Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel spreect hier de rijcke deser Werelt aen, haer te voren leggende dat ordeel, ende zijn Broeders vermaent hy tot lanckmoedicheyt. Ende dat sy niet sweeren en souden, maer haer woordt soude zijn ia, dat ia is, ende neen dat neen is, ende die daer doolt, soudemen waer nemen.

1

⁺ VVel aen nv ghy^* rijcken, weent ende huylt ouer uwe elendicheyt, die ouer v comen sal.

+ A vers 1

* Amos. 6.a.1. Prou. 11.d.14 Luce. 6.d.24. 1.Tim. 6.b.9.

2

Vwe rijckdom is verrottet, uwe cleederen zijn motten aes gheworden.

3

Vwe gout ende siluer is verroest, ende haer roest sal v ter ghetuychenis zijn, ende sal uwe vleesch eten, als een vier.^† Ghy hebt v schatten vergadert in den laetsten daghen.

† Roma. 2.a.5.

4

^‡ Siet, dat loon der Arbeyders, die uwe landt ingheoogst hebben, ende van v vercort is, dat roept: Ende dat roepen der Oogsters, is ghecomen voor de ooren des Heeren Sebaoth.

‡ Leuit. 19.c.13. Deut. 24.c.15 Tobi. 4.c.15.

5

^* Ghy hebt wel gheleeft op Aerden, ende uwe wellust ghehadt, ende uwe herten gheweydet, als op eenen slachtdach.

* Iob. 21.b.23. Luce. 16.c.19.d.25.

6

Ghy hebt den Rechtueerdighen verordeelt, ende ghedoodt, ende hy en heeft v niet wederstaen.

7

⁺ Soo zijt nv verduldich, lieue Broeders, tot op de toecoemst des Heeren. Siet, een Ackerman verbeyt op de costelijcke vrucht der Aerde, ende is daer verduldich ouer, tot dat hy ontfanghe den morghen reghen ende auontreghen.

+ B vers 7

8

Weest ghy oock verduldich, ende sterckt uwe herten, want de toecoemst des Heeren is na by.

9

En sucht niet teghen malcanderen, lieue Broeders, op dat ghy niet verdoemt en wort. Siet, de richter is voor de duere.

10

Neemt, mijn lieue Broeders, tot een Exempel des lijdens, ende der verduldicheyt, de Propheten, die tot v ghesproken hebben, in den naem des Heeren.

11

^† Siet, wy prijsen salich, die daer verdraghen hebben.^‡ De verduldicheyt Iobs hebt ghy ghehoort, ende dat eynde des Heeren hebt ghy ghesien. Want de Heere is^* bermhertich ende een ontfermer.

† Matt. 5.a.11.

‡ Iob. 1.c.21. 2.b.7.

* Num. 14.c.18

12

⁺ Maer voor alle dingen,^† mijn Broederen, en sweret niet, noch by den Hemel, noch by der Aerden, noch met eenighen anderen Eedt. Maer uwe woort sy, Ia, dat Ia is. Ende Neen, dat Neen is, op dat ghy niet in gheueynstheyt en vallet.

+ C vers 12

† matt. 5.d.34 2.Cor. 1.c.18.

13

Lijdt yemant onder v? Die bidde. Is yemant goets moets?^† Die singhe Psalmen.

† Coloss. 3.b.16.

14

Is yemant cranck? Die roepe tot hem de Outsten van der ghemeynte, ende late haer ouer hem bidden, ende hem saluen met oly in den Name des Heeren:

15

Ende dat ghebet des gheloofs, sal den crancken helpen, ende de Heere sal hem oprichten: Ende ist dat hy sonden ghedaen heeft, soo sullen sy hem vergheuen zijn.

16

Deen belijde den anderen zijne sonden, ende bidt voor malcanderen, op dat ghy ghesont wordet. Des rechtueerdighen ghebedt vermach veel, alst ernstich is.

17

^‡ Elias was een mensch ghelijck als wy, ende hy badt een ghebet, dattet niet reghenen en soude, ende ten reghende niet op Aerden in drie Iaren ende ses Maenden.

‡ 3.Reg. 17.a.1. Luce. 4.c.25.

18

^* Ende hy badt noch eenmael, ende de Hemel gaf den Reghen, ende de Aerde bracht de vrucht.

* 3.Reg. 18.a.1.g.42.

19

Lieue Broeders,^† waert dat yemant onder v dwalende werde vander waerheyt, ende yemandt bekeeret hem,

† Matt. 18.b.15

20

Die sal weten, dat wie den Sondaer bekeert heeft van der dwalinge zijns weechs, die heeft een siel van den doot gheholpen, ende sal bedecken de menichte der sonden.