|
| |
[1481]
[1481-1-2]
Item up den tweeden dach van Laumaend, anno 81, doe was gehouden ende ghevochten eenen tornoy met groter chierlichede, ende onzen prinche Maximilyaen ende ons princesse waren ende lagen ten thuine op den houc van Sint Amandstrate, gheheeten in Cranenburch, zeere chierlic
| |
| |
ende princhelic met meneghen fresschen edelman, ende met groter ghezondichede. Gode lof ende danc van zijnder ghebenedyde gracien.
| |
[1481-1-3]
Item up den derden dach van Laumaend, anno 81, doe was ons princesse te Dudzeele, om te heffene ende helpen kersten te doene, 't kind van mynen heere van Dudzeele, de welke es mynen heere Jacop van Gistele.
| |
[1481-1-4]
Item up den 4den dach van Laumaend, anno 81, doe ghinc ons prinche Maximilyaen ende ons princesse, zyne ghezelnede, beede te zamen, te voed, toot Hardenburch in voorme van pelgrimage, ende den 5sten dach quamen zy weder te Brugge te waghene, te peerde ende ooc te voed, beede met hueren state alzo zy plachten te houden ende te voerne.
| |
[1481-1-7]
Item up den 7sten dach van Laumaend, anno 81, zo was tswijn gheslegen up de merct van den blenden lieden ende ons prinche ende princesse voorseyd lagen te thuine op den houc van St Amandstrate, in Cranenburch. God lof ende danc, met groter ghenouchten, ghezonden ende blyschepen.
| |
[1481-1-11]
Item up den 11sten dach van Laumaend, anno 81, doe quam ons harde gheduchten heere ende prinche te Brugghe in de steicbane, hem vieren al ghewapend, ende elc met eender speere in dhand ende die zeere groot ende dicke, ende elc ghecleed met bouckrane rood ende zward, zonder ons prinche, deen hadde an, fluweel, rood ende zward, ende alle zyne hedele lagen ten tuene, hem doende heere ende reverencye.
| |
[1481-2-1]
Item up den eersten dach van Spurkele, anno 81, doe vertrac ons harde gheduchten heere ende prinche Maximilyaen van der stede van Brugghe tooter goede stede van Gend, met groter ghenouchten, ende hy was doe binder stede van Brugghe seven weken ende dry daghen.
| |
[1481-2-7]
Item up den 7den dach van Spurkele, anno 81, doe was
| |
| |
gehouden ende ghedregen processye generael ten clooster van den Freminueren.
| |
[1481-2-20]
Item up den 20sten dach in Spurkele, anno 81, doe vertrac ons princesse huuter stede van Brugghe, ende reed tooter stede van Gend met hueren houden state voorseyd.
| |
[1481-3-23]
Item up den 23sten dach in Maerte, anno 81, doe quam ons princesse weder in de stede van Brugghe ter Cruuspoorten, met twalf witte aggeneyen ende elc hadde een ghetughe van rood gouden lakene, ende dry hanghende vergoude waghenen, ende elc overdect met rooden gouden fluweelen lakenen, ende voord met 200 ander peerden.
| |
[1481-3-25]
Item up den 25sten dach van Maerte, anno 81, doe was ons princesse toot Sinte Donaes, ende zoe hief daer een kind met dhoude vrouwe van Halewijn, ende mynen heere Van Gazebeke, honder hem dryen.
| |
[1481-3-28]
Item up den 28sten dach in Maerte, anno 81, doe was gehouden ende ghedregen processyen generael ter Carmers.
| |
[1481-3-31]
Item up den laetsten dach in Maerte, anno 81, doe was te Brugghe huut gheroupen ter halle, dry maenden bestant tusschen den lande van Vlaenderen ende der Franscher crone.
| |
[1481-4-1]
Item up den 1sten dach in April, anno 81, doe was monster ghedaen, van den lande van den Vryen heerlic ende minzamelic van 600 manne persoonen.
| |
[1481-4-2]
Item up den 2den dach in April, anno 81, doe zo was kersten ghedaen 't kind van Salazaerd, te Sint Gillis, ende het hief ons princesse, mijnheere van Romond, ende mir vrauwe, zyne ghezellene, ende den prinche van Araingen, die men hiet mijnheere van Arguwe.
| |
[1481-4-13]
Item up den 13den dach in April, anno 81, doe griefde hem zelven van den live, zo dat hy daer of starf terstond, den weerd in den Voedboghe, an zijn zelfs daghen, ende hy hiet Karstyaen.
| |
| |
| |
[1481-4-16]
Item up den 16sten dach in April, anno 81, doe was te Brugghe, in den burch, eenen man ontooft die was van Sinte Homaers. God hebbe alle zielen.
| |
[1481-5-5]
Item up den 5den dach in Meye, anno 81, doe vertrac ons princesse huuter stede van Brugghe toot Andworpen, ende altoos met hueren voorseiden state.
| |
[1481-5-20]
Item up den 20sten dach in Meye, anno 81, doe waren ghehouden ende ghedregen processyen generael, ten broeders van den Predicaren.
| |
[1481-5-31]
Item up den laetsten dach in Meye, anno 81, doe waren ghehouden ende ghedregen processyen generael te Sinte Cruus, buuten der stede, ende daer ghync mede, in voorme van amende, Gillis Hegel, een voederare, metten bloten oofde, in zijn lijnwaed ende bervoed, ende eenen barnende toordse in dhand.
| |
[1481-6-16]
Item up den 16den dach in Wedemaend, anno 81, doe was te Brugghe ghehangen eenen ballync, ende was de zuene, in de drye Kueningen, bachten de plaetse Maubeerd, ende het was eenen brauwere, in den Bezem, op toost proossché.
| |
[1481-6-19]
Item up den 19sten dach in Wedemaend, anno 81, doe waren te Brugghe ghehouden ende ghedregen processyen generael ten broeders van den Freminueren, ende daer was mede ghedregen, de weerdege fierter van Sinte Bazelis, ende daer ghyngen mede in de voorseyde processye, twee vrauwen in voorme van amende, bervoed ende elc met een barnende keersse, van een pond, in haer hand.
| |
[1481-6-27]
Item up den 27sten dach in Wedemaend, anno 81, doe was te Brugghe huutgheroupen bestand al tusschen den hertoghe van Oostricke, ende den Franschen kuenync; vry varen ende vry keeren.
| |
[1481-7-8]
Item up den 8sten dach van Hoymaend, anno 81, doe was
| |
| |
groot messchief van brande, in de Langhestrate toot Willem de roedraghere van Sinte Cruus, ende hy biec doe ten tyde, kanstelynghen, ende hy woende doe by den Wildekin.
| |
[1481-7-9]
Item up den 9den dach van Hoymaend, anno 81, doe verdranc eenen man, an de Smedepoorte.
| |
[1481-7-10]
Item up den 10den dach in Hoymaend, anno 81, doe was up ghesteld den keyzer, up den Oosterlyngenhuus, staende int Cromme Gendof, by St Gillisbrugghe.
| |
[1481-7-11]
Item up den 11sten dach in Hoymaend, anno 81, doe zo was eenen zynen hand of ghehauwen, ende hy hiet Joorkin van Poucke, Jooris van Poucke zuene, de paternostermakere.
| |
[1481-7-18]
Item up den 18den dach van Hoymaend, anno 81, doe waren ghehouden ende ghedregen processyen generael toot Sint Jacopskerke.
| |
[1481-7-20]
Item up den 20sten dach in Hoymaend, anno 81, doe was ghesteld eenen man up een schavoot in den burch, ende dien hiet Jan Van Luerne, ende was een pijnder van St Jansbrugghe; hy was verwonnen zonder tyd, ende was de suene van Michiel van Luerne.
| |
[1481-8-10]
Item up den 10sten dach in Oust, anno 81, doe waren ghehouden ende ghedregen processyen generael t'Onzer Liever Vrauwekerke, en daer was mede ghedregen de weerdighe fierter van Ste Bazelis, die rustend es t'Sint Donaes.
| |
[1481-8-11]
Item up den 11sten dach in Oust, anno 81, doe was in den burch ontooft een cord ghezellekin ende hy hiet Jacop, de suene van een voederare in Brugghe, ter cause omme dat hy brochte ter doot de suene van eenen porpointstiker bachte Sinte Donaes by der looden busse. God hebbe alle zielen. Amen.
| |
[1481-8-19]
Item up den 19den dach in Oust, anno 81, doe waren gehouden ende ghedregen processyen generael ten broeders van den Predicaren, ende daer was mede ghedregen den
| |
| |
glorieusen lichame, ende fierter van Sinte Donaes.
| |
[1481-8-24]
Item up den 24sten dach van Oust, anno 81, doe waren ghehouden ende ghedregen processyen generael, ten clooster van den Eechoute, ende daer was mede ghedreghen dry weerdeghe ryven: St Bazelis, Sinte Bonifacius ende Sinte Loy. God lof van zijnder goeder gracien. Amen.
| |
[1481-8-29]
Item up den 29sten dach in Oust, anno 81, doe waren ghehouden ende ghedregen processyen generael toot Sinte Salvator, ende daer was mede ghedregen tsoete, weerde, helich, ghebenedyde bloed Christi Jesus dat rustend es te Sinte Bazelis, ende daer waren twalf toordsen, al barnende van der stede weghe, ende elc metten stede wapene, ende acht toordsen al barnende, ende elke metter wapene van den helegen bloede, ende der was ghesteld een tresoor, op de grote merct voor de halle, ende dat overdect met gouden lakene, tooter eerde; int wederkeeren commende ter Steenstrate neder, zo was 't ghebenedyde, helich bloed daer up ghesteld te rustene, ende alle de ghemeene processyen int generale staende daer rondomme omtrend, ende daer zynghende ende God schynckende al zulc lof alzo daertoe behoord. God lof ende danc, van al.
| |
[1481-9-6]
Item up den 6den dach in September, anno 81, doe was ghehouden ende ghedregen processyen generael, t'Onzer Lieve Vrauwekerke, ende daer mede ghedregen 't ghebenedyde, weerde Sacramend dat rustend es toot Ste Donaes, ende was ghedregen duer de Wullestrate, duer de Heechoudstrate te Nazareth toe, voor by 't huis ter kercke, ten Hanckerken toe, ende alzo t'Onzer Vrouwen in, ende int wederkeeren, duer Sinte Maryestrate, voor by 't west Vleeschuus, ter Steenstrate neder toot up de merct voor de halle, daer stond chierlicken gedect een tresoor met gouden laken toot op dheerde, ende daer was 't ghebenedyde sacramend
| |
| |
up gesteld te rustene, ende daer was ghezongen de litanye met groter werdicheden, ghelic als daer toe behoord ende anthipffonen ende collecten, ende van danen upghenomen gaende voorby de Waterhalle over de Wisselbrugghe, over de plaetse Maubeerd ter Burchpoorte in, ende alzo al rondomme den Burch, ende alzo duer de proostye Sinte Donaes in. God lof ende danc.
Item ooc up den 6den dach in September, anno 81, naer der noene, ten twee hueren, doe was dood ghesteken eenen steenhauwer, ende hiet Gregoris Oost, ende het dede eenen maetsenare, gheheeten Jacop Piers, ende tghesciede in de Oochstrate, voor den Capoen. God hebbe zyne ziele, ende alle zielen. Amen.
| |
[1481-9-12]
Item up den 12sten dach van September, anno 81, doe waren ghehouden ende ghedreghen processyen generael, ende daer was mede ghedregen de weerdege fierter, ende glorieuse lichame van Sinte Donaes, ter cause om dat onze gheduchtege princesse ghelegen was van eenen schonen jonghen zuene, een knapelic kind, dies zy God lof ende danc van zijnder ghebenedyde gracien; ende deze helege processyen waren ghedregen duer de Oochstrate over dhoude Muelenbrugghe, voorby den Predicaren, voorby den Braemberch, over de grote Heechoudbrugghe, duer de Wullestrate, rond omme de merct, over de Wisselbrugghe, over de plaetse Maubeerd, voor by Blancberghe ende alzo in sinte Donaes. God zy ghelooft van al.
| |
[1481-9-21]
Item up den 21sten dach in September, anno 81, doe waren ghehouden ende ghedregen processyen generael ten clooster van Onzer Vrauwenbroeders, ten Carmers.
| |
[1481-10-5]
Item up den 5den dach in October, anno 81, doe quam in dhoude princesse, ende ze quam in van Mechelen, chierlic ende costelic.
| |
| |
| |
[1481-10-7]
Item up den 7sten dach in October, anno 81, doe vertrac ons houde princesse huut Brugghe, ter Smedepoorten huut, om te treckene t'Sinte Homaer met zeere schone state.
| |
[1481-10-18]
Item up den 18den dach in October, anno 81, doe waren ghehouden ende ghedregen processyen generael ten cloostere van den Freminueren.
| |
[1481-10-29]
Item up den 29sten dach in October, anno 81, doe waren vijf haerme lieden dood ghedroomt tusschen de Carmersbrugghe ende de Schiplieden-Capelle, ende waren dood ghedroomt ter cause van der deelynghe over Clays van Nyeuwenhove. God hebbe haer lieder zielen, ende alle zielen. Amen.
| |
[1481-11-3]
Item up den 3den dach in November anno 81, doe verdranc een man, voor den Wijngaerd, ende was te Brugghe eenen vry schepper nayer, ende hy woende up 'tProossche, te Nazarette, ende hy quam wonen in de Stove, voor den Wijngaerd, ende hy was int schip daer hy zynen huusraed in brochte, ende hy viel hover boord. God hebbe zijn ziele ende alle zielen. Amen.
| |
[1481-12-27]
Item up den 27sten dach in December, anno 81, doe quam ons princesse binnen de stede van Brugghe, ende zoe quam in ter sinte Catelinepoorte, met groter gezondichede. God lof ende danc.
| |
[1481-12-28]
Item up den 28sten dach in December, anno 81, doe quam ons harde gheduchten heere ende prinche Maximilyaen, bin zijnder goeder stede van Brugghe, van der stede van Gend, met 200 peerden ende 64.
| |
[1481-12-29]
Item up den 29sten dach in December, anno 81, doe waren twee ghezellen ontooft in den Burch, om datse t'Hyngelmuenstre hadden vermoord eenen man, eene vrauwe ende eene jonghe maecht, ende hadden 'tgoed ende geld berooft, ende daer naer, tvier int huus ghesteken ende die
| |
| |
doode vermoorde lieden, alzo daer in verbarrend. God hebbe de zielen ende alle zielen. Amen.
Tjaer van 81 dat is huut, by de gracie van God, omme een ander. Amen.
|
|
Auteursrechtvrij