Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hoe dat Lammeken ghesien was op den Berch Sion, ende met hem hondert vierentwintich duysent, die met geenen Vrouwen besmet en waren gheweest, ende hoe de Enghel leert die vreese des Heeren, ende dat Babilon die groote stadt geuallen is.

1

⁺ ENde ick sach een^* Lam staende op den^† Berch Sion, ende met hem hondert ende vierenveertich duysent, die hadden den Naem zijns Vaders, geschreuen aen haer voorhoofden.

+ A vers 1

* Ioan. 1.c.29. 1.Cor. 5.a.6.

† 4.Esd. 2.d.42. Apoca. 7.b.9.

2

Ende ick hoorde een stemme vanden Hemel, als eens grooten waters, ende ghelijck een stemme eens grooten donders. Ende de stemme die ic hoorde, was als der Herpenspeelders, die op haer Herpe spelen.

3

^‡ Ende songhen, ghelijck als een nieuwe Liet, voor den stoel, ende voor de vier dieren, ende den Outsten. Ende niemandt en conde dat Liedt gheleeren, dan die hondert ende vierenveertich duysent, die ghecocht zijn vander Aerden.

‡ Apoca. 5.b.9.

4

Dese zijnt, die met Vrouwen niet besmet en zijn: Wandt si zijn^* Maechden, ende volghen den Lam na, waert henen gaet.^† Dese zijn gecocht wt den menscen, tot eerstelingen Gode ende den Lamme.

* 2.Cor. 11.a.4.

† 1.Cor. 6.c.20. Apoca. 5.b.9.

5

Ende in haren mont en is gheen valscheyt geuonden:^‡ Want si zijn onstraflijck, voor den stoele Gods.

‡ Ephesi. 1.a.4 5.c.27. Philip. 2.b.15

6

⁺ Ende ick sach eenen Enghel vliegen, midden door den Hemel, die hadde een eewich Euangelium, te vercondighen den ghenen, die op Aerden sitten ende woonen, ende allen Heydenen, ende gheslachten, ende spraken, ende volcken.

+ B vers 6

7

Ende sprack met grooter stemmen:^* Vreest Godt, ende gheeft hem de eere: Wandt de tijt zijns ordeels is ghecomen, ende aenbidt, dien,^† die ghemaect heeft Hemel ende Aerde, ende See, ende de waterfonteynen.

* Eccle. 12.c.13. 4.Esdre. 16.g.68.

† Ps. 146.a.6 Acto. 14.c.14 17.d.24. Apoc. 10.a.6.

8

Ende een ander Enghel volchde na, die sprack:^‡ Sy is gheuallen, si is geuallen, Babylon, de groote stadt: Wandt sy heeft met den Wijn haerder Hoererije ghedrenckt alle Heydenen.

‡ Esai. 21.b.9. Iere. 51.b.8. Apoca. 18.a.2.

9

⁺ Ende de derde Enghel volchde desen na, ende sprac met luyder stemmen: Ist dat yemandt

+ C vers 9

[p. 105v]

dat dier aenbidt ende zijn beeldt,^* ende neempt dat merckteecken aen zijn voorhooft, oft aen zijn hant,

* Apoc. 13.c.16.

10

Die sal vanden Wijn des toorn Gods drincken, die ingheschenct ende louter is, inden Kelck zijns toorns. Ende sal ghequelt worden met^† vier ende solfer, voor den heylighen Enghelen ende voor den Lamme.

† Esa. 66.d.24 Mat. 25.d.42

11

^‡ Ende de roock haerder qualen sal opclimmen van eewicheyt tot eewicheyt. Ende sy en hebben gheen rust dach ende nacht, die dat dier hebben aengebedet, ende zijn beelt: Ende ist dat yemant dat mercteecken zijns naems aenghenomen heeft.

‡ Apoc. 9.a.2. 19.a.3.

12

^* Hier is verduldicheyt der Heyligen: Hier zijn die houden de geboden Gods, ende het ghelooue aen Iesum.

* Apoc. 13.b.10.

13

⁺ Ende ick hoorde een stemme vanden Hemel tot my segghen: Scrijft.^† Salich zijn de dooden die inden Heere steruen van nv aen. Ia, de gheest spreect, dat sy^‡ rusten van haren aerbeyt, want haer wercken volghen haer nae.

+ D vers 13

† Rom. 14.a.8.

‡ Esai. 56.c.14 Sapi. 3.a.3. 4.a.1.

14

Ende ick sach, ende siet, een witte Wolcke, ende op de Wolcke eenen sitten, die ghelijck was eens menschen Sone, die had een gulden Croone op zijn hooft, ende in zijn handt een scherpe Seyssen.

15

Ende een ander Enghel ghinck wt inden Tempel, die riep met luyder stemmen tot den ghenen, die op de Wolcke sadt:^‡ Slaet aen met uwer Seyssen, ende maeyt. Want de tijt van maeyen is ghecomen: Want de Oogst der Aerden is dorre gheworden.

‡ Ioelis. 3.b.13. Mat. 13.e.39.

16

Ende die op der Wolcken sadt, sloech aen met zijnder Seyssen aen de Aerde, ende de Aerde wert ghemaeyt.

17

⁺ Ende een ander Enghel ginck wt den Tempel inden Hemel, die had oock een scherpe Seyssen.

+ E vers 17

18

Ende een ander Enghel ghinck wt den Altaer, die hadde macht ouer dat vier, ende riep met grooter roepinghe, tot den genen, die de scherpe Seyssen had, ende sprack: Slaet aen met uwer scherper Seyssen, ende snijt de Wijndruyuen op Aerden af, want haer besien zijn rijp.

19

Ende de Enghel sloech aen met zijnder Seyssen aen de Aerde, ende sneet de Wijnrancken der Aerden af, ende werpse inde groote Wijnpersse des toorns Godts.

20

Ende de Wijnpersse wert^* buyten der stadt gheperst,^† ende dat bloet ginck vander Wijnpersse, tot aen de thoomen der Peerden door duysent seshonder velden weechs.

* Apoc. 22.c.15.

† 4.Esdre. 15.f.35.