Den blijden-wegh tot Bethleem voor de Christelijcke jonckheyt

vermeerdert met vele nieuwe leysenen, lof-sanghen ende gheestelijcke liedekens

[p. 125]

Nieuw Liedeken,

Op de vvijse: Al hebben de Princen haren wensch (Oft) Pastorelle (oft) Het was een Herder vroegh-op-ghestaen.

Iesu, mijn Al, en mijnen Een,
Die ick bemin, en anders gheen:
Daer ick op stel mijn hert en sin:
Om dat ick't in u alle vin'.

Soete springh ader vande vreught,

Die my alleen innich verheught:
Die sonder sangh oft snaer ghetier
Mijn ziele stelt in vol playsier.

Ben ick in sieckte of in pijn;

Iesus is troost en medecijn:
Hy maeckt een suyver minne-wont;
Waer door mijn ziele wordt ghesont.

Praemt my den dorst, of hongers noot

Iesus is dranck en Hemels broot.
Een broot, dat niet en wordt verteert;
Maer dat den mensch in Godt verkeert.

Wat isser, daer mijn ziel af-claeght,

Als sy maer Iesum by haer draeght?
Den besten pant, den rijckxsten schadt,
Die oyt een Prins des werelts hadt.

Geen gelt, geen gaut, geen Coninck-rijck

Can by mijn Liefste sijn ghelijck:
Gheen dranck, gheen spijs, gheen soeticheyt
By Iesus teghenwoordicheyt.

[p. 126]

 

Iesu, of ick in u soo stondt,

 

Dat ick hier noyt gheen vreught en vondt?

 

Maer bleef en leefde t' aller ijt

 

In u, die't levens leven zijt.

 

Ick wensche, dat al mijn verstant

 

In u mach wesen vast gheplant:

 

Soo dat ick niet en ken noch leer,

 

Als Iesum, daer ick mee' verkeer.

 

Ick wil mijn wille gans gaen uyt,

 

Dat ghy die in u wille sluyt:

 

Dat ghy mijn lust en sinnen stilt,

 

En breeckt den wil, die anders wilt.

 

Als ick dan Iesu soo aencleef,

 

Heb ick een leven, daer ick leef;

 

Een waerheydt, daer ick vast in staen;

 

Den wegh, waer door ick recht mach gaen.