|
| |
[1478]
[1478-2-11]
Item up den elfsten dach van Sporkele anno 78, doe trocken te Brugghe huut 100 kalueniers by den jonghen Jan van Nyeuwenhove als capiteyn, ende op den zelven dach so starf eenen pijnder an de Craenebrugghe zeer aestelicken zonder biechte of kennesse. God hebbe zyne ziele ende alle zielen. Amen. Ende God wild ons of beschermen. Amen.
| |
| |
| |
[1478-2-27]
Item int jaer 78, den 27sten dach in Sporkele, zoo quam ons harden geduchten heere ende prinche Maximilyaen bin zijnder goeder stede van Gent.
| |
[1478-5-16]
Item den 16den dach van Meye, anno 78, doe vermoorde Joos Houreyne zijn natuerlic kind, ende het was eenen vry backer van Brugghe, ende hy woende, als doe ten tyden, alder naest Cambroen, op de Reye, by de Olybrugghe.
| |
[1478-4-20]
Item up den 20sten dach van April anno 78, doe quam den grave van Sainpool, mynen heere Van Bryane, ter Cruuspoorte in met ses hondert ende een alf ghewapend volc, twee en twee in processyen, ende reden alzo ter Smedepoorten huut.
| |
[1478-4-21]
Item up den 21sten dach van April anno 78, doe quam ons harde gheduchte heere ende princhesse ter Cruuspoorte in met hondert ende tachentig peerden, zoe zittende in een oorsbaer overcleed met zwarten fluweele, ende achter heur tien caemberyeren, ende elc op een witte aggeneye met gouden gethuughen, ende daernaer volghende vier hanghende waghenen overcleed met gouden lakene, rood fluweel, ende elcken waghen vul dienende vrauwen.
| |
[1478-4-24]
Item up den 24sten dach van april, anno 78, doe quam ons harde gheduchten heere ende prinche Maximilyaen ter Cruuspoorten in met 388 peerden.
| |
[1478-4-30]
Item up den laetsten dach van April anno 78, doe nam an ons harde gheduchten heere ende prinche Maximilyaen toysiong, ende up den zelven dach quam een peerd ghecleed met zwarten fluweele toten voeten huut ende daer up ghebonden eenen vergouden zadel ende up zadel een groot zwart fluweele cussen, ende daer up liggende tgouden vlyes. Ende alzo commende huut tsprinchenhooven voorby Dbeerkin duer Dhoendermerct lancx der Steenstrate, toot Sinte Salvatorkerke met 8 heerauden in zwarten ghecleed ende
| |
| |
overslooft, ende elc den wapenroc daerboven, met 60 peerden, ende up elc, eenen edelman van wapenen, ende al ghecleed met zwarten.
Item bin dry hueren, daer naer, zo quam ons harden geduchten heere ende prinche Maximilyan weder omme den zelven wech sittende op tselve peerd voorseit, anhebbende eenen witten gouden keerel lanc toten voeten huut, anhebbende tvoorseyden gouden vlies, ende acht herauden ende met hondert ende 64 peerden zonder alle dhedelen.
| |
[1478-5-2]
Item up den tweeden dach van Meye, anno 78, doe vertrac ons harde geduchten heere ende prinche huut der stede van Brugghe, gewapend int vul harnachs met 500 peerden toot zijnder goede stede van Gend om te wederstaen zijn vianden.
| |
[1478-5-22]
Item up den 22sten dach van Meye, anno 78, doe vertrac hyer huut Brugghe vijf honderd ende 74 mannen ter oorloghewaerd naer Dixmuuden ende van daer tot Ypre toot mijnheere Van den Gruuthuuze als capiteyn.
| |
[1478-6-22]
Item den 22 dach van Wedemaend, anno 78, doe ghelach ons princesse van eenen schoonen jonghen zuene; God zy ghelooft, gedanct, gheheerd ende ghebenedijt als van dien. Amen.
Item up den zelven dach, anno 78, doe was een ghebod ghedaen ter halle huut, by mijnheer Van den Gruuthuuze, ende Maertin Lem, als burchmeester, ende gheboden feeste ende vieren te makene, ende stroyden daer goud ende zilver, ter hallen huut; ende in den burch stond doe ten tyden een schavoot, ende hadde daer langhen tijt ghestaen, ende worde doe gebroken, ende wech ghedaen.
| |
[1478-6-29]
Item up den 29sten dach van Wedemaend, anno 78, doe zo was onzen harden gheduchten heere, ende prinche kerstin ghedaen, toot sinte Donaes met grooter tryonphen, heere, ende weerdicheden, God lof ende dank, ende hy was ghe- | |
| |
naemt Philippus, ende men stroyde geld, van sinte Donaeskercke tooten hove, ende der was ghemact eene stellinghe van houte, knye ooghe, daer de heeren op ghyngen, van sinte Donaeskercke toten hove toe.
| |
[1478-6-18]
Item den 18den dach van Wedemaend, anno 78, doe quam ons volc van wapenen thuus, huuter oorloghen, metten hopenen standaerde, ende was ter hallen huut gheroupen bestand 40 dagen tusschen den hertoghe van Oostenryke ende den franschen kuenync.
| |
[1478-8-2]
Item den tweeden dach van Oust, anno 78, doe quam ons harden geduchten heere ende prinche huuter voorseyden orloghe, van der stede van Rysele, binnen zijnder stede van Brugghe met 360 peerden. Gode lof ende danc!
| |
[1478-8-4]
Item den 4den dach van Oust, anno 78, doe trach ons harde gheduchten heere, ende prinche Maximilyan den hertoghe van Oostenricke, ende ons princesse, zyne ghezelnede, beede t'Ardenburg met 260 peerden, ende quamen binden havende weder thuus.
Item up den 4den dach van Oust, anno 78, doe hilden de Spaengiaerden feeste ende grooten tryonphe in de Langhe Wynckele, van den nyeuwen kuenync, die hem lieden gheboren was, in huerleden land.
Item up den zelven dach, anno 78, doe quam in ter Cruuspoorte, den cardinael van Rome, ende hy quam van Gent, met 400 peerden.
| |
[1478-8-11]
Item up den 11sten dach van Oust, anno 78, doe reed ons harden geduchten heere ende prinche ende ons princesse, zyne ghezelnede, ter Cruuspoorte huut, met vijf hondert ende 64 peerden, ende men stac buten op tveld, met ghecroonden speeren. Dat ghedaen zijnde, ons prinche quam weder omme in de stede, ende ons princesse reed van daer spelen ter Sluus, ende ze quam weder thuus binden zelven
| |
| |
daghe snavens ten tien hueren, met 300 peerden en drye trompetten, al slaende vrolic ende blyde, ende het reynde up dien tijd zeere wel.
| |
[1478-8-13]
Item up den 13den dach van Oust, anno 78, doe reed ons princesse ter Cruuspoorten huut tot sinte Maertijn t'Syseele, met twalf witte aggeneyen, overcleed met gouden ghetuughen, ende met 100 andre peerden, ende min heere van Ravensteyn der mede.
| |
[1478-8-16]
Item up den 16sten dach van Oust, anno 78, doe was ghewyet den temple van sinte Willem, by de Gendpoorte, ende ons harden gheduchten heere ende prinche ende ons princesse, zijn ghezelnede, quamen daer ooc beede met zeere schoonen state te peerde ende ooc te voed, ende met meneghen fresschen hedelman. God lof ende danc.
| |
[1478-8-17]
Item den seventiensten dach van Oust, anno 78, doe vertrac ons harde gheduchten heere ende prinche, ter Cruuspoorten huut tot bachten sinte Cruuskerke; daer stac hy met ghewapende hand, ende met gheeroonde speeren; daer was hy of ghesteken, dat hy viel op dheerde; van daer reed hy ter Sluus.
Item up den zelven dach, anno 78, te clocke vier naer den noene, doe reed ons princesse naer heere van Ravensteyn, 't kind van Gelderen, ende nu heere van den Gruuthuuse ende reed also in zeeren schoonen state hem te ghemoet, onzen harden geduchten heer ende prinche, ende int wederkeeren doe worde daer weder ghesteken up de zelve plecke, van ander heeren snavens met toordsen en alzo quamenze in, alle ghezaemderhand, processiewijs, met 564 peerden, met groter blyschepen. God lof ende danc.
| |
[1478-8-26]
Item op den 26sten dach van Oust, doe vertrac ons harde gheduchten heere ende prinche, ende ons princesse, zyne ghezelnede, ter Gendpoorten huut, ende zoe hadde eenen
| |
| |
sparwere op huer hand, ende reeden beede alzo ghezaemderhand toot harer goeder stede van Gend met 600 peerden ende 84, anno 78.
| |
[1478-8-19]
Item up den 19sten dach van Oust, anno 78, doe was ghevoert den jonghen Phylips ter Cruuspoorten huut, toot zijnder goeder stede van Gend met groter blyschepe ende ghezondichede ende met 700 ende 73 peerden.
| |
[1478-10-9]
Item up 9sten dach in October, anno 78, doe verscheed Fransoys wijf, int Cruusken, van dezer weereld zeere deerlicken, verdrietelec ende conpasselicken.
| |
[1478-12-9]
Item up den 9sten dach in Decembre, anno 78, doe was de fyguere van den hertogh Phylips up ghesteld ant schepenhuuse, ende hy hendede ende verschiet van dezer wereld in zynen persoon anno 67, den 16den dach van Wedemaend.
Item up den 9sten dach in Decembre, anno 78, doe waren dry jonghe schoone ghezellen in den burch ontooft. God hebbe de zielen. Amen.
| |
[1478-12-19]
Item up den 19sten dach in Decembre, anno 78 doe was te Brugghe ter halle huut gheroupen bestande tusschen onzen harden geduchten heere ende prinche Maximilyan met zynen lande van Vlaenderen ende de stede van Doornycke.
Item tjaer van 78 dat es huut.
|
|
Auteursrechtvrij