Den Bloem-hof van de Nederlantsche Jeught beplant met uijtgelesene Elegien, Sonnetten, Epithalamien, en gesangen etc


Nieu Liedt: Op de wyse, Rijck Godt vvie sal ick claghen. GHy die de cracht der minnen In vroomheyt onderstaet Met wel bedacht versinnen (Eer u den donder slaet)
[pagina 35]
Wt alderliefd' en heuscheyt Van Bibli geyle maecht, Maer Thisbes amoureuscheyt Met Piramo beiaecht. Ghedraghen van een moeder End van een Vader bey Socht Biblis aen haer broeder Der minnen soet gheley Haer openbare blintheyt Tuycht al de werelt wijt Daer Pirami ghesintheyt Heel Thisben reyn verblijt. Te voeren met couragy Vant jeughdich leven soet, Malcander in boscagy Zy gingen bey te moet, Daer Piramus de cleeden Sach van sijn lief besmet Sijn borst heeft opghesneden End t'swaert daerin gheset. Nu zijnd' alsoo ghestorven Int roode bloet bemorst Heeft Tesbes oock door-korven Haer eyghen witte borst En is ghetrou int lyden Tot lof der minnen groot, Als eertijts int verblyden Met hem (vriendinne) doot. Ghy Princelijcke jeughden Naert' recht der minnen les Op alder eer en deughden Bemint doch u Princes, Want deser liefden godtheyt Ende brenght gheen sorghen in Als Biblis geyle sotheyt Met haer vervloeckte min.