Het boeck van al 't gene datter geschiedt is binnen Brugghe

[p. 1]

Kronyk der stad Brugge,
tydens het bestuer van Maximiliaen. (1477-1491.)

[1477]

Dit naervolghende es al 'tgheund dat geschied es binder stede van Brugghe, sichtent tjaer ons Heeren 1477, den 14^sten dach van Sporkele.

[1477-2-14]

Item up den 14^sten dach van Sporkele anno 77, doe trac tghemeente van de stede van Brugge elc up huerlieden huuzen.

[1477-4-10]

Item den tiensten dach van April anno 77, doe quamen zy ter merct met hopenen standaerden, bannieren ende pingioenen, ende den seventhienden dach van April doe zo ghingenze weder of.

[1477-4-18]

Item den 18^sten dach van April anno 77, doe bezwoer Marie, ons princesse, dochter van den hertoghe Kaerle ter zalegher ghedachte, de stede van Brugghe, boven up der schepenenhuis; God wil hueren ziele ghedyncken ende alle zielen. Amen.

[p. 2]

[1477-5-16]

Item den 16^sten dach van Meye anno 77, doe quam tvoorseyde ghemeente van de voorseyde stede in de voorzeide voorme ende manieren weder op de voorseyde merct, ende up dien zelven nachte, zo was op de voorseyde merct een schavoot ghemaeckt ende sdaechs daer naer was Jan Barbezaen ontooft. God hebbe zijn ziele, ende alle zielen. Amen.

[1477-5-20]

Item den 20^sten dach van Meye anno 77, doe trocken die van Brugghe huut op den franschen coninc ende sloughen neder bachter der Magdaleene, ende up den 22^sten dach doe trockenze voord ende sloughen voor de stede van Doornicke.

[1477-7-28]

Item up den 28^sten dach van Hoymaend anno 77, doe was versleghen voor Doornicke den hertoghe van Gelderen, den vader van desen jonghen hertoghe. God hebbe zyne ziele, ende alle zielen. Amen.

[1477-8-18]

Item den 18^sten dach van Oust anno 77, doe was ons prinche Maximilyaen ontfanghen te Gent.

[1477-8-19]

Item den 19^sten dach van Oust, anno 77, doe traude Marye ons princesse, ons herfachteghe dochter van den hertoghe Kaerle ter zalegher ghedachte.

[1477-8-28]

Item den 28^sten dach van Oust, anno 77, doe quam onzen harden gheduchten heere ende prinche Maximilyaen, ende onse gheduchteghe princesse, zyne wettelecke ghezelnede, van haerlider goeder stede van Gent binnen goeder stede van Brugghe, met zes hanghende vergouden waghenen met twaelf witte aggenyen, alle met gouden zadelen ende met gouden ghetugen, en op elcken een dienende vrouwe, te zamen deen metten andren met 900 peerden ende tsestig.

[1477-8-19]

Item up den 19^sten dach van Oust, anno 77, doe dede Maximilyaen zinen heed, ende bezwoer de stede van Brugge.

[1477-9-25]

Item up den 25^sten dach van September, anno 77, doe

[p. 3]

troc ons harde gheduchten heere ende prinche Maximilyaen ende ons princesse, zyne ghezelnede, t'Ardenburch, met zeeren schoonen state, ende van daer ter Sluus, ende tsanderdaegs, quamenze beede weder te Brugghe.

[1477-10-15]

Item up den 15^sten dach in october, anno 77, doe troc ons harden gheduchten heere ende prinche Maximilyaen t'Yper, ende op den zelven dach ons princesse zijn ghezelnede te Holland waerd, ende elc byzonderlynghe, met zeere schoonen state.

[1477-11-27]

Item up den 27^sten dach van November, doe ghesciede anno 77, van den mandemaker ande Snackersbrugge; hi quam daer gaende, met eenen cordewaghen, hy sturtede daer mede ende versmoorde daer in zijn zonden, daer ons God of beschermen wil. Amen.

[1477-12-1]

Item up den eersten dach van Decembre, doe was te Brugghe up de merct, anno 77, vercocht eenen francoys, ende dat dede eenen Francoys Drabbe.

[1477-12-17]

Item den 17^den dach van Decembre, doe was den standaerd van Brugghe ontfanghen ende inghebrocht bi minen heere van Merwe.

[1477-11-29]

Item up den 29^sten dach van Novembre, anno 77, doe deden an heur roode journeyen gheborduerd metten tunekins, ende was ghedaen in de Langewynckel, in den Noble, en daer wasser ghehoordeneerd zes en dertig.

't Jaer van 77 dit es huut,