Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hoe Iohannes de ghemeynten tot Ephesen, tot Smyrnen, tot Pergamo ende Thyatiren tot beteringe vermaent.

1

⁺ ENde den^* Enghel der Ghemeynte tot Epheso scrijft: Dat seyt, die daer hout de seuen Sterren in zijn rechter hant, die daer wandelt midden onder den seuen gulden Candelaers:

+ A vers 1

* Malac. 2.b.7. 1.Cor. 11.b.9. Apocali. 3.a.1.

2

Ic weet dijne wercken ende dijnen arbeyt, ende dijne verduldicheyt, ende dat ghy de boosen niet verdraghen en cont: Ende hebt ondersocht die, die daer segghen, sy zijn Apostelen, ende en zijns niet,

3

Ende hebt haer luegenaers gheuonden, ende verdraecht, ende hebt verduldicheyt, Ende om mijns Naems wille arbeyt ghy, ende en zijt niet moede gheworden.

4

Maer dat heb ic tegen v, dat ghy de eerste liefde verlaet.

5

Ghedenct waer af ghy geuallen zijt, ende doet boete, ende doet de eerste wercken.^* Ist dat niet, so sal ic v haestelijc comen, ende uwen Candelaer wech stooten van zijnder stede, ten sy dat ghy boete doet.

* Luce. 13.a.3.

6

Maer dat hebt ghy, dat ghy de wercken der^† Nicolaiten haet, welcke ick oock haet.

† Acto. 6.a.5.

7

Wie ooren heeft die hoore, wat de gheest den ghemeynten seyt. Wie ouerwint, dien wil ic te eten geuen vanden^‡ houte des leuens, dat inden Paradijse Godts is.

‡ Genes. 2.b.9.

8

⁺ Ende den Enghel der ghemeynte tot Smyrnen scrijft: Dat seyt^* de eerste ende de laetste, die doot was, ende is leuendich

+ B vers 8

* Esa. 41.a.4 44.b.6. Apoca. 1.d.17.

[p. 102r]

gheworden:

9

Ick weet dijne wercken, ende dijne droeffenisse, ende dijne armoede (maer ghy zijt rijck) ende die lasteringhe der ghener, die daer seggen: Sy zijn Ioden, ende en zijns niet, maer zijn des Satans Schole.

10

Vreest v voor dier gheen, dat ghy lijden sult. Siet, de Duyuel sal sommighe van v, in de gheuanckenis werpen, op dat ghy ghetempteert wordet, ende sult droefenis hebben thien daghen lanck.^* Sijt ghetrou tot aen den doot, soo wil ick v de^† Croon des leuens gheuen.

* Mat. 10.c.22.

† 4.Esdre. 2.f.43. 2.Tim. 4.a.8. Iacob. 1.b.12.

11

Wie ooren heeft, die hoore, wat de Gheest den gemeynten seyt: Wie ouerwint, dien en sal gheen leedt gheschien, vanden tweeden doot.

12

Ende den Enghel der ghemeynte tot Pergamon schrijft: Dat seyt,^‡ die daer heeft dat scherp tweesnijdighe sweert:

‡ Hebr. 4.c.12. Apoc. 1.c.16.

13

Ick weet wat ghy doet, ende waer ghy woont, dat daer des Satans stoel is, ende hout vast mijnen Naem, ende en hebt mijn ghelooue niet versaeckt.⁺ Ende in mijnen daghen is Antipas mijn ghetrouwe ghetuyghe by v ghedoot, daer de Satan woont.

+ C vers 13

14

Maer ic heb een weynich teghen v, dat ghy aldaer hebt, die de leeringe^* Balaams houden: Die daer leerde door den Balack een argernis aenrichten voor den kinderen van Israel, te eten der Afgoden offer, ende hoererije te bedrijuen.

* Num. 25.a.2. 31.c.16.

15

Alsoo hebt ghy oock, die de leeringhe der Nicolaiten houden, dat haete ick.

16

Doet boete: Maer is des niet, soo sal ick v haest comen, ende met haer vechten, door het^* Sweerdt mijns monts.

* Esaie. 49.a.2 Ephe. 6.c.17. Hebr. 4.c.12. Apoca. 1.d.16.

17

Wie ooren heeft die hoore, wat de gheest der ghemeynten seyt. Wie ouerwint, dien wil ick te eten gheuen, vanden verborghen Manna, ende wil hem gheuen, een goede ghetuychenisse, ende met der ghetuychenisse eenen nieuwen Naem ghescreuen, welcken niemant en kent, dan die hem ontfangt.

18

Ende den Enghel der ghemeynte tot Thyatira scrijft: Dat seyt de Sone Gods,^† die ooghen heeft als de viervlamme, ende zijn voeten ghelijck als Metael:

† Apoc. 1.c.14. 19.c.12.

19

Ick weet dijne wercken, ende dijne liefde, ende dijnen dienst, ende dijn ghelooue, ende dijn verduldicheyt, ende dat ghy hoe langher hoe meer doet.

20

Maer ick heb een weynich teghen v, dat ghy dat Wijf^‡ Iesabel die daer spreect, sy sy een Prophetersse, laet leeren ende verleyden mijne knechten, hoererije bedrijuen, ende Afgoden offer eten:

‡ 3.Reg. 16.d.31 4.Reg. 9.b.7

21

⁺ Ende ick heb haer tijt ghegeuen, dat sy boete soude doen voor haer hoererije, ende sy en doet gheen boete.

+ D vers 21

22

Siet, ick werpse in een bedde, ende die met haer dat houwelijck ghebroken hebben, in groote droeffenisse, ist dat sy gheen boete en doen voor hare wercken:

23

Ende haer kinderen wil ick doot slaen. Ende alle gemeynten sullen bekennen, dat ick ben,^‡ die de nieren ende herten ondersoeckt,^* ende sal eenen yeghelijcken van v, gheuen na uwen wercken.

‡ Psal. 7.b.10. Iere. 17.b.10. Acto. 1.d.24.

* Psa. 62.b.13 Iere. 17.b.10. Mat. 16.d.27 Roma. 2.a.6. 2.Cor. 5.b.10.

24

Maer v seg ick, ende den anderen die te Thyatira zijn, die sulcke leeringhe niet en hebben, ende die niet bekent en hebben de diepte des Satans (als sy segghen) ick en wil gheenen anderen last op v werpen,

25

Doch wat ghy hebt, dat behoudet tot dat ick come.

26

Ende wie ouerwint, ende hout mijn wercken tot aenden eynde,^* dien wil ick macht gheuen ouer de Heydenen,

* Psalm. 2.b.8.

27

^† Ende hy salse weyden, met een ijseren Roede, ende ghelijck als eens Potbackers Vat sal hyse vermorselen,

† Apo. 19.c.15.

28

Soo ick van mijnen Vader ontfanghen heb, ende wil hem gheuen de morghensterre.

29

Wie ooren heeft, die hoore, wat de gheest den gemeynten seyt.