Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hoe dat de Sterre vanden Hemel viel int Basuynen des vijfden Enghels, ende hoe de Sprinckhanen verboden was dat si dat Cruyt der Aerden niet quetsen en souden, ende int Basuynen des sesten Engels werden ontbonden de Enghelen wt de groote Riuiere Euphrate.

1

⁺ ENde de vijfde Engel basuynde, ende ick sach een Sterre gheuallen vanden Hemel, op de Aerde: Ende hem werdt de Slotel tot den^* Put des Afgronts ghegheuen:

+ A vers 1

* Sach. 9.b.11.

2

Ende hy dede den Put des Afgronts op: Ende daer ghinck een^† Roock op wt den Put, ghelijck als een Rooc eens grooten Ouens. Ende de Sonne wert verduystert, ende de Locht, vanden Roocke des Puts.

† Apoc. 14.c.11 19.a.3.

3

Ende wt den Roock quamen^‡ Sprinckhanen op de Aerde. Ende haer wert macht ghegheuen, ghelijck als de Scorpioenen op Aerden macht hebben.

‡ Exodi. 10.d.13

4

^* Ende daer wert tot haer gheseyt, dat si niet beschadighen en souden dat gras op Aerden, noch eenigherley groen, noch eenighen boom, maer alleenlijck de menschen, die niet en hebben den^† Seghel Godts, aen haer voorhoofden.

* Apoca. 7.a.3.

† Ezec. 9.b.4.

5

Ende het werdt haer ghegeuen, dat sise niet en doodden, maer haer quelden vijf Maenden lanck. Ende haer quale was, ghelijc een quale vander Scorpioen, wanneer si eenen mensche steect.

6

^+‡ Ende inden seluen dagen, sullen de menschen den doot soecken, ende niet vinden: Sullen begeeren te steruen, ende de doot sal van haer vlien.

+ B vers 6

‡ Esaie. 2.d.19 Iere. 7.d.36. Osee. 10.b.8. Luce. 23.d.29. Apoc. 6.c.16.

7

Ende de^* Sprinchanen zijn ghelijck

* Exo. 10.a.4 Sapi. 16.b.9.

[p. 104r]

den Peerden, die ter Orloge bereyt zijn: Ende op haer hoofden als Croonen den goude ghelijc, ende haer aensichten ghelijck der menschen aensichten,

8

Ende hadden hayr, ghelijck Vrouwen hayr, ende haer tanden waren ghelijck als der Leeuwen,

9

Ende hadden Pantsiers, als ijseren Pantsiers, ende dat ratelen haerder vlueghelen, als dat ratelen aen de waghenen veler Peerden die inden strijdt loopen.

10

Ende hadden steerten ghelijck den Scorpioenen, ende daer waren Anghelen aen haer steerten, ende haer macht, was te beschadighen den menschen vijf maenden lanck.

11

Ende hadden ouer haer eenen Coninck, eenen Enghel wt den Afgront, diens naem hiet opt Hebreeusch Abaddon, ende opt Griecx heeft hy den name Apollion.

12

⁺ Een wee is wech. Siet, daer comen noch twee wee na dien.

+ C vers 12

13

Ende de seste Enghel basuynde. Ende ick hoorde een stemme wt den vier hoecken des gulden Altaers voor Gode,

14

Die sprac tot den sesten Enghel, die de Basuyne had: Ontbint de vier Enghelen, die ghebonden zijn aenden grooten waterstroom Euphrates.

15

Ende de vier Enghelen werden los, die bereyt waren op een vre, ende op eenen dach, ende op een maent, ende op een Iaer, dat si doodden dat derde deel der menschen.

16

Ende dat ghetal der Ruytersche crijghers was veel duysent mael duysent, ende ick hoorde haer ghetal.

17

Ende alsoo sach ick de Peerden int ghesichte, ende die daer op saten, dat si hadden vierighe, ende gheele, ende solfersche Pantsiers. Ende de hoofden der Peerden, ghelijck de hoofden der Leeuwen, ende wt haren mont ghinck, vier, ende roock, ende solfer.

18

⁺ Van desen drien wert gedoot dat derde deel der menschen, vanden viere, ende roocke, ende solfer, die wt haren mondt ghinck,

+ D vers 18

19

Wandt haer macht was in haren mondt: Ende haer steerten waren den Slangen ghelijc, ende hadden hoofden, ende met den seluen deden si schade.

20

Ende daer bleuen noch lieden ouer, die niet ghedoot en werden van desen plagen, noch boete en deden voor de wercken haerder handen, dat si niet en aenbaden de Duyuelen, ende gulden, silueren, metalen, steenen, ende houten Afgoden,^* welcke noch sien, noch hooren, noch wandelen en connen.

* Psal. 115.b.5. 135.c.15.

21

Die oock gheen boete en deden voor haer moorderije, toouerije, hoererije, ende dieuerije.