Den Bibel, Inhoudende dat Oude ende Nieuwe Testament (Biestkensbijbel)

[p. 96v]

¶ Dat .vij. Capittel.

¶ Hier wort betoont dat Christus Priesterschap meerder is dan Melchisedechs, die een Coninc tot Salem was. Ende hoe Christus hemseluen gheoffert heeft.

1

⁺ DEse^* Melchisedech was een Coninc te Salem, een Priester Gods des Alderhoochsten, die Abraham te ghemoet ghinck, doen hy vanden Slach der Coninghen weder quam, ende segende hem:

+ A vers 1

* Gen. 14.d.18 Psal. 110.a.4

2

Den welcken ooc Abraham gaf de thiende aller goeden. Ten eersten, wort hy verduytst, een Coninck der gherechticheyt: Ende daer na is hy oock een Coninck Salem, dat is een Coninck des vredes,

3

Sonder Vader, sonder Moeder, sonder Gheslacht, ende en heeft noch aenbeghin der daghen, noch eynde des leuens, maer hy is gheleken den Sone Godts, ende blijft Priester in eewicheyt.

4

Maer siet aen, Hoe groot dat die is, dien oock Abraham de Patriarch, de thiende gheeft, vande verouerde Buete.

5

^† Tis waer, de kinderen Leui, daer sy dat Priesterdom ontfanghen, hebben sy een ghebot, den thienden vanden volcke, dat is van haren Broederen, te nemen na der Wet, hoe wel oock die seluen wt den Lenden Abrahe ghecomen zijn.

† Num. 18.d.21 Deut. 18.a.3. Iosu. 14.a.4 2.Pa. 31.d.19

6

⁺ Maer die, welcx gheslacht niet ghenoemt en wort onder haer^‡ die nam den thienden van Abraham, ende seghende den ghenen, die de Beloften hadde.

+ B vers 6

‡ Gen. 14.d.21

7

Nv ist sonder alle wederspreken also, dat, dat mindere, vanden beteren gheseghent wort.

8

Ende hier nemen den tienden, de sterflijcke menschen, maer daer betuycht hy, dat hy leue.

9

Ende dat ic also segghe: Leui, die den thienden neemt is oock verthient door Abraham:

10

Want hy was ymmer noch inde Lenden des Vaders, doen hem Melchisedech teghen ghinck.

11

^* Is nv de volcomenheyt door dat Leuijtsche Priesterdom gheschiet (want onder der seluen heeft dat volck de Wet ontfanghen) wat ist dan meer van nooden te segghen, datter een ander Priester opcomen soude nader ordeninghe Melchisedech, ende niet nader ordeninge Aarons?

* Rom. 3.b.20. Galat. 2.c.22.

12

Want waer dat Priesterdom verandert wort, daer moet oock de Wet verandert worden.

13

Want daer sulcx af geseyt is, die is van eenen anderen gheslacht, wt welcken noyt niemant den Altaer ghedient en heeft.

14

⁺ Want het is ymmers openbaer, dat van^* Iuda wtgegaen is onse Heere, tot welcken geslachte Moses niet ghesproken en heeft vanden Priesterdom.

+ C vers 14

* Esaie. 11.a.1. Matth. 1.a.3. Luce. 3.d.33.

15

Ende het is noch claerlijcker, ist dat nader wijse Melchisedech een ander Priester op coemt, die niet nader Wet des vleeschelijcken ghebots ghemaect en is, maer nader cracht des oneyndelijcken leuens.

16

Want hy betuycht:^† Ghi zijt een Priester eewichlijc, na de ordeninge Melchisedech:

† Psal. 110.a.4 Hebre. 5.a.9.

17

Want daermede wort de voorgaende Wet afghebracht (daerom dat sy te swac ende gheen nutte en was,

18

^* Want de Wet en conde niet volcomen maken) ende wort ingeuoert een beter hope, door welcke wy tot God genaken.

* Roma. 3.c.28. 8.a.3. Gala. 2.c.16.

19

Ende daer toe, dat veel is, niet sonder Eedt. Want gene zijn sonder Eedt Priester gheworden,

20

Maer dese met den Eede, door den genen, die tot hem spreect:^† De Heere heeft ghesworen, ende ten sal hem niet berouwen: Ghy zijt een Priester in eewicheyt, nae de ordeninge Melchisedech.

† Psal. 110.a.4

21

⁺ Also gansch veel eens beteren Testaments Wtrichter is Iesus gheworden.

+ D vers 21

22

Ende ghener zijn veel, die daer Priesteren werden, daerom dat haer de doot niet en laet blijuen.

23

Maer dese, daerom dat hy eewichlijck blijft, so heeft hy een onuerganckelijck Priesterdom:

24

Daerom can hi oock salich maken eewichlijck, die door hem tot Godt comen, ende leeft altoos^‡ ende bidt voor haer.

‡ Rom. 8.e.34. 1.Tim. 2.a.6. 1.Ioan. 2.a.1.

25

Want eenen sulcken hoogen Priester betaemde ons te hebben, die daer ware heylich, onschuldich, onbeuleckt, vanden Sondaren afghescheyden, ende hooger dan de Hemel is:

26

Den welcken dagelijcx niet van nooden en ware^* ghelijck als ghenen hooghen Priesteren, ten eersten voor zijn eyghen sonden offerhande te doen, daer na voor des volcx sonden. Want dat heeft hi eenmael gedaen, doen hy hemseluen offerde.

* Leuit. 9.b.7. 16.b.6.

27

^† Want de Wet set menschen tot hooghen Priesteren, die daer swackheyt hebben: Maer dit woort des Eedts, dat nae de Wet gheseyt is, set den Soon eewich ende volcomen.

† Hebre. 5.b.13.