Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hy onderwijst den Enghel der ghemeynten tot Sardis, tot Philadelphia, ende Laodicia, ende seyt wat hy die verwint hebben sal.

1

⁺ ENde den^* Enghel der ghemeynte te Sarden schrijft: Dat seyt, die de gheesten Gods heeft, ende de seuen Sterren: Ick weet uwe wercken. Want ghy hebt den naem, dat ghy leeft, ende zijt doot.

+ A vers 1

* Apocal. 2.a.1.

2

Weest wacker, ende sterckt dat ander, dat steruen wil: Want ick en heb uwe wercken niet volcomen gheuonden voor Godt.

3

So ghedenct nv, hoe ghy ontfanghen ende ghehoort hebt, ende houdet ende doet boete. Ist dat ghy niet en waect,^† soo sal ick ouer v comen als een dief, ende en sult niet weten, tot welcker vren ick ouer v comen sal.

† mat. 24.d.43 1.Thess. 5.a.2. 2.Petr. 3.b.10. Apoc. 16.c.15.

4

Ghy hebt oock weynich namen te Sarden, die haer cleederen niet beulect en hebben, ende sy sullen met my wandelen in witten cleederen, want sy zijnt weerdich.

5

Wie ouerwint, die sal met witten cleederen becleedt worden.^‡ Ende ick en sal zijnen name niet wtdoen, wt den Boecke des Leuens. Ende^* ick wil zijnen naem belijden voor mijnen Vader, ende voor zijnen Enghelen.

‡ Exod. 32.g.32 Psal. 68.f.28.

* matt. 10.d.32 Luce. 12.b.8.

6

Wie ooren heeft, die hoore, wat de gheest den gemeynten seyt.

7

⁺ Ende den Enghel der ghemeynte te Philadelphia scrijft: Dat seyt de Heylighe, de Warachtighe, die daer heeft den^† Slotel Dauids, die daer op doet, ende niemant toe en sluyt: Die toesluyt, ende niemant op en doet:

+ B vers 7

† Iob. 12.b.14. Esaie. 22.d.22 Apoca. 1.d.18.

8

Ick weet uwe wercken. Siet, ick heb voor v ghegeuen een open duere, ende niemant en can die toesluyten, want ghy hebt een cleyne cracht, ende hebt mijn woort behouden, ende en hebt mijnen Naem niet versaect.

9

Siet, Ick sal geuen wt Satans Schole, die daer segghen: Sy zijn Ioden, ende en zijns niet, maer lieghen. Siet, ick wil haer maecken, dat sy comen sullen, ende aenbeden tot uwe voeten, ende bekennen dat ick v lief heb ghehat.

10

Dewijle dat ghy hebt behouden dat woordt mijnder verduldicheyt, soo wil ick oock v behouden, voor de vre der temptatien, die daer comen sal ouer den omloop der gantscher werelt, te tempteren die daer woonen op Aerden.

11

Siet, ick come haestelijck, behout dat ghy hebt, dat niemandt uwe Croone en neme.

12

⁺ Wie ouerwint, dien wil ick maken tot een Pilaerne inden Tempel mijns Godts, ende en sal niet meer wtgaen. Ende wil op

+ C vers 12

[p. 102v]

hem schrijuen den Naem mijns Godts, ende den Naem des nieuwen Ierusalems, der Stadt mijns Gods,^* die vanden Hemel neder coemt, van mijnen Gode, ende mijnen Naem den nieuwen.

* Apoc. 21.a.2.

13

Wie ooren heeft, die hoore, wat de gheest den ghemeynten seyt.

14

Ende den Enghel der ghemeynte te Laodicea scrijft: Dat seyt, Amen, de ghetrouwe ende warachtighe ghetuyghe,^† dat aenbegin der Creaturen Godts:

† Eccli. 24.b.12 Collos. 1.b.15.

15

Ick weet dijne wercken, dat ghy noch cout noch werm en zijt. Och oft ghy cout oft werm waert.

16

Maer dewijle ghy lau zijt, ende noch cout noch werm, sal ick v wtspouwen wt mijnen mont.

17

Ghy spreeckt: Ick ben rijck, ende hebbe ghenoech, ende en behoeue niet: Ende en weet niet, dat ghy zijt elendich, ende iammerlijck, arm, blint, ende bloot.

18

⁺ Ick rade v, dat ghy gout van my coopt, dat met vier doorloutert is, op dat ghy rijck wordt: Ende witte clederen, dat ghy v aendoet, ende niet gheopenbaert en worde de schande uwer^† naectheyt, ende saluet uwe ooghen, met ooghen Salue, dat ghy moecht sien.

+ D vers 18

† 2.Corin. 5.a.3 Apoc. 16.c.15.

19

^‡ Die ick lief heb, die straffe ick, ende castijse. Soo zijt nv neerstich, ende doet boete.

‡ Pro. 3.b.11. Hebr. 12.a.6.

20

Siet, Ick stae voor de duere, ende clop aen. Ist dat yemant mijn stemme hooren sal, ende de duere op doen, tot dien sal ick ingaen, ende dat Auontmael met hem houden, ende hy met my.

21

Wie ouerwint,^* dien wil ick gheuen, met my op mijnen stoel te sitten, ghelijck als ick ouerwonnen heb, ende heb gheseten met mijnen Vader op zijnen stoel.

* Sapien. 3.b.8. Mat. 19.d.28. Luce. 22.b.30. 1.Cor. 6.a.2.

22

Wie ooren heeft, die hoore, wat de gheest den gemeynten seyt.