Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel leert ons dat wy eenen hoogen Priester hebben Iesum Christum den Sone Godts, die inden Hemel geuaren is, ende dat hy een Priester is na de ordinantie Melchisedech.

[p. 69[96]r]

1

⁺ DEwijle wy^* dan eenen grooten hooghen Priester hebben, Iesum den Sone Godts, die ten Hemel geuaren is, so laet ons vast houden aender belijdinghe.

+ A vers 1

* Hebr. 6.c.20 8.a.1. 9.b.11.

2

^* Want wy en hebben niet eenen hooghen Priester, die niet en can medelijden hebben, met onser swacheyt^† maer die versocht is in allen, gelijc als wy, doch^‡ sonder sonde.

* Hebre. 2.c.18.

† Phili. 2.a.7.

‡ Esa. 53.c.13. Rom. 8.a.3.

3

Daerom laet ons henen toetreden met vrijmoedicheyt tot den genaden^* Stoel, op dat wy barmherticheyt ontfanghen, ende ghenade vinden op die tijt, wanneer ons hulpe van noode sal zijn.

* Rom. 3.c.25. 2.Cori. 5.c.21.

4

⁺ Want een yeghelijck hooghe Priester, die vanden menschen genomen wort die wort gheset voor de menschen tegen Godt^* op dat hy offere gauen ende offerhanden voor de sonden,

+ B vers 4

* Leuit. 9.b.7. Hebre. 7.d.26

5

Die daer can medelijden hebben, met dien, die onwetent zijn ende dwalen, nae dien hy oock selue ombeuanghen is met swackheyt:

6

Daerom moet hy oock^† ghelijck als voor dat volck, also oock voor hemseluen offeren voor de sonde.

† Leuit. 9.b.7. 16.b.6.

7

^‡ Ende niemant en neemt hemseluen eere aen, Maer die oock gheroepen sy van Gode^* ghelijc als die Aaron.

‡ 2.par. 26.c.18

* Exod. 28.a.2. Num. 17.a.5.b.8.

8

Alsoo en heeft Christus hemseluen oock niet inde eere gheset, dat hy hooge Priester werde, Maer die tot hem gheseyt heeft:^† Ghy zijt mijn Soon, heden heb ick v ghebaert.

† Psalm. 2.a.7. Acto. 13.d.33.

9

Als hy ooc op een ander plaetse spreect:^‡ Ghy zijt een Priester in eewicheyt, nae de ordeninge Melchisedech.

‡ Ps. 110.a.4.

10

^* Ende hy heeft inden dage zijns vleeschs, ghebeden ende smeecken met stercke roepinghe ende tranen, gheoffert, tot den ghenen, die hem vanden doot conde wthelpen, ende is oock verhoort, daerom dat hy God in eeren hielt.

* Luce. 23.e.45 Ioan. 17.a.1.

11

^† Ende hoe wel hy Gods Soon was soo heeft hy nochtans aen dat ghene, dat hy leedt, ghehoorsaemheyt gheleert.

† Philip. 2.a.6

12

⁺ Ende doen hy is voleyndet, is hy geworden allen, die hem ghehoorsaem zijn, een oorsake ter eewigher salicheyt,

+ C vers 12

13

Genoemt van Gode een hooghe Priester, nader ordeninghe^* Melchisedech.

* Hebr. 7.a.11.

14

Daer af hadden wy wel veel te spreken, maer het is swaer, dewijle dat ghy so onuerstandich zijt:

15

Ende ghy die alreede langhe Meesters behoordet te zijn behoeft wederom, datmen v de eerste letteren der godlijcker woorden leere, ende datmen v^* Melck geue, ende gheen stercke spijse.

* Esaie. 28.b.9. 1.Cor. 3.a.7. 1.Pet. 2.a.2.

16

Want wienmen noch Melck moet geuen, die is onbesocht inden woorde der gherechticheyt: Want hy is een Ionck kint.

17

Maer den volcomen behoort stercke spijse, die door ghewoonheyt hebben gheoeffende sinnen, tot onderscheyde des goets ende des quaets.