Den Bibel, Inhoudende dat Oude ende Nieuwe Testament (Biestkensbijbel)

[p. 101r]

De Epistel S. Iudas.

¶ De Apostel Iudas leert dat sy bidden souden, op dat sy volstandich int gelooue mochten staende blijuen, Ende dat sy haer van de valsche Leeraers wachten souden, Ende hoe de Heere zijn volck voortijts verlost heeft, ende den ongheloouigen te niet brachte. Ende watter inden laetsten tijden gheschieden sal.

1

⁺ IVdas een knecht Iesu Christi, maer een broeder Iacobi. Den geroepenen, die daer geheylicht zijn, in Godt den Vader ende bewaert in Iesu Christo.

+ A vers 1

2

Godt gheue v veel bermherticheyt, ende vrede, ende liefde.

3

Ghy beminden, Na dien ick voor hadde, om v te schrijuen van onser aller salicheydt, soo hielt ickt voor noodich, v met schriften te vermanen, dat ghy ouer dat ghelooue strijdet, dat den Heyligen eenmael voorghegheuen is:

4

^* Want daer zijn sommighe menschen beneuen in gheslopen, van welcken in voortijden geschreuen is, tot sulcker straffe: Die zijn godloos, ende trecken de ghenade onses Gods op moetwille, ende versaken God ende onsen Heere Iesum Christum, den eenighen Heerscher.

* 2.Petri. 2.a.1.

5

Maer ick wil v vermanen, dat ghy dit eenmael wetet:^* Dat de Heere, doen hy dat volck wt Egypten holp, ten anderen mael^† maeckte hy te niet, die daer niet en geloofden.

* Exodi. 14. ca.

† Nu. 14.d.27 Psa. 106.d.26 Sapien. 1.c.11. 1.Cori. 10.b.10 Heb. 3.b.17.

6

^+‡ Oock de Enghelen, die haer Vorstendom niet en behielden, maer verlieten haer behuysinghe, heeft hy bewaert tot den ordeel des grooten daechs, met eewighen banden inder duysternisse.

+ B vers 6

‡ 2.Pet. 2.a.4

7

^* Als oock Sodoma ende Gomorra, ende de omligghende Steden, die gelijckerwijse als dese wt gehoereert hebben, ende na eenen anderen vleesche ghegaen zijn, tot een Exempel gheset zijn, ende lijden des eewighen vyers pijne.

* Gen. 19.e.24. Deut. 29.d.23 Esa. 13.d.19. Ezec. 16.f.49 Ozee. 11.b.8. Amos. 4.c.11 Luce. 17.e.29. 2.Pet. 2.a.6.

8

Desseluen ghelijcken zijn oock dese droomers, die dat vleesch beulecken, ende de heerschappien verachten, ende de Maiesteyten lasteren.

9

^* Maer Michael de aertsEnghel, doen hy met den Duyuel twiste, ende met hem sprack ouer den lichaem Mosi, en dorste hy dat oordeel der lasteringhe niet strijcken, maer sprack: De Heere straffe dy.

* Sach. 3.a.1.

10

^* Maer dese lasteren, daer sy niet af en weten, maer wat sy natuerlijck bekennen, daer in verderuen sy haer, ghelijck de onuernuftighe dieren.

* 2.Pet. 2.c.12.

11

Wee haer^* want sy gaen den wech Cain, ende vallen inde dwalinghe^† Balaams, om ghewins wille, ende vergaen in der^‡ oproer Core.

* Gen. 4.a.8. 1.Ioan. 3.b.12.

† Nu. 22. 23. 24

‡ Nu. 16.e.32.

12

⁺ Dese vuylnissen brassen van uwen aelmissen sonder schromen, weyden haer seluen:^* Sy zijn wolcken sonder water, vanden wint om ghedreuen. Kale onuruchtbare boomen, tweemael verstoruen ende wtghewortelt,

+ C vers 12

* 2.Pe. 2.d.27

13

Wilde goluen der See, die haer eyghen schande wt schuymen, dwalende Sterren, den welcken bewaert is, de donckerheyt in der duysternisse in eewicheyt.

14

Enoch de seuende van Adam, heeft oock van sulcken ghepropheteert, ende ghesproken:^* Siet de Heere coemt met veel duysent Heylighen,

* Esaie. 3.c.12. Danie. 7.b.13. Actorum. 1.b.11 1.Tessa. 1:b.10 2.Tessa. 1.b.7 Apoca. 1.a.7.

15

Om ordeel te houden ouer alle, ende te straffen alle haer godloosen, om alle wercken haers godloosen wesens, daer si godloos mede gheweest zijn: Ende om al dat herde, dat die godloose Sondaers, teghen hem ghesproken hebben.

16

Dese murmureren, ende claghen alleneen, die na haren lusten wandelen,^‡ ende haer mont spreect stoute woorden, ende achten het aensien der personen, om nuts wille.

‡ Psal. 26.b.10.

17

Maer ghy, mijn beminden, vermaent v der woorden, die te voren gheseyt zijn, van den Apostelen onses Heeren Iesu Christi, doen sy v seyden:

18

^* Dat inden laetsten tijt, souden Bespotters zijn, die na haer eyghen lusten des godloosen wesens, wandelen.

* 1.Tim. 4.a.1. 2.Tim. 3.a.1. 2.Pet. 3.a.3.

19

Dese zijnt, die daer Secten maken, vleeschelijcke, die geenen gheest en hebben.

20

⁺ Maer ghy, mijn beminden, timmert v seluen, op uwen alderheylichsten ghelooue door den heylighen gheest, ende bidt,

+ D vers 20

21

Ende behout v inder liefde Gods, ende wacht op de bermherticheyt onses Heeren Iesu Christi, tot den eewighen leuen.

22

Ende houdet dit onderscheyt, dat ghy v haerder sommiger ontfermt,

23

Maer sommighe met vreesen salich maeckt, ende ruct haer wt den vyer ende haet den beuleckten rock des vleessches.

24

Maer dien, die v can bewaren sonder aenstoot, ende stellen voor dat aensicht zijner heerlijckheyt, onstraflijc met vruechden, Dien^* Gode, die alleen wijs is, onsen Salichmaker, sy Eere, ende Maiesteyt, ende gewelt, ende macht, nv ende tot alder eewicheyt, Amen.

* Rom. 16.c.26.