|
| |
[1480]
[1480-1-1]
Item up den 1sten dach van Laumaend, anno 80, doe quam ons prinche Maximilyan, met heerlicken state, voor den noene, te clocke negen, te Sinte Donaes, ende van daer ghync hy boven up tschepenhuus, by de heere ende de wet, ooftmannen ende dekenen.
| |
[1480-1-2]
Item up den 2den dach van Laumaend, anno 80, doe vertrac ons prinche Maximilyan, van zijnder goeder stede van Brugghe heerlic ende princhelic, met zynen state, toot Eeckeloode.
| |
| |
| |
[1480-1-10]
Item up den 10den dach van Laumaend, anno 80, doe was een dyamandslyper dood ghesteken ende deerlicken vermoord, up den houc van der Moerstrate, ende diet hem dede was zijn ghevader ende zijn ghebuer. God hebbe zyne ziele. Amen.
| |
[1480-1-12]
Item up den 12sten dach van Laumaend, anno 80, doe was een man verdronken, 'snach ooc by nachte, an de Ezelpoorten. God hebbe zijn ziele, ende alle zielen.
| |
[1480-1-17]
Item up den 17den dach van Laumaend, anno 80, doe waren ghehouden ende ghedregen processyen generael t'Onzer Lieve Vrouwe.
| |
[1480-1-30]
Item up den 30sten dach van Laumaend, anno 80, doe was eenen man dood ghesteken int huus van Boedeloo, ende hy hiet Roegier; hy was eenen maetsenare ende eenen linewevers zuene, ende het dede hem eenen tinestoopgieters zuene.
| |
[1480-2-8]
Item up den achtsten dach van Spurkele, anno 80, doe was eenen man dood gesteken up den Vlamyncdam, ende hy hiet Pieter, ende hy was page van mynen heere Van Huutkerke.
| |
[1480-2-28]
Item up den 28sten dach van Spurkele, anno 80, doe verdranc eenen knecht, an de Cruuspoorte, int Hawat, daer men de peerden watert. God hebbe zyne ziele, ende alle zielen. Amen.
| |
[1480-2-29]
Item up den 29sten dach van Spurkele, anno 80, doe was ghehanghen ende overghedaen by justicye eenen ballync, ende was een backerscnape. God hebbe zyne ziele, ende alle zielen. Amen.
| |
[1480-3-11]
Item up den 11sten dach van Maerte, anno 80, doe was eenen man ontooft, in den burch ende dien hiet Michiel. God hebbe zyne ziel. Amen.
Item up den zelven dach, anno 80, doe was by justicye eenen man ghebarrend, buuten de Cruuspoorte, bachten Sinte Cruus, die hiet Thomaes.
| |
| |
| |
[1480-3-12]
Item up den 12sten dach van Maerte, anno 80, doe waren ghehouden ende ghedregen processyen generael ten Broeders van de Predicaren, ende daer waren mede ghedregen dry weerdeghe ryven, Sinte Bazelis, Sinte Bonifacius ende Sinte Loy, ende daer ghync eenen kalsyere, in zijn linwaed, bervoed, ende metten bloten oofde, in de voorme van amende, met eenen barnender toordse in zijn handen.
| |
[1480-3-13]
Item up den 13den dach van Maerte, anno 80, doe verdranc eenen man, an de Speyepoort, ende hy hiet Jan Malegijs. God hebbe zijn ziel ende alle zielen daer God beede vooren begeerd. Amen.
| |
[1480-3-27]
Item up den 27sten dach van Maerte, anno 80, doe waren twee mannen, elc huer hand of gehouwen, up den Steen-Steghere, den eenen was Rogier Sleeger en d'andere hiet Pieter de Wale, ende was van Schieddamme, huut Holland.
| |
[1480-4-6]
Item up den 6den dach van April, anno 80, doe was eenen man dood geworpen, ende die hiet Livinus Haper, ende was eenen mutsescheerere, ende het dede hem den zuene van Joos Dhyzervoerder, ende tgheschiede by Sint Gillis, tegen over Bertelmeus van den Bogaerde, den mutsereeder. God hebbe zyne ziele, ende alle zielen. Amen.
| |
[1480-4-8]
Item up den 8sten dach van April, anno 80, doe verdranc eene maechd houd seven jaren, ten Hoye, ten huuse van Jacop Wydhoghe; het was zijn kind, ende het versmoorde in een van den pitten van den doobeerers. God hebbe zyne ziele. Amen.
| |
[1480-4-14]
Item up den 14den dach van April, anno 80, doe waren ghehouden ende ghedregen processyen generael, ende daer was mede ghedregen tweerde, helich, ghebenedyde sacrament van Sinte Donaes toot Sinte Salvator, duer de Steenstrate, ende aldaer wederomme commende, zo wast ghestelt rustende up
| |
| |
de merct, voor de Halle, op een trezoor ghedect ende becleed met gouden lakene tooter heerde, ende de voorseyde processye daer rondomme staende, ende elc geestelic ende weerlic vallende over zyne knyen, daer God anebedende met zanghe ende met bedynghe, ghelic als daer toe behoord, met waslichte ende met wierooke, alzo dat betaemt.
| |
[1480-5-13]
Item up den 15den dach van Meye, anno 80, doe was te Brugghe ghehangen eenen man, maer het was eenen dief van elf peerden. God hebbe zyne ziele; ende up den zelven dach, zo waren dry bouven ghegeesselt.
| |
[1480-5-15]
Item up den 15den dach van Meye, anno 80, was eenen man, in den Burch ontooft, ende hy hiet, in de Wandelynghe, Coppin Broeders. God hebbe zyne ziele. Amen.
| |
[1480-5-30]
Item up den 30sten dach van Meye, anno 80, doe verdranc eene schone jonghe maecht, ende zoe was ghevonden ende ghevischt an de Leebrugghe, ende hadde verdroncken ghezijn vijf daghen. God hebbe haer ziele ende alle zielen. Amen.
| |
[1480-6-5]
Item up de 5den dach van Wedemaend, anno 80, doe quam ons princesse in de stede van Brugge, met zeere costelicken ende princhelicken state, ter Gendpoorte in.
| |
[1480-6-6]
Item up den 6den dach van Wedemaend, anno 80, doe stac dood den smid van Zyseele den smid van Scheeipstale, ende hy hiet Jan, ende den smid van Zyseele hiet Pieter.
| |
[1480-6-7]
Item up den 7den dach van Wedemaend, anno 80, doe vertrac dhoude princesse, ter Cruuspoorten huut, tooter stede van Gend, met 50 peerden ende met hangende vergouden waghenen, ende met twalf witte aggeneyen, ende alle met ghetugen van rood gouden laken, ende op elc een dienende vrauwe.
| |
[1480-6-21]
Item up den 21sten dach van Wedemaend, anno 80, doe
| |
| |
quam ons houde princesse weder ter Cruuspoorten in, met 150 peerden ende metten zelven state vorseyt.
| |
[1480-7-11]
Item up den 11sten dach van Hoymaend, anno 80, doe waren ghehouden ende ghedregen processyen generael, ter Breyelstrate huut, rondomme de merct, ende daer was mede ghedregen den fierter van St. Donaes, ende voor de halle, was ghedect eenen trezoor met goude lakenen tooter heerden, ende den weerdegen fierter daer up ghesteld te rustene, ende alle de processyen staende daer omtrent ende hem gediend met waslichte ende met wierooke, ende een lof ghezonghen zulk als daer toe diend: ende daer ghinc eenen man mede in de voorzeyde processye barvoed, in zijn lijnwaet, met eender barnende toordse in zijn hand, ende metten blooten oofde, in voorme van amende.
| |
[1480-7-16]
Item den 16den dach van Hoymaend, anno 80, doe quam den Busschop van Doornicke, in de stede van Brugghe ter Cruuspoorte in, als kardenael, met zeere schonen state, ende metter gheheelder geestelicker college van Brugghe, ende alle processyewijs ende met alle de generale processyen van der stede, ende den deken van kerstenhede, dien dede hem een relaes ter voorseyde poorte, ende ter voorseyde poorte, was ghespreed eenen gouden pelder, ende een gouden cussen daer up, ende daer op ligghende een gouden cruce, ende alzo was hem ghedaen ter Burchpoorte voor Blanckenberghe by den kanonicken van Sinte Donaes, ende bezwoer daer de helege kercke, ende de voorseyde processyen stonden daer an beide zyde van de straten, ende alle processyewijs met schonen oordinancyen.
| |
[1480-8-6]
Item up den 6den dach van Oust, anno 80, doe trac mijn heere Jan Van Nyeuwenhove huuter stede, ende doe was een ghebod ghedaen, dat alle wie saud willen winnen, datse hem zouden commen doen bescriven.
| |
| |
| |
[1480-8-12]
Item up den 12sten dach van Oust, anno 80, doe was eenen man ghesteld in den Burch, op een schavoot, die hiet Andries, ende hy was van Gistele, ende hy was ghesteken met eenen helsene, duer zijn tonghe ende het was ghedaen by den wet van den Vryen.
| |
[1480-8-14]
Item up den 14den dach van Oust, anno 80, doe waren ghehouden ende ghedregen processyen generael toot Onzer Lieve Vrauwe, ende daer was mede ghedregen tsoete, weerdich, helich, gebenedyde sacrament van St. Donaes, ende alle de priesters van de voorseyde processye, hooftmannen ende dekenen, ende elc deken met zynen heede, elc een wassen keersse van een pond al beernende in zijn hand, ende voor de halle op de merct, was ghesteld een trezoor ende ghedect ende behangen met gouden lakene tooter heerde, ende alzo commende ter Steenstrate neder, ende gaende rondomme de merct commende toot voor de voorseyde halle, daer was tsoete, weerdich, helich ende ghebenedyde Sacramend ghedaen te rustene op tvoorseyde trezoor; daer waren ghezonghen oracien ende collecten, hem ter heeren, ende ter weerdichede, als daer toe behoord.
| |
[1480-8-26]
Item up den 26sten dach van Oust, anno 80, doe was een man ontooft, in den Burch, die hiet Pieter De Rudder, ende hy was een huudevettere, ende ooc clerc van de huudevetters.
Item up den zelven dach, doe was huutghevoerd eenen man ter Cruuspoorte huut, ende dien hiet Anthuenis, ende hy was vermaerd voor eenen waersegghere, ende hy plochte te pypene, metter zacpype, ende hy was overghedaen by justicyen ter cause van zaken, die beter ghezwegen zijn dan ghenoemdt. God hebbe harer beede zielen, Amen.
| |
[1480-9-9]
Item up den 9den dach van September, anno 80, doe was in den Burch, eenen man ontooft die hiet Roeland de
| |
| |
Puut, ende hy was van Poperynghe; hy was van doodslage.
| |
[1480-9-26]
Item up den 26sten dach van September, anno 80, doe waren ghecleed de 16 biervoerders van honder de halle van den huudlandschen biere, ende waren ghecleed met blauwen journeyen daer up gheborduerd, metten boome ghelijkende daer datse dbier mede draghen.
| |
[1480-9-28]
Item up den 28sten dach van September, doe was eenen man doodghesteken, in Pieterscriverstrate ende hy was van Ninmeghen huut Gelderland, ende het deden twee ghezellen ooc wesende van Ninmeghen.
| |
[1480-9-30]
Item up den laetsten dach van September, anno 80, doe quam ons houde princesse ter Smedepoorten in, met zeere schonen state, ende quam met 6 aggeneyen wit ende elc met gouden ghetuugen, ende met eenen hangenden waghen, vergoud binnen, ghecleed met gouden lakene, ende buuten zward fluweel.
| |
[1480-10-1]
Item up den eersten dach van October, doe waren ghehouden ende ghedregen, toot St. Salvator, processyen generael, ende daer was mede ghedregen Sente Bonifacius ende Sente Bazelis ende daer gynghen mede dry mannen, elc barvoed in zijn lijnwaed ende metten bloten oofde, elc een barnende toordse in zijn hand, ende dien hiet Karstiaen ende was een sliper, honder de halle, an de merct, by de fonteyne.
| |
[1480-10-2]
Item up den tweeden dach van October, doe vertrac ons houde princesse, huuter stede van Brugghe toot Gend, anno 80, met haren state voorseyd.
| |
[1480-11-11]
Item up den 11sten dach van November, anno 80, doe zo was eenen man dood ghereeden van eenen waghen beneden Sint Jansbrugghe, by den Oosterlynghenplaetse; hy hiet Jan de Visschere. God hebbe zyne ziele ende alle zielen. Amen.
| |
| |
| |
[1480-11-12]
Item up den 12sten dach van November, anno 80, doe zat een cuper ende dranc, onder dbeerkin, ende hy hiet Pieter Lievin, ende hy versmoorde in zynen dranc. God hebbe zyne ziele. Amen.
| |
[1480-11-22]
Item up den 22sten dach van November, anno 80, doe quam ons houde princesse binder stede van Brugghe, ter Gendpoorten in, met haren houden state voorseyd.
| |
[1480-11-27]
Item up 27sten dach van November, anno 80, doe starf eenen man zeere onverzien en aestelicken in Sinte Katelinnekerke, ende hiet Antheunis Bec, ende was een vry cuper ende men hiet hem in de wandelynghe, den Dullen Cuper. God hebbe zyne ziel ende alle zielen. Amen.
| |
[1480-11-28]
Item up den 28sten dach van November, anno 80, doe brochten van levende live ter dood Thomaes van Reynevyle, eenen die men hiet Gillis, ende dien was van Lisseweghe, ende het was eenen handschoewerkere. God hebbe zyne ziel, ende alle zielen. Amen.
| |
[1480-12-10]
Item up den tienden dach van December, anno 80, doe quam ons harde gheduchte heere ende prinche van zynder goede stede van Gend, bin zijnder goede stede van Brugghe, met 300 peerden, waer of dat de 200 waren van binnen, 100 van den houden voedboghe, ende elc man met een rooden journeye, ende 100 van den handboghe, ende elc man, met een groene journeye; voord, up den zelven dach, zo quam ons princesse ooc in met hem, met twalf witte aggeneyen ende elc een ghetuughe van rood gouden laken ende dry hanghende vergoude waghenen, ende elc overcleed met rood gouden fluweel lakenen, ende alle die waghenen vul dienstvrauwen, ende daer waren zes dozinen barnende toordsen van der stede weghe, ende an elcken toordse hanghende de stede wapenen. God lof en danc.
| |
[1480-12-19]
Item up den 19sten dach van December, anno 80, doe zo
| |
| |
was te Brugghe geschoten den papegaey van den houden voedboghe, ende ons prinche Maximilyaen ende de grave van Sainpool, dien was daer ghequest in zijn ooft, van eenen boge die brac, ende het worde doe daer kuenync eenen graeuwerker, ende hiet Houdaerd. Voord up den zelven dach, naer der noene, doe stac ons harde gheduchten heere Maximilyaen ter merct in de steeicbane, ende zijn peerd was behangen met witte semyte ende stac daer vroylic ende met goeder manieren, ende mynen heere van Ravesteyn die diende hem van de speere, ende den grave van Assauwe die stac ooc met hem, ende ons princesse die lach daer ter venster in Cranenburch, met haren state. God lof ende danc. Voord ons prinche voorzeyd aldaer ghesteken hebbende hy reed huuter baene, al ghewapend ende ghehellemd, ende dede de voerseyde kuenync gheleede toot zynen huuse. Voord up den zelven dach ons prinche ende ons princesse, ende dhoude princesse die quamen snavends ten hetene inder Stedehuuse, ende vele meer andre diversche heeren. God lof ende danc.
| |
[1480-12-26]
Item up den 26sten dach van December, anno 80, doe waren ghehouden ende ghedregen processyen generael ten broeders van den Predicaren, ende daer ghyngen twee mannen barvoed, in huer lijnwaed, ende metten bloten oofde in voorme van amende, deen met eene barnende toordse en dandre met eender barnende keerse.
't Jaer van 80 dat es huut, by der gracie van Gode om tander.
|
|
Auteursrechtvrij