|
| |
[1479]
[1479-1-8]
Item up den 8sten dach in Laumaend 79, doe quamen beede ons princessen, dhoude en de jonghe, in de stede van Brugghe met 200 peerden ende met vier hanghende vergouden waghenen.
| |
[1479-1-12]
Item up den 12sten dach in Laumaend, anno 79, doe reeden beede ons princessen, dhoude en de jonghe, ter Cruuspoorten huut ter Sluuze waerd, met hondert peerden en twaelf witte aggeneyen, met gouden ghetugen ende up elc, eene dienende joncfrauw, ende quamen alzo binden
| |
| |
zelven havende weder te Brugghe in de stede, met blyschepen ende met meneghen fresschen edelen man.
| |
[1479-1-18]
Item up den 18sten dach van Laumaend, anno 79, doe vertrac ons princesse huut haer goede stede van Brugghe, toot harer goede stede van Gend met 600 ende 38 peerden, ende met meneghen fresschen edelen man.
| |
[1479-2-15]
Item up den 15den dach van Spurkele, anno 79, doe waren ghehouden ende ghedregen processyen generael, ten clooster van den Augustinnen.
| |
[1479-3-31]
Item up den 31sten dach van Maerte, anno 79, doe was ghezien staende op een schavoot in den burch, eenen gheheeten Jacop Feye, Fs. Christiaens, ter cauzen van zijnder bedriegelijkhede ende bouveryen die hy ghedaen hadde in dyveersche landen.
| |
[1479-4-23]
Item up den 23sten dach van April, anno 79, doe wast een groot messchief van den wedere van dundere ende blixeme an den tor van den Jacopinen, ende ooc in de kercke; den almachtegen God wilder voord hemlieder, ende elken kerstenen mensche of beschermen. Amen.
| |
[1479-4-14]
Item up den 14sten dach van April, anno 79, werd temmerwerc of ghedaen, van voor dschepenhuus, ende de schilderye van hertoghe Jan en van hertoghe Phylips vuldaen ende eerst ghetoocht.
Item up den zelfden dach van april 79, doe quamen ons prinche Maximilyaen ende Marie, ons princesse, zyne ghezelnede, beede te samen ter Cruuspoorten in met 460 peerden, ende achter huer 12 witte aggeneyen met gouden rood ghetuge, ende vier hanghende vergoude waghenen, overcleed met rood gouden laken fluweel, ende elken waghen vul dienstvrauwen.
| |
[1479-4-25]
Item up den 25sten dach van April, anno 79, doe quamen in die van Rysele, om huer vespereye te doene ende onzen
| |
| |
harden gheduchten heere ende prinche Maximilyan reed hemleden tjeghen, van huut zynen hove, toot in den Vlieghenden Hert ende quamen met hemleden toot in de bane, te zamen ende deen metten andre, met 800 peerden, ende met meneghen fresschen edelman.
Item up den zelven dach naer der noene, doe dede onzen zelven heere ende prinche vespereye met onzen poorters van de stede van Brugghe, ende quamen in de bane costelic ende chierlic met 400 peerden.
| |
[1479-4-28]
Item up den 28sten dach van April, anno 79, doe quam ons princesse naer der noene, ten vier hueren ter steeicbane met 50 peerden ende twaelf witte aggeneyen, ende elcken behanghen met gouden ghetughe van rood fluweel, gouden lakene, ende vier vergoude hanghende waghenen, becleed met gouden lakene rood fluweel; ende met huer quamen den jonghen hertoghe van Gelderen, den Grave van Saeimpool ende den Grave van Bocheem onder hem allen, ende deen metten anderen, met 500 peerden ende 64.
Item up den 28sten dach van April, anno 79, doe quam ons harde geduchten heere ende prinche Maximilyaen te clocke ses, naer den noene, ter voorseyde steeicbane, al ghewapent, met zes trompetten ende vier claroenen, ende met zes heerauden, ende vijftig mannen, elc anhebbende eenen gouden journeye, te peerde ende te voet, ende zijn peerd overdect tooter heerde, ooc met goude lakene, ende quamen alzo in de voorzeyde steeicbane met 500 peerden ende met meneghen fresschen edelen man.
Item hy aldaer in de voorzeyde steeicbane zijnde, hy zond zyne heerauden, toot die van Rijssele, in den Vlyeghenden Herd, dewelcke die van Rijssele quamen metten voorzeyden heerauden ter voorseyde steeicbane, dewelcke die daer, van onzen prinche minlic ende vriendelic ontfanghen waren.
| |
| |
| |
[1479-4-29]
Item up den 29sten dach van April, anno 79, doe was groot messchief van brande, an den voet van den Kuenicxbrugghe, toot Willem de Fevere, ende eenen daer binnen wonende die hiet Luuc de Brouckere, ende hadde ghetraud de dochter van Karstyaen Plaet, van waer dat 'tgrote messchief quam van dien brande, ende hy verbarrende zo in den voorseyden brand, als dat hy starf, ende in barne stond, tweeden dach van Meye. God hebbe zyne ziele ende alle zielen. Amen.
| |
[1479-5-2]
Item up den 2den dach van Meye, anno 79, doe trac ons princesse, naer der noene, ten vier hueren, met hueren state, ten clooster van den Sartruezinnen.
| |
[1479-5-6]
Item up den 6den dach van Meye, anno 79, doe was groot messchief te Brugghe, in Sint Jacopkercke van den weerd in de Speere, in de Graeuwerstrate, om dat hy eenen priester van der voorzeyde kercke slouch, met eenen zweerde in zijn ooft, ende dat ter cauze, van de meshuuzinghe van zynen wive, ende van den voorseyden priester.
| |
[1479-5-8]
Item up den 8sten dach van Meye, anno 79, doe reed ons harde gheduchten heere ende prinche ende ons princesse, zyne ghezelnede, ende den jonghen hertoghe van Gelderen reeden ter Cruuspoorten huut, ter Sluuse waerd, ende quamen binden zelven havende weder te Brugge, vroylic ende blyde, met 300 peerden. Gode lof ende danc.
| |
[1479-5-9]
Item up den 9den dach van Meye, anno 79, doe was gheschoten den papegay van den houden boghe, by onzen harden gheduchten heere ende prinche, den heere van den Gruuthuuze ende den grave van Assauwe, ende mynen heere Jacop Van Gistele, mijnheere van Dutzeele, ende meer ander edele heeren, ende onzen harden gheduchten heere ende prinche, worde daer kuenync van den voorzeyde boghe. God almachtich zy ghebenedijt van al zijnder gra- | |
| |
cien, die hy ons verleend heeft, ende noch voord verleenen zal.
| |
[1479-5-16]
Item up den 16den dach van Meye, anno 79, doe was den tempel Gods, de kercke van mynen heere Sint Jacop ghewyet ende ghebenedijt, by minen heere den busschop van Doornicke. Gode lof en danc.
| |
[1479-5-17]
Item den 17den dach van Meye, anno 79, doe was te Brugghe ghedreghen processie generael ter Magdaleene buuten Brugghe, ende daer was mede ghedreghen tsoete, weerde, helich, ghebenedyde, bloedt, met groter weerdichhede ende reverencie, met acht barnende toordsen, ende twaelf barnende toordsen, elc metter stede wapenen, ende daer ginghen mede, drye mannen, in vorme van amende, elc met een barnende toordse in zijn hand, de twee ghecleed ende de derde in zijn lynwaed.
Item up den selven dach, heer dat de voorseyde processyen huut ghynghen, zo was in den burch onthooft eenen geheeten Hannekin de Backere, ende hy was van Gend, ende hy was te Ghend ballinc vijftig jaer, maer den heere gaf hem tkercof.
Item der cause van de voorseyde heleger processye zo ghyngen alle de priesters, roededragers ende alle de schoolkindren ghyngen in de voorseyde processye bervoed, ende elc met eenen barnende keersse in de hand, ende ooc den busschop van Doornicke God almachtich biddende, om zyne zoete, ghebenedyde gracie, dat ons harde gheduchte heere ende prinche den hertoghe ter zalegher ghedachten, zyne vianden zoude mueghen wederstaen ende tland van Vlaenderen, ende ooc voort alle zyne lande zouden mueghen houden in heeren ende in payse, dies ic Gode bidde, dat alzo moet geschien. Amen.
| |
[1479-5-25]
Item up den 25sten dach van Meye, anno 79, doe vertrac
| |
| |
ons harden gheduchten heere ende prinche, ter Smedepoorte huut om te treckene op zyne vianden, met hondert ende tachentig peerden.
| |
[1479-5-26]
Item up den 26sten dach van Meye, anno 79, doe vertrac ons princesse ooc ter Smedepoorte huut met twaelf witte aggeneyen, ende elke behangen met goude ghetuughen ende met dry hanghenden vergouden waghenen overdect met rood gouden lakenen ende met hondert ende 80 peerden.
| |
[1479-6-7]
Item up den 7den dach van Wedemaent, anno 79, doe was te Brugghe ghehouden ende ghedreghen processye generael, ten clooster van den Eechout, ende daer waren ghebrocht met grooter heeren weerdichede ende reverencien, drye ryven; Sinte Loy, Sinte Bonifacius en Sinte Bazelis, ende in de voorseyde processye gync een man barvoed met een toordse, van twee ponden al barnende, in zijn lynwaed, metten blooten oofde, in voorme van amende.
| |
[1479-7-11]
Item up den 11sten dach van Hoymaend, anno 79, doe waren ghehouden ende ghedregen processyen generael, tot Onzer Liever Vrouwen.
| |
[1479-7-23]
Item up den 23sten dach van Hoymaend, anno 79, doe vertrac minen heere Van Merwe, als capitein van der stede van Brugghe, ende den jonghen Jan van Nyewenhoove, als burchmeester met twee schepenen, twee raden ende eenen clarc, ende met 50 peerden, ten heerewaerd.
Item up den 23sten dach in de zelve maend, anno 79, doe verdranc eenen man, by de Cruuspoorte, ende hy was eenen vry keersgieter ende eenen katoenslagher ende hy hiet Ooste; hem was ghedaen alzo hem toebehoord, dat hy was ghehangen by zynen halze an een spriet. God ontferme zyne ziele; offer God bede vooren begeerd. Amen.
| |
[1479-7-24]
Item up den 24sten dach van Hoymaend, anno 79, doe
| |
| |
quam ons princesse van Duunkerke, ter Smedepoorte in, met haren ghemeenen state.
| |
[1479-7-27]
Item up den 27sten dach van Hoymaend, anno 79, doe waeren ghehouden ende ghedregen processyen generael ende daer was mede omme ghedregen den weerdeghen fierter van Sinte Donaes, ende daer ginc mede ons princesse ende minen heere van den Gruuthuuze hy huer leedende, in zynen haren, ende den jonghen hertoghe van Gelderen ghync voor huer, ende huer dienstvrauwen achter huer, ende elc met eender barnende keersse in handen. Men dede den dienst t'St Donaes.
| |
[1479-7-28]
Item up den 28sten dach van Hoymaend, anno 79, doe quam ons princesse ten Heleghen Bloede, met dry hanghenden vergouden waghenen, overcleed met rood goud fluweelen lakene, ende met veertien dienstvrauwen, ende met mynen heere Vanden Gruuthuuse, ende met den jonghen hertoghe van Gelderen.
| |
[1479-7-29]
Item up den 29sten dach van Hooymaend, anno 79, doe was ons princesse ten clooster van de Colletten, by sinte Katelinepoorte, met haren houder voorseyden state ende heeren.
| |
[1479-7-30]
Item up den 30sten dach van Hooymaend, anno 79, doe was ons princesse ten clooster van den Observanten buuten der Ezelpoorte, metten heere ende metten voorzeyden state ghecostumeerd van houden tyden.
| |
[1479-7-31]
Item up den 31sten dach van Hoymaend, anno 79, doe was ons princesse ten clooster van de Freminueren, met hueren zelven voorseyden state, ende met hueren voorseyden heer.
| |
[1479-8-1]
Item up den 1sten dach van Oust, anno 79, doe was ons princesse ten tempel van sente Salvator, met hueren voorseyden heeren ende state.
| |
| |
| |
[1479-8-2]
Item up den tweeden dach van Oust, anno 79, doe waren gehouden ende ghedreghen processyen generael t'Onzer Liever Vrauwekercke, ende daer was mede ghedregen tweerde, helich, ghebenedyde, glorieuze sacramend, ende ons princesse ginc daer mede, ende mynen heere van den Gruuthuuze ende den jongen hertoghe van Geldere, ende veele andere edele heeren ende elken bervoed, ende eene barnende keerse in de hand, ende int wederkeeren, commende ter Steenstrate neder, daer stond, op den merct ghemaect, voor de Halle, een trezoor overdect met gouden lakene, ende daer was op ghestelt ende ghedaen rusten, tsoete, weerdich, helich, ghebenedyde sacramend, ende daer worde God almachtig ende Maria ghebenedijt geanebeed met devoter bedynge ende met schonen loven. Ons princesse ende alle de hedele heeren, ende ooc de heeren van de wet, vielen alle over haer knyen, ende anbeden dat soete, weerdich, helich, ghebenedyde Sacramend om zyne zoete, ghebenedyde gracye.
| |
[1479-8-3]
Item up den 3den dach van Oust, anno 79, doe viel den cnape te Francoys huuter burch int Cruyskin, ende die hiet Claeys, ende hy viel in den brauketel, waer of dat hy quam van levende live ter doot. God ontfermt zijn ziele. Amen.
| |
[1479-8-8]
Item up den 8sten dach van Oust, anno 79, doe quam ons princesse toot sente Donaes te vespertyden met hueren state, ende daer waeren alle de heeren ende alle officiers, de heere ende de wet, oofdmannen ende dekenen ende de gheheele college van de kerke, ende die zongen daer Te Deum Laudamus metten vullen koore, ende alle over huer knyen voor Onzer Liever Vrouwe, ende metter lude ende beyaerde metter vullen gheluude, zoo als daer toe diend.
| |
[1479-8-9]
Item up den 9sten dach van Oust, anno 79, doe waren ghehouden ende ghedreghen processyen generael, ende tzoete,
| |
| |
weerde, ghebenedyde, helich bloed der mede, te sinte Salvatorkerke, ende ons princesse gync doe mede ende int wederkeeren commende huuter Steenstrate op de merct, doe keerden alle de voorzeyde processyen omme ter luchter hand ende gyngen alzo rondomme de merct toot voor de Halle; daer stond een trezoor, ghedect met goude lakene toot op dheerde, ende daer was op ghesteld ende ghedaen rusten, tsoete, weerdich, helich, gebenedyde Bloedt, ende alle de crucen van der voorzeyde processye, waren daer rondomme ghesteld ende twee zelvere vergoude candelaers, elc met eender barnende keersse, ghestelt op tvoorseyde tresoor, ende twee zelveren wyeroocvaten, alzo daer toe behoord; voord, ende alle tvolc geestelic ende weerdelic, dat viel over zyne knyen, ende ooc ons princesse, ende al haren state, ende daer was ghesongen tlof ter heeren van God ende van Maria, ende van den weerden helegen, ghebenedyden Bloede, also daer toe behoord, ende ons princesse ende al haren staet, ende al de priesters ende clercken geestelic ende weerdelic ghynghen alle bervoed ende metten bloten oofde ende elc een barnende keersse in zijn hand, ende ooc den heere ende de wet, officyers, hoofdmannen ende dekenen, ende elc deken met zynen heede; ende op den dach voor den dach dat dit gheschiede, dat was op den achtsten dach doe waren te Brugghe ghemaect vueren up de straten in teeken van blyschepen ende victorye up onzer vianden. God brynct alten besten. Amen.
| |
[1479-8-10]
Item up den 10den dach van Oust, anno 79, doe verdranc eenen man by der Speypoorte ende was een leywerkere. God hebbe zyne ziele. Amen.
| |
[1479-8-14]
Item up dem 14den dach van Oust, anno 79, doe vertrac ons princesse t'Ypere, ende zoe rustede snavends te Touroud.
| |
| |
| |
[1479-9-1]
Item up den 1sten dach van September, anno 79, doe waren twee Duutschen dood ghesteken, den eenen up den houc van de Vlamyncstrate ende danderen voor de Coushalle. God wil de zielen ghedyncken.
| |
[1479-9-2]
Item up den 2den dach van September, anno 79, doe quam ons harde gheduchten heere ende prinche van der stede van Gend, in de stede van Brugghe, ende ooc ons princesse, zyne ghezelnede, ende elc met hueren state, honder al, ende deen metten andren, met 600 peerden.
| |
[1479-9-7]
Item up den 7sten dach van September, anno 79, doe was eenen man dood ghesteken, up den houc van den Garnaerdstraetkene. God hebbe zyn ziele, ende alle zielen!
| |
[1479-9-10]
Item up den 10den dach van September, anno 79, doe vertrac ons harde gheduchten heere ende prinche van der stede van Brugghe, toot Ooscamp, ende ons princesse der mede, met hueren state, ende deen metten andren met 500 peerden, ende op den elfsten dach, doe vertrac hy van daer toot zijnder wapenynghe, met 400 peerden, ende up den zelven dach doe quam ons princesse weder binder stede van Brugghe.
| |
[1479-9-22]
Item up den 22sten dach van September, anno 79, doe was groot messchief van brande, int Wildeken, de brauwerye, op den houc van de Roodstrate.
| |
[1479-9-29]
Item up den 29sten dach van September, anno 79, doe was groot messchief van brande, in de Heechoudstrate.
| |
[1479-10-2]
Item up den 2den dach van October, anno 79, doe was of gedaen de stellynge van voor der stedenhuuse, ter cauze van de schilderye van de groetenesse van Maria, de voorzeyde stellinghe ghestond dry en twintich weken.
| |
[1479-10-5]
Item up den 5den dach van October, anno 79, doe was buuten de Bouveryepoorte gheprouft een serpentinne.
| |
[1479-10-7]
Item up den 7den dach van October, anno 79, doe zo
| |
| |
was groot messchief van brande, beneden Sint Jansbrugghe, op den houc van der straten tieghen over dbrune Cruce, ende van dien zelven brande, zo worde onsteken tschoemakershuus beneden de Kuenincxbrugghe, naest den Roozenhoed.
| |
[1479-10-11]
Item up den elfsten dach van October, anno 79, doe waren gehouden ende ghedregen processyen generael toot Sinte Salvator, ende daer was mede ghedregen St. Bazelis, die rustend es t'Sinte Donaes, ende ooc Sinte Bonifacius, die rustend es t'Onzer Lieve Vrouwe. God almachtich theeren!
| |
[1479-10-17]
Item up den 17den dach van October, anno 79, naer der noene, ten vier hueren, doe was ingebrocht den standaerd van Brugghe, by Jan Van Nyeuwenhoove, de jonghe; hy gaffene ende prezenteerdene den heere ende de wet, voor der Stedehuus, in den Burch.
| |
[1479-10-31]
Item up den laesten dach van October, anno 79, doe was te Brugghe een ghebod ghedaen ter halle huut, dat alle die saud wilden winnen, datse hem zouden commen doen bescryven, op 6. groten sdaechs, ende mynen heere van Romond, zoude zijn als capiteyn. Item den zelven heere, trac huut, up den zelven dach met mynen heere Heyndric Haerlefijn.
| |
[1479-11-3]
Item up den 3den dach van November, anno 79, doe was eenen man dood ghesteken, voor de Munte, in de Vlamyncstrate, ende was eenen wapenmaker, ende hiet Herman. God wil zyne ziel ontfermen ende alle zielen. Amen.
| |
[1479-11-8]
Item up den 8sten dach van November, anno 79, doe verdronc eenen kaerdemakere, ende hiet Jan de Visschere, ende was ghevischt up den tienden dach. God hebbe zyne ziel. Amen.
Item up den achtsten dach van November, anno 79, doe was een ghevoert ter Cruuspoort huut ende daer buuten gherecht metten viere, ende was verwezen, van den
| |
| |
mannen van den burch, ende hy hadde ghezijn eenen coc van de Sartruezen. God hebbe zyne ziele. Amen.
| |
[1479-11-28]
Item up den 28sten dach van November, anno 79, doe was dood ghesteken, in Sint Janstrate, recht voor de vijf hande, de zuene in de Paeu, in de Vlamyncstrate. God ontferme zyne ziele, ende alle zielen. Amen.
| |
[1479-12-1]
Item up den 1sten dach van December, anno 79, doe waren ghehouden ende ghedregen processyen general toot Sinte Salvator. God lof ende danc.
| |
[1479-12-12]
Item up den 12sten dach van December, anno 79, doe was groot messchief van brande in de Langhe Strate, tieghen over de Vulder Strate, ende thuus behoorde toe Jan Maes, den bierpackere.
| |
[1479-12-30]
Item up den 30sten dach van December, anno 79, doe dranc hem eenen man dood in de Roskam, ende hy was te Brugghe een blaeuverwere, ende hy hiet Roeland van Wommen. God ontfermt zyne ziel. Amen.
| |
[1479-12-31]
Item up den 31sten dach van December, doe quam onzen heere ende prinche Maximilyan van zijnder goeder stede van Gend, binder goeder stede van Brugghe, ende quam met edele ende honedele, met dry hondert peerden ende zestig.
Tjaer van 79 dat is huut.
|
|
Auteursrechtvrij