Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hoe Iohannes de duere des Hemels open sach, ende eenen stoel gheset, om welcken noch waren vierentwintich sitsteden, daer vierentwintich Ouders op saten, ende met vier dieren die Godt glorie ghauen dach ende nacht.

1

⁺ DAer na sach ick, ende siet, Een duere wert opghedaen, inden Hemel,^* ende de eerste stemme, die ick ghehoort hadde, met my spreecken, als een Basuyne, die sprack: Climt herwaerts, ick wil v thoonen, wat nae desen gheschyen sal.

+ A vers 1

* Apoc. 1.b.10.

2

Ende terstont was ick inden gheest, Ende siet, een stoel wert gheset inden Hemel, ende op den stoel sat eene.

3

Ende die daer sat, was ghelijck aen te sien, als de steen Iaspis, ende Sardis: Ende een Reghenboghe was rontsom om den stoel, ghelijck aen te sien, als een Smaragd:

4

Ende rontsom om den stoel, waren vierentwintich^† stoelen, ende op de stoelen, saten vierentwintich Outsten, met witten cleederen becleet, ende hadden op haer hoofden gulden^† Croonen.

† Danie. 7.b.9. Apoc. 20.b.4

† 4.Esdre. 2.f.43.

5

Ende vanden stoel gingen wt blicxemen, donderen, ende stemmen, ende seuen Fackelen met vier branden voor den stoel,^‡ welcke zijn de seuen gheesten Godts.

‡ Apoca. 5.a.6.

6

⁺ Ende voor den stoel was een^* glasen See, gelijck den Crystalle, ende midden inden stoel, ende rontsom den stoel, vier dieren, vol ooghen voor ende achter.

+ B vers 6

* Apo. 15.a.2.

7

Ende dat eerste dier was gelijck eenen Leeuwe: Ende dat tweede dier was ghelijck eenen Calue: Ende dat derde dier had een aensicht als een mensch: Ende dat vierde dier gelijck eenen vliegenden Arent.

8

Ende dier vier dieren had een yeghelijck ses vlueghelen rontom, ende waren binnen vol oogen, Ende en hadden gheen rust dach ende nacht, ende spraken:^† Heylich, heylich, heylich, is Godt de Heere, de Almachtighe, die daer was, ende die daer is, ende die daer coemt.

† Leuit. 19.a.2. Esaie. 6.a.3.

9

Ende doen de dieren prijs, ende eere, ende danc gauen den genen, die op den stoel sat, die daer leeft, van eewicheyt tot eewicheyt,

10

Vielen de vierentwintich Outsten, voor dien, die op den stoel sat, ende baden dien aen, die daer leeft van eewicheyt tot eewicheyt: Ende worpen haer Croonen voor den stoel,

11

Ende spraken:^† Heere, ghy zijt weerdich te nemen prijs, ende eere, ende cracht, want ghy hebt alle dinck gheschapen, ende door uwen wille hebben sy dat wesen, ende zijn gheschapen.

† Apoc. 5.b.12.