Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Hoe dat de Enghel den Duyuel bint, ende hoe de dooden gheoordeelt worden, ende de Boecken op gedaen, ende hoe si inden vierighen poel gheworpen werden, die in dat Boec des leuens niet gheschreuen en zijn.

1

⁺ ENde ick sach eenen Enghel vanden Hemel varen, die hadde den Sluetel tot den Afgront, ende een groote keten in zijn hant.

+ A vers 1

2

^* Ende hy greep den draeck, de oude slanghe, welcke is de duyuel, ende de Satan, ende bandt hem duysent Iaer,

* Iob. 4.b.18. 2.Pet. 2.b.4.

3

Ende wierp hem inden afgront, ende besloot hem, ende beseghelde daer bouen op, dat hy de Heydenen niet meer verleyden en soude, tot dat voleynt werden duysent Iaer. Ende daer nae moet hy los worden een cleyne tijt.

4

^+† Ende ick sach stoelen, ende sy saten daer op, ende haer werdt ghegheuen dat ordeel,^‡ Ende de sielen der ghener, die onthooft waren, om des getuychenis Iesu, ende om des woorts Gods wille,^* ende die niet aengebeden en hadden dat dier, noch zijn beeldt, ende niet ghenomen en hadden zijn merckteeken aen haer voorhooft, ende op haer handt: Dese leefden, ende regeerden met Christo duysent Iaer.

+ B vers 4

† Danie. 7.b.9. Apoc. 4.a.4.

‡ Apoc. 6.b.9.

* Apoc. 13.c.15.

5

Mer de ander dooden en werden niet wederom leuendich, tot dat duysent iaer voleynt werden.^† Dit is de eerste verrijsinghe.

† Roma. 6.a.5. Ephe. 5.b.14 Collos. 2.b.12. 3.a.1.

6

Salich is die, ende heylich, die een deel heeft, aen de eerste verrijsinghe, ouer sulcke en heeft de tweede doot geen macht: Maer si sullen^‡ Priesteren Gods ende Christi zijn, ende met hem regeren duysent Iaer.

‡ 1.Pet. 2.a.5.b.9. Apoca. 1.a.6. 5.b.10.

7

⁺ Ende wanneer duysent Iaer voleynt zijn, so sal de Satanas los worden, wt zijn gheuanckenis,

+ C vers 7

8

Ende sal wtgaen om te verleyden de Heydenen, in de vier hoecken der Aerden: Den^* Gog ende^† Magog, om haer te vergaderen in eenen strijt, der welcker ghetal is, als dat sant aen der See.

* Ezech. 38.a.2.

† Eze. 39.b.6.

9

Ende sy traden op de breetheyt der Aerden, ende omcinghelden den Heyrlegher der Heylighen, ende de beminde Stadt.^‡ Ende dat vier viel van Gode wt den Hemel, ende verteerde haer.

‡ 4.Reg. 1.b.10

10

^† Ende de duyuel, die haer verleyde, wert geworpen inden vierighen poel ende solfer, daer dat dier ende de valsche Propheet was,^* ende sullen ghequelt worden, dach ende nacht, van eewicheyt tot eewicheyt.

† Dani. 7.b.11. Mat. 25.d.42 Apoc. 19.d.20

* Apo. 14.c.10

11

^+† Ende ick sach eenen grooten witten stoel, ende dien, die daer op sat, voor welcx aensicht vliedde de Aerde ende de Hemel, ende haer en werdt gheen stede gheuonden.

+ D vers 11

† Danie. 7.b.9.

12

^‡ Ende ick sach de dooden, beyde groot ende cleyn, staen voor Gode,^* ende de Boecken werden op ghedaen. Ende een ander^† Boeck werdt op ghedaen, welcke is des leuens. Ende de dooden werden geoordeelt, na der Schrift inden Boecken,^‡ na haren wercken.

‡ Dani. 12.b.12

* Dan. 7.b.10

† Exo. 32.g.32 Psal. 68.f.28. Phili. 4.a.3. Apoca. 3.a.5. 21.d.27.

‡ Psa. 62.b.13 Iere. 17.b.10. Mat. 16.d.27 Roma. 2.a.6. 14.b.12. 2.Cor. 5.b.10.

13

Ende de See gaf de dooden, die daer in waren, ende de doot, ende de Helle, gauen de dooden, die daer in waren, ende si werden gheoordeelt, een yeghelijck na zijn wercken.

14

Ende de doot, ende de Helle werden

[p. 107v]

gheworpen inden vierighen poel. Dat is de tweede doot,

15

Ende ist datter yemant niet en wert geuonden,^* gheschreuen inden Boecke des leuens, die werdt gheworpen inden^† vierighen poel.

* Luce. 10.b.20.

† Apoc. 19.d.20 21.b.8.