Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Hoe dat veel scharen Godt loofden vant ordeel der hoeren, Ende hoe dat si salich zijn die tot het Auontmael des Heeren gheroepen zijn, ende hoe de beeste met alle de valsche Propheten inden vierigen poel gheworpen worden.

1

⁺ DAer nae hoorde ick een stem grooter scharen, in den Hemel, die spraken: Haleluia, Salicheyt ende Prijs, Eere ende cracht, sy Gode onsen Heere:

+ A vers 1

2

Want warachtich ende rechtueerdich zijn zijn oordeelen, dat hy de grote Hoere veroordeelt heeft, die welcke de Aerde met haer hoererije verdorf,^* ende heeft dat bloet zijnder knechten van haerder hant ghewroken.

* 4.Esd. 15.a.9 Apoca. 6.b.10

3

Ende si spraken ten anderen mael: Haleluia.^† Ende de roock gaet op eewichlijck,

† Apoca. 9.a.2. 14.c.11.

4

Ende de vierentwintich Oudtsten, ende de vier dieren, vielen neder, ende baden Godt aen, die op den stoel sat, ende spraken: Amen, Haleluia.

5

Ende een stemme ghinck vanden stoele: Louet onsen God, alle zijn knechten, ende die hem vreeset, beyde cleyn ende groot.

6

⁺ Ende ick hoorde een stemme eender grooter schare, ende als een stemme grooter wateren, ende als een stemme stercker donderen, die spraken: Haleluia, wandt de Almachtighe Godt

+ B vers 6

[p. 107r]

heeft dat Rijck in genomen.

7

Laet ons verblijden ende vrolijck zijn, ende hem de^* Eere gheuen. Wandt de Bruyloft des Lams is ghecomen, ende zijn Wijf heeft haer bereydt.

* Iosue. 7.c.19. Psal. 115.a.1. Ioan. 9.c.24.

8

Ende het werdt haer ghegheuen haer te becleeden met reyner ende schooner zijden, (Ende de zijde is de gherechticheyt der Heylighen.)

9

Ende hy sprack tot my:^† Salich zijn die, die tot den Auondtmael des Lams gheroepen zijn. Ende hy sprack tot my: Dit zijn die warachtige woorden Gods.

† Math. 22.a.2. Luc. 14.b.16.

10

Ende ick viel voor hem tot sinen voeten, om hem aen te bidden. Ende hy spreect tot my: Siet toe,^‡ en doet het niet, Ick ben dijn medeknecht, ende dijner broederen, ende der ghener, die dat getuychnisse Iesu hebben. Bidt Godt aen (maer dat getuychenisse Iesu is de Gheest der Prophetien.)

‡ Acto. 10.c.26. 14.c.14. Apoc. 22.b.9.

11

⁺ Ende ick sach den Hemel op ghedaen, ende siet, een wit Peert, ende die daer op sat, hiet getrou ende warachtich, ende ordeelt ende strijdet met gherechticheyt.

+ C vers 11

12

^* Ende zijn ooghen zijn als een vier vlamme, ende op zijn hooft veel croonen, ende hadde eenen Naem gheschreuen, die niemandt en wiste, dan alleen hy selue.

* Apoc. 1.c.14. 2.c.18.

13

Ende was becleedt met eenen cleede,^† dat met bloet besprengt was, ende zijn Naem hiet^‡ Gods woort.

† Esaie. 63.a.2.

‡ Ioan. 1.a.1.

14

Ende hem volchde dat Heyr in den Hemel nae, op witte peerden, becleedt met witter ende reyner zijden.

15

^* Ende wt sinen mondt ghinck een scherp sweert, op dat hy daer de Heydenen mede sloeghesloeghe,^† Ende hy salse regeren met der ijseren roede, ende hy treedt de Wijnpersse des wijns, des grimmighen toorns des Almachtighen Godts.

* Apoca. 1.c.16. 2.c.16.

† Psal. 2.b.9.

16

Ende heeft eenen Naem gheschreuen op zijn cleedt, ende op zijn dyen, alsoo:^‡ Een Coninck alder Coninghen, ende een Heere alder Heeren.

‡ 1.Tim. 6.c.15. Apoc. 17.c.14

17

⁺ Ende ick sach eenen Enghel in der Sonnen staen, ende hy riep met grooter stemmen, ende sprack tot allen vogelen, die onder den Hemel vlieghen: Coemt, ende vergadert v tot den Auontmael des grooten Godts,

+ D vers 17

18

Op dat ghy etet dat vleesch der Coninghen, ende der Hooftlieden, ende dat vleesch der stercken, ende der peerden, ende der ghener die daer op sitten, ende dat vleesch alder Vrijen ende knechten, beyde der cleynen ende der grooten.

19

Ende ick sach dat dier, ende de Coninghen op Aerden, ende haer Heyr vergadert, om eenen strijdt te houden, met dien, die opt peert sat, ende met zijn Heyr.

20

Ende dat dier wert ghegrepen, ende met hem de valsche Propheet,^* die de Teeckenen voor hem dede, door welcken hy verleydet, die dat merckteecken des diers namen, ende die dat Beelt des diers aenbaden.^† Leuendich werden dese beyde in den vierighen poel gheworpen, die met solfer brande.

* Deut. 13.a.1. mat. 24.d.24 2.Tess. 2.b.9.

† Dani. 7.b.11. mat. 25.d.42. Apoc. 20.c.10.

21

Ende die anderen werden gedoodet, met den^‡ sweerde des gheens, die opt Peert sat, dat wt zijnen mont ghinck, ende alle voghelen werden sat van haren vleessche.

‡ Hebr. 4.c.12