Den Bibel, Inhoudende dat Oude ende Nieuwe Testament (Biestkensbijbel)

[p. 99v]

De Epistel S. Iacobs.

¶ Dat .I. Capittel.

¶ De Apostel vermaent ons dat wy de temptatien wederstaen sullen, bewijsende dat Godt gheen oorsake en is van onse temptatien, noch van onse sonden, Ende leert wat den rechten Gods dienst is.

1

⁺ IAcobus een knecht Gods, ende des Heeren Iesu Christi. Den twelf geslachten^* die daer zijn hier ende daer: Vruechde te voren.

+ A vers 1

* Actorum. 8.a.1. 1.Petri. 1.a.1.

2

Mijn lieue Broeders, achthet voor enckele blijschap,^† wanneer ghy in menigerley aenuechtinghen valt,

† Roma. 5.a.3.

3

^‡ Ende weet, dat uwe ghelooue, ist dat het oprecht is, verduldicheyt werckt.

‡ Sach. 13.b.9 Roma. 5.a.3. 1.Pet. 1.b.6.

4

Maer de verduldicheyt moet bestandich blijuen tot aen den eynde, op dat ghy zijt volcomen ende gheheel, ende gheen ghebreck en hebbet.

5

^* Ende ist dat yemanden onder v wijsheyt ghebreeckt, die bidde van Gode, die daer gheeft eenuuldelijck eenen yeghelijcken, ende en verwijtet niemanden. Soo sal sy hem ghegeuen worden.

* Prou. 2.a.6. Ioan. 16.e.23.

6

^† Mer hy bidde int ghelooue, ende en twijfele niet: Want wie daer twijffelt, die is ghelijck als een golue der See, die van den winde ghedreuen ende beweecht wort.

† Mat. 7.a.7. Mar. 11.c.24. Luce. 11.b.9. Ioan. 14.b.14. 16.c.24. 1.Ioan. 3.d.22 5.c.14.

7

Alsulcken mensch en dencke niet, dat hy yet van den Heere ontfanghen sal.

8

Een twijfelmoedich mensch, is onghestadich in allen zijnen weghen.

9

⁺ Maer een broeder, die nederich is, die beroeme hem zijnder hoocheyt:

+ B vers 9

10

Ende die daer rijck is, beroeme hem zijnder nederheyt.^‡ Want ghelijck als een bloem des gras, sal hy vergaen.

‡ Esa. 40.a.6. Eccli. 14.b.16 1.Cori. 7.e.31. 1.Pet. 1.d.24 1.Ioan. 2.c.17 Iaco. 4.b.14

11

De Sonne gaet op met der hitte, ende dat gras verwelct, ende de bloeme valt af, ende zijn schoon ghedaente verderft: Alsoo sal de rijcke in zijner haue verwelcken.

12

^* Salich is de man, die de aenuechtinghe verdraecht. Wandt nae dien hy beproeft is, sal hy de^† Croon des leuens ontfangen, die Godt beloeft heeft den ghenen, die hem lief hebben.

* Iob. 5.b.17.

† 4.Esd. 2.f.43 2.Tim. 4.b.8 Apoca. 2.b.10

13

Niemant en segge, als hy becoort wort, dat hy van Gode becoort worde: Want Godt en is geen becoorder tot quaet. Hy en becoort nyemanden,

14

Maer een yeghelijck wort becoort, wanneer hy van zijn eyghen lust afgetogen ende gelockt wort.

15

Daer na wanneer de lust ontfanghen heeft, baert sy de sonde: Ende de sonde, wanneer sy volbracht is, baert sy den doot.

16

En dwalet niet, lieue Broeders.

17

^‡ Alle goede gaue, ende alle volcomen gaue, coemt van bouen neder, vanden Vader des Lichts, by welcken en is gheen veranderinghe noch wisselinghe des Lichts ende der duysternisse.

‡ Prouer. 2.a.6 Ioan. 3.d.31. 1.Cor. 4.b.7.

18

^* Hy heeft ons ghebaert na zijnen wille, door dat woort der waerheyt, op dat wy waren eerstelinghen zijner Creaturen.

* Ioan. 1.a.12. 1.Cor. 4.c.13. 1.Pet. 1.d.23.

19

Daerom lieue Broeders,^† Een yegelijck mensch si snel om te hooren, maer lancksaem om te spreken, ende lancsaem tot toornicheyt.

† Pro. 17.d.27. Eccli. 5.b.13.

20

Want des menschen toornicheyt, en doet niet wat voor Godt recht is.

21

^+‡ Daerom soo legt af alle onreynicheyt ende alle boosheyt, ende neemt dat woordt aen, met saechtmoedicheyt, dat in v gheplant is, welck can uwe sielen salich maken.

+ C vers 21

‡ Rom. 13.b.12. Collos. 3.a.8.

22

^* Maer zijt daders des woorts ende gheen hoorders alleenlijc, daer ghy v seluen mede bedrieget.

* Mat. 7.c.21. Luce. 6.e.46. Roma. 2.b.13.

23

Want ist dat yemant is een hoorder des woorts, ende gheen doender, die is ghelijc eenen man, die zijn lijflijck aensicht in eenen spieghel beschouwet.

24

Want daerna als hy hem besien heeft, gaet hy van stonden aen daer af, ende vergeet hoe hy ghestelt was.

25

^* Maer wie doorsiet in de volcomen Wet der vrijheyt, ende daer in blijft, ende en is geen vergetelijc hoorder, maer een doender, die selue sal salich zijn in zijner daet.

* Matt. 5.b.19.

26

Ist dat hem yemant onder v laet duncken, hy dient Gode^* ende en hout zijn tonghe niet inden thoome, maer verleyt zijn herte, diens Gods dienst is onnut.

* Psal. 34.b.13. 1.Pet. 3.b.10. Iacobi. 3.a.5.

27

Een reyn ende onbeuleckte Gods dienst, voor Godt den Vader, is dese: De Weesen ende Weduwen in haer bedroeffenisse te besoecken, ende hemseluen^† van der werelt ombeuleckt te bewaren.

† 1.Ioan. 2.c.15.