Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel bewijst ons tquaet dat wter tongen spruyt, also wel in leeringe als in gemeyn leuen, ondersceydende de leeringe Gods ende der werelt.

1

⁺ LIeue Broeders,^* een yeghelijck en onderwinde hem niet een Leeraer te zijn,^† ende wetet, dat wy dies te meer oordeels ontfanghen sullen.

+ A vers 1

* Matt. 23.a.7.

† Hebr. 13.c.17.

2

Want wy faelgeren alle menichuoudelijcken.^† Ende wie oock in geen woort en faelgeert, die is een volcomen man, ende can oock dat gantse lichaem in den tome houden.

† Eccli. 14.a.1. 16.c.16. 25.b.11

3

Siet, de peerden houden wy inden toom, dat si ons ghehoorsaem zijn, ende stieren dat gantse lichaem.

4

Siet, de Schepen, hoe wel sy groot zijn, ende van stercken winden ghedreuen worden, soo worden sy nochtans ghestiert, met eenen cleynen Roer, waer die henen wil, diet regeert.

5

^+‡ Also is oock de tonghe een cleyn lit, ende richt groote dinghen aen. Siet, een cleyn vier, hoe grooten Bosch steecktet aen:

+ B vers 5

‡ Eccli. 28.b.14

6

Ende de tonghe is oock een vier, een Werelt vol ongherechticheyt: Alsoo is de tonghe onder onse leden, ende beulect het gantse lichaem, ende onsteect al onse wandelinghe, als sy van der Hellen ontsteecken is.

7

Want alle nature der dieren, ende der voghelen, ende der slanghen, ende der Seewonderen, worden ghetempt, ende zijn ghetempt van der menschelijcker nature:

8

Maer de tonghe en can van gheenen mensche ghetempt worden, dat onrustich quaet, vol dootlijcx fenijns.

9

Door haer louen wy Godt den Vader: Ende door haer vloecken wy den menschen,^† nae den Beelde Gods ghemaect.

† Gene. 1.d.26. Sapien. 2.d.23

10

Wt eenen mont gaet lof ende vloecken. Het en behoort, lieue Broeders also niet te zijn.

11

Geeft oock een Fonteyn wt eenen gate suet ende bitter?

12

Can oock, lieue Broeders, een vijgheboom oly, ofte een Wijnstock vijghen dragen? Alsoo en can oock een Fonteyn gheen sout ende suet water gheuen.

13

⁺ Wie is wijs ende cloeck onder v?^‡ Die bewijse met zijne goede wandelinge zijn wercken, in der saechtmoedicheyt ende wijsheyt.

+ C vers 13

‡ Ephe. 5.b.8. Colos. 4.a.4

14

^* Maer hebt ghy bittere nijdicheyt, ende twist in uwe herten, so en beroemt v niet, ende en lieget niet tegen de waerheyt.

* Rom. 13.b.13.

15

Want dat en is de^† wijsheyt niet, die van bouen neder coemt, maer aertsch, menschelijck, ende duyuelsch:

† 1.Cor. 2.a.6.

16

Want waer^‡ nijt ende twist is, daer is ongeordineertheyt, ende enckel boos dinck.

‡ 1.Corin. 3.a.3. Galat. 5.c.20.

17

Maer^* de wijsheyt van bouen af, die is ten eersten cuysch, daer na vreedtsaem, vriendelijc, laet haer geseggen, vol bermherticheyt ende goeder vruchten, onpartijch, sonder gheueynstheyt.

* Sap. 6.b.13

18

Maer de vrucht der gerechticheyt wort gesaeyt in vrede, den ghenen, die den vrede houden.