Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Hoe dat den seuen Enghelen gheboden was te storten de seuen gramschappen Gods, waer af deerste ghestort was opter Aerden, dander inder See, de derde, op alle Fonteynen der wateren.

1

⁺ ENde ick hoorde een groote stem wt den Tempel, die sprack tot den seuen Enghelen: Gaet henen, ende giet de schalen des toorns Godts wt op de Aerde.

+ A vers 1

2

Ende de eerste ghinck henen, ende goot zijn schale wt op de Aerde. Ende daer werdt een boose ende quade swere aenden menschen,^* die dat merckteecken des diers hadden, ende die zijn beelt aenbaden.

* Apoca. 13.c.16 14.c.9.

3

Ende de tweede Enghel goot zijn schale wt inde See: Ende het wert bloet, als eens dooden, ende alle leuende siel sterf in der See.

4

Ende de derde Enghel goot zijn schale wt in de waterstroomen, ende in de water Fonteynen, ende het wert bloet.

5

Ende ick hoorde den Enghel segghen: Heere, ghy zijt rechtueerdich, die daer is, ende die daer was, ende heylich, dat ghy sulcx gheordeelt hebt.

6

^† Wandt si hebben dat bloet der Heylighen, ende der Propheten, vergoten, ende bloet hebt ghy haer te drincken ghegheuen, want si zijns weert.

† Mat. 23.e.34. Apoc. 18.e.24

7

⁺ Ende ick hoorde eenen anderen Enghel wt den Altaer segghen: Ia, Heere, Almachtighe God, dijne ordeelen zijn warachtich ende rechtueerdich.

+ B vers 7

8

Ende de vierde Enghel goot zijn schale wt in de sonne, ende hem wert ghegheuen den menschen heet te maken met vier.

9

Ende den menschen wert heet van grooter hitten, ende lasterden den Naem Godts, die daer macht heeft ouer dese plaghen, ende en deden geen boete, om hem de eere te geuen.

10

Ende de vijfde Enghel goot zijn schale wt, op den stoel des diers, ende zijn rijck wert verduystert, ende si beten haer tonghen ontstucken van smerten,

11

Ende

[p. 106r]

lasterden Godt inden Hemel, om haer smerten, ende van haren sweren, ende en dede gheen boete voor haer wercken.

12

⁺ Ende de seste Enghel goot zijn schale wt, op den grooten waterstroom Euphrates, ende dat water verdroochde, op dat bereydt werde den wech, den Coninghen, vanden opganck der Sonnen.

+ C vers 12

13

Ende ick sach wt den mondt des Draecks, ende wt den mondt des diers, ende wt den mondt des valschen Propheets, drie onreyne gheesten ghaen, ghelijck den vorsschen.

14

Ende het zijn gheesten der Duyuelen,^* die doen teeckenen, ende gaen wt tot den Coninghen op Aerden, ende op den ghantsen omganck der werelt, om haer te vergaderen inden strijt, op ghenen grooten dach Gods des Almachtigen.

* 2.Tess. 2.b.9. Apoc. 13.c.14. 19.d.20.

15

^† Siet, ick come, als een dief: Salich is, die daer waect, ende bewaert zijn cleederen, dat hy niet^‡ naect en wandele, ende datmen zijn schande niet en sie.

† mat. 24.d.43 Luce. 12.e.39. 1.Tess. 5.a.2. 2.Pet. 3.b.10. Apoca. 3.a.3.

‡ 2.Cor. 5.a.3. Apoc. 3.d.18.

16

Ende hy hadse vergadert in een plaetse die daer heet opt Hebreeusch, Harmagedon.

17

⁺ Ende de seuende Enghel goot zijn schale wt in de locht. Ende daer ghinck een groote stem wt vanden Hemel wt den stoele, die sprack: Het is gheschiet.

+ D vers 17

18

Ende daer werden stemmen, ende donderen, ende blixemen, ende daer wert een groote Aertbeuinghe, dat soodanighe niet gheweest en is, sint der tijt, datter menschen op Aerden geweest zijn, soodanighe Aertbeuinghe alsoo groot.

19

Ende wt de groote stadt werden drie deelen, ende de steden der Heydenen vielen. Ende Babylon der grooter, wert ghedacht voor Gode, om haer te geuen den kelck des wijns, van sinen grimmighen toorne. Ende alle Eylanden ontuloden, ende gheen Berghen en werden geuonden.

20

Ende een groot haghel als een Centener, viel vanden Hemel op de menschen, ende de menschen lasterden Godt, ouer de plaghe des haghels, wandt zijn plaghe is seer groot.