Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Hoe den Tempel Godts ghesien was inden Hemel, met der Arcken des Testaments, ende vander Vrouwen die metter Sonnen ghecleedt was, ende de Mane onder haer voeten, ende voor haer den grooten drake, ende daer was eenen strijt metten Enghel Michael ende metten drake.

1

⁺ ENde de seuende Enghel basuynde, ende daer werden groote stemmen inden Hemel, die spraken: De rijcke der werelt zijn onses Heeren, ende zijns Christus gheworden. Ende hy sal regeren van eewicheyt tot eewicheyt.

+ A vers 1

2

Ende de vierentwintich Outsten, die voor Gode op haer stoelen saten, vielen op haer aensicht, ende baden Godt aen,

3

Ende spraken: Wy dancken v Heere Almachtige Godt, ghy die zijt, ende waert ende toecomende zijt, dat ghy hebt aenghenomen dijne groote cracht, ende heerschapt.

4

Ende de Heydenen zijn toornich gheworden. Ende dijn toorn is ghecomen, ende de tijt der dooden, te ordeelen ende te geuen dat loon dijnen knechten, den Propheten, ende den Heyligen, ende den ghenen, die dijnen Naem vreesen, den cleynen ende den grooten, ende te verderuen den ghenen, die de Aerde verdoruen hebben.

5

^+* Ende de Tempel Godts wert opghedaen inden Hemel, ende de Arcke zijns Testaments, wert in sinen Tempel ghesien. Ende daer gheschiedden blicxemen, ende stemmen, ende donderen, ende Aertbeuinghen, ende een groote haghel.

+ B vers 5

* Apoc. 15.b.5.

6

Ende daer verscheen een groot teecken inden Hemel. Een Vrouwe metter Sonnen becleedt, ende de Mane onder haer voeten, ende op haer hooft een Croone van twelf Sterren.

7

Ende si was beurucht, ende riep, ende was in kints baren noot, ende hadde groote quale totter gheboorte.

8

Ende daer verscheen een ander teecken inden Hemel. Ende siet, een groote roode Draeck, die had seuen hoofden ende thien hoornen: Ende op zijn hooft seuen Croonen,

9

Ende zijn steert tooch dat derde deel der Sterren, ende wierpse op de Aerde.⁺ Ende de Drake tradt voor de Vrouwe, die daer baren soude, op dat, wanneer si gebaert hadde, hy haer kint verslinde.

+ C vers 9

10

Ende si baerde eenen sone een knechtken, die alle Heydenen soude weyden met der ijseren Roede. Ende haer kint wert ontruct tot Gode, ende sinen stoele.

11

^† Ende de Vrouwe ontuliedde inder woestijne, daer si hadde een plaetse bereyt van Gode, op dat sy aldaer gheuoedet werde, duysent, tweehondert, ende tsestich daghen.

† Dani. 11.f.34 Apoc. 12.d.19.

12

Ende daer verhief hem een strijt inden Hemel. Michael ende zijn Enghelen streden met den Draeck: Ende de Drake street ende zijn Enghelen,

13

Ende en ouerwonnen niet. Oock en wert haer plaetse niet meer gheuonden inden Hemel.

14

^* Ende de groote Draeck, de Oude Slanghe, die daer heet de Duyuel ende Satanas, wert wtgheworpen, die de gantsche werelt verleyt, ende wert gheworpen op de Aerde, ende zijn Enghelen werden daer oock henen geworpen.

* Esai. 14.b.12 Luce. 10.b.18. Apoc. 20.a.2.

15

Ende ick hoorde een groote stemme, die sprack inden Hemel: Nv is de salicheyt, ende de cracht, ende dat Rijck, ende de macht onses Gods zijns Christi gheworden. Dewijle dat die verworpen is, diese beschuldichde dach ende nacht voor Gode.

16

⁺ Ende sy hebben hem ouerwonnen door des Lams bloet, ende door dat woordt haers ghetuychnis, ende en hebben haer leuen niet lief ghehat tot aenden doot.

+ D vers 16

17

Daerom verblijt v ghy Hemelen, ende die daer in woonen. Wee den ghenen die op Aerden woonen, ende op de See: Want de Duyuel coemt tot v af, ende heeft een groote toornicheyt, ende weet, dat hy weynich tijt heeft.

18

Ende doen de Drake sach, dat hy verworpen was op de Aerde, veruolchde hy de Vrouwe, die dat knechtken gebaert hadde:

19

^† Ende der Vrouwen werden twee vlueghelen ghegheuen, ghelijck als van eenen grooten Aerne, op dat sy inder woestijne vloghe, op haer plaetse, daer sy geuoet werde^‡ een tijt, ende twee tijden, ende een halue tijt, voor dat aensicht der slanghen.

† Apoc. 12.c.11.

‡ Dani. 7.d.25. 12.c.17.

20

Ende de slanghe schoot na der Vrouwen, wt haren mont een water, ghelijck een vliet, op dat hy haer soude verdrencken.

21

Maer de Aerde halp der Vrouwen, ende dede haren mont op, ende ver-

[p. 105r]

slinde dat vliet, dat de Drake wt zijnen monde schoot.

22

Ende de Drake werdt toornich ouer de Vrouwe, ende ghinck henen om te strijden metten ouerghebleuenen van haren Sade, die daer Godts gheboden houden, ende hebben dat ghetuychnis Iesu Christi.