Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Hoe Iohannes sach de gheteekende Godts, wt alle geslachten Israels, ende wt den Heydenen ende ander volc die vant Lammeken gheregeert worden wt alle tribulatien verlost, ende alle haren tranen afghewasschen.

1

⁺ ENde daer na sach ick vier Engelen staen op de vier hoecken der Aerden, die hielden de vier winden der Aerden, op datter gheen wint ouer de Aerde en bliese, noch ouer de See, noch ouer eenighen boom.

+ A vers 1

2

Ende ick sach eenen anderen Enghel opclimmen vanden opganghe der Sonnen, die hadde den Seghel des leuendigen Godts ende riep met grooter stemmen tot den vier Enghelen, welcken ghegheuen is, te beschadighen de Aerde ende de See.

3

Ende hy sprack:^† En beschadicht de Aerde niet, noch de See, noch de Boomen,^‡ tot dat wy besegelen de knechten onses Godts, aen haer voorhoofden.

† Apoc. 9.a.4.

‡ Ezech. 9.b.4

4

⁺ Ende ick hoorde dat ghetal der ghener, die beseghelt werden, hondert ende vierenveertich duysent, die besegelt waren van alle geslachten der kinderen Israels.

+ B vers 4

5

Vanden gheslachte Iuda, twelf duysent beseghelt. Vanden gheslachte Ruben, twelf duysent beseghelt. Vanden gheslachte Gad, twelf duysent besegelt.

6

Vanden gheslachte Aser, twelf duysent beseghelt. Vanden geslachte Nephtalim, twelf duysent beseghelt. Vanden gheslachte Manasse, twelf duysent beseghelt.

7

Vanden gheslachte Simeon, twelf duysent beseghelt. Vanden gheslachte Leui, twelf duysent besegelt. Vanden gheslachte Isachar, twelf duysent

[p. 103v]

beseghelt.

8

Vanden gheslachte Sabulon, twelf duysent besegelt. Vanden gheslachte Ioseph, twelf duysent beseghelt. Vanden gheslachte BenIamin, twelf duysent beseghelt.

9

^* Daer na sach ick, ende siet: Een groote schare, welcke niemant ghetellen en conde, wt allen Heydenen ende volcken, ende spraken, staende voor den stoel, ende voor dat Lam, becleet met witten cleederen, ende Palmen in haer handen,

* 4.Esdre. 2.f.42.

10

Riepen met luyder stemmen, ende spraken: Salicheyt sy den genen, die op den stoel sit, onsen Gode ende den Lamme.

11

Ende alle Enghelen stonden om den stoel, ende om de Outsten, ende rontsom de vier dieren, ende vielen voor den stoel, op haer aensichten, ende baden Godt aen,

12

Ende spraken: Amen. Lof, ende eere, ende wijsheyt, ende danck, ende prijs, ende cracht, ende stercheyt, sy onsen Gode, van eewicheyt tot eewicheyt, Amen.

13

⁺ Ende een der Outsten antwoorde, ende sprack tot my: Wie zijn dese metten witten cleederen becleedt? Ende van waer zijn si ghecomen?

+ C vers 13

14

Ende ick sprack tot hem: Heere, ghy wetet. Ende hy sprack tot my: Dese zijnt, die ghecomen zijn wt groote droefnisse, ende hebben haer cleederen ghewasschen, ende hebben haer cleederen claer gemaect, int bloet des Lams.

15

Daerom zijn si voor den stoel Gods, ende dienen hem dach ende nacht in zijnen Tempel: Ende die op den stoel sit, sal bouen haer woonen.

16

^† Haer en sal niet meer hongheren noch dorsten, ooc en sal niet op haer vallen de Sonne, oft eenige hitte:

† Esa. 49.b.10.

17

Want dat Lam midden inden stoele salse weyden, ende leyden tot de leuende waterfonteynen,^‡ ende God sal afwasschen alle tranen van haren oogen.

‡ Esaie. 25.b.8. Apoc. 21.a.4.