach vooren ghenoemt, ter zaleger ghedachte.
| |
[1482-4-2]
Item up den 2den dach in April, anno 82, doe was ons princesse voorseyd ter zalegher ghedachte ter kerk dood, tOnzer Liever Vrauwen, in Brugghe, heerlicken ende met schonen state, eerst, de vier hoordenen ghyngen alvooren, ende aldervoren de Observanten, ende elc naervolghende in processye, ende daer achtervolghende de gheheele collegie van de wet, ende daer naer de officiers van den hove, ende daer naer volghende de 6 herauden gecleed in zwarten, ende vooren overslooft ende elc den wapenroc der hover, ende daer naer volghende myn heere van den Gruuthuuse, ende daer naer tvoorseyde lyc. God moet ghelyken. Ende daer mede gaende, an elcken zyde, dry 25 mannen, ende elcken met zwarten rauwkeerels, en alle overslooft, ende elc in zyn hand eene barnende toordse van vuf pond, ende eenen schild van Bourgogne daer an hanghende, ende eenen schild voor de borst. Voords zo was tvoorseyde lyc ghedregen van menegen hedelen heere ende rudder, ende alle de hedel rudders, overslooft in zwarten habyten; ende tvoorseyde lyc overdect al
| |
| |
met gouden lakene, hanghende an beede zyden, tooter heerde, ende tvoorseyde goudenlaken, al an beede zyden behangen met den voorseyden schilden, van der voorseyde wapen van Bourgognen, ende boven hover tvoorseyde lyc, was ghedregen een viercante gouden laken, met vier stocken ooghe ophoudende, de stocken zward gheverwed, ende an elken voorseyden stoc hanghende eenen schild metter voorseyde wapene van Bourgognien, ende voorseyde goude cleed was int viercante met schone gouden fringen, ende voord achtervolghende tvoorseyde lyc zoo volchde ons harde gheduchten heere ende prinche Maximilyaen zo bedruct, ende met groten rauwe, alst zedelic was, ende menich freschs edelman met hem, zo alst wel betaemde, ende daer naer alle de hedele joncfrauwen van den hove, ende alle ghecleed in zwarten habyten, ende de dry die voren ghyngen waren overslooft met raucaproenen, ende voord alle dandere gheparerd met witte line ooftcleederen, ende alle de staten van den mannen vooren ghenoemd in zwarten habyten; voord alle de ambochten ende neeryngen hier van de stede van Brugghe, waren ghecleed in zwarten habyten, ende elc ambocht staende in hoordenancye, ende hielden daer barnende elc al zo vele toordsen als zy plegen keersen te brynghine ter merct, op den heleghen bloed dach, ende alle die toordsen waren zward gheverwed, ende elc ambocht, aen elcken toordse hanghende eenen zwarten schild, ende elc byzonderlynghe, met zynder wapene daer in staende.
| |
[1482-4-12]
Item up den 12sten dach in April, anno 82, doe vertrac ons harde gheduchten heere ende prinche Maximilyaen, uyt zynder goeder stede van Brugghe, wand hy hadde doe hier in de stede gheweeist 17 weken, ende hy reed also vooren ghezeid es, met goeden notablen wyze, ende secreten heeren van Gend, toot zynder goeder stede van Gend,
| |
| |
zeere princelic, chierlic, notabelic ende heerlic, met hondert ende tweeentseventich peerden.
| |
[1482-4-14]
Item up den 14den dach in April, anno 82, doe waren ghehouden ende ghedreghen processyen generael ten broeders van den Predicaren, ende daer was mede ghedregen tglorieuse lichame ende weerdich fierter van Sinte Donaes, ende de weerdeghe fierter van St. Bonifacius, ende de weerdeghe fierter van St. Loy. God lof ende danc.
| |
[1482-4-25]
Item up den 25sten dach in April, anno 82, doe waren gehouden ende ghedreghen processyen generael ten broeders van de Freminueren.
| |
[1482-4-29]
Item up den 29sten dach in April, anno 82, doe was te Brugghe eenen man huutghevoerd ende ontooft; hy hadde eenen knecht verdroncken ende versmoord int water.
| |
[1482-5-2]
Item up den 2den dach in Meye, anno 82, doe quam ons harde gheduchten heere ende prinche Maximilyaen van Gend, bin zynder goeder stede van Brugghe, met 600 peerden.
| |
[1482-5-5]
Item up den 5den dach in Meye, anno 82, doe quam onzen harden gheduchten heere ende prinche Maximilyaen huut zynder goeder stede van Brugghe, tooter stede van Ypre al metten voorseyden state, ende hy reed snavends te Thoroud.
| |
[1482-5-10]
Item up den 10den dach in Meye, anno 82, quam onzen voorseyden prinche van Ypre, tooter plecke van Wynendale, ende van daer bin zynder goeder stede van Brugghe, ende altoos met zynen state vooren ghezeyt.
Item hy quam van daer bachten te Magdeleene, ende daer zach hy monster passeeren, ende reed van daer buuten omme naer den Tempelhove, en alzo om naer de poorte van Sinte Ledenaerd, ende alzo ter Sluus, ende van daer in Holland, ende ic bad dat God hem wilde bewaren. Amen.
| |
[1482-5-12]
Item up den 12sten dach van Meye, anno 82, doe quamen
| |
| |
400 ghezellen huut Braband, ter Cruuspoorten in, metten pingoenen van der stede van Brugghe, ende trocken alzo met schone hordenancyen, duer de stede, ter Smedepoorten huut, up de frontiere van den lande van Vlaenderen.
| |
[1482-5-15]
Item up den 15den dach in Meye, anno 82, doe was te Brugghe eenen ghehanghen by justicie, ende hy was eenen droochscheerers zuene die ic niet en kende.
| |
[1482-5-27]
Item up den 27sten dach in Meye, anno 82, doe waren buuten de Bouverypoorte, seven engiene gheprouft ende gheschooten by mynen heere de Schoudheeten, Burchmeesters ende Schepenen.
| |
[1482-5-28]
Item up den 28sten dach in Meye, anno 82, doe was te Brugghe up de merct ghehanschaud van den heere en van de wet, een kind dat dood ghevonden was, up de voorseyde merct, in de Waermoesmerct.
| |
[1482-6-11]
Item up den elfsten dach in Wedemaend, anno 82, doe was te Brugghe ghehouden ende ghedregen processyen generael tonzer vrauwen broeders ter Carmers, ende daer ghyngen mede in de voorseyde processie twee mannen in haerleder lynwaed barvoed, ende metten bloten oofde, den eenen met eene barnende toordse in zyn handen, ende dandren met eene keersse; ende op dien zelven dach, zo was gheschoten den papegay van den handboghe ter plaetse ghecostumeerd.
| |
[1482-6-24]
Item up den 24sten dach van Wedemaend, anno 82, doe waren ghehouden processyen generael, ten clooster van den Heechouten, (sic) den glorieusen lichame, ende weerdegen fierter van Sinte Donaes. God lof ende danc, van al.
| |
[1482-6-28]
Item up den 28sten dach in Wedemaend, anno 82, doe waren ghehouden ende ghedregen processyen generael, tOnzer Lieve Vrauwe.
| |
[1482-6-30]
Item up den 30sten dach in Wedemaend, anno 82, doe
| |
| |
waren ghehouden ende ghedregen processyen generael toot Sinte Salvator, ende daer was mede ghedregen tghebenedyde, weerde, glorieus ende helich houd van den lieven, weerdegen, helegen ende ghebenedyden Cruce, van onzen behouder Christus Jhesus, twelcke dat rustend es tOnzer Liever Vrauwekercke, ende daer was mede ghedregen, tglorieuse, ghebenedyde, weerde helich Sacramend dat rustend es toot Sinte Donaes, met groter heeren ende weerdicheden. God lof ende danc.
| |
[1482-7-14]
Item up den 14den dach in Hoymaend, anno 82, doe waren ghehouden ende ghedregen processyen generael te Sinte Donaes, ende daer was mede ghedregen de glorieuse lichame ende weerdege fierter van Sinte Donaes, ende de weerdeghe fierter van Sinte Bonifacius, ende de weerdige fierter van Sinte Loy.
| |
[1482-7-18]
Item up den 18den dach in Hoymaend, anno 82, doe was ende lach verdroncken een houde vrouwe, ende die plochte ten kerchove te gane, om in de wulle te werkene, ende lach verdroncken an de groote Heechoudbrugghe. God hebbe huer ziele, ende alle zielen. Amen.
| |
[1482-7-22]
Item up den 22sten dach in Hoymaend, anno 82, doe waren gehouden ende ghedregen processyen generael ten broeders van den Predicaren, ende daer was mede ghedreghen den weerdegen fierter van Sinte Bazelis, die rustend es toot Sinte Donaes.
| |
[1482-7-28]
Item up den 28sten dach in Hoymaend, anno 82, doe waren ghehouden ende ghedregen processyen generael ten clooster van den Freminueren, ende daer was ooc mede ghedreghen den weerdegen fierter van Sinte Maximus, die rustend es toot Sinte Donaes, boven den ooghen houtaer, alder naest thelege lichame van Sinte Donaes.
| |
[1482-8-14]
Item up den 14den dach in Oust, anno 82, doe quam
| |
| |
ons harde geduchten heere ende prinche Maximilyaen, van der stede van Gend, in zynder goeder stede van Brugghe, met 160 peerden princhelic ende notabelic, ende hy hadde doe van hier ghezyn 18 weeken, twee daghen min.
| |
[1482-8-18]
Item up den 18den dach in Oust, anno 82, doe waren ghehouden ende ghedreghen processyen generael te Sinte Salvator.
Item up den zelven dach, anno 82, doe was dood ghesteken den weerd int zwarte Leeukin, up den houc van den Garnaerdstraetkin, ende hy was eenen mandragere, ende hy was ooc een vuldere, ent geschiede in Vlaender, an twest vleeschuus. God hebbe zyne ziel. Amen.
| |
[1482-8-19]
Item up den 19den dach in Oust, anno 82, doe vertrac ons harde gheduchten heere ende prinche Maximilyaen, van zynder goeder stede van Brugghe, te Middelburch in Zeeland, ende hy hadde doe hier ghezyn 5 daghen.
| |
[1482-8-21]
Item up den 21sten dach in Oust, anno 82, doe quam ons harde gheduchten heere ende prinche, in de stede van Brugghe, van Middelburch huut Zeeland; hy was doe wech twee daghen.
| |
[1482-8-23]
Item up den 23sten dach in Oust, anno 82, doe quam ons harde gheduchten heere ende prinche Maximilyaen, boven up der stedehuus, ende hy dede daer zyn relaes, zulc als hy vooren hadde, ende zulc als hem goed dochte, voor de hoofdmannen ende de dekenen, ende up den zelven dach, doe vertrac hy naer der noene, huut zyn goede stede van Brugghe toot Ypere, ende hy rustede snavends te Thoroudt. God wil hem bewaren.
| |
[1482-8-26]
Item up den 26sten dach in Oust, anno 82, doe quam in de stede van Brugghe, mynheere van Santray ter Gendpoorten in, met 240 peerden, ende alle ghewapender hand, ende op den 29sten dach, zo reed hy weder huut, ter Smedepoorte
| |
| |
toot Ypere, by onzen harde geduchten heer ende prinche, ende al metten zelven voorseyden state, chierlic, eerlic ende princhelic zo hem wel betaemd.
| |
[1482-8-29]
Item up den 29sten dach in Oust, anno 82, doe waren ghehouden ende ghedregen processyen generael ten broeders van den Predicaren, ende daer was mede ghedregen tglorieuse lichame ende weerdege fierter van Sinte Donaes.
| |
[1482-8-30]
Item up den 30sten dach in Oust, anno 82, doe quam ons harde gheduchten heere ende prinche van Ypere in zyn goede stede van Brugghe, ter Smedepoorte in, princhelic ende chierlic, met twee honderd peerden ende tachentich.
| |
[1482-8-31]
Item up den laetsten dach in Oust, anno 82, doe zo quam ons harde gheduchten heere ende prinche up der schepenen huus, zeere chierlic ende princhelic voor hem voerende een gouden zweerd, ende daer dedy zyn relaes voor hoofdmannen ende dekenen, zulc als hy voren hadde, ende te rade was.
| |
[1482-9-1]
Item up den eersten dach in September, anno 82, doe quam ons harde geduchten heere ende prinche weder toot inder schepenenhuus, princhelic ende chierlic, ende veele nottabel heeren, ende voor haer voerende tvoorseyden gouden zweerd, ende daer commende zegghende zyn begheerte.
| |
[1482-9-2]
Item up den tweeden dach in September, anno 82, doe quam ons harde gheduchten heere ende prinche toot in den Burch, zeere chierlic ende princhelic met veele hedel heeren, en voor hem voerende tgouden zweerd, ende hy beetede van zynen peerde, ende ghync in der schoudheeten love, ende dit, ter cause, om de wed van der stede te vermakene.
| |
[1482-9-8]
Item up den 8sten dach in September, anno 82, doe waren ghedregen ende ghehouden processyen generael, ende daer was mede ghedregen tghebenedyde, weerdich, helich bloed toot Onzer Liever Vrauwe, ende het was
| |
| |
ghedregen van den eerweerdegen vader in Gode Suffregaen, busschop van Sarepten, ende den habd van den Heechoute, ende daer waren 16 barnende toordsen, acht van der stede weghe, ende elcke, metter stede wapene, ende voord, acht van den helegen bloede weghe. God lof ende danc.
| |
[1482-9-9]
Item up den 9den dach in September, anno 82, doe quam ons harde gheduchten heere ende prinche, up der stede huus by den goeden lieden van de wet, oofdmannen ende dekenen, ende met vele andere nottabele heeren, ende menegen fresschen edelman, ende met den eerweerdegen vader mynen heere den habd van Sinte Pieters van de goede stede van Gend.
| |
[1482-9-18]
Item up den 18den dach in September, anno 82, doe vertrac ons harde gheduchten heere ende prinche Maximilyaen, huut zynder goeder stede van Brugghe, ter Gendpoorte huut met zeere schonen state princhelic ende statelic, ende met menegen eerlicken hedel man, ende met den voorzeyden eerweerdegen vader den habd van Sinte Pieters in Gend, ende met 300 ende 84 peerden. Item hy hadde doe hier ghezyn twyntich dagen. God lof.
Item up den 18den dach in September, anno 82, dat was up den zelven dach, doe was een groot messchief van brande ten vyf houcke, by Sint Gilliskercke, aldernaest den Stove geheeten int Valckenhaes.
| |
[1482-9-19]
Item up den 19den dach in September, anno 82, doe was ghevoerd huuter stede van Brugghe, den edelen heere van Symay die was van Henegauwen als hoverleden ende dood om te begravene in Henegauwen, ende was ghevoerd, met zeere schonen state, heerlic ende princhelic, alzo alst hem betaemt. God hebbe zyne ziele. Amen.
| |
[1482-9-21]
Item up den 21sten dach in September, anno 82, doe was te Brugghe, eenen man overghedaen by justicie ter Cruus- | |
| |
poorten huut, ghelic als van zulcken fayte pleeicht te doene byder wet van den Vryen: hy was van Kouckelare, ende hy hadde daer te vooren ghewoend in de prochye van Ichtegeem by Kouckelare. God gheve zyn ziele vrede ende alle zielen daer Gods beede voren begeerd. Amen.
| |
[1482-9-28]
Item up den 28sten dach in September, anno 82, doe was te Brugghe, in den Burch, ontooft eenen man, ende hy hiet Hans van Limburch, ende dat ter cause, om dat hy was een bespyere, ende een wrouger tusschen den lande van Vrankeryke ende den lande van Vlanderen. God hebbe zyne ziele. Amen.
| |
[1482-9-29]
Item up den 29sten dach in September, anno 82, doe waren ghehouden ende ghedregen processyen generael ten broeders van den Predicaren, ende daer was mede ghedregen den weerdegen fierter van Sinte Bazelis, die rustend es te Sinte Donaes.
| |
[1482-10-8]
Item up den achtsten dach in October, anno 82, doe was in den Burch ghemaect een schavood, ende daer was up ghesteld by justicye, eenen geheeten Jan de Vriese, Jan Maertin of Jan Nachtegale, in de wandelynghe; hy was daer ghesteld dry dagen achtereen, om dat hy de goede lieden alzo bedrogen hadde, van juweelen ende in gelde, ende up den derden dach, hy was ghebannen 10 jaer huuten lande van Vlaenderen, up zyn ooft, als van dieften.
| |
[1482-10-12]
Item up den 12den dach in October, anno 82, doe was groot messchief van brande, bachten de Pypers capelle, in de Lane. God wil daer of ons beschermen. Amen.
| |
[1482-10-18]
Item up den 18den dach in October, anno 82, doe was ghehouden ende ghedregen processyen generael te Sinte Donaes, ende daer was mede ghedregen den weerdegen fierter van Sinte Donaes, Bazelis. God lof en danc.
| |
[1482-10-27]
Item up den 27den dach in October, anno 82, doe waren
| |
| |
gehouden en ghedregen processyen generael ten broeders van Freminueren ende daer was mede ghedregen den weerdegen fierter van Sinte Maximus, die rustend es toot Sinte Donaes, ende den weerdegen fierter van Sinte Bonifacius, die rustend es tOnzer Lieve Vrauwe. God lof ende danc.
| |
[1482-11-3]
Item up den 3den dach in November, anno 82, doe waren gehouden ende ghedregen processyen generael te Sinte Salvator ende daer was mede ghedregen tsoete, weerde, helich, ghebenedyde sacramendt, dat rustend es tSinte Donaes; ende van daer deur de Dwerstate, voorby thof van onzen harden gheduchten heere ende prinche, voorby dBueterhuus, ende alzo op de merct, ende daer was weerdichliken eenen tresoor ghedect, honder de vaute van de Halle, ende daer was tweerdege, helich, ghebenedyde sacramend up ghesteld te rustene, ende daer waren ghezongen antieffenen, collecten, als daertoe behoord.
| |
[1482-11-19]
Item up den 19den dach in November, anno 82, doe waren te Brugge overghedaen by justicyen, zes vrauwen bachten Sinte Cruus, daer men al zulcke justicye pleecht te doene, van zulcke zaken die beter ghezwegen zyn dan ghenoemd. God ontferme der zielen. Amen.
| |
[1482-11-25]
Item up den 25sten dach in November, anno 82, doe waren ghehouden ende ghedregen processyen generael tOnzer Liever Vrauwenkercke, ende daer ghync mede in de voorseide processye, metten bloten oofde, barvoed, in zyn lynwaed, met eender barnende toordse in zyn hand, eenen riemscheerer gheheeten Symyoen Wernaerd, ter cause van hoverhooricheden.
| |
[1482-12-21]
Item up den 21sten dach in December, anno 82, doe waren gehouden ende ghedregen processyen generael ten clooster van den Freminueren, ende in de voorseyde processye, zo ghync in voorme van amende, in zyn lynwaed,
| |
| |
barvoed ende metten bloten oofde, ende met eender barnende toordse in zyn hand, ende het was eenen hoedemaker, ende hy hiet Colaerd, ter cause van hoverhoorichede.
| |
[1482-12-22]
Item up den 22sten dach in December, anno 82, doe was eenen man ghebrocht van levenden live ten doode, ende het was een ghelughieters enape, ende het dede hem eenen gheheeten quade Hannin, in de wandelynghe.
| |
[1482-12-23]
Item up den 23sten dach in December, anno 82, doe waren twee manoofden hoverghedaen by justicyen, den eenen was een spaengaerd niet coopman, noch facteur van der spaenscher nacye, maer hy was eenen van Salazaerds lieden, ende hy hiet Maertin, ende dander was vander stede van Houdenaerde, ende die hiet Jacop, ende hy was ballync van der stede van Houdenaerde. God ontfermt de zielen. Amen.
| |
[1482-12-28]
Item up den 28sten dach van December, anno 82, doe was eenen man doot hoverreden up den Braemberch, van der karre van Jacopinissen, ende hiet Jan vander Haghe, ende woende in Ooscamp; hy bleef doe dood, up de stede voorseyt.
tJaer van 82 dat es huut, en by de Gracien van Gode almachtich, gebenedyt omtander.
|
|
Auteursrechtvrij