Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ De Apostel betoont hier dat de oude Wet de sonde niet af en doet, ende hoe Christus dat volcomelijck ghedaen heeft. Verhaelt oock vanden hooghen Priesterschap, ende hoe hy zijn Wetten in onse herten schrijuen wil, ende onse sonden niet meer ghedencken.

1

⁺ VVant de Wet^* heeft de schaduwe vanden toecomenden goeden, niet dat wesen der goeden selue: Alle Iaer moetmen ghestadelijck offeren eenderley offerhande, ende en can die ghene, die daer offeren, niet volcomen maken:

+ A vers 1

* Deute. 16.a.5 Coloss. 2.c.17. Hebre. 8.a.5.

2

Anders hadde dat offeren opgehouden, Waert dat die, die inden Godsdienst zijn, gheen conscientie meer en hadden vanden sonden, als sy eens ghereynicht waren:

3

Maer daer gheschiet slechs door de seluen een ghedachtenis der sonden alle Iaer.

4

^† Want het is onmoghelijck door Osschen ende Bocken bloet, sonden wech te nemen.

† Leuit. 19.c.22. Num. 19.a.4 Hebre. 9.b.13

5

Daerom, als hy inde werelt coemt, spreeckt hy:^‡ Offer ende gaue en hebt ghy niet ghewilt. Maer dat Lichaem hebt ghy my toe bereyt:

‡ Psal. 40.b.7 Esaie. 50.b.5. Amos. 5.f.22.

6

Brandtoffer ende Sondoffer en behaghen v niet.

7

Doen sprack ick: Siet, ick come, Inden Boecke staet voornamelijck van my gheschreuen: Dat ick doen sal, Godt dijnen wille.

8

Te voren, als hy gheseyt hadde: Offer ende gaue, Brantoffer ende Sondoffer, en hebt ghy niet ghewilt, sy en bebaghen v oock niet (welcke nae der Wet gheoffert worden.)

9

Doen sprack hy: Siet, ick come om te doen, Godt, dijnen wille. Daer brengt hy dat eerste af, op dat hy dat ander insette.

10

In welcken wille wy gheheylicht zijn, eenmael gheschiet,^* door dat offer des lichaems Iesu Christi.

* Hebre. 9.b.12

11

⁺ Ende een yeghelijck Priester is ingeset, dat hy alle daghe Godsdienst doe, ende dickwils eenderley offerhande doe, die de sonden nemmermeer en connen afnemen.

+ B vers 11

12

Maer dese, doen hy heeft een offer voor de sonden gheoffert, dat eewelijck ghelt,^* sit hy nv ter rechter handt Gods,

* Psal. 110.a.1. Actor. 2.c.22. 1.Cor. 15.c.25. Ephe. 1.d.20. Colloss. 3.a.1.

13

Ende wacht nv voortaen, tot dat zijn Vianden tot een voetbanck zijnder voeten gheleydt worden.

14

Want met eenen offer, heeft hy in eewicheyt volcomen ghemaeckt, die gheheylicht worden.

15

Dat betuycht ons oock de heylighe gheest. Want nadien hy te voren gheseyt hadde:

16

^† Dat is dat Testament, dat ick haer maken wil na dien daghen, spreeckt de Heere: Ick wil mijn Wet in haer herten geuen, ende in haren sin wil ickse schrijuen,

† Ierem. 31.e.31 Rom. 11.d.27 Hebre. 8.b.8.

17

Ende haerder sonden, ende haerder ongherechticheyt en wil ick niet meer ghedencken.

18

Maer waer der seluer vergheuinghe is, daer en is gheen offer meer voor de sonde.

19

⁺ Dewijle wy dan nv hebben, lieue Broeders, de vrijmoedicheyt tot den inganck, in dat Heylighe, door dat bloet Iesu,

+ C vers 19

20

Welcken hy ons toe bereyt heeft, tot den nieuwen leuendighen wech, door dat voorhancsel, dat is, door zijn vleesch,

21

Ende hebben eenen hooghen Priester ouer dat huys Godts:

22

Soo laet ons henen toegaen, met waerachtigher herten, in een volcomen ghelooue,^* besprenget in onse herten, ende los vander quader conscientien,

* Exo. 24.b.8. 1.Petri. 1.a.2.

23

Ende ghewasschen aent Lichaem, met^† reynen water, ende laet ons vast houden aender belijdinghe der hopen, ende niet twijfelen. Want hy is ghetrou, diese beloeft heeft.

† Eze. 36.d.25

24

Ende laet ons onder malcanderen ons seluen waernemen, met verwecken totter liefde ende goede wercken,

25

Ende niet verlaten onse vergaderinge, als sommige plegen, maer onder malcanderen vermanen:^‡ Ende dat soo veel meer, so veel ghy siet, dat de dach ghenaket.

‡ Rom. 13.b.12.

26

^* Want ist dat wy moetwillichlijck sondighen, na dien wy de kennisse der waerheyt ontfanghen hebben, soo en hebben wy voortaen, gheen ander offerhande voor de sonden,

* Num. 15.c.30. Mat. 12.d.24 2.Pet. 2.d.20. Hebre. 6.a.6.

27

Maer een verschrickelijc verwachten der ordeels, ende des vyers strengheyt, welcke de Wedervechters verteren sal.

28

Wanneer yemant de wet Mosi breect, die moet steruen sonder barmherticheyt^* door twee oft drie ghetuyghen.

* Deut. 17.b.11 19.c.15. Mat. 18.b.16. 2.Cor. 13.a.1.

29

⁺ Hoe veel ergher straffe, meynt ghy sal die verdienen, die den Soon Gods met voeten treedt, ende dat bloet des Testaments onreyn achtet door welck hy gheheylicht is, ende den gheest der ghenaden scheyndet?

+ D vers 29

30

Want wy weten den genen, die daer spreect:^† De wrake is mijn, ick wil vergelden, spreeckt de Heere. Ende wederom:^‡ De Heere sal zijn volck ordeelen.

† Deut. 32.e.35. Rom. 12.c.19.

‡ Deu. 32.e.36.

31

Het is verschrickelijc, inde handen des leuenden Gods te vallen.

32

Gedenct aen de voorleden dagen, in welcken ghy verlicht [zijnde] eenen grooten strijt des lijdens verdraghen hebt:

33

Eens deels selue door versmaetheyt ende droeffenisse, een gaepspel gheworden, eens deels, gemeynschap gehadt met den ghenen, dien het alsoo gaet.

34

Want ghy hebt met^* mijnen banden medelijden ghehadt, ende den roof uwer goeden met vruechden verdraghen^† als ghy die wetet, dat ghy by v seluen een beter ende blijuende Haue inden Hemel hebt.

* Actor. 21.e.33. Ephes. 4.a.1. Philip. 1.a.6. 2.Tim. 2.b.9.

† Mat. 5.a.12

35

En werpt uwe betrouwen niet wech, welc een groote belooninge heeft.

36

^‡ Maer verduldicheyt is v van nooden, op dat ghy den wille Gods doet, ende de beloftenis onfanghet.

‡ Hebre. 12.a.1.

37

^* Want noch ouer een cleyne wijle, soo sal comen, die daer toecomende is, ende niet vertoeuen.

* Abacuc. 2.a.3. 1.Pet. 1.a.6.

38

^† Maer de rechtueerdighe sal des geloofs leuen: Maer wie wijcken sal, aen dien en sal mijn siel gheen welbehaghen hebben.

† Rom. 1.b.17. Galat. 3.b.11.

39

Maer wy en zijn niet van dien, die daer wijcken, ende verdoemt worden, Maer van dien, die daer gheloouen, ende de siele behouden.