Bijdragen en Mededeelingen van het Historisch Genootschap. Deel 14

[p. 89]

De Heerlijkheid van Culemborg verheven tot Graafschap, 21 October 1555.
Medegedeeld door J.H. Hofman.

Wijl de oorkonde, waarin keizer Karel V aan Floris I van Palland bovengemelde gunst bewees, tot heden, zoo ver we weten, nog niet in druk is uitgegeven, meenen we der geschiedenis en oudheidkunde een dienst te doen, als we haar in trouw afschrift hier meêdeelen. Ze luidt als volgt:

Charles, par la divine clemence Empereur des Romains, tousjours Auguste, Roy de Germanie, Castille, de Leon, Grenade, Navarre, d'Arragon, Naples, Secille, Maliorque, Sardaine, des isles Jndes et terre ferme de la mer Oceane, Archiduc d'Austrice, Duc de Bourgoigne, Lotier, Brabant, Limbourg et de Gheldre, Conte de Flandres, d'Arthois, de Bourgoigne, Palatin et de Haynnau, Hollande, Zelande, Ferrette, Hagnau, Namur et de Zutphen, Prince de Zwave, Marquis du Saint Empir, Seigneur de Frise, Salms, Malines, des cite, villes et pays d'Utrecht, d'Overyssel et Groeninghe, et Dominateur en Asie et Africque etc.

Savoir faisons a tous presens et avenir, nous avoir

[p. 90]

receu l'humble supplication de nostre tres chier et feal Florens seigneur de Culembourg, de Pallant, Withem etc. contenant: Comme par le trespas de feu messire Erard, en son vivant seigneur du dict Pallant et Withem luy soient succedés et advenus plusieurs terres et seigneuries, sises tant soubs nous que autres princes et seigneurs, aussi que nostre tres chier et tres amée cousine, dame Elisabeth de Culembourg, dame du dit lieu, sa tante, vefve douaigiere premiers de feu messire Jehan de Luxembourg seigneur de Vile, et en apres de feu messire Anthoine de Lalaing, en son temps conte de Hoochstraten, chevaliers de nostre ordre, luy ait cedé et transporté (: saulf a elle son usufruict sa vie durant:) la proprieté de la dite seigneurie de Culembourg avec ses appertenances et deppendances, ensemble les jurisdictions haulte, moyenne et basse, avec tous les autres droiz, libertés et preëminences y appertenens, la dite seigneurie avec ses appertenances tenue en fief de nous a cause de nos duché de Gheldres, conté de Hollande et seigneurie d'Utrecht; - de sorte que estant le dit seigneur de Culembourg abondamment et souffissamment pourveu de biens pour entretenir trayn et estat honnorable; - il nous a tres humblement requis, que en consideration des longs et leaulx services, que ses ancestres ont faits tant au feu Roy de Castille monseigneur nostre pere, que Dieu absoille, que aussi a nous, il nous plaise eriger la dite terre et seigneurie de Culembourg en conté et sur ce luy faire depecher nos lettres d'octroy pertinentes;

Pour ce est il que nous, les choses susdites considerées et mesmement les services que puis aucunes années ença ledit seigneur de Culembourg a faiz a nostre tres chiere et tres amée seur, la Royne douaigiere d'Hongrie, de Boheme etc., pour nous regente

[p. 91]

et gouvernante en nos pays de pardeça, et ceulx que esperons il fera ci-apres a nostre tres chier et tres amé fils le Roy d'Angeterre, - veullans, pour ces causes et autres a ce nous mouvans, eslever et decorer iceluy seigneur de Culembourg, - avons de nostre certaine science, grace et liberalité, plaine puissance et auctorité souveraine, et du consentement de la dite douaigiere de Hoochstraten, creé et erigé, et par cestes creons et erigeons en conté la dite terre et seigneurie de Culembourg et ses appertenances et appendances, tenues de nous a cause de nos dites duché de Gheldres, conté de Hollande et seigneurie d'Utrecht, pour de la dite erection et creation en conté avec du nom de conte, ensemble des droiz, honneurs, prerogatives, excellences et preeminences, qui a conte appertient, joyr et user par le dite seigneur de Culembourg, ses hoirs, successeurs et aians cause, contes de la dite conté de Culembourg, ainsi par nous erigée et crée, comme dit est, tout ainsi et par la forme et maniere que font et ont accoutumé faire les autres contes de nos pays de pardeça, - et sans aucunement deroguer ou prejudicier au dit seigneur de Culembourg, ses hoirs, successeurs ou aians cause, en temps advenir contes de la dite conté de Culembourg, aux droiz, previleges, jurisdictions, libertés, preheminences et autres quelsconques a luy appertenans a cause de la dite conté de Culembourg, appertenances et appendances d'icelle, dont il et ses predecesseurs ont accoutumé joyr et possesser par ci-devant; bien entendu que par ceste nostre erection de la dite seigneurie de Culembourg en conté n'entendons donner aucune prerogative au prejudice de nos droiz, auctorités et haulteurs, dont nous et nos predecesseurs ont joy en la dite seigneurie, comme ducs de Gheldres, contes de Hollande et seigneurs d'Utrecht, laquelle

[p. 92]

leurs demeurera subjecte tant en relief, serement de fidelité et souveraineté, comme elle a esté jusques a present. Si donnons en mandement par ces dites presentes a nostres chiers et feaulx les chiefs, presidens et gens de nos privé et grand consaulx et des finances, chancellier et gens de nostre conseil en Gheldres, premier conseillier et gens de nostre conseil en Hollande, president et gens de nostre conseil a Utrecht, presidens et gens des comptes en Brabant et Hollande et a tous autres nos justiciers et officiers ou a leurs lieutenans et chaquun d'eulx, sicomme a luy appertiendra, que de la dite erection, nom et droiz de conté dessus dites, ainsi et par la maniere que dit est, ils facent, souffrent et laissent le dite seigneur de Culembourg, ses hoirs, successeurs et aians cause plainement, paisiblement et perpetuellement joyr et user, sans en ce leur faire, mettre ou donner, né souffir estre fait, mis ou donné aucun destourbier ou empeschement en maniere que ce soit au contraire, - lequel si fait, mis ou donné leur avoit esté ou estoit, le reparent et mettent, ou facent reparer et remettre incontinent et sans delay a plaine delivrance et au premier estat et dheu. Car tel est nostre plesir. Nonobstant quelsconques ordonnances, restrinctions, mandemens ou defenses a ce contraires.

Et afin que ce soit chose ferme et estable a tousjours, nous avons signé cestes de nostre main, et a icelles fait mettre nostre grand seel, saulf en autres choses nostre droit et l'autruy en toutes. Donné en nostre ville de Bruxelles le vingteungieme jour d'Octobre l'an de grace mil cinq-cens cinquantecinq, de nostre empire le trentecinquieme et de nos regnes de Castille et autres le quarantieme.

(get.) Charles.

[p. 93]

(Onder de vouw stond:) Erection en conté de la seigneurie de Culembourg.

(Op de vouw stond:) Par l'Empereur et Roy.

(get.) Bave.

Naar het oorspronkelijke perkament, bewaard in het archief van Gelderland, afdeeling Culemborg. 's Keizers zegel, dat aan een koord onder het stuk heeft gehangen, is thans verloren.