Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Hoe de Enghel Iohannes leerde vanden val van Babilonien, ende van haer verdriet, ende vander verblijdinghe des Hemels, ende hoe dat bloedt der Heylighen in haer geuonden is.

1

⁺ ENde daer na sach ic eenen anderen Engel neder varen vanden Hemel, die hadde een groote macht, ende de

+ A vers 1

[p. 106v]

Aerde wert verlicht van siner claerheyt,

2

Ende riep wt macht, met luyder stemmen, ende sprack:^* Sy is gheuallen, si is gheuallen, Babylon de groote, ende een behuysinghe der duyuelen gheworden, ende een bewaringhe alder onreyner gheesten, ende een bewaringhe aller onreyner ende onaenghenamer voghelen.

* Esaie. 21.b.9. Iere. 51.b.8. Apoc. 14.b.8.

3

^† Wandt vanden wijn des toorns harer hoererije, hebben alle Heydenen gedroncken, ende de Coninghen op Aerden hebben met haer^‡ hoererie bedreuen, ende haer cooplieden zijn rijck gheworden, van haerder grooter wellust.

† Apoc. 17.a.1.

‡ 4.Esdre. 15.g.47.

4

⁺ Ende ick hoorde een ander stem vanden Hemel, die sprack:^* Gaet wt van haer, mijn volc, dat ghy niet deelachtich en wordet haerder sonden, op dat ghy niet van haren plagen wat en ontfangt:

+ B vers 4

* Gene. 19.c.15. Esaie. 52.c.11. Iere. 51.a.6. 2.Cor. 6.c.17.

5

Want haer sonden reycken tot inden Hemel, ende Godt ghedenckt aen haer boosheden.

6

Betaelt haer ghelijck als si v betaelt heeft, ende maket haer tweeuuldich nae haren wercken. Ende met welcken kelck si v ingheschenckt heeft, schenckt haer tweeuuldich in.

7

Alsoo veel als si haer heerlijck ghemaeckt ende haren moetwille ghehadt heeft: So veel qualen ende leets schenct haer in. Want si spreeckt in haer herte:^† Ick sitte ende ben een Coninghinne, ende en sal gheen weduwe zijn, ende leedt en sal ick niet sien.

† Esai. 47.b.8.

8

^‡ Daerom sullen haer plagen op eenen dach comen, de doot, leedt, ende honger, ende met vier sal si verbrandt worden. Want sterck is Godt de Heere, die haer oordeelen sal.

‡ Dani. 8.d.25. 2.Tess. 2.b.8.

9

^+* Ende de Coninghen op Aerden, die met haer gehoereert ende moetwille bedreuen hebben, sullen haer beweenen, ende hen ouer haer beclagen, Wanneer si sien sullen den roock van haren brant,

+ C vers 9

* Apoc. 17.a.2. 18.a.3.

10

Ende sullen van verre staen, van vreesen haerder qualen, ende spreken:^† Wee, wee, de grote stadt Babylon, de stercke stadt, op een vre is dijn oordeel ghecomen.

† Esaie. 21.b.9. Iere. 51.b.8. Apoc. 14.b.8.

11

Ende de Cooplieden op Aerden sullen weenen ende rouwe draghen by haer seluen, dat haer ware niemant meer coopen en sal,

12

De ware des gouts, ende siluers, ende edel ghesteenten, ende de peerlen, ende zijden, ende purpur, ende scharlaken, ende allerley Thinen hout, ende allerley vaten van yuoren, ende allerley vaten van costelijcken houte, ende van metael, ende van ijser, ende marmoren,

13

Ende caneel, ende thymiaen, ende salue, ende wierooc, ende wijn, ende oly, ende bloemen van mele, ende terwe, ende vee, ende schapen, ende peerden, ende waghenen, ende lichamen, ende sielen der menschen.

14

⁺ Ende dat oeft, daer dijne siele lust aen hadde, is van v gheweken, ende alle wat vet ende heerlijck was, is van v gheweken, ende ghy en sult sulcx niet meer vinden.

+ D vers 14

15

De Cooplieden sulcker ware, die van haer zijn rijck geworden, sullen van verre staen van vreese haerder qualen, weenen ende claghen,

16

Ende seggen:^† Wee, wee, de groote stadt, die met zijden ende purpur, ende scharlaken becleedt was, ende vergult was met gout, ende edel ghesteente, ende peerlen,

† Iere. 51.b.8.

17

Wandt in eenre vren is soodanighe rijckdom verwoest gheworden. Ende alle Schippers, ende alle die op de schepen hanteren, ende schiplieden die op der zee hanteren, stonden van verre,

18

Ende riepen, doen si den roock van haren brant sagen, ende spraken: Wie is deser grooter stadt ghelijck?

19

Ende si worpen stof op haer hoofden, ende riepen, weenden ende claechden, ende spraken: Wee, wee, de groote stadt, in welcke zijn rijck gheworden alle die daer schepen hadden in der zee, van hare ware: Want in eender vren is si verwoest.

20

⁺ Verblijt v ouer haer Hemel, ende ghy heylighe Apostelen ende Propheten, want God heeft uwe oordeel, aen haer gheordeelt.

+ E vers 20

21

Ende een stercke Enghel, nam eenen grooten steen op, als een molensteen, wierp hem in de See, ende sprack:^* Alsoo sal met eenen storm verworpen worden de groote Babylon, ende niet meer geuonden worden.

* Iere. 51.b.8.

22

Ende de stem der Sanghers, ende snarenspelers, Pijpers, ende Basuyners, en sal niet meer in v ghehoort worden. Ende geen hantwercxman eenichs handtwercks, en sal meer in v gheuonden worden.

23

Ende de stem der muelen en sal niet meer in v ghehoort worden.^† Ende de stem des Bruydegoms ende der Bruyt, en sal niet meer in v ghehoort worden. Want uwe Cooplieden waren Vorsten op Aerden, want door uwe toouerije zijn verdwaelt gheworden alle Heydenen,^‡ Ende dat bloet der Propheten, ende der Heylighen, is in haer gheuonden worden, ende alle der ghener, die op Aerden ghedoodet zijn.

† Iere. 16.b.9. 25.b.10.

‡ Mat. 23.e.34 Apoc. 16.a.6. 17.b.6.