Den blijden-wegh tot Bethleem voor de Christelijcke jonckheyt

vermeerdert met vele nieuwe leysenen, lof-sanghen ende gheestelijcke liedekens

Een ander.

Op de wijse: Alsoo 't beghint.

HEden is ons een kindeken gheboren
Wt verkoren
Van Maria Maghet seer bequaem
En waer hy niet gheboren
Wy waren al verloren
Iesus is sijnen naem.

Gloria in excelsis schoone

Wt den throone
Songhen d' Enghelkens met groot jolijt
Die Herderkens die songhen,
Die lammerkens die spronghen
Vreucht inde werelt wijt.

Op den achtsten dach werdt 't kindeken besneden

In sijn teere leden
Naer die oude wet 'tis openbaer;
Dus wilt hem altijt eeren
En sijnen lof vermeeren
Met desen nieuwen jaer.