Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ De Apostel verwect ons tot broederlijcke liefde ende altijt duecht te doene aen onsen naesten, ende vermaent ons dat wy te vreden sullen zijn met tghene dat ons Godt in deser werelt verleent: Leerende voort met wat offerhande dat wy Godt versoenen sullen. Ende bidt dat sy dese vermaninghe int goede houden souden.

1

⁺ BLijft vast in der^* broederlijcker Liefde.

+ A vers 1

* Rom. 12.b.10.

2

^† Herbergich te zijn en vergeet niet, want door dat selue hebben sommighe, sonder haer weten, Enghelen gheherbercht.

† Gen. 18.a.3. 19.a.2. Rom. 12.b.13. 1.Pet. 4.b.9.

3

^* Ghedenckt der ghebondenen, als die metghebonden: Ende der ghener, die droeffenisse lijden, als ghi die oock noch int lichaem leuet.

* mat. 25.c.37.

4

^† De Echt sal eerlijck gehouden worden by allen, ende dat Echtbedde onbeulect: Maer de Hoereniagers ende de Echtbrekers, sal Godt oordeelen.

† Tob. 6.d.16.

5

^* De wandelinghe sy sonder giericheyt, ende^† laet v ghenoeghen aen dien, dat voorhanden is. Want hy heeft gheseyt:^‡ Ick en wil v niet verlaten noch versuymen:

* Exodi. 23.a.8.

† Eccl. 29.d.28

‡ Deute. 31.b.8. Iosue. 1.a.5.

6

Alsoo, dat wy derren segghen:^* De Heere is mijn Hulper, ende ick en wil my niet vreesen, wat soude my een Mensche doen?

* Psa. 56.a.12 118.a.6.

7

Ghedenct aen uwe Leeraers, die v dat woort Gods geseyt hebben, welcker eynde siet aen, ende volghet haren ghelooue na.

8

⁺ Iesus Christus, gisteren ende^† heden, ende die selue oock in eewicheyt.

+ B vers 8

† Hebre. 3.b.7.

9

En^‡ laet v niet met menigherley ende vreemde leeringen omdrijuen, want het is costelijc dinck^* dat dat herte vast worde, dwelck gheschiet door ghenade, niet door spijse, daer af gheen nutticheyt en hebben, die daer mede omme gaen.

‡ Mat. 24.a.4

* Ioan. 6.f.27. Rom. 14.c.17

10

Wy hebben eenen Altaer, daer af gheen macht en hebben te eten, die der Hutten dienen.

11

^* Want welcker dieren bloet door den hoogen Priester ghedragen wort in dat Heylige, voor de sonde, der seluer lichamen worden verbrant buyten den Leger.

* Exo. 29.b.14. Leuit. 4.c.12. 6.d.30. 16.f.27 Num. 19.a.5.

12

^† Daerom oock Iesus, op dat hy heylichde dat volck door zijn eyghen bloet, heeft hy gheleden buy-ten voor der poorten.

† Ioan. 19.b.18.

13

So laet ons nv tot hem henen wtgaen, wt den Legher, ende zijn versmaetheyt dragen.

14

Want wy en hebben hier gheen blijuende stadt^* maer de toecomende soecken wy.

* Philip. 3.c.20.

15

^+† So laet ons nv offeren, door hem, dat Lofoffer Gode altijt, dat is, de vrucht der lippen, die zijnen Naem belijden.

+ C vers 15

† Psal. 92.a.1.

16

Wel te doen, ende mede te deylen, en vergeet niet, want sulcke^‡ offerhanden behaghen Gode wel.

‡ Phil. 4.c.18.

17

^* Sijt ghehoorsaem uwen Leeraers, ende volget haer: Want sy waken ouer uwe sielen^† als die daer rekenschap voor gheuen sullen: Op dat sy dat met vruechden doen, ende niet met suchten, want dat en is v niet goet.^‡ Bidt voor ons.

* 1.Tessa. 5.b.12 1.Timo. 5.c.17

† Ezec. 33.b.8.

‡ Actor. 4.c.29. 12.a.5. Ephes. 6.c.19.

18

Onse troost is die, dat wy een goede conscientie hebben, ende beneerstighen ons, een goede wandelinge te leyden by allen.

19

Maer ick vermaen tot oueruloet, sulcx te doen, op dat ick opt alder eerste, weder tot v come.

20

⁺ Godt des vredes, die van den dooden wtgeleyt heeft, den grooten^* Herder der schapen, door dat bloet des eewigen Testaments, onsen Heere Iesum,

+ D vers 20

* Esai. 40.b.11. Ezec. 34.d.23. Ioan. 10.a.11. 1.Pet. 5.a.4.

21

^‡ Die make v gheschickt in allen goeden wercken, te doen zijnen wille, ende doe in v, wat voor hem behaghelijck is, door Iesum Christum, den welcken sy Eere van eewicheyt tot eewicheyt, Amen.

‡ Deu. 8.d.18. Phili. 2.b.13.

22

Ick vermaen v, lieue Broeders, Houdet my dat woordt der vermaninghe ten goede, want ick heb v opt cortste gheschreuen.

23

Wetet, dat de broeder Timotheus weder los is, met welcken, ist dat hy haest coemt, wil ick v sien.

24

Gruetet alle uwe Leeraers, ende alle Heylighen. V grueten de Broederen wt Italia.

25

De ghenade sy met v allen, Amen.

Gheschreuen wt Italia, door Timotheum.