Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ De Apostel betoont hoe Christus beter dienaer is dan de dienaers des Ouden Testaments, ende verhaelt hoe hy zijn Wetten in haer sinnen ende herten gheuen wil.

1

⁺ DAt is nv de summa des gheens, daer wy af spreken.^* Wy hebben eenen sulcken hooghen Priester,^† die daer sit ter rechter hant op den stoel des Maiesteyt inden Hemel,

+ A vers 1

* Hebr. 5.a.1. 6 c.20. 9.b.11.

† mar. 16.c.19 Ephe. 1.d.20. Colloss. 1.a.1.

2

Ende is een bediener der heyligher goeden, ende der waerachtigher Hutten, welcke God opghericht heeft, ende gheen mensch.

3

^‡ Want een yegelijck hooghe Priester wort ingheset om te offeren gauen ende offerhanden.^* Daerom moet dese ooc wat hebben, dat hy offere.

‡ Leuit. 9.a.7.

* Ephesi. 5.a.2.

4

Waert dat hy nv op Aerden ware, so en waer hy geen Priester, dewijle datter Priesters zijn, die na der Wet gauen offeren,

5

^† Welcke dienen den voorbeelde, ende der schaduwe der Hemelscher goeden, gelijc dat godlijcke antwoort tot Mosen sprack: Doen hy de Hutte volbrenghen soude:^‡ Siet toe, sprack hy, dat ghy alle dinck maeckt nae den voorbeelde, dat v opten Berch ghetoont is.

† Collos. 2.c.17 Hebre. 10.a.1

‡ Exo. 25.d.40 Acto. 7.f.44

6

⁺ Mer nv heeft hy een beter Ampt vercregen, als die eens beteren Testaments^* Middelaer is: Welcke oock op betere beloften staet.

+ B vers 6

* 1.Tim. 2.a.5. Hebr. 9.c.15. 12.d.24.

7

Want waert dat tgene dat eerste, onstraflijck geweest ware, soo

[p. 97r]

en werder gheen ruymte tot eenen anderen ghesocht:

8

Want hy straft haer ende seyt:^* Siet, de daghen comen, spreeckt de Heere, dat ick ouer dat huys Israel, ende ouer dat huys Iuda^* een Nieu Testament maken wil:

* Iere. 31.d.31.

* 2.Cor. 3.b.6.

9

Niet na den Testamente, dat ick ghemaeckt hebbe met haren Vaderen, in dien daghe, doen ick haer hant aengreep, om haer wt te leyden wt Egypten lande.^‡ Want sy en zijn niet ghebleuen in mijnen Testamente, so en heb ick haerder oock niet willen achten, spreeckt de Heere.

‡ Actu. 7.e.39.

10

^+* Want dat is dat Testament dat ick maken wil den huyse Israels, na desen daghen, spreeckt de Heere:^† Ic wil mijn Wet gheuen in haren sinne, ende in haer herte wil ickse schrijuen.^‡ Ende wil haer Godt zijn, ende sy sullen mijn volck zijn:

+ C vers 10

* Iere. 31.d.33.

† Esa. 51.b.7.

‡ Sach. 8.b.8. Apoc. 21.b.7.

11

^* Ende niemant en sal zijnen naesten leeren, noch yemant zijnen Broeder, ende segghen: Bekent den Heere. Want sy sullen my alle kennen, vanden cleynsten aen, tot den grootsten toe.

* 1.Io. 2.d.27.

12

Want ic wil ghenadich zijn haerder onduecht, ende haer sonden, ende haerder ongherechticheyt en wil ick niet meer ghedencken.

13

In dien dat hy seyt: Een nieu, maeckt hy, dat eerste oudt. Maer wat out ende oueriaeret is, dat is naby zijn eynde.