Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel leert, dat by Godt geen aensien der Personen en is, ende onderwijst ons in de wercken der ontfermherticheyt, ende seyt hoe dat tgelooue sonder wercken doot is.

1

⁺ LIeue Broederen, en houdet daer niet voor: Dat het ghelooue aen Iesum Christum onsen Heere der heerlijcheyt^* aensien der Personen lijde.

+ A vers 1

* Leuit. 19.d.15. Deute. 1.c.17. Pro. 24.c.23. Eccli. 42.a.3.

2

Want waert datter in uwe vergaderinge een man quame, met eenen gulden ringhe, ende met eenen heerlijcken cleede: Ende daer quame oock een arm man in eenen verachten cleede,

3

Ende ghy siet op den ghenen, die dat heerlijcke cleet draecht, ende spreeckt tot hem: Set v alhier op de beste stede: Ende spreeckt tot den armen: Staet ghy daer: ofte set v hier onder tot mijnen voeten:

4

Ende en bedenckt het niet recht, maer ghy wordet Richters, ende maeckt een boos onderscheyt.

5

Hoort toe, mijn lieue broeders,^* en heeft Godt niet vercoren de armen op deser werelt, die aent ghelooue rijck zijn, ende Erfghenamen des rijcks, welc hy^† beloeft heeft, den ghenen, die hem lief hebben?

* Matth. 5.a.3. Ioan. 7.d.48 1.Cor. 1.d.24.

† 1.Cor. 2.b.9.

6

Maer ghy hebt den arme oneere gedaen.^* En zijn de Rijcken niet die, die ghewelt aen v ghebruycken, ende trecken v voor dat Gherichte?

* Iacob. 5.a.8.

7

En lasteren sy niet den goeden Name, daer ghy af ghenoemt zijt?

[p. fol. 100r]

8

⁺ Ist dat ghy de Coninclijcke Wet volbrengt, na der^* Scrift: Hebt dijnen naesten lief, als v seluen, soo doet ghy wel:

+ B vers 8

* Leuit. 19.e.18. Marc. 12.c.31. Rom. 13.b.9.

9

Maer ist dat ghy de Persoon aensiet, so doet ghy sonde, ende wordet ghestraft van der Wet, als de Ouertreders.

10

^† Want al ist dat yemant de gantsche Wet hout, ende sondicht aen eenen, die is aen allen schuldich.

† Ezec. 18.b.10.

11

Want die daer geseyt heeft:^‡ Ghy en sult gheen ouerspel doen, die heeft oock gheseyt: Ghy en sult niet dooden. Al ist dat ghy nv geen ouerspel en doet, maer doodet, so zijt ghy een Ouertreder des Wets.

‡ Exo. 20.c.14. Matt. 5.c.27.

12

Also spreect, ende also doet, als die daer sullet door de Wet der vrijheyt geordeelt worden.

13

^* Want daer sal een onbermhertich ordeel ouer dien gaen, die gheen bermherticheyt ghedaen en heeft:^† Ende de bermherticheyt beroemt haer teghen dat oordeel.

* Mat. 18.d.35. Luce. 16.c.25.

† Matt. 25.c.35.

14

^‡ Wat helpt het, lieue Broeders, al ist dat yemant seyt: Hy hebbe het ghelooue, ende en heeft doch de wercken niet? Can hem oock het ghelooue salich maken?

‡ Matt. 7.c.26. Iacob. 1.d.23.

15

^* Maer waert dat een Broeder oft Suster bloot ware, ende gebreck hadde der dagelijcxscher neeringe,

* Luce. 3.b.11. 1.Ioan. 3.c.17

16

Ende yemant onder v sprake tot haer: Gaet henen in vrede, wermt v, ende versadicht v, ende en gauet haer niet, wat des lichaems nootdruft is, wat holp haer dat?

17

Also oock het ghelooue, ist dattet gheen wercken en heeft, soo ist doot aen hem seluen.

18

⁺ Maer yemant mocht segghen: Ghy hebt het ghelooue, ende ick heb de wercken. Bewijst my dijn ghelooue met dijne wercken: So wil ick dy oock mijn gelooue bewijsen, met mijnen wercken.

+ C vers 18

19

Ghy gelooft, datter een eenich Godt is? Ghy doet daer wel aen.^† De Duyuelen gheloouent oock, ende beuen.

† Matt. 8.d.28. Marc. 1.c.24.

20

Maer wilt ghy weten, ghy ydele mensch, dat het ghelooue sonder wercken doot sy?

21

En is Abraham onse vader niet, door de wercken rechtueerdich gheworden, doen hy zijnen soon Isaac op den Altaer offerde?

22

Daer siet ghy, dat het gelooue mede ghewracht heeft, aen zijne wercken, ende door de wercken, is het ghelooue volcomen gheworden.

23

Ende de Scrift is veruult, die daer spreeckt:^‡ Abraham heeft Gode gelooft, ende het is hem ter gerechticheyt gherekent, ende is een vrient Gods geheeten.

‡ Gene. 15.b.16 Roma. 4.a.3. Galat. 3.a.6.

24

So siet ghy nv, dat de mensch door de wercken rechtueerdich wort, ende niet door het ghelooue alleen.

25

^* Des seluen gelijcken de Hoere Rahab, is sy niet door de wercken rechtueerdich gheworden, doen sy de boden ontfinc, ende lietse door eenen anderen wech wt?

* Iosue. 2.a.1.b.4. 6.d.25. Hebr. 11.d.31.

26

Want ghelijck als het lichaem sonder gheest doot is, alsoo is oock het ghelooue sonder wercken doodt.