Den blijden-wegh tot Bethleem voor de Christelijcke jonckheyt

vermeerdert met vele nieuwe leysenen, lof-sanghen ende gheestelijcke liedekens

Een ander,

Op de wijse: Alsoo t' beghint,

GOdt Vader o ghenadigh Heer,
V ghenade is soo groot,
Hoort my toch ick bid u seer,
Van vier dinghen heb ick noot,
Gracy, Deught, Kost en Habijt.
Thoont dat ghy mijn Vader zijt.

Alderliefsten Iesu Christe;

Schelt my quijt al mijn misdaet
Dat mijn sotte jonckheyt miste,
Heer dat oock vergheten laet:
Doet my naermaels gheen verwijt
Thoont dat ghy mijn Broeder zijt.

Heylich Gheest, o wijs berader,

Wijst een onberadich kindt:
O schoon licht comt my toch naerder,
Doet my sien, want ick ben blindt:
Leert my kennen 's vyandts strijdt,
Thoont dat ghy mijn Meester zijt.