Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel verbiet strijt ende nijt, vermanende ons dat wy de werelt ende den Duyuel verloochenen sullen, ende gaen tot Godt, ende dat door liefde, ende voort stelt hy van der liefden, die de een totten anderen behoort te hebben.

1

⁺ VAn waer coemt strijdt ende crijch onder v? En coemt het niet van daer, namelijck, wt uwen wellusten, die daer strijden in uwen leden?

+ A vers 1

2

Ghy zijt begherich, ende de vercrijcht daer niet mede. Ghy hatet ende benijdet, ende en winnet daer niet mede.

[p. 100v]

Ghy strijdet ende crijghet, ghy en hebt niet: Daerom, dat ghy niet en bidt.

3

Ghy bidt, ende en ontfanghet niet,^* Daerom, dat ghy qualijck biddet, te weten, daer toe, dat ghijt met uwen wellusten verteret.

* Matt. 20.c.22 Rom. 8.d.26.

4

Ghy Ouerspeelders ende ouerspelerschen, en weet ghy niet,^† dat der werelt vrientschap, Gods viantschap is?^‡ Wie der werelt vriendt zijn wil, die sal Gods viant zijn.

† 1.Ioan. 2.b.15

‡ Ioan. 15.c.19 Galat. 1.b.10.

5

Ofte laet ghy v duncken, dat de Scrift te vergheefs spreect:^‡ Den gheest, die in v woont, lustet teghen den haet,

‡ Rom. 8.d.26.

6

Ende^* geeft rijckelijck ghenade:

* Prou. 3.d.31.

7

So zijt nv Gode onderdanich.^† Wederstaet den Duyuel, soo vliet hy van v.

† 1.Pet. 5.b.9

8

⁺ Ghenaket tot Gode, soo ghenaket hy tot v. Reynicht de handen, ghy Sondaers, ende maeckt uwe herten cuysch, ghy wanckelmoedighen.

+ B vers 8

9

^† Sijt elendich, ende draecht rouwe, ende weendt. Vwe lachen verkeere hem in weenen, ende uwe vrolijcheyt in truericheyt.

† Luce. 6.d.25.

10

^‡ Verootmoedicht v voor Gode, soo sal hy v verhooghen.

‡ Prou. 29.d.23 Matt. 23.a.11. Luce. 14.b.11. 18.c.14. 1.Petri. 5.b.5.

11

En achterclapt niet onder malcanderen lieue Broeders. Wie achterclap spreect van zijnen broeder, ende ordeelt zijnen broeder, die achterclapt der Wet, ende ordeelt der Wet. Maer oordeelt ghy de Wet, soo en zijt ghy gheen Vader des Wets, maer een Richter.

12

Daer is een eenich Wetgheuer, die can salich maken ende verdoemen.^* Wie zijt ghy, ghy die eenen anderen oordeelt?

* Rom. 14.a.4

13

^† Wel aen, Ghy die nv segt: Heden oft morgen willen wy gaen in die oft in die Stadt, ende willen daer een Iaer ligghen, ende hanteren, ende ghewinst doen,

† Ezec. 28.a.2. Luce. 12.b.18.

14

Ghy die niet en weet, wat morghen geschieden sal. Want wat is uwe leuen?^* Eenen damp isset, die eenen cleynen tijt duert, maer daer na verdwijnt hy.

* Esai. 40.a.6. Eccli. 14.c.16

15

Daer voor sout ghy segghen:^† Ist dat de Heere wil ende wy leuen, soo sullen wy dit oft dat doen.

† Actor. 18.c.21. 1.Cor. 4.d.19. Hebr. 6.a.4.

16

Maer nv beroemt ghy v, in uwen hoomoet. Alle sodanigen Roem is boos.

17

^‡ Want die daer weet wat goets te doen, ende en doet het niet, dien ist sonde.

‡ Luce. 12.e.47