Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Hoe dattet een stilte was inden Hemel doen den seuenden Seghel op gedaen was, ende hoe den seuen Enghelen basuynen ghegheuen werden, ende hoe den Enghel veel wieroock ontfinck, ende daer gheschieden veel donderslaghen ende stemmen.

1

⁺ ENde doent den seuenden Segel op dede, wertter een stilheyt inden Hemel, ontrent een halue vre.

+ A vers 1

2

Ende ick sach seuen Enghelen, die daer traden voor Godt, ende haer werden seuen Basuynen ghegheuen.

3

Ende een ander Engel quam, ende tradt byden Altaer, ende hadde een gulden wieroock Vat: Ende hem werdt veel Ruecwercx ghegheuen,^* dat hy gaue ten ghebede alder Heylighen, op den gulden Altaer voor den stoele.

* Psal. 141.a.2. Apoca. 5.b.8.

4

Ende de rueck des Ruecwercx vanden ghebede der Heylighen, ghinck op van de hant des Enghels voor Gode.

5

Ende de Engel nam dat wieroock Vat, ende vulde het met vier vanden Altaer, ende gotet op de Aerde. Ende doen gheschiedden stemmen, ende donderen, ende blicxemen, ende Aertbeuinghen.

6

⁺ Ende de seuen Enghelen met den seuen Basuynen, hadden haer bereyt, om te basuynen.

+ B vers 6

7

Ende de eerste Enghel basuynde, ende daer wert een hagel ende vier met bloet ghemengt, ende viel op de Aerde: Ende dat derde deel der boomen verbrande, ende alle het groen gras verbrande.

8

Ende de tweede Enghel basuynde: Ende daer voer wat als een groot Berch, met vier barnende, inder See:

9

Ende dat derde deel der zee wert bloet: Ende dat derde deel der leuender Creatueren inder zee, storuen: Ende dat derde deel der Schepen werden verdoruen.

10

Ende de derde Engel basuynde, ende daer viel een groote Sterre vanden Hemel, die barnde als een Fackel: Ende viel op dat derde deel der waterstroomen, ende ouer de waterfonteynen:

11

⁺ Ende de naem der Sterre hiet, Alsem. Ende dat derde deel wert Alsem. Ende veel menschen storuen vanden wateren, om dat si soo bitter waren gheworden.

+ C vers 11

12

Ende de vierde Enghel basuynde, ende dat derde deel der Sonnen werdt gheslaghen, ende dat derde deel der Manen, ende dat derde deel der Sterren, also dat haer derde deel verduystert wert, ende de dach dat derde deel niet en scheen. Ende de nacht des seluen ghelijcken.

13

Ende ick sach, ende hoorde eenen Enghel vlieghen midden door den Hemel, ende segghen met luyder stemmen: Wee, wee, wee den genen die op Aerden woonen, voor de ander stemmen der Basuynen, der drien Enghelen, die noch basuynen sullen.